ரணிலின் திட்டங்களை கைவிடின் நாடு மீண்டும் வீழ்ந்துவிடும்
எதிர்காலம் குறித்து முஸ்லிம்கள் சிந்திக்க வேண்டும் என்று முஸ்லிம் உறுப்பினர்கள் கூட்டாக வலியுறுத்து
(எம்.வை.எம்.சியாம்)
எவராலும் தீர்க்க முடியாமல் போன பொருளாதார நெருக்கடியை தீர்க்க ஜனாதிபதி ரணில் விக்கிரமசிங்கவினால் முடிந்துள்ளதாக தெரிவித்துள்ள ஜனாதிபதி விக்கிரமசிங்கவை ஆதரிக்கும் முஸ்லிம் பாராளுமன்ற உறுப்பினர்கள், சரியான பொருளாதார வேலைத்திட்டத்தை இடைநடுவில் கைவிட்டால் நாடு மீண்டும் வீழ்ச்சியடையும் என்றும் எச்சரிக்கை விடுத்துள்ளனர்.
அத்துடன் முஸ்லிம் மக்கள் எதிர்காலம் குறித்து சிந்தித்து எதிர்வரும் ஜனாதிபதித் தேர்தலில் ஜனாதிபதி விக்கிரமசிங்கவுக்கு ஆதரவு வழங்க வேண்டும் என்று கூட்டாக வலியுறுத்தியுள்ளனர்.
ஜனாதிபதி விக்கிரமசிங்கவை ஆதரிக்கும் முஸ்லிம் பாராளுமன்று உறுப்பினர்களின் விசேட ஊடகவியலாளர் சந்திப்பு நேற்று கொழும்பில் இடம்பெற்றது.
இந்த ஊடக சந்திப்பில் ஜனாதிபதி விக்கிரமசிங்கவை ஆதரிக்கும் வெளிவிவகாரம் மற்றும் நீதித்துறை அமைச்சர் அலி சப்ரி, இராஜாங்க அமைச்சர் காதர் மஸ்தான், பாராளுமன்ற உறுப்பினர்களான எஸ்.எம்.எம்.முஷர்ரப், இஷாக் ரஹ்மான், அலி சப்ரி ரஹீம், ஏ.எச்.எம்.பௌசி மற்றும் அலி சாஹிர் மௌலானா ஆகியோர் கலந்துகொண்டே இவ்வாறு தெரிவித்தனர்.
அங்கு உரையாற்றிய அமைச்சர் அலி சப்ரி குறிப்பிடுகையில்,
நாம் தீர்க்கமான தருணத்துக்கு வந்துள்ளோம். அத்துடன் நாட்டின் அரசியல் கலாசாரமும் மாற்றமடைந்துள்ளது. முஸ்லிம் மக்கள் மற்றும் முஸ்லிம் சமூகத்தை பிரதிநிதித்துவப்படுத்தும் தலைவர்கள் என்ற ரீதியில் எமது தேவை என்ன? எமக்கு எது அவசியம் என சிந்திக்க வேண்டும். அமைதி மற்றும் அனைத்து இனங்களும் மதங்களும் புரிந்துணர்வுடன் ஒற்றுமையாக வாழக்கூடிய நிம்மதியான சூழல் என்பனவே அவசியப்படுகிறது.
கடந்த இரண்டு வருடங்களுடன் ஒப்பிடும் போது தற்போதைய ஜனாதிபதி ரணில் விக்கிரசமசிங்கவின் வேலைத்திட்டங்கள் தொடர்பில் மக்கள் மத்தியில் நம்பிக்கை கட்டியெழுப்பட்டுள்ளது. அத்துடன் வங்குரோத்து அடைந்த நாட்டின் பொருளாதாரத்தை நிலைநிறுத்திய ஜனாதிபதி மீண்டும் இரண்டாவது முறையாக ஜனாதிபதியாக தெரிவு செய்ய எதிர்பார்த்துள்ளனர்.
எனவே வீழ்ச்சியடைந்த நாட்டை கட்டியெழுப்பும் பயணத்தை இடைநடுவில் நிறுத்தி விட்டு மீண்டும் நாம் ஏன் புதிய ஒருவருக்கு அந்த பொறுப்பை ஒப்படைக்கவேண்டும் என்று சிந்திக்கவேண்டும் என்றார்.
இராஜாங்க அமைச்சர் காதர் மஸ்தான் குறிப்பிடுகையில்,
எதிர்வரும் ஜனாதிபதித்தேர்தல் ஒத்திகை பார்க்கும் தேர்தல் அல்ல. சீர்குலைந்த நாட்டின் பொருளாதாரம் தற்போது கட்டியெழுப்பட்டு பாதுகாக்கப்பட்டு வருகிறது.மீண்டும் அனுபவமற்ற தலைவர்களிடம் நாட்டை ஒப்படைத்து விட்டு மீண்டும் பழைய நிலைமைக்கு செல்ல முடியாது.எனவே நாட்டு மக்கள் நிம்மதியாகவும் சுபீட்சமாகவும் வாழக்கூடிய சூழலை உருவாக்கக்கூடிய அனுபவமிக்க தலைவர் ஒருவரிடம் நாட்டை ஒப்படைக்கவேண்டிய பொறுப்பு எமக்குள்ளது.
எனவே தான் நாம் எதிர்வரும் ஜனாதிபதித்தேர்தலில் ரணில் விக்கிமரசிங்கவுக்கு ஆதரவு வழங்க தீர்மானித்தோம்.இந்த தீரமானத்தை தனித்து நாம் எடுக்கவில்லை.மக்களின் கருத்துக்களையும் உள்ளடக்கி அவர்களின் வேண்டுகோளுக்கு இணங்கவே நாட்டின் நன்மைக்காகவே இந்த தீர்மானத்தை எடுத்தோம்.அவரின் வெற்றிக்காக அர்ப்பணிப்புடன் கிராமப்புறங்களில் இருந்து எமது பிரசார நடவடிக்கைகளை முன்னெடுப்போம் என்றார்.
அகில இலங்கை மக்கள் காங்கிரஸின் பாராளுமன்ற உறுப்பினர் முஷாராப் குறிப்பிடுகையில்,
நாட்டு மக்கள் தற்போது மிகத்தெளிவாக இருக்கிறார்கள். தமிழ் மக்களும் சரி முஸ்லிம் மக்களும் சரி மிகச்சரியான பாதையிலேயே பயணித்துக்கொண்டிருக்கிறார்கள்.எனவே இந்த பயணத்தை இதே பாதையில் தொடர்ச்சியாக செல்வதா அல்லது பாதையை மாற்றி மீண்டும் பின்னால் செல்வதா என்பதில் தெளிவாக இருக்கின்றனர்.கட்சிகளும் சரி கட்சித் தலைமைகளும் சரி எடுக்கும் தீர்மானங்களுக்கு கட்டுப்படும் கலாசாரம் மாறியுள்ளது.
மக்கள் மத்தியில் இன்னமும் பயமிருக்கிறது.ரணில் தவிர்ந்த எவர் ஆட்சிக்கு வந்தாலும் அவர்களால் நாட்டை ஒரு குறுகிய காலத்துக்கு மாத்திரமே கொண்டு செல்ல முடியும்.புதியவர்களிடம் நாட்டை ஒப்படைப்பதால் எதிர்காலத்தில் பாரதூரமான நெருக்கடிகளை சந்திக்க நேரிடும்.எனவே மக்கள் ஜனாதிபதி ரணிலை வெற்றியடையச் செய்ய மிகத் தெளிவாக இருக்கிறார்கள்.
ஜனாதிபதி ரணில் விக்கிரமசிங்கவின் வெற்றிக்காக எதிர்க்கட்சியின் பாராளுமன்ற உறுப்பினர் தலதா அத்து கோரல தனது பாராளுமன்ற உறுப்புரிமையை தியாகம் செய்வாராயின் நாம் கட்சிக்காகவும் தலைமைகளின் தீர்மானங்களுக்காவும் கட்டுப்பட்டு நாட்டை படுகுழிக்குள் தள்ளக்கூடாது.அவர் மனசாட்சிக்கு ஏற்ப செயற்பட்டுள்ளார்.
முஸ்லிம் காங்கிரஸ் மற்றும் அகில இலங்கை மக்கள் காங்கிரஸ் தலைவர்கள் எடுத்துள்ள தீர்மானத்தை நாம் பெரிதாக எடுத்துக்கொள்ள வேண்டியதில்லை.சஜித் பிரேமதாச எழுதிக்கொடுப்பதை வாசிப்பவர்.அவரை ஜனாதிபதியாக தெரிவு செய்வது என்பது மற்றுமொரு கோட்டாபய ராஜபக்ஷவை ஜனாதிபதியாக தெரிவு செய்வதைப் போன்றது என்றார்.
முஸ்லிம் காங்கிரஸின் பிரதித்தலைவரும் பாராளுமன்ற உறுப்பினருமான அலி சாஹிர் மௌலானா கருத்து தெரிவிக்கையில்,
நிறைவேற்று அதிகாரம் கொண்ட ஜனாதிபதி ஒருவரை தெரிவு செய்யப்போகும் ஒருவர் அந்த பதவிக்கு பொருத்தமான ஒருவரா என்பதை சிந்திக்க வேண்டும். அவர் வீழ்ந்த நாட்டையும் பொருளாதாரத்தையும் கட்டியெழுப்பி மீண்டும் முன்னோக்கி கொண்டு செல்லக்கூடிய ஒருவராகவும் சர்வதேச சமூகம் ஏற்றுக் கொண்ட அனுபவம் மிக்க ஒருவராகவும் இருக்க வேண்டும்.
இந்த அனைத்து தகைமைகளையும் ஜனாதிபதி ரணில் விக்கிரமசிங்கவுக்கு உள்ளது.நாட்டு மக்கள் அவருக்கு நன்றிக்கடன் பட்டுள்ளனர். அவருக்கு கைமாறு செய்ய ஒரு சந்தர்ப்பம் ஏற்பட்டுள்ளது.முன்னதாக அவர் பாராளுமன்றத்தில் அரசியலமைப்புக்கு அமைய ஜனாதிபதியாக பதவியேற்றார்.ஆனால் தற்போது அவர் மக்களாணை பெற்று ஜனாதிபதியாக தெரிவு செய்ய தகைமை பெற்றுள்ளார். சாதித்துள்ளார்.
பரிசோதிக்கும் நேரமல்ல.வாய்ப்பேச்சில் அரசியல் செய்யும் தரப்பினரிடம் நாட்டை ஒப்படைக்க முடியாது.எனவே நாட்டு மக்கள் எதிர்வரும் ஜனாதிபதித் தேர்தலில் ரணில் விக்கிரமசிங்கவை வெற்றி பெற செய்ய வேண்டும் என்றார்
ஐக்கிய மக்கள் சக்தியின் பாராளுமன்ற உறுப்பினர் ஏ.எல்.எம்.பௌசி கருத்து தெரிவிக்கையில்,
கடந்த வருடம் ஜனாதிபதித் தேர்தலில் சஜித் பிரேமதாசவுக்கு 90 வீதமான முஸ்லிம் மக்களின் வாக்குகள் கிடைக்கப்பெற்றன. ஆனால் இம்முறை அவருக்கு 20 வீதமான வாக்குகள் கூட கிடைக்குமா என்பதும் சந்தேகமே.அன்று அளிக்கப்பட்ட அனைத்து வாக்குகளும் ஐக்கிய தேசியக்கட்சியின் வாக்குகளாகும்.அத்துடன் கடந்த பாராளுமன்ற தேர்தலில் வாக்குகள் சிதறடிக்கப்பட்டன.இம்முறை அப்படி நடக்காது. முஸ்லிம் மக்களின் வாக்குகள் இம்முறை ஜனாதிபதி ரணில் விக்கிரமசிங்கவுக்கே கிடைக்கபெறும்.நாட்டை முன்னோக்கி கொண்டு செல்ல ஜனாதிபதி ரணில் விக்கிரமசிங்கவிடம் எதிர்வரும் 5 வருடங்கள் ஒப்படைக்க வேண்டும் என்றார்.
பாராளுமன்ற உறுப்பினர் இஷாக் ரஹ்மான் குறிப்பிடுகையில்,
நாம் நாட்டை நேசிக்கிறோம். எனவே நாம் பழைய நிலைமைக்கு மீண்டும் செல்லவிரும்பவில்லை.முன்னோக்கி செல்லவே விரும்புகிறோம். போலியான வாக்குறுதிகளை வழங்கும் தலைவர்களிடம் நாட்டை ஒப்படைப்பதை விடுத்து நாட்டை முன்னோக்கி கொண்டு செல்லக்கூடிய தலைவரிடம் ஒப்படைப்பது பொருத்தமானது என்றார்.– Vidivelli