சஜித் – ரணில் டீல் தொடர்பில் கபீர் வெளிப்படுத்த வேண்டும்
ரிஷாதும் ஆனந்த சாகர தேரரும் ஒரே மேடையில் என சாடுகிறார் அனுர
(எம்.வை.எம்.சியாம்)
நாம் ஒருபோதும் டீல் அரசியல் செய்யவில்லை. ரணிலும் சஜித்துமே டீல் அரசியல் செய்கிறார்கள். இது தொடர்பில் கபீர் ஹாசீம் உண்மையை வெளிப்படுத்த வேண்டும் என தேசிய மக்கள் சக்தியின் ஜனாதிபதி வேட்பாளர் அனுரகுமார திசாநாயக்க தெரிவித்தார்.
அத்துடன், வில்பத்து காட்டை அழித்தவர் எனக்குற்றஞ்சாட்டி ரிஷாத் பதியுதீனுக்கு எதிராக சி.ஐ.டிக்கு சென்ற ஆனந்த சாகர தேரர் இன்று சஜித்துக்கு ஆதரவாக செயல்படுகிறார். குற்றஞ்சாட்டப்பட்ட ரிஷாத் பதியுதீனும் ஒரே மேடையில் நிற்கிறார் எனவும் சுட்டிக்காட்டிய அனுர, இனவாதத்துக்கு இணங்காத அரசியல் மேடை எமதாகும். எனவே நல்லவர் யார் தீயவர் யார்? என்பதை மக்கள் சிந்தித்து தீர்மானம் எடுக்க வேண்டும் எனவும் தெரிவித்தார்.
கேகாலையில் நேற்று முன்தினம் பிற்பகல் இடம்பெற்ற தேர்தல் பிரசார கூட்டத்தில் கலந்து கொண்டு உரையாற்றும் போதே அவர் இவ்வாறு தெரிவித்தார்.
அங்கு அவர் மேலும் உரையாற்றுகையில், கோட்டாபயவின் ஆட்சியின் போது அமைச்சராக இருந்து பங்குச் சந்தையில் பணத்தை விரயம் செய்தவர் இன்று சஜித் பிரேமதாசவுடன் இருக்கிறார். கீதா குமாரசிங்கவுக்கு கடந்த வாரம் ரணில் விக்கிரமசிங்க சிறந்தவர், இந்த வாரம் சஜித் சிறந்தவர். ஆனமடுவையில் ஆசிரியர் ஒருவரை அடித்து மண்டியிடச்செய்தவரும் இன்று சஜித்துடன் இருக்கிறார். வில்பத்து காட்டை அழித்தவர் எனக்குற்றஞ்சாட்டி ரிஷாத் பதியுதீனுக்கு எதிராக சி.ஐ.டிக்கு சென்ற ஆனந்த சாகர தேரர் இன்று சஜித்துக்கு ஆதரவாக செயற்படுகிறார். குற்றச்சாட்டப்பட்ட ரிஷாத்தும் ஒரே மேடையில் நிற்கிறார். அர்ஜுனவும் திலங்க சுமத்திபாலயும் அந்த பக்கம் ஒன்றாக நிற்கின்றனர். ஒரு மாதத்துக்கு முன்னர் சஜித்துக்கு நையாண்டி செய்த சம்பிக்க ரணவக்க இன்று அவருடன் உள்ளார்.
ஆனால் ஒரே கொள்கையை கொண்டுள்ள அரசியல் கட்சி தேசிய மக்கள் சக்தியாகும். நாம் இதுவரை இந்த பாராளுமன்றத்தில் எந்தவொரு ஊழலிலும் மோசடியிலும் ஈடுபடவில்லை. மொட்டுக் கட்சியின் இனவாதத்துக்கு இணங்காத அரசியல் மேடை எமதாகும். யார் நல்லவர்? யார் தீயவர்? என்பதை சிந்தித்து தீர்மானம் எடுங்கள்.
நாமும் ரணிலும் ஒப்பந்தம் செய்து கொண்டுள்ளதாக சஜித் பிரேமதாச கூறுகிறார். உண்மையில் ரணிலும் சஜித்துமே டீல் அரசியல் செய்கிறார்கள். இவர்கள் இருவரும் பகலில் சந்தித்து டீல் பேசிக்கொள்கிறார்கள். இது தொடர்பில் கபீர் ஹாசீம் உண்மையை கூற வேண்டும்.
அண்மையில் அவர்கள் சந்தித்து பேச்சு நடத்தினார்கள். தலதாவுடன் சந்தித்தார்கள். இவர்கள் அனைவரும் ஒன்றோடு ஒன்றாக இருக்கிறார்கள்.
எனவே மக்களுக்கு நல்ல சந்தர்ப்பம் கிட்டியுள்ளது. பகலிலும் இரவிலும் சந்தித்து டீல் கதைத்தவர்களையும் ஊழல் மோசடி செய்தவர்களையும் மதுபான அனுமதிப்பத்திரங்களை பெற்றுக்கொண்டவர்களையும் எரிபொருள நிரப்பு நிலையங்களை பகிர்ந்துகொண்டவர்களையும் ஒன்றாக வீட்டுக்கு அனுப்ப நல்ல சந்தர்ப்பம் உருவாகியுள்ளது.
எனவே, எதிர்வரும் 21 ஆம் திகதி சிந்தித்து செயல்படுங்கள் என்றார்.– Vidivelli