ரஸீன் ரஸ்மின்
முன்னாள் பாராளுமன்ற உறுப்பினரும், ஜனாதிபதி வேட்பாளருமான டாக்டர் ஐதுரூஸ் முஹம்மது இல்யாஸ் கடந்த வியாழக்கிழமை இரவு காலமானார்.
வைத்தியர் இன்திகாப், புத்தளம் நகர சபையின் முன்னாள் உறுப்பினர்கள் ஜமீனா கமருதீன் மற்றும் பஸ்மியா ஆகிய மூன்று பிள்ளைகளின் தந்தையான இவர், மரணிக்கும் போது வயது 79 ஆகும்.
கடந்த திங்கட்கிழமை (19) திடீரென சுகயீனமடைந்த ஜனாதிபதி வேட்பாளரான ஐதுரூஸ் முஹம்மது இல்யாஸ், புத்தளம் தள வைத்தியசாலையில் சிகிச்சைக்காக அனுமதிக்கப்பட்டு சிகிச்சை பெற்றுவந்த நிலையில், வியாழன் இரவு காலமானதாக தெரிவிக்கப்படுகிறது.
ஸ்ரீலங்கா முஸ்லிம் காங்கிரஸ் ஊடாக தனது அரசியல் பிரவேசத்தை ஆரம்பித்த இவர், அந்தக் கட்சியின் உருவாக்கத்திற்கு மு.கா ஸ்தாபகத் தலைவரான மர்ஹூம் எம்.எச்.எம்.அஷ்ரபுடன் இணைந்து மிகத் தீவிரமாக செயற்பட்டார்.
இலங்கையில் போர் தீவிரமடைந்த காலங்களில் வடமாகாண சபைத் தேர்தலில் போட்டியிட்டு உறுப்பினராக தெரிவானது மாத்திரமன்றி, ஸ்ரீலங்கா முஸ்லிம் காங்கிரஸின் யாழ். மாவட்ட பாராளுமன்ற உறுப்பினராகவும் தெரிவானார்.
மாத்திரமன்றி, இலங்கை – ஈரான் ஆகிய நாடுகளுக்கிடையில் நட்புறவை பேணி வருவதற்கும் டாக்டர் ஐதுருஸ் முஹம்மது இல்யாஸ் மரணிக்கும் வரை செயற்பட்டு வந்தார்.
அரசியல் செயல்பாடுகளில் முதிர்ச்சியடைந்த இவர், தேசிய அரசியல் கட்சிகளுடனும், கட்சித் தலைவர்களுடனும் மிகவும் நெருக்கமான உறவையும் பேணி வந்துள்ளார்.
புத்தளத்தில் அனுபவம் வாய்ந்த வைத்தியரான இவர், புத்தளத்தில் இலவச மருத்துவ சேவைகளையும் முன்னெடுத்து வந்துள்ளார்.
அத்துடன், புத்தளத்தில் பல சமூகம் சார்ந்த போராட்டங்களில் தலைமை வகித்துள்ளதுடன், 2022 ஆம் ஆண்டு கொழும்பு குப்பைகளை புத்தளம் அருவக்காட்டில் கொட்டுவதற்கு அப்போதைய அரசு ஏற்பாடுகள் செய்த போது, அதற்கு எதிராக புத்தளத்தில் நடத்தப்பட்ட போராட்டங்களில் கலந்துகொண்ட இவர், சுழற்சி முறையிலான உணவு தவிர்ப்பு போராட்டத்தினையும் ஆரம்பித்து வைத்து எதிர்ப்பை வெளிக்காட்டினார்.
ஈரானிய மக்கள் அகிம்சை வழியில் போராடி வெற்றிபெற்றதைப் போல, மகாத்மா காந்தி உப்பு சத்தியாகிரகத்தை முன்னெடுத்து இந்தியாவுக்கு சுதந்திரத்தை பெற்றுக் கொடுத்ததைப் போல புத்தளம் மக்களும் அகிம்சை வழியில் போராடி தமது உரிமைகளை பெற்றுக்கொள்ள வேண்டும் என்று இவர் அடிக்கடி கூறிவந்தார்.
2010 ஆம் ஆண்டு, 2015 ஆம் ஆண்டுகளில் ஜனாதிபதித் தேர்தலில் போட்டியிட்ட இவர் இம்முறை ஜனாதிபதித் தேர்தலிலும் சுயேட்சை வேட்பாளராக களமிறங்கியிருந்தார்.
1979 ஆம் ஆண்டு ஈரானில் ஏற்பட்ட இஸ்லாமிய புரட்சியின் பிரதிபலிப்பாக இலங்கையில் அந்தப் போராட்டத்தை அவர் ஆதரித்தார்.
மக்களோடு மக்களாக வாழ்ந்து, தேர்தல் காலங்களைத் தவிர பெரும்பாலும் இலை மறை காயாக அவர் இருந்த போதிலும், அவரிலிருந்து புரட்சிகரமான எண்ணம் எப்பொழுது புறப்படுகிறது என்பது பலருக்கு விசித்திரமாக இருந்திருக்கிறது. அதனாலேயே அவரை வித்தியாசமான அரசியல்வாதியொருவராக நான் பார்க்கிறேன். மக்கள் மத்தியில் சர்வ சாதாரணமாக நடந்து கொள்ளும் அவர் காலத்திற்கு காலம் ஏற்படும் அரசியல், சமூக எழுச்சியினால் ஏற்படும் விழிப்புணர்ச்சியினாலும் தன்னைத் தானாகவே புடம் போட்டுக்கொண்டு, புதுமையைப் புகுத்தியவராக இருந்திருக்கிறார்.
மாவட்ட சபை தேர்தல், மாகாண சபை தேர்தல் ஆகியவற்றில் மட்டுமல்ல 1994 ஆம் ஆண்டில் ஸ்ரீலங்கா முஸ்லிம் காங்கிரஸ் ஊடாக யாழ்ப்பாண மாவட்டத்தில் பாராளுமன்ற தேர்தலிலும் போட்டியிட்டு அவர் வெற்றிபெற்றார்.
ஜனாதிபதி தேர்தலில் வேட்பாளர் ஒருவராக இம்முறையும் களமிறங்கியிருந்த டாக்டர் ஐதுரூஸ் முகம்மது இல்யாஸ் ஒரு புரட்சிகரமான அரசியல்வாதியாக பலராலும் நோக்கப்படுகிறார்.
அன்னாரது மரணம் புத்தளம் மாவட்டத்தில் உள்ள மூவின மக்கள் மத்தியில் மாத்திரமன்றி, அரசியல் தலைவர்கள் மத்தியிலும் பெரும் அதிர்ச்சியை ஏற்படுத்தியுள்ளது.
அன்னாரின் ஜனாஸா கடந்த வெள்ளிக்கிழமையன்று புத்தளம் மஸ்ஜிதுல் பகா முஸ்லிம் மையவாடியில் நல்லடக்கம் செய்யப்பட்டது.
துணிச்சல்மிக்க அரசியல்வாதி ஒருவரை புத்தளம் முஸ்லிம்கள் மட்டுமல்ல, இலங்கை வாழ் முஸ்லிம்கள் இழந்திருப்பதாக டாக்டர் ஐ.எம். இல்யாஸின் மறைவு குறித்து, ஸ்ரீலங்கா முஸ்லிம் காங்கிரஸ் தலைவர் பாராளுமன்ற உறுப்பினர் ரவூப் ஹக்கீம் வெளியிட்டுள்ள அனுதாபச் செய்தியில் குறிப்பிட்டுள்ளார். இவ்வாறான பல்துறை ஆளுமையின் இழப்பு உண்மையிலேயே கவலைக்குரியது. அன்னாருக்கு எல்லாம் வல்ல அல்லாஹ் மேலான ஜன்னத்துல் பிர்தௌஸ் எனும் சுவன பாக்கியத்தை வழங்குவானாக!
அவரது மறைவினால் துயருற்றிருக்கும் குடும்பத்தினருக்கும், உறவினர்களுக்கும், புத்தளம் வாழ் மக்களுக்கும் மன ஆறுதலை வழங்குவானாக!– Vidivelli