சவூதி அரேபியாவின் மக்கா நகரில் நடைபெற்ற சர்வதேச அல்குர்ஆன் மனனப் போட்டியில் இலங்கையை பிரதிநிதித்துவப்படுத்தி கலந்து கொண்ட காத்தான்குடி ஜாமிஅதுல் பலாஹ் கலாபீட ஷரீஆப் பிரிவு மாணவர் அல்ஹாபிழ் ஏ.ஆர்.எம். ஷிபாக் இறுதிச் சுற்றுவரை முன்னேறி சாதனை படைத்துள்ளார். ஆறு வருடங்களுக்குப் பின்னர் இலங்கை மாணவர் ஒருவர் இப் போட்டியின் இறுதிச் சுற்று வரை முன்னேறியிருக்கின்றமை குறிப்பிடத்தக்கதாகும்.
புனித குர்ஆனை மனனம் செய்தல், ஓதுதல் மற்றும் தப்சீர் விளக்கமளித்தல் என்பவற்றுக்கான மன்னர் அப்துல் அஸீஸ் சர்வதேச அல் குர்ஆன் போட்டியின் 44வது அமர்வு கடந்த 8 ஆம் திகதி முதல் 15 ஆம் திகதி வரை சவூதி அரேபியாவில் நடைபெற்றது.
இரண்டு புனித தலங்களின் பாதுகாவலர் மன்னர் சல்மான் தலைமையில் நடைபெற்ற இப்போட்டியில், 123 நாடுகளில் இருந்து 174 போட்டியாளர்கள் கலந்து கொண்டனர். இப் போட்டியில் வெற்றி பெற்றவர்களுக்கு மொத்தம் 4 மில்லியன் ரியால் பரிசுத் தொகை பகிர்ந்தளிக்கப்பட்டது. சவூதியின் இஸ்லாமிய விவகாரங்கள், அழைப்பு மற்றும் வழிகாட்டல் அமைச்சினால் இந்தப் போட்டி ஏற்பாடு செய்யப்பட்டிருந்தது.
மக்கா ஹரம் ஷரீபில் நடைபெற்ற இப் போட்டியின் நிறைவு விழாவில் இளவரசர்கள், அமைச்சர்கள், அறிஞர்கள், அரபு மற்றும் இஸ்லாமிய நாடுகளின் தூதுவர்கள், அரச அதிகாரிகள் மற்றும் மக்கா புனித பள்ளிவாசலின் இமாம்கள் என பலர் கலந்து கொண்டனர்.
இந் நிகழ்வில் உரையாற்றிய இஸ்லாமிய விவகாரங்கள், அழைப்பு மற்றும் வழிகாட்டல் அமைச்சர் ஷேக் அப்துல் லதீப் அல்-ஷேக், புனித குர்ஆனை ஓதுதல் மற்றும் மனனம் செய்வதை ஊக்குவிப்பதில் சவூதி அரேபியா கொண்டுள்ள அக்கறையை இந்தப் போட்டி உறுதிப் படுத்துகிறது என்றார்.
இலங்கை சார்பில் பங்குபற்றிய அல்ஹாபிழ் ஏ.ஆர்.எம். ஷிபாக் சென்ற வருடம் இலங்கைக்கான சவூதி அரேபிய தூதரகமும் முஸ்லிம் சமய பண்பாட்டு அலுவல்கள் திணைக்களமும் இணைந்து முதன் முறையாக தேசிய ரீதியில் நடாத்திய அல்குர்ஆன் மனனப் போட்டியில் வெற்றியீட்டியதுடன் இவ்வருடம் நடைபெற்ற மாகாண ரீதியிலான மற்றுமொரு போட்டியிலும் முதல் நிலை பெற்றிருந்தார்.
இம்மாணவர் சர்வதேச போட்டியில் பங்கு பற்றுவதற்கான வழிகாட்டல்களை முஸ்லிம் சமய பண்பாட்டு அலுவல்கள் திணைக்கள அதிகாரிகள் வழங்கியிருந்தனர்.
சவூதி அரேபியாவில் நடைபெற்ற சர்வதேச போட்டியில் பங்கேற்று நாடுதிரும்பிய அல்ஹாபிழ் ஏ.ஆர்.எம். ஷிபாக் அவர்களை இலங்கைக்கான சவூதி அரேபிய தூதுவர் காலித் பின் ஹமூத் அல் கஹ்தானி கடந்த திங்கட்கிழமை கொழும்பிலுள்ள சவூதி தூதரகத்திற்கு அழைத்து கெளரவித்தார். மாணவரின் எதிர்கால வெற்றிகளுக்காக பிரார்த்தித்த தூதுவர் எதிர்காலத்தில் சவூதி அரேபியாவில் உயர் கல்வியைத் தொடர்வதற்கான வாய்ப்புகள் குறித்தும் ஆலோசனை வழங்கினார். அதேபோன்று முஸ்லிம் சமய பண்பாட்டலுவல்கள் திணைக்கள பணிப்பாளர் எம்.எஸ்.எம்.நவாஸ் இம் மாணவரை அழைத்து தனது வாழ்த்துக்களைப் பரிமாறினார். இந் நிகழ்வில் திணைக்கள அதிகாரிகளும் கலந்து கொண்டனர்.
அல்ஹாபிழ் ஏ.ஆர்.எம். ஷிபாக் அவர்களுக்கு இந்த வாய்ப்பை வழங்கியமைக்காக இலங்கைக்கான சவூதி அரேபிய தூதுவர் காலித் பின் ஹமூத் அல் கஹ்தானி அவர்களுக்கும் முஸ்லிம் சமய பண்பாட்டலுவல்கள் திணைக்களத்திற்கும் காத்தான்குடி ஜாமிஅதுல் பலாஹ் அரபுக் கல்லூரி நிர்வாகம் தமது நன்றிகளைத் தெரிவித்துள்ளது.– Vidivelli