எல்லை நிர்ணய செயற்பாடுகளில் முரண்பாடுகள் இருப்பதன் காரணத்தினால் பழைய முறையில் தேர்தலை நடத்த கட்சித் தலைவர்கள் கூட்டத்தில் தீர்மானம் எடுக்கப்பட்டுள்ளது. ஆகவே எந்தவொரு தேர்தலுக்கு முகம்கொடுப்பதற்கும் நாங்கள் தயாராகவே இருக்கின்றோம் என்று சபை முதல்வரும் அமைச்சருமான லக்ஷ்மன் கிரியெல்ல தெரிவித்தார். மாகாண சபை தேர்தலுக்கான எல்லை நிர்ணய அறிக்கை தொடர்பாக பிரதமர் தலைமையில் அமைக்கப்பட்டுள்ள மீளாய்வுக் குழுவின் அறிக்கையின் தாமதம் தொடர்பாக எதிர்க்கட்சி பாராளுமன்ற உறுப்பினரான தினேஷ் குணவர்தன நேற்று புதன்கிழமை பாராளுமன்றத்தில் கேள்வி எழுப்பினார். இதனைத் தொடர்ந்து சபையில் எழுந்த வாத விவாதங்களின் போது எதிர்க்கட்சியினர், அரசாங்கம் தேர்தலுக்கு அஞ்சுவதாக கருத்துக்களை முன்வைத்த நிலையில் அது தொடர்பாக பதிலளித்த போதே சபை முதல்வர் லக்ஷ்மன் கிரியெல்ல இவ்வாறு தெரிவித்தார்.
அவர் மேலும் தெரிவிக்கையில்,
எந்த தேர்தலுக்கும் நாங்கள் அஞ்சவில்லை, நாங்கள் தேர்தலுக்கு எதிர்ப்புமில்லை. எந்த தேர்தலாக இருந்தாலும் அதற்கு தயாராகவே இருக்கின்றோம். ஜனாதிபதி தேர்தலுக்கும் தயாராகவே இருக்கின்றோம். இதேவேளை, மாகாண சபை தேர்தலை பழைய முறைமையில் நடத்துவதற்கு சகல கட்சிகளும் விருப்பம் தெரிவித்துள்ளன.
கட்சித் தலைவர்கள் கூட்டத்தில் நிமல் சிறிபாலடி சில்வா இதனை முன்வைத்தபோது அனைவரும் ஏற்றுக் கொண்டனர். நாங்களும் அதற்கு விருப்பம் தெரிவிக்கின்றோம் என தெரிவித்தார்.
-Vidivelli