ஆறு வருடங்களில் சாதனைகளால் சரித்திரம் படைத்த அஷ்ரப்

By vidivelli Last updated Sep 18, 2024

கலாபூஷணம் ஏ.ஸீ.ஏ.எம். புஹாரி (கபூரி)

கல்முனைக் குடியைச் சேர்ந்த முஹம்மது ஹுசைன் விதானை மற்றும் சம்மாந்துறையைச் சேர்ந்த உமர்லெவ்வை மரைக்கார் மதீனா உம்மா ஆகியோருக்கு 1948 ஒக்டோபர் 23ஆம் திகதி சம்மாந்துறையில் பிறந்த குழந்தைக்கு முஹம்மது அஷ்ரஃப் எனும் பெயர் சூட்டி மகிழ்ந்தனர் பெற்றோர்.
அஷ்ரஃபின் பள்ளிப்பருவம் கல்முனையில் ஆரம்பமாகியது. பின்னர் கொழும்பில் உயர் கல்வியையும், தொழிற் கல்வியையும் கற்றுத் தேர்ச்சியடைந்து பிரபல நாடறிந்த சட்டத்தரணியாகவும், அரச தரப்பு வக்கீலாகவும் அறிமுகமானார்.

இளமைப் பருவத்திலேயே சமூக சேவைகளிலும், அரசியலிலும் ஆர்வமுடன் ஈடுபடத் தொடங்கினார். அன்றைய நாட்களில் முஸ்லிம் தலைமைத்துவம் தேசியக் கட்சிகளின் விருப்பு வெறுப்புக்களை அனுசரித்தே தமது சமூகத்திற்கு ஏற்படும் வேதனைகளையும், சோதனைகளையும் பகிரங்கமாக பாராளுமன்றத்தில் பேசுவதற்கு தயக்கம் காட்டிய காலம். இந்த நிலை இளைஞர் அஷ்ரஃபுக்கு வேதனையை அதிகரிக்கச் செய்தது.

இதனால் இலங்கை முஸ்லிம்களின் மனித உரிமைகளைத் தட்டிக்கேட்க அவர்களுக்கான அரசியல் முகவரியைப் பெற்றுக்கொடுத்து தன்மானத்துடன் தலைநிமிர்ந்து வாழ்வதற்காகவே ஸ்ரீ லங்கா முஸ்லிம் காங்கிரஸ் என்ற கட்சியை 21.09.1980 இல் காத்தான்குடியில் ஆரம்பித்தார்.

அக்கட்சியின் மூலம் முஸ்லிம் மக்கள் மத்தியில் விழிப்புணர்வை ஏற்படுத்தி அரசியல் கட்சியாக அதனைப் பதிந்து மாகாணசபை, பாராளுமன்றத் தேர்தல்களில் முகங்கொடுக்கும் நம்பிக்கையை வளர்த்தெடுத்தார்.

இவரது தைரியம், துணிச்சல், பேச்சாற்றல், உண்மையை உரைத்தல் என்பன மக்கள் மத்தியில் பேசுபொருளாக மாறியபோது கூட்டம் கூட்டமாக மக்கள் கட்சிக்கு ஆதரவு கொடுக்க முன்வந்தனர்.

இக்காலத்தில் இலங்கை, இந்திய அரசுகளினால் கையெழுத்திடப்பட்ட 13வது திருத்தச் சட்டத்திற்கமைய இணைந்த வடகிழக்கு மாகாணத்திற்கான தேர்தல் பிரகடனப்படுத்தப்பட்டது. விடுதலைப் புலிகள் இத்தேர்தலைப் பகிஷ்கரித்தது மட்டுமன்றி இத்தேர்தலில் களமிறங்குவோருக்கு மரண தண்டனை விதிக்கப்படும் என்றும் பயமுறுத்தினர்.

இச்சமயத்தில் அஷ்ரஃபின் விவேகமும், புத்திக் கூர்மையும், தைரியமும் பலரையும் பிரமிக்க வைத்தது. தனது ஆதரவாளர்களை உற்சாகப்படுத்தி, தைரியப்படுத்தி தேர்தல் களத்தில் குதிப்பது என்ற முடிவுக்கு வந்தார்.

இந்தத் தேர்தலில் முஸ்லிம் காங்கிரஸ் 17 ஆசனங்களைப் பெற்றது. வரதராஜப்பெருமாள் முதலமைச்சராகிறார். சேகு இஸ்ஸதீன் எதிர்க்கட்சித் தலைவராகிறார். இச்சபையில் எம்.ரி.ஹஸன் அலி, எம்.வை.எம். மன்சூர், எம்.இஸட். முனாஸ் காரியப்பர், அலி உதுமான், அபுஸாலி, (ஜவாட்) அப்துர்ரஸாக், அஸீஸ், ஜவாத் மரைக்கார், ஆதம்பாவா, அப்துல் மஜீது ஆகியோரும் இன்னும் பலரும் சேர்ந்து 17 பேர் தெரிவாகினர்.

1989 இல் பாராளுமன்றத் தேர்தல் நடைபெற்றது. இத்தேர்தலுக்காக கட்சியின் போராளிகளும், தொண்டர்களும், அபிமானிகளும் வீடுவீடாகச் சென்று ஆயிரத்துக்கு மேற்பட்ட கலந்துரையாடல்களை நடாத்தி அம்பாரை மாவட்டத்தில் நான்கு ஆசனங்களைப் பெறுவது எப்படி? என்று படித்துப் படித்துச் சொல்லிய போதும் முஸ்லிம் காங்கிரஸின் எதிர்ப்பாளர்களால் அப்பிரச்சாரம் முறியடிக்கப்பட்டது.

ஈற்றில் ஐ.தே.க வுக்கு 62,200 வாக்குகளும், முஸ்லிம் காங்கிரஸுக்கு 60,925 வாக்குகளும் சிடைத்தன. இன்னும் 638 பேர் மாத்திரம் முஸ்லிம் காங்கிரஸுக்கு வாக்களித்திருந்தால் இரண்டு ஆசனங்களையும் ஒரு போனஸ் ஆசனத்தையும் பெற்றிருக்கலாம். அதுதான் அல்லாஹ்வின் நாட்டம் போலும்.

அம்பாரை மாவட்டத்தில் தலைவர் அவர்களும், மட்டக்களப்பு மாவட்டத்தில் ஹிஸ்புல்லாஹ்வும், வன்னி மாவட்டத்தில் சுந்தரமூர்த்தி அபூபக்கருடன் தேசியப்பட்டியல் மூலம் என்.எம். புஹார்தீன் ஹாஜியும் தெரிவு செய்யப்பட்டனர்.
பிரேமதாஸ ஜனாதிபதியாகப் பதவி வகித்த காலத்தில் அவரது கட்சியைச் சேர்ந்த சிலரால் அவருக்கெதிராக குற்றப்பிரேரணை (Impeachment) கொண்டு வரப்பட்டபோது அது வெற்றி பெறும் நிலை காணப்பட்டதால் பிரேமதாஸ நிலைகுலைந்தார். இச்சமயத்தில் தலைவர் அஷ்ரஃபிடம் ஆலோசனை கேட்டபோது அந்தக்குற்றப் பிரேரணையில் உள்ள பலவீனங்களைச் சுட்டிக்காட்டி அது தோற்கடிக்கப்பட அஷ்ரஃப் ஆலோசனை கூறினார்.

பாராளுமன்றத்தில் பிரேரணை தோற்கடிக்கப்பட்டபோது மிகவும் உற்சாகமடைந்த ஜனாதிபதி பிரேமதாச அஷ்ரஃபை அழைத்து இதற்கு உங்களுக்கு எப்படி கைமாறு செய்யலாம். நீங்கள் கேட்பவற்றை நான் கொடுக்கின்றேன் என்று கூறியபோது அஷ்ரஃப் கேட்டதெல்லாம் கோடிகளையல்ல, உறவினர்களுக்கு உயர் பதவிகளையோ அல்லது தூதுவர் பதவிகளையோ அல்ல. ஒரேயொரு கோரிக்கைதான். அதுதான் 12.5 வீதம் வெட்டுப்புள்ளி விவகாரம். இதனை 5 வீதமாகக் குறைக்க வேண்டுமென்று அஷ்ரஃப் கேட்டுக்கொண்டபோது பாராளுமன்ற மசோதாவின் மூலம் அது நிறைவேற்றப்பட்டது.

இத்திருத்தத்தினால் முஸ்லிம் காங்கிரஸ் மட்டுமன்றி ஜே.வி.பி., எம்.ஈ.பி, கம்யூனிஸ்ட் போன்ற சகல கட்சிகளுக்கும் வாழ்வு கிடைத்தது. தலைவர் அஷ்ரஃப் அவர்களுக்கு இந்த நாடே நன்றி செலுத்த வேண்டும். நமது ஒற்றுமையின் பயனால் கிடைத்த வாக்குப் பலத்தினால் சுயநல நோக்கங்களை முற்படுத்தாது நமது சமூகத்திற்கும், நாட்டுக்காகவுமே குரல் கொடுத்தார்.

இவ்வாறே நாட்டின் ஜனாதிபதி விரும்பும் போதெல்லாம் பாராளுமன்றத்திற்கு வருகை தந்து உரையாற்ற முடியும் என்ற சட்ட நுணுக்கத்தையும் கூறி அவரை பாராளுமன்றித்தில் உரையாற்ற வைத்தார். ஒரு காலத்தில் சட்ட வல்லுனராக இருந்த ஜி.ஜி. பொன்னம்பலம் அவர்களின் சாதனைகளுக்கு இவரும் சளைத்தவரல்ல என்பதை நிரூபித்தார்.

1993 இன் இறுதிப்பகுதியில் உள்ளூராட்சி மன்றங்களுக்காக நடைபெற்ற தேர்தலில் தலைவர் அஷ்ரஃப் துணிச்சலுடன் ஒரு சவால் விடுத்தார். அம்பாரை மாவட்டத்திலுள்ள முஸ்லிம்கள் செறிந்து வாழும் ஆறு பிரதேச சபைகளான கல்முனை, சம்மாந்துறை, நிந்தவூர், அக்கரைப்பற்று, பொத்துவில், அட்டாளைச்சேனை ஆகியவற்றில் ஒரு பிரதேச சபையிலாவது பெரும்பான்மைப் பலம் முஸ்லிம் காங்கிரஸுக்கு கிடைக்கவில்லை எனில் தனது பாராளுமன்ற உறுப்பினர் பதவியை இராஜினாமாச் செய்வதாக பாராளுமன்றத்திலும், பகிரங்க கூட்டங்களிலும் சூளுரைத்தார்.

தேர்தல் நடந்து முடிந்தது. கல்முனை, சம்மாந்துறை, அட்டாளைச்சேனை, அக்கரைப்பற்று பிரதேச மக்கள் தலைவரின் பாராளுமன்ற உறுப்புரிமையைப் பாதுகாக்கப் போராடி வெற்றி பெற்றனர். ஆனால் நிந்தவூர், பொத்துவில் பிரதேச சபைகளை வெல்ல முடியவில்லை.

தலைவரோ சளைக்கவில்லை. தனது பாராளுமன்ற உறுப்பினர் பதவியைத் துறக்க முஸ்தீபுகளைச் செய்து கொண்டிருந்தபோது பாராளுமன்றத்திலும், வெளியிலும் அரசியல் தலைவர்களும், ஆத்மீகத் தலைவர்களும் இன மத பேதமின்றி நான்கு சபைகளில் வெற்றி பெற்று விட்டீர்களே! நீங்கள் பாராளுமன்றத்தில் இல்லாவிடின் உங்கள் வெற்றிடத்தை யாராலும் நிரப்ப முடியாது. உங்கள் முடிவை மறுபரிசீலனை செய்யுங்கள் என்று வற்புறுத்தினர்.

1994 இல் சம்மாந்துறையில் நடைபெற்ற 14வது வருடாந்த தேசிய மகாநாட்டிற்கு சமுகமளித்திருந்த தமிழர் விடுதலைக் கூட்டணியின் முக்கிய தலைவர்களான சிவசிதம்பரம், சம்மந்தன் ஐயா, இலங்கைத் தொழிலாளர் காங்கிரஸின் தலைவர் தொண்டமான் ஆகியோர் பகிரங்க மேடையில் வைத்து உங்கள் முடிவை மறுபரிசீலனை செய்யுங்கள் என்று கூறியபோது கூடியிருந்த மக்கள் வெள்ளம் அதனை ஆதரித்து, ஆமோதித்து தங்கள் உற்சாகத்தைத் தெரிவித்த போதிலும் இறுதியாகப் பேசிய தலைவர் அவர்கள் சொன்ன, சொல்லைத் தன்னால் மீற முடியாது என்றும் அனைவரும் தன்னை மன்னித்துக் கொள்ளுமாறும் கூறி நாடாளுமன்றப் பதவியை இராஜினாமாச் செய்தார்.

ஒரு துக்கத்திலும் ஒரு சந்தோஷம் கிடைப்பது போல வேட்பாளர் பட்டியலில் அடுத்த நிலையிலிருந்தவரும் சம்மாந்துறைப் பிரதேச கபையின் தவிசாளராகவிருந்த தொப்பி முகைதீன் என்று எல்லோராலும் செல்லமாக அழைக்கப்பட்ட சட்டத்தரணி யூ.எல்.எம். முகைடீன் பாராளுமன்றத்திற்கான உறுப்பினராக சத்தியப்பிரமாணம் செய்கிறார். ஐ.எம். இப்றாஹீம் சம்மாந்துறைப் பிரதேச சபையின் தவிசாளராகப் பாரமெடுக்கிறார்.

அதையடுத்து 1994இல் நடைபெறவிருந்த ஜனாதிபதித் தேர்தலில் சந்திரிகா அம்மையார் களமிறங்கினார். தனது தாயாருக்கும் அஷ்ரஃபுக்கும் இடையே இருந்த காழ்ப்புணர்வை மறந்து செய்த தவறுக்குப் பரிகாரமாக தலைவர் அஷ்ரஃபை தனக்கு ஆதரவளிக்குமாறு வேண்டினார். வேண்டுகோள் ஏற்றுக்கொள்ளப்பட்டது. சத்திரிகா ஜனாதிபதி ஆனார். தலைவர் அஷ்ரஃப் ஆட்சியின் பங்காளியாகி அமைச்சரானார். அவருடன் ரவூப் ஹக்கீம் குழுக்களின் பிரதித்தலைவராகவும், கப்பல்துறை, துறைமுக அபிவிருத்தி புனர்வாழ்வு புனரமைப்பு அமைச்சராக அஷ்ரஃபும் நியமிக்கப்படுகிறார்.

அமைச்சுப்பதவியைப் பாரமெடுத்த நாள் முதல் தனது பணிகளுக்கு ஒத்துழைப்பு நல்கும் அதிகாரிகளையும், உத்தியோகத்தர்களையும் நியமித்து தனது சமூகத்தின் விடிவுக்காக இரவு பகலென்று பாராது திட்டங்களைத் தீட்டி செயற்படுத்துவதில் மும்முரமாக ஈடுபடத் தொடங்கினார். இதன் விளைவாக பின்வரும் சமூக நலத்திட்டங்களை மிகக்குறுகிய காலத்தில் அவரால் செய்ய முடிந்தது.

01. பயங்கரவாத நடவடிக்கைகள் காரணமாக யாழ் பல்கலைக்கழகத்திலும், கிழக்குப் பல்கலைக்கழகத்திலும் தங்களது உயர் கல்வியைத் தொடர முடியாது கஷ்டப்பட்டுக் கொண்டிருந்த மாணவர்களுக்காக மட்டக்களப்பு நகரில் ஒரு வளாகத்தை அமைத்துத் தருமாறு சம்மந்தப்பட்ட சகலரிடமும் வற்புறுத்திக் கேட்டபோதும் கூட மேலிடங்கள் அதை விரும்பாத நிலையில் ஜனாதிபதி சந்திரிகாவின் ஆசீர்வாதத்துடன் தென்கிழக்குப் பல்கலைக்கழகம் என்ற பெயரில் சகல வசதிகளையும் கொண்ட ஒரு பல்கலைக்கழகத்தை ஒலுவில் கிராமத்தில் நிறுவுவதில் வெற்றி கண்டார்.

02. பல்கலைக்கழகத்துக்குப் பக்கத்தில் துறைசார்ந்தவர்களின் ஆலோசனைகளைப் பெற்று பாரிய துறைமுகம் ஒன்றைக் கட்டுவதற்கான நிர்மாணப் பணிகளை மேற்கொண்டார். துறைமுகத்திற்கான வெளிச்ச வீடு ஒன்றையும் நிறுவி மஹாபொல விடுதியையும் அமைத்தார்.

03. துறைமுக அபிவிருத்தி அமைச்சில் ஐயாயிரத்திற்கும் மேற்பட்டவர்களுக்கு இன மத மொழி பாகுபாடின்றி வேலை வாய்ப்புக்களை வழங்கினார்.

04. கிழக்கில் பயங்கரவாத நிகழ்வுகளால் பாதிக்கப்பட்ட அரச ஊழியர் மற்றும் பொது மக்களுக்கான நட்டஈட்டை புனர்வாழ்வு அமைச்சின் மூலம் பெற்றுக்கொடுத்தார்.

05. கிழக்கில் சகல மாவட்டங்களிலும் மாதிரிக் கிராமங்களை அமைத்து பாதிக்கப்பட்ட மக்களுக்கு வீடு, பாடசாலை முதலிய வசதிகளை ஏற்படுத்திக் கொடுத்தார்.

06. தனது செல்வாக்கையும் அறிமுகத்தையும் பாவித்து கொழும்பு கொம்பனி வீதியில் ஏழு அடுக்கு கட்டிடம் ஒன்றை கட்சிக்கான தலைமைக் காரியாலயமாக அமைத்து அதற்கு தாறுஸ்ஸலாம் (சாந்தி இல்லம்) என்ற பெயரையும் சூட்டினார். அதற்குப் பக்கத்தில் உள்ள வளவுகளையும் வாங்கி அதையும் கட்சியின் சொத்தாக ஆக்கினார்.

07. புலிப்பயங்கரவாதிகளால் மனிதாபிமானமற்ற முறையில் வடக்கிலிருந்து முஸ்லிம் மக்களை மாத்திரம் வேறுபடுத்தி உடுத்த உடையுடன் இரவோடிரவாக துரத்தியடித்தபோது கால்நடையாகவே புத்தளம் நகருக்கு புகலிடம் தேடி வந்த மக்களுக்காக மாதிரிக்கிராமங்களையும், வீட்மைப்புத் திட்டங்களையும், பாடசாலைகளையும் அமைத்துக் கொடுத்து அவர்கள் நிம்மதிப் பெருமூச்சுவிட வழிசெய்தார்.

08. கல்முனை நகரை ஒரே வாரத்தில் மாநகர சபையாகத் தரமுயர்த்தினார்.

09. சாய்ந்தமருதூரில் மீன்பிடிப் படகுகளை நிறுத்தி வைக்க துறை ஒன்றை அமைக்க நடவடிக்கை எடுத்தார்.

10. சம்மாந்துறை நகர மத்தியில் அமைக்கப்பட்டிருந்த நீர்த்தாங்கிக்கு நீரைக் கொண்டுவர அவுஸ்திரேலிய அரசுடன் தொடர்பு கொண்டு 3500 மில்லியன் டொலருக்கான நிதியுதவி ஒப்பந்தம் ஒன்றைச் செய்து அம்பாரை மாவட்டம் முழுவதற்குமான குடிநீர் வசதியைப் பெற்றுக்கொடுத்தார். அத்திட்டத்தின் மூன்றாம் கட்ட வேலைதான் இப்போது நடைபெற்றுக் கொண்டிருக்கிறது.

11. பயங்கரவாதத்தின் உச்சக்கட்டம் தலைவிரித்தாடியபோது காரைதீவில் பணிபுரிந்த பொலிஸ் உத்தியோகத்தர்களை இனரீதியாகப் பிரித்து முஸ்லிம் பொலிஸ் உத்தியோகத்தர்கள் 40 பேரையும் காரைதீவு முகாமில் வரிசையாக நிற்கவைத்து மிருகக்குணம் கொண்ட வெறியர்களால் சுட்டுக்கொல்லப்பட்டு ஷஹீதாக்கப்பட்டவர்களுக்கான நஷ்டஈட்டையும், அவர்கள் ஓய்வு பெறும் காலம் வரையான சம்பளத்தையும் வழங்க வைப்பதில் பெரும் பங்காற்றினார்.

12. பயங்கரவாத நடவடிக்கைகளால் கல்முனை வைத்தியசாலைக்குச் சென்று பரிசோதனைகளைச் செய்யவும், வைத்தியர்களைச் சந்தித்து ஆலோசனைகளைப் பெறவும், மருந்துகளைப் பெற்றுக்கொள்ளவும் முடியாத நிலையிலிருந்தபோது சாய்ந்தமருது வைத்தியாலைக்கு சில பிரிவுகளை இடமாற்றம் செய்து அதையும் தரமுயர்த்தலாம் என்ற ஆலோசனை உரியவர்களிடம் முன்வைக்கப்பட்டபோது அதுவும் நிராகரிக்கப்பட்ட காரணத்தினால் மடுவம் என அழைக்கப்பட்ட ஆயுர்வேத வைத்தியசாலை அமைந்திருந்த இடத்தில் புதிதாக வைத்தியசாலை ஒன்றை நிறுவ நடவடிக்கை மேற்கொண்டார். அதுவே இன்று அஷ்ரஃப் ஞாபகார்த்த வைத்தியசாலை (ஏ.எம்.எச்) என்ற பெயரில் தலைநிமிர்ந்து நிற்கிறது.

13. வட கிழக்கு முஸ்லிம்களின் பாதுகாப்பிற்காக 500 ஊர்காவற் படையினரை நியமித்து அவர்களுக்கு சட்டரீதியான ஆயுதங்களை வழங்கி பாதுகாப்பை உறுதிப்படுத்த நடவடிக்கைகளை மேற்கொண்டார்.

இவ்வாறான பல வேலைத்திட்டங்களை நமது சமூகத்திற்காகவும், நாட்டிற்காகவும் ஆறே ஆறு வருடங்களில் செய்து முடித்து சாதனை படைத்த மாபெரும் தலைவனை செயலிழக்கச்செய்வதில் பயங்கரவாதம் வெற்றி பெற்றது. ஹெலிகொப்டர் விபத்தில் அத்தலைவன் நம்மை விட்டுப் பிரிந்து விட்டார். இன்று நாம் அனாதைகளாக ஆக்கப்பட்டு நாதியற்ற சமூகமாக பழைய நிலைக்கே வந்து விட்டோம்.

2000ஆம் ஆண்டு செப்டெம்பர் மாதம் 16ஆம் திகதி நம்மை விட்டுப் பிரிக்கப்பட்டு 24 ஆண்டுகள் ஆகின்றன. அவரது மறைவுக்குப் பின்னர் சமூகத்தின் விடிவுக்காக உருவாக்கப்பட்ட கட்சியின் சாதனைகள் என்ன? சிந்திப்போமா? அஷ்ஷஹீத் அஷ்ரஃப் அவர்களுக்கு அல்லாஹ் அனைத்து நலன்களையும் வழங்குவானாக!- Vidivelli