எப்.அய்னா
பொத்துவில், அறுகம்பே பகுதி உள்ளிட்ட இஸ்ரேலியர்கள் அதிகம் நடமாடும் பகுதிகளில் அவர்களையும் அவர்கள் சார் ஸ்தலங்களையும் இலக்கு வைத்து ஒருங்கமைக்கப்படாத தாக்குதல்கள் நடாத்த திட்டமிட்டதாக கூறப்படும் சம்பவத்தின் பிரதான சூத்திரதாரி ஈரானியர் ஒருவர் என தகவல்கள் வெளிப்பட்டுள்ளன.
51 வயதான பர்ஹாத் ஷகேரி என்பவரே இந்த சம்பவத்தின் பின்னணியில் இருப்பவர் என, அவர் உள்ளிட்ட மூவருக்கு எதிராக அமெரிக்காவின் சட்ட திணைக்களம் தொடுத்துள்ள வழக்கை மையப்படுத்தி அத்திணைக்களம் வெளியிட்டுள்ள அறிக்கை ஊடாக இந்த விடயம் வெளிப்பட்டுள்ளது.
அமெரிக்காவின் ஜனாதிபதி டொனால்ட் ட்ரம்பை கொலை செய்ய சதித் திட்டம் தீட்டியமை உள்ளிட்ட குற்றச்சாட்டின் கீழ், எப்.பி.ஐ. இனுடைய நிவ்யோர்க் பிராந்திய கள அலுவலகம் ஊடாக முன்னெடுக்கப்படும் விசாரணைகளில், இரு சந்தேக நபர்கள் கைது செய்யப்பட்டுள்ளனர்.
அவர்களை விசாரித்துள்ள எப்.பி.ஐ. அதிகாரிகள், அவ்விருவருக்கு மேலதிகமாக இதுவரை கைது செய்யப்படாத ஷகேரி எனும் ஈரானியரையும் சேர்த்து நிவ்யோர்க் தெற்கு மாவட்ட நீதிமன்றில் அமெரிக்க சட்ட மா அதிபர் மெர்ரிக் பி. கார்லன்ட் (Merrick B. Garland.) ஊடாக வழக்குத் தொடுத்துள்ளார். இது தொடர்பிலான அறிவித்தலை அமெரிக்காவின் சட்டத் திணைக்களம் கடந்த 8 ஆம் திகதி வெளியிட்ட நிலையிலேயே, அறுகம்பே விடயத்தில், அமரிக்க ஜனாதிபதியை கொலை செய்ய சதி செய்த பிரதான சந்தேக நபரான ஷகேரி தொடர்புபட்டுள்ளமை வெளிப்படுத்தப்பட்டுள்ளது.
அமெரிக்க ஜனாதிபதி உள்ளிட்ட அமெரிக்க பிரஜைகள் பலரை கொலை செய்ய ஷகேரி ஊடாக சதி செய்யப்பட்டுள்ளதாக எப்.பி.ஐ. பணிப்பாளர் கிறிஸ்தோபர் வ்ரே தெரிவித்ததுடன், அமெரிக்காவின் தேசிய பாதுகாப்புக்கு அச்சுறுத்தலான, நேரடி தொடர்புபட்ட ஈரானியர் உள்ளிட்டோருக்கு எதிராக வழக்குத் தொடுத்ததாக அமெரிக்க சட்ட மா அதிபர் மெர்ரிக் பி. கார்லன்ட் தெரிவித்துள்ளார்.
அமெரிக்க ஜனாதிபதி டொனால்ட் ட்ரம்ப் கொலை சதி தொடர்பில் நியூயார்க்கின் புரூக்ளின் பகுதியில் வைத்து கார்லிஸ்லே ரிவேரா என்ற 49 வயது நபரும் நியூயார்க்கில் உள்ள ஸ்டேட்டன் தீவில் வைத்து 36 வயதான ஜொனன் லோதோல்ட எனும் நபரும் கைது செய்யப்பட்டுள்ளனர். எப்.பி.ஐ. இன் நிவ்யோர்க் கள அலுவலக அதிகாரிகள் முன்னெடுக்கும் இந்த விசாரணைகளுக்கு சுங்கம் மற்றும் எல்லை பாதுகாப்பு விசாரணை அலுவலகமும், போதைப் பொருள் தடுப்பு பிராந்திய அலுவலகமும் ஒத்துழைப்பு வழங்கியுள்ளது.
இந்த நிலையிலேயே கைதான சந்தேக நபர்களிடம் முன்னெடுக்கப்பட்ட விசாரணைகளில் 51 வயதான ஷகேரி தொடர்பில் தகவல் வெளிப்பட்டதாக அமெரிக்காவின் சட்ட அமுலாக்கல் பிரிவு தெரிவித்துள்ளது.
அது தொடர்பிலான மேலதிக விசாரணைகளிலேயே மேற்படி பர்ஹாத் ஷகேரி இலங்கையின் சுற்றுலா தலங்களில் இஸ்ரேலியர்களை இலக்கு வைத்து தாக்குதல் நடாத்த முன்னெடுக்கப்பட்டதாக கூறப்பட்ட சதியுடனும் தொடர்புபட்டுள்ளமை வெளிப்படுத்தப்பட்டுள்ளதாக அமெரிக்க நீதித்துறை திணைக்கலம் தெரிவிக்கின்றது.
இதே நேரம் அமெரிக்க ஜனாதிபதி தேர்தலில் டிரம்ப் தோல்வியடைவார் என்று சதித் திட்டம் தீட்டியோர் நம்பியுள்ளதாகவும், தேர்தலுக்குப் பிறகு அவரை சுட்டுக் கொல்ல திட்டமிட்டுள்ளதாகவும் அமெரிக்க நீதித்துறை செய்திக்குறிப்பில் தெரிவிக்கப்பட்டுள்ளது.
இந்த நடவடிக்கைகள் ஈரானிய புரட்சிகர காவலர் படையின் பிரதிநிதியால் வழிநடத்தப்பட்டதாக அமரிக்க நீதித் துறை கூறுகின்றது.
அதே நேரம், நியூயோர்க்கில் வசிக்கும் இரண்டு யூத அமெரிக்கர்களை குறிவைத்து தாக்குதல் நடாத்தவும், பிரதான சூத்திரதாரியாக கருதப்படும் ஷகேரிக்கு அறிவுறுத்தல்கள் கிடைத்துள்ளதாகவும், ஈரானிய புரட்சிகர காவல்படை அவர்கள் ஒவ்வொருவருர் தொடர்பிலும் தலா 500,000 அமெரிக்க டொலர்கள் வழங்குவதாக உறுதியளித்துள்ளதாகவும் அமெரிக்க நீதித்துறை வெளியிட்டுள்ள செய்தி அறிவிப்பில் கூறப்பட்டுள்ளது.
பொத்துவில், அறுகம்பே பகுதி உள்ளிட்ட இஸ்ரேலியர்கள் அதிகம் நடமாடும் பகுதிகளில் அவர்களையும் அவர்கள் சார் ஸ்தலங்களையும் இலக்கு வைத்து ஒருங்கமைக்கப்படாத தாக்குதல்கள் நடாத்த திட்டமிட்டதாக கூறப்படும் சம்பவம் தொடர்பில் பலர் கைது செய்யப்பட்டு தடுப்புக் காவலில் வைத்து விசாரித்து வருவதாக பயங்கரவாத தடுப்பு மற்றும் விசாரணைப் பிரிவினர் (சி.ரி.ஐ.டி.) தெரிவிக்கின்றனர்.
அமெரிக்காவின் எப்.பி.ஐ.அதிகாரிகளின் விசாரணை பிரகாரம், பர்ஹாத் ஷகேரி எனும் ஈரானியர், ஈரானின் புரட்சிகர காவல் படையின் பிரதிநிதி ஒருவரின் அறிவுறுத்தலுக்கு அமைய செயற்பட்டுள்ளதாக கூறப்படுகின்றது.
எப்.பி.ஐ. அதிகாரிகள் ஷகேரியை இதுவரை கைது செய்யாத போதும், அவரை தொலைபேசியில் தொடர்புகொண்டதாக கூறப்படுகின்றது.
அதன்படி எப்.பி. ஐ. அதிகாரிகள் தொலைபேசியில் ஷகேரியிடம் முன்னெடுத்த உரையாடலுக்கு அமைய, ஈரானின் புரட்சிகர காவலர் படையின் அதிகாரி ஒருவர், இலங்கையில் உள்ள இஸ்ரேலிய சுற்றுலாப் பயணிகளைக் குறிவைத்து, அக்டோபர் 2024 இல் ஒரு பாரிய துப்பாக்கிச் சூட்டு சம்பவத்தை திட்டமிடுமாறு ஷகேரியிடம் கேட்டுக் கொண்டுள்ளதாக எப்.பி.ஐ.இன் விசாரணை அறிக்கை கூறுகின்றது.
அவ்விசாரணைகளின் பிரகாரம்,
2024 ஆம் ஆண்டு அக்டோபர் 23 ஆம் திகதி அல்லது அதனை அண்மித்த நாளொன்றில், அமெரிக்கா மற்றும் இஸ்ரேல் அரசாங்கங்கள் அறுகம்பை பகுதியில் உள்ள சுற்றுலாத் தலங்களை குறிவைத்து தாக்குதல் நடத்தப்படக் கூடும் என்ற அச்சுறுத்தல் குறித்து பயணிகளை பகிரங்கமாக எச்சரித்துள்ளது. அதன்படி ஷகேரியிடம் இருந்து பெறப்பட்ட தகவல்களையும் அமெரிக்கா இலங்கையுடன் பகிர்ந்துகொண்டதாக கூறப்படும் நிலையில் அதற்கமைவாகவே முதலில் இலங்கையின் பயங்கரவாத தடுப்பு மற்றும் விசாரணைப் பிரிவு 3 பேரைக் கைது செய்துள்ளது. அவர்களில், ஷகேரியுடன் நேரடி தொடர்பினை கொண்ட முக்கிய சந்தேக நபரும் அடங்குகின்றார்.
அமெரிக்கா, இஸ்ரேல் ஆகியன தமது குடிமக்களுக்கு பயண எச்சரிக்கை விடுத்த பின்னர், ஷகேரியை எப்.பி.ஐ. அதிகாரிகள் தொடர்புகொண்டுள்ளதாகவும், அதன் போது முதலில், இலங்கையில் உள்ள இஸ்ரேலின் கொன்சியூலர் அலுவலகத்தையே உளவு பார்க்க தனக்கு அறிவுறுத்தப்பட்டதாகவும் பின்னர் மீண்டும் அறுகம்பே பகுதியில் இஸ்ரேலியர்கள் அதிகம் வந்து செல்லும் சுற்றுலா தளம் ஒன்று தொடர்பில் உளவு பார்க்க அறிவுறுத்தப்பட்டதாக தெரிவித்துள்ளதாக எப்.பி.ஐ. விசாரணையாளர்கள் அறிக்கை இட்டுள்ளனர்.
இந்த உளவு பார்க்கும் பணியையே, இப்போதும் இலங்கையின் பயங்கரவாத தடுப்பு மற்றும் விசாரணை பிரிவினர் கைது செய்துள்ள சந்தேக நபரிடம் ஷகேரி கையளித்துள்ளதாக எப்.பி.ஐ.யின் விசாரணையாளர்கள் அறிக்கையிட்டுள்ளனர்.
எவ்வாறாயினும் இந்த விடயம் தொடர்பில் இலங்கையின் பயங்கரவாத தடுப்பு மற்றும் விசாரணைப் பிரிவின் சிறப்புக் குழு தீவிரமாக விசாரித்து வருகின்றது. ஷகேரியும், தற்போது பயங்கரவாத தடுப்பு மற்றும் விசாரணை பிரிவின் 90 நாள் தடுப்புக் காவலின் கீழ் இருக்கும் பிரதான சந்தேக நபரும் ஒன்றாக இலங்கையின் சிறையில் இருந்ததாக தெரிவித்துள்ளார். இந் நிலையிலேயே சிறையில் உள்ள பலரிடம் விசாரணைகளை, நீதிமன்ற உத்தரவுக்கு அமைய பயங்கரவாத தடுப்பு மற்றும் விசாரணை பிரிவினர் முன்னெடுத்துள்ளனர்.
இந்த நிலையில், அறுகம்பையில் பாரிய துப்பாக்கிச் சூட்டு சம்பவத்தை நடாத்த ஈரானின் புரட்சிகர காவலர் படையின் குறித்த பிரதிநிதி தனக்கு ஆலோசனையளித்ததாகவும், அதன்படி இலங்கை தற்போது கைது செய்துள்ள பிரதான சந்தேக நபர் ஊடாக ஏ.கே.47 உள்ளிட்ட ஆயுதங்களை பெற திட்டமிடப்பட்டுள்ளதாக ஷகேரி எப்.பி.ஐ. இற்கு தெரிவித்ததாக கூறப்படுகின்றது.
இந்த நிலையிலேயே எப்.பி.ஐ. அதிகாரிகளின் விசாரணை அறிக்கை ஊடாக கூறப்படும் விடயங்களை சான்றுகளோடு உறுதிப்படுத்த இலங்கையின் பயங்கரவாத தடுப்பு மற்றும் விசாரணைப் பிரிவு விரிவான விசாரணைகளை முன்னெடுத்து வருவதாக அறிய முடிகின்றது.-Vidivelli