சட்டவிரோதமாகக் கடத்தப்பட்ட எகிப்தின் புராதனகால கலைப்பொருள் ஒன்று லண்டன் ஏல விற்பனை மண்டபமொன்றில் கண்டுபிடிக்கப்பட்டதாக எகிப்திய அதிகாரிகள் தெரிவித்தனர்.
18 ஆவது வம்சத்தைச் சேர்ந்த அமேன்ஹோடெப் ஐ மன்னனின் கால உருவ எழுத்துக்களைக் கொண்ட கட்டுமானத்தில் ஒரு பகுதியான இத்தொல்பொருள் சர்வதேச ஏல விற்பனை இணையத்தளங்களில் தேடியதையடுத்து கண்டுபிடிக்கப்பட்டது என எகிப்தின் புராதன பொருட்களுக்கான அமைச்சு செவ்வாய்க்கிழமையன்று தெரிவித்தது.
கடந்த செப்டம்பர் மாதம் புராதனகால கலைப்பொருள் லண்டனிலுள்ள எகிப்திய தூதரகத்திற்கு கிடைக்கப்பெற்றது.
தெற்கு எகிப்திய நகரான லக்சேரிலுள்ள புராதனகால கர்னாக் கோயிலின் திறந்த நூதனசாலையில் காட்சிப்படுத்தப்பட்டிருந்த குறித்த பொருள் எவ்வாறு நாட்டுக்கு வெளியே கொண்டு செல்லப்பட்டது என்பது தெரியவரவில்லை.
எகிப்தின் வெளிநாட்டமைச்சு, லண்டனிலுள்ள எகிப்திய தூதரகம் மற்றும் பிரித்தானிய அதிகாரிகளுடன் எகிப்தின் புராதன பொருட்களுக்கான அமைச்சு இணைந்து கட்டுமானத்தில் ஒருபகுதியினை கண்டுபிடிக்கும் பணியில் ஈடுபட்டது என அமைச்சின் பணிப்பாளர் நாயகம் ஷாபான் அப்தெல் கவாட் தெரிவித்தார்.
2011 ஆம் ஆண்டு அமைதியின்மைக்குப் பின்னரான காலப் பகுதியில் எகிப்திய கலைப் பொருட்கள் திருடப்படும் சம்பவங்கள் அதிகரித்தன.
-Vidivelli