(எப்.அய்னா)
உயிர்த்த ஞாயிறு தினம் இடம்பெற்ற தாக்குதல்கள் தொடர்பில், முன்னாள் இராஜாங்க அமைச்சர் பிள்ளையான் எனும் சிவனேசதுரை சந்திரகாந்தன் சி.ஐ.டி.யின் சிறப்புக் குழுவினரால் தீவிர விசாரணைக்கு உட்படுத்தப்பட்டார்.
நேற்று (20) சி.ஐ.டி. யின் விஷேட விசாரணைப் பிரிவுக்கு அழைக்கப்பட்ட அவரிடம் முற்பகல் 9.30 மணி முதல் சுமார் 5 மணி நேரம் தீவிர விசாரணை நடாத்தப்பட்டு வாக்கு மூலம் ஒன்றும் பதிவு செய்யப்பட்டது. இதனையடுத்து குறித்த வாக்கு மூலத்தை ஆராய்ந்த பின்னர் மீள விசாரணைக்கு அழைப்பதாக கூறி அவர் விடுவிக்கப்பட்டுள்ளார்.
உயிர்த்த ஞாயிறு தினம் இடம்பெற்ற தாக்குதல்களுடன், முன்னாள் இராணுவ உளவுத்துறை பிரதானி துவான் சுரேஷ் சலேவுக்கு தொடர்பிருப்பதாக, செனல் 4 தொலைக்காட்சி நிகழ்ச்சியொன்றில் வெளிப்படுத்தப்பட்ட தகவல்களை மையப்படுத்தி விசாரணைகள் ஆரம்பிக்கப்பட்டுள்ளன.
இது தொடர்பில் கோட்டை நீதிவான் நீதிமன்றுக்கு கடந்த 11 ஆம் திகதி அறிக்கையிட்ட முதல் தகவல் அறிக்கையை சமர்ப்பித்த சி.ஐ.டி., 12 ஆம் திகதி அவ்விசாரணைகளுக்காக முன்னாள் இராஜாங்க அமைச்சர் சிவனேசதுரை சந்திரகாந்தன் எனும் பிள்ளையானை அழைத்தது.
எனினும் தன்னால் அன்றைய தினம் சி.ஐ.டி.யில் ஆஜராக முடியாது என எழுத்து மூலம் அறிவித்த பிள்ளையான் நவம்பர் 18 முதல் 25 ஆம் திகதிக்குள் ஒரு திகதியை பரிந்துரைக்குமாறும் அப்போது அத்திகதியில் விசாரணைகளுக்கு சமூகமளிப்பதாகவும் தெரிவித்திருந்தார். இதனையடுத்தே அவர் நேற்று ( 20) இவ்வாறு விசாரணைக்கு அழைக்கப்பட்டார்.
உயிர்த்த ஞாயிறு தினம் இடம்பெற்ற தாக்குதல்களுடன், முன்னாள் இராணுவ உளவுத்துறை பிரதானி துவான் சுரேஷ் சலேவுக்கு தொடர்பிருப்பதாக, செனல் 4 தொலைக்காட்சி நிகழ்ச்சியொன்றில் வெளிப்படுத்தப்பட்ட தகவல்களை மையப்படுத்தி விசாரணைகளை முன்னெடுத்து உண்மைகளை வெளிப்படுத்துமாறு சி.எஸ்.ஆர். நிறுவனத்தின் நிறைவேற்று பணிப்பாளர் அருட் தந்தை ரொஹான் சில்வா முறைப்பாட்டை முன் வைத்திருந்தார்.
அவரிடம் வாக்கு மூலத்தை ஏற்கனவே பதிவு செய்த சி.ஐ.டி. சிறப்புக் குழு, நீதிமன்றுக்கு குறித்த முறைப்பாடு தொடர்பில் விசாரணைகளை ஆரம்பித்ததாக நீதிமன்றுக்கு அறிவித்தது. அதே நேரம் செனல் 4 தொலைக்காட்சி நிகழ்ச்சில் சலேயின் தொடர்பு குறித்து வெளிப்படுத்திய அசாத் மெளலானா, இலங்கையில் இருந்த போது சிவனேசதுரை சந்த்ரகாந்தனின் தனிப்பட்ட செயலாளராக கடமையாற்றியிருந்தார். அத்துடன் அவ்வெளிப்படுத்தலில் பிள்ளையான் எனும் சிவனேசதுரை சந்திரகாந்தனின் பெயரும் வெளிப்படுத்தப்பட்ட நிலையிலேயே, அவரை விசாரிக்க சி.ஐ.டி. தீர்மானித்தது.
பொது மக்கள் பாதுகாப்பு அமைச்சின் செயலருக்கு கிடைத்த முறைப்பாடு பதில் பொலிஸ் மா அதிபர் பிரியந்த வீரசூரியவுக்கு அனுப்பப்பட்ட நிலையில், அவரின் உத்தரவில் இது குறித்த விசாரணைகள், குற்றப் புலனாய்வுத் திணைக்ளத்தின் பிரதிப் பொலிஸ் மா அதிபர் பியசேன அம்பாவிலவின் நேரடி கட்டுப்பாட்டில் ஆரம்பிக்கப்பட்டுள்ளமை குறிப்பிடத்தக்கது.- Vidivelli