(எஸ்.என்.எம்.சுஹைல்)
முன்னாள் அமைச்சர் யூ.எல்.எம்.அலி சப்ரி பிரதிநிதித்துவ அரசியலிலிருந்து ஒதுங்குவதாக அறிவித்துள்ளார்.
மிகக் குறுகிய காலத்திற்குள் நீதி, வெளிவிவகாரம் மற்றும் நிதி ஆகிய முக்கிய அமைச்சுப் பதவிகளை வகித்த அவர் திடீரென இந்த அறிவிப்பை வெளியிட்டுள்ளார்.
ஜனாதிபதித் தேர்தலில் சுயாதீன வேட்பாளர் ரணில் விக்ரமசிங்கவுக்கு ஆதரவு தெரிவித்திருந்த நிலையில் அவர் தோல்வியடைந்ததையடுத்து இத்தீர்மானத்தை முன்னாள் அமைச்சர் அலி சப்ரி வெளியிட்டார்.
இது தொடர்பாக அவர் விடிவெள்ளிக்கு கருத்து தெரிவிக்கையில், ஒரு பாராளுமன்ற தவணைக்காக வேண்டியே நான் அரசியலுக்கு வந்திருந்தேன். ஏற்கனவே, தீர்மானித்ததற்கு அமையவே, நான் பிரதிநிதித்துவ அரசியலிலிருந்து ஒதுங்கிக்கொள்கிறேன்.
அரசியலிலிருந்து விலகி மீண்டும் சட்டத்தரணியாக எனது பணிகளை தொடரவே திட்டமிட்டிருக்கிறேன்.
நான் மிகக் குறுகிய காலம் பாராளுமன்ற உறுப்பினராகவும் அமைச்சராகவும் பதவி வகித்தாலும் மிக முக்கிய பொறுப்புகள் எனக்கு தரப்பட்டது.
ஆரம்பத்தில் நீதி அமைச்சு எனக்கு தரப்பட்டது. இதற்கமைய எனது பதவிக் காலத்தில் நூற்றுக்கும் மேற்பட்ட சட்டங்களை கொண்டுவர முடிந்தது.
அத்தோடு, மிகவும் நெருக்கடியான நேரத்தில் நிதி அமைச்சு எனக்கு தரப்பட்டது. மத்திய வங்கி முன்னாள் ஆளுநர் அஜித்நிவாட் கப்ரால் மற்றும் அட்டிகல போன்றோரை நீக்கி நிதி அமைச்சிலும் பல்வேறு மாற்றங்களை கொண்டுவர முடிந்தது. தற்போது பதவியில் இருக்கும் மத்திய வங்கியின் ஆளுநரை நியமித்திருந்தேன். இவர், ஜனாதிபதி ரணில் விக்ரமசிங்க நிதியமைச்சை வகித்தபோதும் தொடர்ந்தும் பதவி வகித்தார். இன்றைய நிதியமைச்சு பதவியை வகிக்கும் ஜனாதிபதி அநுரகுமார திசாநாயக்கவும் அதே ஆளுநரை பதவியில் நீடிக்க வைத்துள்ளார்.
இதுபோக, வெளிவிவகார அமைச்சை வகித்துள்ளேன். அவ்வமைச்சுப் பதவியை ஜனாதிபதி ரணில் விக்ரமசிங்க எனக்கு பொறுப்பேற்குமாறு கேட்டுக்கொண்டார். அவ்வமைச்சுப் பதவியின் மூலம் இலங்கைக்கு சர்வதேச உதவிகளை பெற்றுக்கொடுக்கும் சந்தர்ப்பம் எனக்கு கிட்டியது. அத்துடன், மத்திய கிழக்கு நாடுகள், இஸ்லாமிய ஒத்துழைப்பு நாடுகளுடன் இலங்கையின் தொடர்பை மேலும் வலுப்படுத்த முடிந்தது. மேலும், அயல்நாடுகளுடனான இராஜதந்திர உறவுகளையும் பலப்படுத்த முடிந்தது.
மேலும், ஒரு சிறுபான்மை அரசியல்வாதியாக, முஸ்லிம் பிரதிநிதியாக நாட்டின் கௌரவத்தை பாதுகாக்க முடிந்ததுடன், சமூகத்திற்கு எந்தவகையிலும் இழுக்கு ஏற்படாத முறையில் அரசியல் நடவடிக்கைகளை முன்னெடுக்க முடிந்ததை கௌரவமாக கருதுகிறேன் என்றார்.
மிக குறுகிய மற்றும் இக்கட்டான காலத்தில் நிதி அமைச்சு, நீதி, சிறைச்சாலைகள் மறுசீரமைப்பு மற்றும் சட்ட மறுசீரமைப்பு அமைச்சு, வெளிவிவகார அமைச்சு போன்ற இலங்கையின் முக்கிய அமைச்சுப் பதவிகளை வகித்த முஸ்லிம் அரசியல்வாதி என்பது குறிப்பிடத்தக்கதாகும்.- Vidivelli