ஜனாதிபதி மைத்திரி – கோத்தா கொலை சதி விவகாரம்: பொலிஸ்மா அதிபர் பூஜித்தின் குரல் மாதிரிகளும் பெறப்பட்டன
ஜனாதிபதி மைத்திரிபால சிறிசேன, முன்னாள் பாதுகாப்பு செயலர் கோத்தாபய ராஜபக் ஷ, சி.சி.டி.யின் உதவி பொலிஸ் அத்தியட்சகர் பிரசன்ன அல்விஸ் ஆகியோரை கொலை செய்ய சதி செய்ததாகக் கூறப்படும் விவகாரம் தொடர்பிலான விசாரணைகளின் ஓர் அங்கமாக பொலிஸ்மா அதிபர் பூஜித் ஜயசுந்தரவிடம் நேற்று அரச இரசாயன பகுப்பாய்வுத் திணைக்களத்தினால் குரல் மாதிரி பெற்றுக்கொள்ளப்பட்டது. கோட்டை நீதிவான் ரங்க திஸாநாயக்கவிடம் கடந்த வாரம் சி.ஐ.டி. பெற்றுக்கொண்ட விஷேட உத்தரவொன்றுக்கமைவாக இவ்வாறு நேற்று இந்தக் குரல் மாதிரி பொலிஸ்மா அதிபரிடம் பெற்றுக்கொள்ளப்பட்டதாகவும், நாமல் குமாரவின் தொலைபேசியிலிருந்து கண்டுபிடிக்கப்பட்ட சில குரல் பதிவுகள் தொடர்பிலான குரல் சோதனையின் நிமித்தம் இவ்வாறு குரல் மாதிரி பதிவு செய்யப்பட்டுள்ளதாகவும் அரச இரசாயன பகுப்பாய்வாளர் திணைக்கள பணிப்பாளர் நாயகம் ஆரியானந்த வெலிஅங்க தெரிவித்தார். நேற்று குரல் மாதிரியினை வழங்குவதற்காக அரச இரசாயன பகுப்பாய்வுத் திணைக்களத்துக்கு சென்ற பொலிஸ்மா அதிபரிடம், அதன் டிஜிட்டல் பகுப்பாய்வு ஆய்வு கூடத்தில் வைத்து 30 நிமிடங்களுக்கும் அதிக நேரம் இந்தக் குரல் மாதிரிகளை பெறும் நடவடிக்கைகள் இடம்பெற்றுள்ளன.
ஜனாதிபதி மைத்திரிபால சிறிசேன, முன்னாள் பாதுகாப்பு செயலர் கோத்தாபய ராஜபக் ஷ, சி.சி.டி.யின் உதவிப் பொலிஸ் அத்தியட்சகர் பிரசன்ன அல்விஸ் ஆகியோரை கொலைசெய்ய சதி செய்ததாகக் கூறப்படும் விவகாரம் தொடர்பிலான விசாரணைகளின் ஓர் அங்கமாக சி.ஐ.டி., பொலிஸ்மா அதிபர் பூஜித் ஜயசுந்தரவிடம் கடந்த 2018 நவம்பர் 25 ஆம் திகதியும் அதன் பின்னரும் இரு தடவைகள் விஷேட விசாரணைகளை நடாத்தியது. இதன்போது பொலிஸ்மா அதிபருக்கும் கொலைசதி விவகார முறைப்பாட்டாளராகக் கருதப்படும் ஊழல் தடுப்பு படையணியின் நடவடிக்கை பணிப்பாளர் நாமல் குமாரவுக்கும் இடையிலான தொடர்புகள் குறித்து விரிவாக விசாரிக்கப்பட்டிருந்தன.
இந்நிலையில் ஏற்கனவே, இந்த சதி விவகாரத்தில் சந்தேக நபராகக் கைது செய்யப்பட்டு விளக்கமறியலிலுள்ள பயங்கரவாத புலனாய்வுப் பிரிவின் முன்னாள் பிரதிப் பொலிஸ்மா அதிபர் நாலக டி சில்வா, முறைப்பாட்டாளரான நாமல் குமார ஆகியோர் குரல் சோதனைகளுக்கு உட்படுத்தப்பட்டிருந்தனர். அப்போது முறைப்பாட்டின்போது கையளிக்கப்பட்ட 124 குரல் பதிவுகளில் 123 இல் உள்ள குரல்கள் அவ்விருவரினுடையது என்பதை அரச இரசாயன பகுப்பாய்வாளர்கள் உறுதி செய்தனர். இந்நிலையில் பின்னர் சி.ஐ.டி.யிடம் கையளிக்கப்பட்ட, ஹொங்கொங் நாட்டின் டேட்டா எக்ஸ்பேர்ட் எனும் நிறுவன ஆய்வுகூடத்தில் ஆய்வுக்குட்படுத்தப்பட்ட நாமல் குமாரவின் தொலைபேசியிலிருந்து மீள உற்பத்தி செய்யப்பட்ட அழிக்கப்பட்டிருந்த தகவல்களில் அடங்கிய ஒரு மணி நேர உரையாடல்கள், விசாரணைகளை கையாளும் உதவி பொலிஸ் அத்தியட்சகர் இந்திக லொக்குஹெட்டியினால் நீதிவானுக்கு சமர்ப்பிக்கப்பட்ட நிலையில், அதிலுள்ள குரல்கள் யாரினுடையது என்பதை உறுதிசெய்ய அரச இரசாயன பகுப்பாய்வு நடவடிக்கைகளை முன்னெடுக்க அனுமதி பெறப்பட்டிருந்தது.
நாமல் குமாரவின் குறித்த தொலைபேசியிலிருந்து மீட்கப்பட்ட 39 ஜி.பி. தரவுகளில் 427 உரையாடல்கள் இருந்தன. 31 செயலிழந்த உரையாடல்கள், 4323 புகைப்படங்கள், 802 செயலிழந்த புகைப்படங்கள், 26 வீடியோக்கள், 656 செயலிழந்த வீடியோக்கள், 684 தொலைபேசி ஸ்டிக்கர்ஸ்கள், 134 பாடல்கள், 78 தொலைபேசி அழைப்பு நாதங்களும் அதில் இருந்தன. குறிப்பாக, உரையாடல்களில் முக்கியமான உரையாடல்கள் மூன்று கண்டுபிடிக்கப்பட்டன. ஒன்று 21 நிமிடங்களும் 06 செக்கன்களும் நீளமானது. மற்றையது 32 நிமிடங்களும் 49 செக்கன்களும் நீளமானது. மூன்றாவது 7 நிமிடங்களும் 40 செக்கன்களும் நீளமானது. இவை மூன்றையும் தனித்தனியாக இறுவட்டுக்களில் பதிவு செய்து மன்றில் ஒப்படைத்த சி.ஐ.டி. அதிலுள்ள குரல்களை அடையாளம் காண சிறப்பு நடவடிக்கைகளை முன்னெடுத்தது.
அதன்படி ஏற்கனவே முறைப்பாட்டாளரான நாமல் குமார, சந்தேக நபர்களில் ஒருவரான முன்னாள் பிரதிப் பொலிஸ்மா அதிபர் நாலக சில்வா ஆகியோரின் குரல் மாதிரிகள் அரச இரசாயன பகுப்பாய்வுத் திணைக்களத்திலுள்ள நிலையில், புதிதாக பொலிஸ்மா அதிபரின் குரல் மாதிரிகள் மட்டும் ஆய்வுக்குத் தேவைப்பட்டன. ஏனெனில், ஹொங்கொங்கில் மீட்கப்பட்ட உரையாடல்களில் பொலிஸ்மா அதிபருடன் நாமல் குமார முன்னெடுத்ததாகக் கூறும் உரையாடல்களும் அடங்கும்.
எனவே அதனை உறுதி செய்துகொள்வதற்காகவே பொலிஸ்மா அதிபரின் குரல் மாதிரிகள் பெறப்பட்டுள்ளன. நேற்று முற்பகல் 10.00 மனிக்கு அரச இரசாயன பகுப்பாய்வாளர் திணைக்களத்தில் பிரசன்னமான பொலிஸ்மா அதிபர் 10.45 வரை அங்கு தங்கியிருந்தார். பொலிஸ்மா அதிபர் அங்கு பிரசன்னமாகும்போது அவருடன் விசாரணை அதிகாரிகளான உதவிப் பொலிஸ் அத்தியட்சகர் இந்திக லொக்குஹெட்டி, பிரதான பொலிஸ் பரிசோதகர் ரஞ்ஜித் முனசிங்க ஆகியோரும் உடன் அங்கு சென்றிருந்தனர். இதனைவிட மேலும் பல பிரதேசங்களுக்குப் பொறுப்பான உயர் பொலிஸ் அதிகாரிகளும் அங்கு பிரசன்னமாகியிருந்தனர்.
பொலிஸ்மா அதிபரிடம் மூவர் கொண்ட அரச இரசாயன பகுப்பாய்வுப் பிரிவின் டிஜிட்டல் பிரிவு அதிகாரிகள் குரல் மாதிரிகளைப் பெற்றுள்ளதுடன், அவை தற்போது ஆய்வுக்கு உட்படுத்தப்பட்டுள்ளன. ஆய்வின் முடிவில் குரல் பதிவுகளில் உள்ளது பொலிஸ்மா அதிபரின் குரலா என்பது உறுதியாகக் கண்டறியப்பட்டு அதன் முடிவு நீதிமன்றுக்கு அறிவிக்கப்படவுள்ளது.
-Vidivelli