வடக்கு உட்பட மூன்று மாகாணங்களுக்கான புதிய ஆளுநர்கள் ஜனாதிபதியால் நேற்று நியமிக்கப்பட்டுள்ளனர். இவ்வாறு நியமிக்கப்பட்ட வடக்கு, சம்பரகமுவ மற்றும் ஊவா மாகாண ஆளுநர்கள் நேற்று காலை ஜனாதிபதி செயலகத்தில் ஜனாதிபதிக்கு முன்னால் சத்தியப்பிரமாணம் செய்துகொண்டனர். அதன் பிரகாரம் வடமாகாண ஆளுநராக இருந்த ரெஜிநோல்ட் குரேக்கு பதிலாக கலாநிதி சுரேன் ராகவன் நியமிக்கப்பட்டுள்ளதுடன் சப்ரகமுவ மாகாண ஆளுநராக இருந்த நிலுக்கா ஏக்கநாயக்கவுக்கு பதிலாக கலாநிதி தம்ம திசாநாயக்கவும் ஊவா மாகாண ஆளுநராக இருந்த ஆரிய பீ. ரெகவவுக்கு பதிலாக கெபே அமைப்பின் நிறைவேற்று பணிப்பாளர் ரஞ்சித் கீர்த்தி தென்னகோனும் நியமிக்கப்பட்டுள்ளனர்.
அத்துடன் கடந்த வெள்ளிக்கிழமை மேல், கிழக்கு, மத்திய, வடமத்திய மற்றும் வடமேல் மாகாணங்களுக்கு முறையே புதிய ஆளுநர்களாக அசாத் சாலி, எம்.எல்.ஏ.எம். ஹிஸ்புல்லாஹ், சட்டத்தரணி மைத்திரி குணரத்ன, சரத் ஏக்கநாயக்க மற்றும் பேசல ஜயரத்ன ஆகியோர் ஜனாதிபதியால் நியமிக்கப்பட்டிருந்தனர்.
இதேவேளை, ஒன்பது மாகாணங்களில் இதுவரை எட்டு மாகாணங்களுக்கான புதிய ஆளுநர்கள் நியமிக்கப்படுள்ளபோதும் தென் மாகாணத்துக்கான ஆளுநர் இதுவரை நியமிக்கப்படவில்லை. ஏற்கனவே தென் மாகாண ஆளுநராக ஐக்கிய மக்கள் சுதந்திர முன்னணி பாராளுமன்ற உறுப்பினர் டிலான் பெரேராவின் தந்தை மார்ஷல் பெரேரா பதவி வகித்தமை குறிப்பிடத்தக்கது.
-Vidivelli