பைசர் அமான்
ஆட்சி மாற்றம் ஒன்றை வேண்டி நின்ற பெரும்பாலான மக்களின் ஆதரவுடன் தோழர் அநுரகுமார திசாநாயக்க தேசிய மக்கள் சக்தியின் ஊடாக இலங்கையின் ஒன்பதாவது நிறைவேற்று அதிகாரம் கொண்ட ஜனாதிபதியாக கடந்த 23 ஆம் திகதி பதவிப் பிரமாணம் செய்து கொண்டார். அவருடைய புதிய நியமனங்களும் நடவடிக்கைகளும் மக்கள் சார்ந்த அல்லது மக்கள் எதிர்பார்த்த ஆட்சிமுறை மாற்றத்திற்கான நம்பிக்கை சமிக்ஞையாக இருக்கின்றது என்று சொன்னால் அது மிகையல்ல.
இருந்த போதிலும் மக்கள் எதிர்பார்க்கும் முழுமையான ஆட்சி மாற்றத்திற்கு திடமான பாராளுமன்றமும் அமைய வேண்டும். எனவே, பாராளுமன்றத்திலும் தேசிய மக்கள் சக்தியின் பெரும்பான்மை அமையப் பெற்றால் மாத்திரமே மக்களாட்சியை உறுதிப்படுத்திக் கொள்ள முடியும். எதிர்வரும் நவம்பர் மாதம் 14ஆம் திகதி பாராளுமன்ற தேர்தலுக்கான திகதி அறிவிக்கப்பட்டிருக்கின்றது.
ஒக்டோபர் 11 ஆம் திகதிக்குள் வேட்பு மனுக்கள் தாக்கல் செய்யப்பட வேண்டும். இந்த சூழ்நிலையிலே குறிப்பாக கிழக்கு மாகாணத்தை பிரதிநிதித்துவப் படுத்தக்கூடிய சிறுபான்மை மக்களின் நிலைப்பாடு என்ன? அதிலும் குறிப்பாக மட்டக்களப்பு மாவட்ட முஸ்லிம் வாக்காளர்களின் நிலைப்பாடு எவ்வாறு அமைய வேண்டும் என்பதை இக்கட்டுரை ஆய்வு செய்ய விளைகிறது.
பெரும்பான்மை கட்சிகளுடன் கூட்டிணைந்து அல்லது ஒட்டுண்ணிகளாக செயற்பட்டு தமது சொந்த நலன்களை அடைந்து கொள்ளலாம் என்ற நப்பாசையுடன் களமிறங்கி மக்கள் வாக்குகளை கொள்ளையடித்து சுகபோக வாழ்வு கண்ட நமது அரசியல்வாதிகளின் கடந்த கால செயற்பாடுகள் இனி இந்த அரசாங்கத்தில் நடப்பதற்கான துளி வாய்ப்பு கூட இல்லை என்பதை முதலில் பொது மக்களாகிய நாம் புரிந்து கொள்ள வேண்டும்.
அரசியல் என்பது நெகிழ்ச்சித் தன்மைக்குட்பட்டது என்பதில் மாற்றுக் கருத்தில்லை. இம்முறை மட்டக்களப்பு மாவட்டத்தை பிரதிநிதித்துவப்படுத்தும் நாம் தீர்க்கமான சில தீர்மானங்களை எடுக்க வேண்டிய புள்ளியில் வந்து நிற்கின்றோம். அதாவது தற்போது அரசு மேற்கொண்டுவரும் மக்கள் நலன் சார்ந்த செயற்பாடுகளுக்கு எமது அரசியல் பங்களிப்பை கண்டிப்பாக வழங்க வேண்டும். அதே சமயம் சிறுபான்மை மக்கள் என்ற அடிப்படையில் எமது பாராளுமன்ற பிரதிநிதித்துவத்தையும் பாதுகாத்துக் கொள்ள வேண்டும். இந்த இரண்டிற்கும் மத்தியில் எமது தீர்மானம் பின்வரும் இரண்டில் ஒன்றாகத்தான் இருக்க முடியும்.
1. தேசிய மக்கள் சக்தியுடன் நேரடியாக இணைந்து பயணிப்பது.
இந்த தீர்மானத்தைப் பொறுத்தவரை தமிழ்த்தரப்புடன் பேச்சுவார்த்தை ஒன்றை மேற்கொண்டு வேட்பாளர்களை சமமாக பிரித்து அல்லது விகிதாசார அடிப்படையில் பிரித்து தேர்தலில் தேசிய மக்கள் சக்தியில் போட்டியிடலாம். தேசிய மக்கள் சக்தியை பொறுத்தவரை கடந்த ஜனாதிபதி தேர்தலில் மட்டக்களப்பு மாவட்டத்தில் சுமார் 38000 க்கு மேற்பட்ட வாக்குகளை பெற்றிருந்தார்கள். இது கிட்டத்தட்ட மாவட்டத்தில் ஒரு பாராளுமன்ற பிரதிநிதித்துவத்தை உறுதி செய்யும் வாக்கு வங்கியாகும்.
எந்த ஒரு பின்புலமும் இல்லாமலும் பாரியளவில் தேர்தல் பிரச்சாரங்கள் இல்லாமலும் இதனை அவர்களால் பெற முடிந்தது. எனவே பாராளுமன்றத் தேர்தலிலே பல்வேறு வேலைத் திட்டங்களின் ஊடாக மேலதிகமாக இன்னும் வாக்குகளை பெறக்கூடிய சாத்தியம் காணப்படுகிறது. இந்த சாதகத்தை பயன்படுத்திக் கொண்டு தமிழ் முஸ்லிம் உறவுகளைப் பேணும் வகையிலே இரண்டு சாராரும் ஒன்றிணைந்து திசைகாட்டி சின்னத்தில் போட்டியிட்டால் இரண்டு ஆசனங்களை இலகுவாக பெறக்கூடிய சாத்தியக்கூறு காணப்படுகிறது.
2. மட்டக்களப்பு முஸ்லிம் வேட்பாளர்கள் சுயேட்சையாக பொதுச் சின்னம் ஒன்றில் போட்டியிடுவது.
மேற்படி முதலாவது தீர்மானம் உடனடியாக சாத்தியப்படாத விடத்து இரண்டாவது தெரிவாக முஸ்லிம் வாக்குகளை மட்டக்களப்பு மாவட்டத்தில் ஒன்றிணைக்க வேண்டிய தேவை காணப்படுகிறது. அவ்வாறு இணைக்கும் போது 1989 ஆம் ஆண்டு முஸ்லிம் காங்கிரஸ் எவ்வாறு தேர்தலை எதிர்கொண்டதோ அதேபோன்று பிரதான மூன்று முஸ்லிம் ஊர்களையும் ஒன்றிணைத்தவாறு 8 பிரதிநிதிகளை நிறுத்தி இரண்டு ஆசனங்களை பெற்றுக் கொள்ளக்கூடிய வியூகத்தை வகுக்க வேண்டும்.
அவ்வாறு வியூகம் வகுக்கும்போது பின்வரும் விடயங்களை கவனத்தில் கொள்ள வேண்டியது மிக அவசியமாகும்.
1. முஸ்லிம் கட்சிகளின் பெயர்களிலோ சின்னங்களிலோ போட்டியிடக் கூடாது.
2. ஏற்கனவே அரசியலில் காணப்பட்ட முகங்கள் யாரையும் வேட்பாளர்களாக நிறுத்தக்கூடாது.
3. பொதுவான சின்னம் ஒன்றிலே சுயேட்சையாக களமிறங்க வேண்டும்.
4. சிவில் பொது அமைப்புக்கள் ஒன்றிணைந்து குழு ஒன்றினை அமைத்து ஒவ்வொரு ஊரிலிருந்தும் நல்ல கல்வியறிவுள்ள, சமூக சிந்தனை கொண்ட, மக்கள் செல்வாக்குள்ள 8 பேரை தெரிவு செய்து வேட்பாளர்களாக நிறுத்த வேண்டும்.
5. அவர்களுக்காக ஒவ்வொரு ஊர்களையும் பிரதிநிதித்துவப்படுத்தக் கூடிய ஜம்மியத்துல் உலமா, சம்மேளனம் போன்ற பெரிய அமைப்புகள் நேரடியாக அல்லது மறைமுகமாக மக்களை விழிப்பூட்ட வேண்டும்.
6. கிடைக்கப்பெறும் பாராளுமன்ற பிரதிநிதித்துவத்தைப் பொறுத்து ஊர் தழுவிய ரீதியில் பங்கிட்டுக் கொள்வதற்கான ஒப்பந்தமொன்றையும் மேற்கொள்ளலாம்.
மேற்குறிப்பிட்ட இரண்டு தீர்மானங்களில் ஏதாவதொரு தீர்மானத்தினூடாக எமது பிரதிநிதிகளை பாராளுமன்றம் அனுப்புவதினூடாகத்தான் எங்களுடைய பிரதிநிதித்துவத்தை மட்டக்களப்பு மாவட்டத்திலே பாதுகாத்துக் கொள்வதோடு அரசாங்கத்துடன் இணைந்து பல்வேறு வேலைத்திட்டங்களுக்கு நாங்களும் பங்குதாரர்களாக மாறலாம். அத்தோடு அரசாங்கம் விரும்பக்கூடிய பிரதிநிதிகளாகவும் எமது பிரதிநிதிகள் மாறுவார்கள்.
எனவே, யாரும் குழம்பிய குட்டையில் மீன் பிடிக்க முயற்சி செய்யாமல் ஒற்றுமையாக அனைவரையும் அரவணைத்துக் கொண்டு செயற்படுவது சிறந்த பலாபலன்களைத்தரும். இதனை முன்னின்று செயல்முறைப்படுத்துவது ஊர்த்தலைமைகளின் பொறுப்பும் கடமையுமாகும்.
மேலதிக குறிப்பும் ஆலோசனையும்:
மட்டக்களப்பு மாவட்டத்தை பிரதிநிதித்துவப்படுத்திய மூத்த அரசியல் பிரமுகர்கள் அனைவரும் அடுத்தவர்களுக்கு வழிவிடுவதோடு நீங்கள் அனைவரும் ஒன்றிணைந்து ஒரு ஆலோசனை சபையாக இயங்கி இளையோருக்கு வழிகாட்டலாம். இதுநாள்வரை மக்கள் உங்களுக்கு அளித்த மரியாதைக்கான சிறு கைங்கரியமாக இது இருக்கும்.- Vidivelli