எஸ்.என்.எம்.சுஹைல்
ஆபத்தான சாகசமொன்றில் ஈடுபடும்போது ஏற்படும் சிறு தவறும் மரணத்திற்கு இட்டுச் செல்லும் என்ற பொதுவான கருத்தியலேயே, “கரணம் தப்பினால் மரணம்” என்பதற்கு நாம் கொண்டிருந்தோம்.
விடயம் அதுவல்ல, நாயகிக்கு (பெண்) திருமண காலம் நெருங்க வீட்டார் மணமகன் தேட ஆரம்பித்து விடுவர். நாயகியின் நிலையோ திண்டாட்டம். அக்காலத்தில் மனதால் வரித்தவன் (காதலன்) வரவில்லை என்றால் பெண்கள் உயிரை மாய்த்துக் கொள்ள தயாராகிவிடுவர். இதைத்தான், அக்காலத்தில் “கரணம் தப்பினால் மரணம்” எனப்பட்டது. “கரணம்’ என்ற சொல்லுக்கு “வதுவைச் சடங்கு’ என்று பொருள் உண்டு.
சரி விடயத்துக்கு வருவோம், பாராளுமன்றத் தேர்தல் நெருங்கிக்கொண்டிருக்கிறது. இன்னும் 20 நாட்கள் மாத்திரம் எஞ்சியிருக்கும் நிலையில் முஸ்லிம் பிரதிநிதித்துவத்தை உறுதிப்டுத்தும் விடயத்தில் ‘‘கரணம் தப்பினால் மரணம்’’ எனும் பொதுவான கருத்தியல் நிலை ஏற்பட்டிருக்கிறது.
கடந்த காலங்களில் உயர்ந்தபட்சமாக முஸ்லிம் பிரதிநிதித்துவம் திகாமடுல்லயிலும் கண்டியிலும் நான்கு, கொழும்பில் மூன்று, மட்டக்களப்பு, திருகோணமலை, வன்னியில் இரண்டு, புத்தளம், கேகாலை, களுத்துறை, பொலன்னறுவை, குருநாகல், அநுராதபுரம், யாழ். மற்றும் கம்பஹா ஆகிய மாவட்டங்களில் ஒன்று என இருந்துள்ளது.
எனினும், பொலன்னறுவை, களுத்துறை, குருநாகல், யாழ். மற்றும் கம்பஹா மாவட்டங்களில் பிரதிநித்துவம் கடந்த இரு தசாப்தங்களாக கனவாகவே மாறிவிட்டது.
எனினும், திகாமடுல்ல, கண்டி, கொழும்பு, மட்டக்களப்பு, திருகோணமலை, வன்னி மற்றும் கேகாலை மாவட்டங்கள் தமது பிரதிநிதித்துவத்தை கடந்த காலங்களில் பாதுகாத்து வந்துள்ளது. எனினும், இம்முறை நிலைமை கொஞ்சம் மோசமடைந்துள்ளது.
குறிப்பாக புதிய அரசியல் மாற்றம் மற்றும் முன்னைய அரசியல்வாதிகளின் பிழைகளினால் வாக்காளர்களிடையே சிந்தனையில் புதிய தெம்பு உருவாகியிருக்கிறது. இந்த புதுத் தெம்பு பிரதிநிதித்துவத்திற்கு ஆப்பாக மாறிவிடுமோ என்ற அச்ச நிலைமை தோன்றியிருக்கிறது. அல்லது பெரும்பான்மை சுயநல அரசியல் முதலைகளின் வலையில் சிக்கியிருக்கிறோமா என்றும் எண்ணத் தோன்றுகிறது.
இன்று முஸ்லிம் பிரதிநிதித்துவம் அவசியமில்லை, எமக்கு நேர்மையான அரசியல்வாதிகளே அவசியம் என்ற சிந்தனை சில பகுதிகளில் மேலெழுந்திருக்கிறது. அல்லது முஸ்லிம் பிரதிநிதித்துவம் இல்லாமல் போனாலும் பரவாயில்லை குறிப்பிட்ட முஸ்லிம் அரசியல்வாதியை எப்படியாவது தோற்கடிக்க வேண்டும் என்கிற மனநிலை சிலரிடம் உருவாகியிருக்கிறது. இது இன்று நேற்று தோன்றியதல்ல, கட்சி முரண்பாடுகள் அரசியல் நோக்கங்களுக்காக நீண்டகாலமாக எமது சமூகத்தில் நீடித்து வந்த ஒருவிடயம்தான். எனினும், அதற்கு சரியான சந்தர்ப்பமாக இந்த அரசியல் சூழ்நிலை மாறியிருக்கிறது. அதனை அவர்கள் சரியாக பயன்படுத்திக்கொள்ள சிந்தனை போராட்டத்தை முடுக்கிவிட்டுள்ளதை காண்கிறோம்.
இது சரியான சிந்தனையா? பிழையான சிந்தனையா என்பதற்கு அப்பால், இந்த சிந்தனை வியாபிப்பதற்கு முன்னைய அரசியல்வாதிகளின் பிழையான போக்குகளே காரணம் எனலாம்.
முஸ்லிம்களை வைத்தும், இஸ்லாத்தின் பெயரிலும் இவர்கள் மேற்கொண்ட முறையற்ற அரசியல் செயற்பாடுகளின் விரக்தியின் உச்சமே இந்த நிலைப்பாட்டுக்கு காரணமாகும். இதனை சில தரப்புகள் சாதகமாக பயன்படுத்திக்கொள்ள முயற்சிக்கின்றன. இதனால் வெற்றிபெறப்போவது யார் தோல்வியடையப்போவது யார் என்பதுதான் கேள்வி.
“முஸ்லிம் அரசியல்வாதிகளுக்கு பாடம் கற்பிக்க வேண்டும் என்ற மனநிலையையும் காண முடிகிறது. இதனால் முஸ்லிம் வாக்குகள் சிதறி பிரதிநிதித்துவம் இல்லாது செய்யப்படும் நிலையே உருவாகும்.”
உண்மையில் யார் வென்றாலும்? யார் தோற்றாலும் முஸ்லிம் சமூகம் எப்படியும் தோற்றுப்போகத்தான் காத்திருக்கிறது. ஏனெனில் முஸ்லிம் அரசியல் தலைமைகளிடம் ஒரு மாற்றம் ஏற்படும்வரை நம்மை தோல்வியே துரத்திக்கொண்டிருக்கும் என்றே கூற வேண்டும்.
குறிப்பாக இம்முறை முஸ்லிம் வாக்குகள் பல வகையிலும் சிதறடிக்கப்படும் சாத்தியமே இருக்கிறது. 2015 இலும் 2020 இலும் ராஜபக்சாக்களுக்கு எதிராக ஓரணியில் திரண்டதனால் முஸ்லிம் பிரதிநிதித்துவத்தை உறுதிப்படுத்த முடிந்தது.
குறிப்பாக கண்டி, கொழும்பு, கேகாலை மற்றும் அநுராதபுரம் உள்ளிட்ட தென் மாவட்டங்களில் முஸ்லிம் வேட்பாளர்கள் ஐக்கிய தேசியக் கட்சி அல்லது ஐக்கிய மக்கள் சக்தி கூட்டணியில் பலமான வாக்கு வங்கியுள்ள வேட்பாளராக இருந்தனர்.
இம்முறை நிலைமை அப்படியல்ல, முஸ்லிம்கள் ஓரணியில் திரளும் சந்தர்ப்பம் இல்லை. ஏனென்றால், இதுவரை காலமும் ஐக்கிய தேசியக் கட்சி அல்லது ஐக்கிய மக்கள் சக்தியை மட்டுமே முஸ்லிம்கள் நம்பினர். எனினும், இம்முறை தேசிய மக்கள் சக்தியையும் நம்பும் நிலைமை இருக்கிறது. அத்தோடு, ஸ்ரீலங்கா சுதந்திரக் கட்சி அல்லது ஸ்ரீலங்கா பொதுஜன முன்னணி என்பன மீது முஸ்லிம்கள் விரக்தியடைந்திருந்தனர். அவர்கள் இம்முறை தேர்தல் களத்தில் காணாமல் போய் உள்ளனர். கடந்த காலங்களில் ஒரே தெரிவு என்றிருந்த நிலைமை இப்போது பல தெரிவுகளாகிவிட்டது.
மட்டுமல்லாமல், பல அணிகளும் திட்டமிட்டு களமிறக்கப்படுவதால் வாக்குகள் வேண்டுமென்றே சிதறடிக்கப்படும் துரதிஷ்டமான நிலைமையொன்று உருவாகியிருக்கிறது.
குறிப்பாக முஸ்லிம் வாக்கு வீதம் கணிசமாக உள்ள திகாமடுல்ல மாவட்ட பிரதிநிதித்துவமானது சிதைக்கப்படும் சாத்தியமே உருவாகியுள்ளது. அம்மாவட்டத்திலேயே அதிகமான கட்சிகளும் சுயேட்சைக் குழுக்களும் களமிறங்கிளுள்ளன. இதனால் நடக்கப்போவது வாக்குகள் சிதறடிக்கப்பட்டு அம்மாவட்டத்தில் பெறப்பட்ட முஸ்லிம் பிரதிநிதித்துவம் குறையும் நிலை ஏற்படும்.
மட்டக்களப்பு மாவட்டம் ஏற்கனவே கடந்த பாராளுமன்ற தேர்தலின்போது முன்பைவிட ஒரு பிரதிநிதித்துவத்தை இழந்திருந்தது. இம்முறை அதே நிலைதான் தொடரும் என்பதை களநிலைவரங்கள் மூலம் ஊகிக்கலாம். சிலபோது, அதையும் இழந்து நின்றாலும் ஆச்சரியப்படுவதற்கில்லை என்றே தோன்றுகிறது.
முஸ்லிம்களின் ஆதரவுத்தளம் உள்ள மூன்று கட்சிகள் ஒன்றிணைவதால் திருகோணமலை மாவட்டம் இரண்டு முஸ்லிம் பிரதிநிதித்துவத்தை தக்கவைத்து வந்துள்ளது. எனினும், இம்முறை அந்த நிலைமை கொஞ்சம் மாற்றமடைந்திருக்கின்றது. ஏனென்றால், இம்முறை அந்த மூன்று தரப்பும் ஒன்றாகி இணைந்திருந்தாலும் மாற்றமாக இரண்டு தரப்புகளுக்கு வாக்குகள் பிரிந்து செல்லும் சாத்தியம் இருக்கின்றது. திருகோணமலை மாவட்டத்தை பொறுத்தமட்டில் அனைத்து இன மக்களின் மொத்த சனத்தொகை விகிதாசாரம் மிகச் சிறிய அளவிலேயே வித்தியாசப்படும். இம்முறை நிலைமை கொஞ்சம் மாற்றமடைந்தாலும் பெறுபேறு மாறியமையும். களத்தில் தேசிய மக்கள் சக்தியின் பக்கமும் முஸ்லிம் வாக்குகள் திரும்புவதால் போனஸ் ஆசனத்துடன் மாவட்டத்தை வெல்லும் ஐக்கிய மக்கள் கூட்டணி தப்பிப் பிழைக்குமா என கூர்ந்து அவதானிக்க வேண்டியுள்ளது.
அத்தோடு, கண்டி மாவட்டத்திலும் தற்போது மாறுபட்ட அரசியல் சூழலை காணமுடிகிறது. 1952 ஆம் ஆண்டுமுதல் தொடர்ச்சியாக கண்டியில் பாதுகாத்துவரப்பட்ட பிரதிநிதித்துவம் தற்போது கேள்விக்குறியாகியுள்ளது. குறிப்பாக முஸ்லிம் காங்கிரஸ் தலைவர் ரவூப் ஹக்கீம் மீது அதிருப்தி நிலைமை காணப்படுகின்றது. அவர் கடந்த 30 வருடங்களில் கூடுதலாக ஆளும் தரப்பில் அமைச்சராக இருந்தபோதிலும் கண்டி மாவட்டத்திற்கான அபிவிருத்தி விடயத்தில் மக்கள் விமர்சனங்களை முன்வைத்து வருகின்றனர். எனினும், தேசிய மக்கள் சக்தி முன்னிறுத்தியிருக்கும் வேட்பாளர் பட்டியல் முஸ்லிம் சமூகத்திலிருந்து வியாபாரிகளை மட்டுமே தேர்ந்தெடுத்துள்ளமை அக்கட்சி மீதான அதிருப்தியையும் ஏற்படுத்தியிருக்கிறது.
இது இவ்வாறிருக்க கொழும்பு மாவட்ட வேட்பாளர்கள் பட்டியலில் முஸ்லிம் பிரதிநிதித்துவத்திற்கு விகிதாசார அடிப்படையில் எந்தப் பிரதான கட்சிகளும் இடமளிக்கவில்லை. மாவட்ட சனத்தொகைக்கு ஏற்ப மூன்று வேட்பாளர்கள் முஸ்லிம்களுக்கு ஒதுக்கப்பட வேண்டிய நிலையில் ஐக்கிய மக்கள் சக்தியும் புதிய ஜனநாயக முன்னணி (சிலிண்டர்)யும் தலா இரு வேட்பாளர்களை களமிறக்கியிருக்கிறது. என்றாலும் ஜனாதிபதியின் தேசிய மக்கள் சக்தியானது ஒரேயொரு வேட்பாளரை மாத்திரம் களமிறக்கியிருக்கின்றமை பெரும் ஏமாற்றத்தையே தருகிறது. அத்தோடு, கண்டியைப் போன்று கொழும்பில் வாக்குகள் ஒரே அணிக்கு திரள்வது மிகவும் குறைவே. ஏனெனில் அண்ணளவாக மூன்று இலட்சத்தை அண்மிக்கும் கொழும்பு முஸ்லிம் வாக்குகளில் ஒரேயொரு தடவை மாத்திரம் சுதந்திரக் கட்சி சார்பில் போட்டியிட்ட ஏ.எச்.எம்.பௌஸி ஒரு இலட்சம் வாக்குகளை பெற்றார். ஐக்கிய தேசியக் கட்சியில் போட்டியிட்ட எவரும் இலட்சக்கணக்கான வாக்குகள் எடுக்கவில்லை. அத்தோடு, 2010 ஆம் ஆண்டு இம்மாவட்டம் முஸ்லிம் பிரதிநிதித்துவத்தை இழந்திருந்தது. எனவே, இந்த தேர்தலானது கொழும்பில் பிரதிநிதித்துவம் இழக்கப்படும் சந்தர்ப்பமே உருவாகியுள்ளது.
இதனிடையே, கடந்த மூன்று தேர்தல்களிலும் உட்கட்சிப் பூசல்கள் காரணமாக களுத்துறை மாவட்டம் முஸ்லிம் பிரதிநிதித்துவத்தை இழந்திருந்தது. இம்முறை அதை சாத்தியப்படுத்த அதிக பிரயத்தனங்கள் மேற்கொள்ளப்பட்டாலும் முஸ்லிம் வாக்குகள் பிரதானமாக மூன்று அணிகளுக்கு பிளவுபடுவதால் பிரதிநிதித்துவம் பெறுவதில் களுத்துறை மாவட்டம் இம்முறையும் ஏமாற்றத்தையே சந்திக்கலாம்.
தவமாய் தவமிருந்து 30 வருடங்களின் பிறகு கடந்த 2020 இல் முஸ்லிம் தரப்புகள் ஓரணியில் திரண்டு பிரதிநிதித்துவத்தை உறுதிப்படுத்தினர். எனினும், தேர்ந்தெடுக்கப்பட்ட பிரதிநிதியின் செயற்பாடுகள் பெரும் அதிருப்திக்குள்ளானதுடன், புத்தளம் மக்களுக்கும் தலைகுனிவை ஏற்படுத்தியிருந்தது.
இந்நிலையில், இம்முறை புத்தளம் ஐக்கிய மக்கள் கூட்டணி ஊடாக மு.கா., அ.இ.ம.கா. என்பன ஐக்கியப்பட்டிருந்தாலும் இன்னும் சில தரப்புகளும் அங்கு பிரிந்து நிற்கின்றன. அத்தோடு, தேசிய மக்கள் சக்திக்கும் வாக்குகள் பிரிந்து செல்லும் நிலைமை இருப்பதையும் காணலாம்.
அநுராதபுரம் மாவட்டம் பிரதிநிதித்துவத்தை இழக்கும் விளிம்பில் இருக்கும் நிலையில் குருநாகல் மாவட்டம் நீண்ட கால தாகத்திற்கு விடை கிடைக்குமா என எதிர்பார்த்து நிற்கிறது. இதனிடையே, 50 ஆயிரத்துக்கும் குறைந்த முஸ்லிம் வாக்குகளுடைய கேகாலை மாவட்டம் 1989 முதல் பிரதிநிதித்துவத்தை உறுதிபடுத்தியிருக்கிறது. எனினும், இம்முறை திசைமாறிய பயணங்கள் பிரதிநிதித்துவத்தை இழக்கச் செய்யலாம் என அஞ்சப்படுகிறது.
இப்படி நாடு முழுவதும் நிலைமை காரணம் தப்பினால் மரணம் என்ற நிலையே முஸ்லிம் பிரதிநிதித்துவத்திற்கு ஏற்பட்டிருக்கிறது.
இந்த நிலைமை உருவாவதற்கு பல்வேறு காரணங்கள் உள்ளன. இதுவரை மக்கள் வாக்களித்த கட்சிகள் முஸ்லிம் சமூகம் விடயத்தில் செயற்பட்ட விதம். அத்தோடு, முஸ்லிம் சமூகத்தின் பிரதிநிதித்துவத்தை உறுதிபடுத்திய ஐக்கிய தேசியக் கட்சியும் ஐக்கிய மக்கள் சக்தியும் கடந்த 30 வருட காலமாக ஸ்திரமான ஆட்சியமைக்காமையினால் பாரிய அபிவிருத்திப் பணிகளை மேற்கொள்ள முடியாமற் போனமை என்பனவும் உள்ளடங்கும். இதனால் விரக்தியடைந்த முஸ்லிம் மக்கள் மாற்று சக்திகளை கடந்த காலங்களிலும் தேடினர். மாற்று சக்திகளாக நினைத்த அந்த தரப்புகளும் ஏமாற்றத்தையே தந்திருக்கிறன. எனவே, இம்முறை தேர்தலில் முற்றிலும் மாறுபட்ட நிலைப்பாட்டிற்கு ஒரு பிரிவினர் வந்திருக்கின்றனர். முஸ்லிம் அரசியல்வாதிகளுக்கு பாடம் கற்பிக்க வேண்டும் என்ற மனநிலையையும் காண முடிகிறது. இதனால் முஸ்லிம் வாக்குகள் சிதறி பிரதிநிதித்துவம் இல்லாது செய்யப்படும் நிலையே உருவாகும்.– Vidivelli