எம். ரிஷான் ஷெரீப்
ஒரு நாட்டில் அப்போதுள்ள அரசாங்கத்தின் மீதான மக்களின் அதிருப்தியின் அடிப்படையில்தான் பொதுவாக ஆட்சி மாற்றம் நிகழும். இலங்கையில் இந்த வாரம் நடைபெற்ற ஜனாதிபதித் தேர்தலின் வெற்றி மேலே குறிப்பிட்ட கருத்துக்கு மேலும் வலுச் சேர்க்கிறது.
இலங்கையில் 2022 ஆம் ஆண்டு ஏற்பட்ட புரட்சிகரமான ‘மக்கள் போராட்ட’த்துக்குப் பிறகு நாட்டைக் கையேற்ற ரணில் விக்ரமசிங்கவின் ஆட்சிக்கு வெறும் இரண்டரை வருடங்களே ஆயுள் இருந்தது. அக் குறுகிய காலத்துக்குள் அவர் நாட்டு மக்களின் நலனுக்காக எதையும் செய்யத் தவறியமை அவரை மீண்டும் ஆட்சியில் அமர்த்தாமல் புறந்தள்ள வைக்க மக்களை நிர்ப்பந்தித்துள்ளது என்பதை இந்தத் தேர்தல் தெளிவாக எடுத்துக் காட்டுகிறது. உள்ளாட்சித் தேர்தலை நடத்தாமல் விட்டமை, அரச மருத்துவமனைகளில் பொதுமக்களுக்கு போலி மருந்துகளை வழங்கிப் பரிசீலித்தமை, நீதியைக் கையிலெடுத்து பல மோசமான குற்றவாளிகளை சட்டத்தின் பிடியிலிருந்து விடுதலை செய்தமை போன்ற வன்மையான குற்றச்சாட்டுகள் இந்தக் குறுகிய காலத்துக்குள் ரணில் விக்கிரமசிங்க மீது உள்ளன.
மக்கள் போராட்டத்திற்குப் பிறகு நாட்டைப் பொறுப்பேற்று அதைச் சீரமைக்க வந்த ஜனாதிபதியே தனது மோசமான செயற்பாடுகளால் சமூகச் சீர்கேடுகளுக்கு வழிவகுத்த காரணத்தால் பொதுமக்கள் ஒரு பெரும் மாற்றத்தை அடுத்த ஜனாதிபதித் தேர்தலில் எதிர்பார்த்திருந்தார்கள். இன்று அந்த மாற்றத்தைச் செய்து காட்டியிருக்கிறார்கள். பெருமளவு வாக்குகளால் மக்களால் தேர்ந்தெடுக்கப்பட்டுள்ள நிறைவேற்று அதிகாரம் கொண்ட புதிய ஜனாதிபதி அனுர குமார திஸாநாயக்கவிற்கு இப்போது பெரும் பொறுப்பு இருக்கிறது. இலங்கையில் பொதுமக்கள் எதிர்கொண்டிருக்கும் அனைத்து நெருக்கடிகளையும் முடிவுக்குக் கொண்டு வருவார் என்ற முழுமையான நம்பிக்கையை இன்று அவர் மீது வைத்திருக்கிறார்கள் மக்கள்.
இலங்கையின் பொருளாதாரச் சீர்கேட்டை சரியான திசையில் கொண்டு வருவது அந்தளவு எளிதான விடயமல்ல. அதற்குரிய பொருளாதார நோக்கும், திறமையும் அதில் பெரும் பங்காற்றும். ஆகவே புதிய ஜனாதிபதி அதில்தான் கூடிய கவனம் செலுத்த வேண்டியிருக்கும்.
மக்கள் விடுதலை முன்னணி தலைவர் அனுர குமார திசாநாயக்கவால் 2019 ஆம் ஆண்டில் தொடங்கப்பட்டதுவும், இலங்கை அரசியலில் இதுவரை மூன்றாவது அரசியல் கட்சியாக இருந்து வந்ததுமான தேசிய மக்கள் சக்தி National People’s Power (NPP) என்பது இலங்கையின் ஓர் இடதுசாரி அரசியல் கூட்டணி ஆகும். முன்னாள் ஜனாதிபதி கோத்தாபய ராஜபக்ஷவைத் துரத்தியடித்த மக்கள் போராட்டத்திற்கு ஆரம்பத்தில் அனுர குமார திஸாநாயக்க அந்தளவு ஆதரவு அளிக்கவில்லை. என்றாலும் போராட்டம் படிப்படியாக உக்கிரமடைந்தபோது அவரது கட்சியின் ஆதரவு அதிகமாகி போராட்டத்துக்கு மேலும் வலு சேர்த்தது. தொடர்ந்து ‘மக்கள் போராட்டம்’ கோத்தாபய ராஜபக்ஷவை நாட்டிலிருந்து துரத்தியடித்ததோடு அதற்கான பெரும்புகழ் அனுர குமார திஸாநாயக்கவின் கட்சியை வந்தடைந்தது.
‘மக்கள் போராட்டம்’ என்ற ஒன்று மாத்திரம் அன்று நிகழ்ந்திருக்காவிட்டால் இலங்கையின் முக்கிய அரசியல் சக்திகளில் ஒருவராக அனுர குமார திஸாநாயக்கவால் மாறியிருக்க வாய்ப்பில்லை. காரணம் அதுவரையில் பாராளுமன்றத்தில் குறைந்தளவு உறுப்பினர்களைக் கொண்ட கட்சியாகத்தான் அவரது கட்சி இருந்து வந்தது. என்றாலும் மக்கள் போராட்டத்துக்குப் பிறகான கடந்த இரண்டரை வருட காலத்துக்குள் இலங்கை அரசியலில் ஒரு பெரும் மாற்றத்தை ஏற்படுத்துவதற்காக மக்கள் இன்று அவரை நம்பித் தேர்ந்தெடுத்திருப்பது குறிப்பிடத்தக்கது. பொதுமக்களுக்கு தமது வாழ்க்கையைச் சீரமைத்துக் கொள்ள ஒரு நம்பகமானதும், பொறுப்பானதும், ஊழலற்றதுமான கட்சியும், ஜனாதிபதியும் தேவையாக இருக்கிறது. இது, இதுவரை ஆட்சியிலிருந்த எந்தக் கட்சியின் ஜனாதிபதி மீதும் மக்களால் திணிக்கப்படாத மிகப் பெரிய சவால்.
அவ்வாறே புதிய ஜனாதிபதிஇன்னும் என்னென்ன சவால்களை எதிர்நோக்கவிருக்கிறார் என்று பார்த்தோமானால், முந்தைய ஜனாதிபதிகள் தாம் பதவிக்கு வர வேண்டும் என்பதற்காக அளித்த தேர்தல் வாக்குறுதிகளை பின்னர் நிறைவேற்றுவதில் ஆர்வம் காட்டவில்லை. ஆனால் புதிய ஜனாதிபதியால் அவ்வாறிருக்க முடியாது. அவரது ஒவ்வொரு செயற்பாடும் மக்களால் அவதானிக்கப்பட்டுக் கொண்டேயிருக்கும்.
புதிய ஜனாதிபதியின் தேர்தல் வாக்குறுதியாக ஊழல் எதிர்ப்பு என்பது உள்ளது. அவரோடு போட்டியிட்டவர்கள் தாம் ஆட்சியிலிருந்த போதே ஊழல் நடவடிக்கைகளில் ஈடுபட்டமையும், ஊழல்வாதிகளைத் தமது கட்சியில் கொண்டிருந்ததுவும் இந்த ஜனாதிபதித் தேர்தலில் அவர்களுக்கே கேடாக அமைந்தது. புதிய ஜனாதிபதியிடம் திடமான மன உறுதியும், சங்கல்பமும் இருந்தால் ஊழலைத் தடுத்து நிறுத்துவதில் உறுதியாக இருப்பார் என்று நம்பலாம். என்றாலும் இலங்கையின் பொருளாதாரச் சீர்கேட்டை சரியான திசையில் கொண்டு வருவது அந்தளவு எளிதான விடயமல்ல. அதற்குரிய பொருளாதார நோக்கும், திறமையும் அதில் பெரும் பங்காற்றும். ஆகவே புதிய ஜனாதிபதி அதில்தான் கூடிய கவனம் செலுத்த வேண்டியிருக்கும்.
இதுவரையில் இலங்கையில் ஊழலற்ற அரசியல் கலாசாரத்தை உருவாக்கி, நாட்டின் பொருளாதாரத்தை அபிவிருத்திப் பாதையில் கொண்டு செல்ல ஆட்சியில் இருந்த எந்தக் கட்சியாலும் முடியவில்லை. எனவேதான் இந்தத் தேர்தலில் இதுவரை ஆட்சியமைக்காத ஒரு புதிய இடதுசாரிக் கட்சியிடம் தமது நாட்டை ஒப்படைத்திருக்கிறார்கள் இலங்கை மக்கள். ஜனநாயக ஆட்சியில் ஒரு இடதுசாரிக் கூட்டணியிடம் தமது நாட்டை ஒப்படைக்க மக்களுக்கு பூரண உரிமையுள்ளது.
நாட்டில் ஊழலை முடிவுக்குக் கொண்டு வரவும், அபிவிருத்திப் பாதையில் நாட்டைக் கொண்டு செல்லவும் ஒரு புதிய கட்சி, ஒரு புதிய தலைவர் தேர்ந்தெடுக்கப்படுவது நல்லதுதான். குறைந்தபட்சம் அவர்கள் ஆட்சியமைத்ததும் தமது வாக்குறுதிகளை நிறைவேற்ற முற்படுவார்கள். பழையவர்களுக்கோ மக்களை ஏமாற்றத் தெரிந்திருந்தது. புதியவர் எப்படிப்பட்டவராக இருந்தாலும் பதவியேற்றதுமே அந்த ஏமாற்று வித்தைகளைச் செய்யத் துணியமாட்டார். தான் ஒழுங்காக ஆட்சியமைக்கவில்லையென்றால் முன்னாள் ஜனாதிபதிகளுக்கு நடந்ததுதான் தனக்கும் நடக்கும் என்பதை அவர் நன்கு அறிந்திருப்பார்.
முன்னாள் ஜனாதிபதி கோத்தாபய ராஜபக்ஷவுக்கு அதுதான் நடந்தது. மக்கள் அவரிடமிருந்து பெருமளவு எதிர்பார்த்தார்கள். அவரால் எதுவும் மக்களுக்காக நல்லது செய்ய முடியாது என்பதைப் புரிந்துகொண்டதுமே மக்கள் ஒன்றிணைந்து அவரைத் துரத்தியடித்தார்கள். இந்த ஆபத்து இலங்கையில் ஜனாதிபதியாக ஆகும் எவருக்கும் இருக்கிறது. என்றாலும் இலங்கையின் பொருளாதார வளர்ச்சியின் பாதையை சரியாக இனங்கண்டு தனது தலைமைத்துவம் மூலம் நாட்டை அபிவிருத்தியின் பாதையில் சரியாக வழிநடத்துபவரைத்தான் மக்கள் தொடர்ந்து நீடித்து நிலைக்கச் செய்வார்கள்.
வெறும் தேர்தல் வாக்குறுதிகளாலும், மேடைக் கூச்சல்களாலும் மக்கள் மனதில் இடம்பிடிப்பது தற்காலத்தில் சாத்தியமில்லை என்பதை அமைதியாகச் சாதித்து நிரூபித்திருக்கிறார் இலங்கையின் புதிய ஜனாதிபதி அனுர குமார திஸாநாயக்க. பதவியில் அவர் தொடர்ந்து நீடிப்பதுவும், விட்டுச் செல்வதும் அவரது ஆட்சி முறையிலேயே தங்கியிருக்கிறது.- Vidivelli