- சட்ட மா அதிபரின் உதவியைபெற திட்டம்
- மேன் முறையீட்டு நீதிமன்றில் ரிட் மனு நாளை பரிசீலனைக்கு
(எப்.அய்னா)
கண்டி மாவட்டத்தின் அக்குறணை பிரதேசபை நிர்வாக எல்லைக்கு உட்பட்ட அலவத்துகொட பொலிஸ் பிரிவின் கண்டி மாத்தளை பிரதான வீதியில் இலக்கம் 178/3 எனும் இலக்கத்தில் அமைந்துள்ள, பெயார்லைன் கட்டிடம் என பரவலாக அறியப்படும் கட்டிடத்தை இடிக்க, கண்டி மேலதிக நீதிவான் வழங்கிய இடிப்பு கட்டளையை தற்காலிகமாக செயற்படுத்தாமல் இருக்க இணக்கம் காணப்பட்டுள்ளது.
குறித்த இடிப்பு கட்டளைக்கு எதிராக கண்டி மேல் நீதிமன்றில் மீளாய்வு மனு தாக்கல் செய்யப்பட்டுள்ள நிலையில், அம்மனு மீதான விசாரணையின் ஆரம்பத்தில், விசாரணை நிறைவு பெற்று தீர்ப்பளிக்கப்படும் வரை, அக்கட்டிடத்தை இடிப்பதில்லை என நீதிமன்றுக்கு நகர அபிவிருத்தி அதிகார சபை உறுதியளித்துள்ளது.
30053/22 எனும் வழக்கிலக்கத்தில் கண்டி மேலதிக நீதிவான் ஹர்ஷன டி அல்விஸ் முன்னிலையில், குறித்த பெயார்லைன் கட்டிடம் தொடர்பில் நகர அபிவிருத்தி அதிகார சபையால் வழக்குத் தொடுக்கப்பட்டது. அதன்படி கடந்த 2022ஜூன் 28ஆம் திகதி, 1982 ஆம் ஆண்டின் நான்காம் இலக்க சட்டம் ஊடாக திருத்தப்பட்டுள்ள நகர அபிவிருத்தி அதிகார சபை சட்டத்தின் 8 ஆவது அத்தியாயத்தின் உப பிரிவுகளின் விதிவிதானங்களை மீறி, அவ்வதிகார சபையின் அனுமதிப் பத்திரம் இன்றி குறித்த கட்டிடம் கட்டப்பட்டுள்ளதாக கூறி, அக்கட்டிடத்தை இடித்து தரைமட்டமாக்க கண்டி மேலதிக நீதிவான் ஹர்ஷன டி அல்விஸ் உத்தரவிட்டிருந்தார்.
அதன்படி குறித்த கட்டளையை ஆட்சேபித்து, கண்டி மேல் நீதிமன்றில் 89/24 எனும் இலக்கத்தின் கீழ் மீளாய்வு மனு, அக்கட்டிடத்தின் உரிமையாளரால் தாக்கல் செய்யப்பட்டது. அதன்படி குறித்த வழக்கில் கடந்த ஒக்டோபர் 25 ஆம் திகதி கண்டி மேல் நீதிமன்ற நீதிபதி தர்ஷிகா விடுத்த அறிவித்தலுக்கு அமைய, கடந்த 8ஆம் திகதி இவ்வழக்கு விசாரணைக்கு வந்தது.
இதன்போது மீளாய்வு மனுவின் மனுதாரர் சார்பில் சட்டத்தரணிகளான அயுக பெரேரா, சஹ்மி பரீட் ஆகியோரோடு சிரேஷ்ட சட்டத்தரணி ருஷ்தி ஹபீப் ஆஜராகி வாதங்களை முன் வைத்தார்.
மீளாய்வு மனுவில் பிரதிவாதிகளாக பெயரிடப்பட்டுள்ள நகர அபிவிருத்தி அதிகார சபை சார்பில் சட்டத்தரணி நுஷானி ஜயரத்ன ஆஜரானார்.
இதன்போது மன்றில், நகர அபிவிருத்தி அதிகார சபை சார்பில் சட்டத்தரணி நுஷானி ஜயரத்ன மேல் நீதிமன்றில் உள்ள மீளாய்வு மனு மீதான விசாரணைகள் நிறைவுற்று கட்டளை ஒன்று ஆக்கப்படும் வரையில், நீதிவான் நீதிமன்றால் பிறப்பிக்கப்பட்ட இடிப்பு கட்டளையை செயற்படுத்தாமல் இருக்க இணக்கம் தெரிவித்தார். அத்துடன் இந்த வழக்கில் சட்டமா அதிபரின் உதவியையும் பெற்றுக்கொள்ள எதிர்பார்ப்பதாக அவர் தெரிவித்தார்.
அதன்படி இம்மனு தொடர்பில் ஆட்சேபனைகள் இருப்பின் அவற்றை பதிவு செய்ய, மீளாய்வு மனு மீதான விசாரணைகள் எதிர்வரும் 2025 ஜனவரி மாதம் 21 ஆம் திகதிவரை ஒத்தி வைக்கப்பட்டது.
இதனிடையே, குறித்த கட்டிடத்தை இடிப்பதற்கு எதிராக மேன் முறையீட்டு நீதிமன்றிலும் எழுத்தாணை (ரிட்) மனுவொன்று தாக்கல் செய்யப்பட்டுள்ளது. தற்போது ஜப்பானில் வசிக்கும் உரிமையாளர் அளித்துள்ள அட்டோனி அதிகார பத்திரத்துக்கு அமைய நஜிபுதீன் மொஹம்மட் பாஹிம் மனுதாரராக பெயரிடப்பட்டு 680/2024 எனும் இலக்கத்தின் கீழ் இந்த மனு தாக்கல் செய்யப்பட்டுள்ளது. இந்த எழுத்தாணை மனுவானது நாளை 12ஆம் திகதி மேன் முறையீட்டு நீதிமன்றில் பரிசீலனைக்கு எடுத்துக்கொள்ளப்படவுள்ளமை குறிப்பிடத்தக்கது.- Vidivelli