ஜனாதிபதித் தேர்தல் பிரசாரம் சூடுபிடித்திருக்கும் நிலையில் இம்முறை முஸ்லிம் சமூகத்தின் வாக்குகளைக் கவர்வதற்கான பாரிய பிரயத்தனங்களை பிரதான வேட்பாளர்கள் முன்னெடுத்து வருகின்றனர். அதில் முக்கிய இடம்பிடித்திருப்பது முஸ்லிம்களின் ஜனாஸா எரிப்பு விவகாரமாகும்.
தேர்தலுக்கு முன்னராகவே கொவிட் 19 தொற்றினால் உயிரிழந்த முஸ்லிம்களின் ஜனாஸாக்களை எரித்தமைக்காக மன்னிப்புக் கோரும் தீர்மானத்திற்கு அமைச்சரவை அங்கீகாரமளித்த விவகாரம் மிகுந்த கவனயீர்ப்பைப் பெற்றிருந்தது. இந்நிலையில் தற்போது தேர்தல் பிரசாரத்தில் ஈடுபடும் பிரதான வேட்பாளர்களான ஜனாதிபதி ரணில் விக்ரமசிங்க, எதிர்க்கட்சித் தலைவர் சஜித் பிரேமதாச மற்றும் தேசிய மக்கள் சக்தியின் தலைவர் அநுரகுமார திசாநாயக்க என அனைவருமே இந்த விவகாரத்தைப் பேச ஆரம்பித்துள்ளனர்.
நேற்று முன்தினம் உலமா சபைக்கு விஜயம் செய்த ஜனாதிபதி இந்த விவகாரம் தொடர்பில் பாராளுமன்ற தெரிவுக்குழு அமைத்து விசாரணைகளை முன்னெடுக்க நடவடிக்கை எடுப்பேன் என வாக்குறுதியளித்திருக்கிறார். இதேபோன்றுதான் சஜித் பிரேமதாசவும் ஜனாஸாக்களை எரிக்க காரணமாக இருந்தவர்கள் சட்டத்தின் முன் நிறுத்தப்படுவார்கள் எனக் குறிப்பிட்டிருக்கிறார். அநுரகுமார திசாநாயக்க சார்பில் கருத்து வெளியிட்டுள்ள அக் கட்சியின் சிரேஷ்ட பிரமுகர் பிமல் ரத்நாயக்கவும் தமது ஆட்சியில் இதற்கு காரணமானவர்களுக்கு எதிராக சட்ட நடவடிக்கை எடுக்கப்படும் எனக் கூறியிருக்கிறார்.
பிரதான வேட்பாளர்களுக்கு ஆதரவு வழங்கும் முஸ்லிம் கட்சிகளும் முஸ்லிம் அரசியல் பிரதிநிதிகளும் இந்த விடயத்தையே வலியுறுத்தி வருகின்றனர்.
இவ்வாறு முஸ்லிம் சமூகத்தை நோக்கி இந்த விடயத்தில் வேட்பாளர்கள் தமது வாக்குறுதிகளை அள்ளி வீசி வருகின்றனர். இவை வெறுமனே காற்றில் அள்ளுண்டு செல்லும் தேர்தல் கால வாக்குறுதிகளாகவன்றி உண்மையில் நடைமுறைக்கு வர வேண்டும் என்பதே அனைவரதும் எதிர்பார்ப்பாகும்.
முதன் முறையாக அரசாங்கம் எத்தனை முஸ்லிம்களின் ஜனாஸாக்கள் எரிக்கப்பட்டன என்ற உத்தியோகபூர்வ எண்ணிக்கையை அண்மையில் வெளியிட்டது. இதற்கமைய மொத்தமாக 276 ஜனாஸாக்கள் எரிக்கப்பட்டுள்ளன.
நீர்வழங்கல் வடிகாலமைப்பு அமைச்சினால் முன்னெடுக்கப்பட்ட இரண்டு வெவ்வேறான ஆய்வுகளில் கண்டறியப்பட்டதற்கமைவாகவே நிலத்தடி நீர் மூலம் கொவிட் வைரஸ் பரவாது என்ற உண்மையை இலங்கை அரசாங்கம் உத்தியோகபூர்வமாக நிறுவியுள்ளது. அதற்கமைவாகவே கட்டாயமாக தகனம் செய்யப்பட்டமைக்காக முஸ்லிம்களிடம் மன்னிப்பும் கோரியுள்ளது.
தவறை உணர்ந்து மன்னிப்புக் கோருவது வரவேற்கத்தக்க விடயம் என்ற போதிலும் இங்கு இடம்பெற்றிருப்பது தவறு அல்ல. மாறாக வேண்டுமென்றே முஸ்லிம்களைப் பழி தீர்க்க எடுக்கப்பட்ட தீர்மானமே கட்டாய தகனக் கொள்கை என்பது தற்போது நிரூபணமாகியுள்ளது. அந்த வகையில் இத்தீர்மானத்தை எடுப்பதற்கு காரணமாகவிருந்த நிபுணர் குழு இது விடயத்தில் எவ்வாறு பொறுப்புக்கூறலுக்கு உள்ளாக்கப்படும் என்ற கேள்விக்கு அரசாங்கம் பதில் தர வேண்டியது அவசியமாகும். இந்த கோரிக்கைக்கு விடை காண்பதில் அரசியல் கட்சிகள், சிவில் சமூக நிறுவனங்கள், உலமாக்கள் என சகலரும் கைகோர்த்துச் செயற்பட வேண்டும்.- Vidivelli