கடந்தகால தோல்விகளை வெற்றிகளாக மாற்றி வருங்காலத்தில் அர்ப்பணிப்புடன் செயற்படுவேன்
ஜனாதிபதியாக பதவியேற்று நான்கு வருட நிறைவில் மைத்திரி
இற்றைக்கு நான்கு வருடங்களுக்கு முன்னர் தன்னை இந்த நாட்டின் அரச தலைவராகத் தேர்ந்தெடுத்த மக்கள், தன்மீது கொண்ட எதிர்பார்ப்புக்களை நிறைவேற்றுவதற்காக முன்னெடுக்கப்பட்ட பல வேலைத்திட்டங்கள் வெற்றியடைந்துள்ளதைப் போலவே சில வேலைத்திட்டங்கள் தோல்வியடைந்த சந்தர்ப்பங்களும் காணப்படுகின்றன.
அதனூடாகப் பெற்றுக்கொண்ட வெற்றிகளை மேலும் உறுதிப்படுத்த நடவடிக்கை எடுப்பதை போன்றே தோல்விகளை வெற்றியை நோக்கி வழிநடத்த வருங்காலத்தில் அர்ப்பணிப்புடன் செயற்படுவதாக ஜனாதிபதி மைத்திரிபால சிறிசேன தெரிவித்தார். லக்கல, புதிய பசுமை நகரத்தை நேற்றுமுன்தினம் மக்களிடம் கையளித்ததன் பின்னர் இடம்பெற்ற மக்கள் சந்திப்பின்போதே ஜனாதிபதி மேற்கண்டவாறு தெரிவித்தார்.
இதன்போது அவர் மேலும் தெரிவிக்கையில்,
மக்களின் ஜனநாயகம், சுதந்திரம் ஆகியவற்றை உறுதிசெய்து சகல இன மக்களும் அச்சமும் சந்தேகமுமின்றி வாழக்கூடிய சூழலைக் கட்டியெழுப்பவும் ஊடக சுதந்திரம், நீதிமன்றத்தின் சுயாதீனத் தன்மை, பக்கச்சார்பற்ற அரச சேவை ஆகியவற்றை கட்டியெழுப்பவும் தேசிய பொருளாதாரத்தை பலப்படுத்தவும் கடந்த நான்கு வருட காலத்தில் பல முக்கியமான தீர்மானங்கள் மேற்கொள்ளப்பட்டன.
நாட்டைக் கட்டியெழுப்புவதற்கு முக்கிய சவாலாகக் காணப்படும் இலஞ்சம், ஊழல், மோசடி ஆகியவற்றை இல்லாதொழிப்பதற்கு கடந்த நான்கு வருடகாலத்தில் சிறப்பான அர்ப்பணிப்பை செய்ததோடு, அதனூடாகப் பெற்றுக்கொண்ட அனுபவங்களை ஆசிர்வாதமாக கருதி ஊழல், மோசடியை இல்லாதொழிப்பதற்கான வலுவான வேலைத்திட்டத்துடன் கைகோர்த்துக்கொள்ள அனைத்து மக்களுக்கும் அழைப்பு விடுக்கிறேன்.
கட்சி வேறுபாடுகளுடன் அதிகாரத்தை பெற்றுக்கொள்வதற்காக தனிப்பட்ட அரசியல் நிகழ்ச்சி நிரலுக்கமைய செயற்படுபவர்களன்றி பொதுவான நிகழ்ச்சி நிரலுக்கமைய நாட்டின் நலன்கருதி சிந்தித்து செயலாற்றுபவர்களே தற்போது நாட்டுக்கு அவசியமாகும். புதிய எண்ணங்களோடு, புதிதாக திட்டமிட்டு, புதிய பயணமொன்றை மேற்கொள்ள ஒன்றிணைய வேண்டும்.
ரஜரட்ட மக்களின் நீர் பிரச்சினைக்குத் தீர்வு காணுமுகமாக மொரகஹகந்த – களுகங்கை பாரிய நீர்ப்பாசனத் திட்டம் நடைமுறைப்படுத்தப்பட்டதைப் போன்று வடக்கு மக்களின் நீர்ப் பிரச்சினைக்கும் உரிய தீர்வொன்றினை பெற்றுக்கொடுக்கும் தினத்திலேயே தன்னால் உண்மையான மகிழ்ச்சியை உணர முடியும்.
சுதந்திரம், ஜனநாயகம், பொருளாதார சுபீட்சம் மற்றும் மக்கள் அச்சமும் சந்தேகமுமின்றி வாழக்கூடிய சூழலைக் கட்டியெழுப்புவதற்கான விரிவான செயற்பணிகளை நிறைவேற்றும் அதேவேளை, இனங்களுக்கிடையே சமாதானத்தையும் நல்லிணக்கத்தையும் கட்டியெழுப்புவதற்கு தேவையான சகல நடவடிக்கைகளும் முன்னெடுக்கப்படும் என்றும் அவர் தெரிவித்தார்.
பொதுமக்களின் எதிர்பார்ப்புக்களை நிறைவேற்றி, அமைதியானதொரு தேசத்தையும் பேண்தகு அபிவிருத்தியையும் கட்டியெழுப்பும் நோக்குடன் 2015 ஜனவரி 08ஆம் திகதி இந்த நாட்டின் 62 இலட்சத்துக்கும் அதிகமான மக்களின் வாக்குகளின் மூலம் ஜனாதிபதி பதவிக்கு தெரிவுசெய்யப்பட்ட ஜனாதிபதி மைத்ரிபால சிறிசேன பதவிக்கு தெரிவுசெய்யப்பட்டு நேற்று முன்தினத்துடன் நான்கு ஆண்டுகள் நிறைவடைந்தன.
அதனை முன்னிட்டு ஜனாதிபதிக்கு ஆசிவேண்டி பல்வேறு இடங்களில் சமய கிரியைகள் இடம்பெற்றதுடன், நேற்று முன்தினம் இரவு ஜனாதிபதி அலுவலகத்தில் பிரித் பாராயணமும் இடம்பெற்றது.
அத்துடன் மகா சங்கத்தினருக்கான அன்னதான நிகழ்வொன்றும் இடம்பெற்றது.
இதேவேளை, ‘மைத்திரி ஆட்சி – பேண்தகு யுகம்’ பொருளாதார, கலாசார மறுமலர்ச்சியின் ஐந்தாண்டு பிரவேசத்தை முன்னிட்டு மொரகஹகந்த – களுகங்கை திட்டத்தினால் நீரில் மூழ்கிய லக்கல நகரத்திற்குப் பதிலாக நிர்மாணிக்கப்பட்டுள்ள லக்கல புதிய பசுமை நகரத்தை மக்களிடம் கையளிக்கும் நிகழ்வில் ஜனாதிபதி கலந்துகொண்டார்.
மொரகஹகந்த நீர்த்தேக்கத்துடன் தொடர்புபடும் அடுத்த பாரிய நீர்த்தேக்கமான களுகங்கை நீர்த்தேக்கத்தையும் ஜனாதிபதி மக்களிடம் கையளித்தார்.
மொரகஹகந்த – களுகங்கை திட்டத்தின் மூலம் இடம்பெயர்ந்த 3.000 குடும்பங்களின் தேவைகளை நிறைவேற்றி களுகங்கை நீர்த்தேக்கத்தினால் நீரில் மூழ்கிய லக்கல நகரத்திற்குப் பதிலாக களுகங்கை நீர்த்தேக்கத் திட்டத்திற்கு அண்மித்ததாக புதிய லக்கல நகரம் நிர்மாணிக்கப்பட்டுள்ளது. எதிர்கால தேவைகளை கருத்திற்கொண்டு புதிய நகர எண்ணக்கருவான பூங்கா நகர எண்ணக்கருவிற்கு அமைய இந்த நகரம் திட்டமிடப்பட்டுள்ளதுடன் இதற்காக மொத்தமாக 4500 மில்லியன் ரூபா முதலீடு செய்யப்பட்டுள்ளது.
லக்கல புதிய நகரத்தில் 26 அரச நிறுவனங்களுக்கான கட்டிடங்கள் அமைக்கப்பட்டுள்ளதுடன், மக்களுக்கு சேவையை வழங்கும் அந்த அனைத்து நிறுவனங்களும் ஒன்றுடனொன்று தொடர்புபடக்கூடிய வகையில் திட்டமிடப்பட்டுள்ளமை குறிப்பிடத்தக்கதாகும். இந்த வகையில் நிர்மாணிக்கப்பட்டுள்ள லக்கல புதிய பிரதேச வைத்தியசாலையை மக்களிடம் கையளிக்கும் நிகழ்வும் பல்லேகம மத்திய மகா வித்தியாலயத்தின் நிர்வாக கட்டிடத்தை மாணவர்களிடம் கையளிக்கும் நிகழ்வும் ஜனாதிபதியினால் ஆரம்பிக்கப்பட்டன.
மேலும் புதிய நகரத்தில் நிர்மாணிக்கப்பட்டுள்ள புதிய வீடுகள், பாடசாலைகள், வைத்தியசாலைகள், பிரதேச செயலாளர் அலுவலகம், பொலிஸ் நிலையம், விளையாட்டு மைதானம், சந்தை, பஸ் தரிப்பிடம், தபால் அலுவலகம், சுகாதார மத்திய நிலையம், நெடுஞ்சாலைகள் முறைமை உள்ளிட்ட அரச சேவைகள் மற்றும் மக்கள் உட்கட்டமைப்பு வசதிகளை மக்களிடம் கையளிக்கும் நிகழ்வுகள் அமைச்சர்களினால் ஆரம்பித்து வைக்கப்பட்டன.
அமைச்சர்களான சஜித் பிரேமதாஸ, பி.ஹரிஸன், சந்திராணி பண்டார, எம்.எச்.ஏ.ஹலீம், ராஜித சேனாரத்ன மற்றும் இராஜாங்க அமைச்சர்கள், பிரதியமைச்சர்கள் மற்றும் ஆளும் கட்சி, எதிர்க்கட்சி பாராளுமன்ற உறுப்பினர்கள் பலரும் இந்த நிகழ்வில் கலந்துகொண்டனர்.
-Vidivelli