ஜனாதிபதித் தேர்தலுக்கான வேட்புமனுக்கள் இன்று தாக்கல் செய்யப்படும் நிலையில் ஜனாதிபதித் தேர்தலுக்கான பிரசாரப் பணிகளும் முடுக்கி விடப்பட்டுள்ளன. ரணில், சஜித், அநுர எனும் மூன்று பிரதான வேட்பாளர்களுக்கு ஆதரவளிக்கும் கட்சிகள் தமது நிலைப்பாடுகளை அறிவித்து வருகின்றன. இதனிடையே தேர்தல் நடக்குமா இல்லையா என்ற சந்தேகத்தையும் சிலர் கிளப்பி வருகின்றனர். நீதித்துறைக்கும் நிர்வாகத்துறைக்குமிடையிலான முரண்பாடுகளைக் காரணமாகக் கொண்டு தேர்தல் ஒத்திவைக்கப்படலாம் என்ற நிலைப்பாட்டையும் சிலர் முன்வைக்கின்றனர்.
ஜனாதிபதித் தேர்தல் என்பது ஒரு நாட்டின் முக்கியமான தேர்தலாகும். இந்தப் பிரதான தேர்தலில் பிரதான அபேட்சகர்கள் மாத்திரம் போட்டியிடுவதே நன்மை பயக்கும். பொது மக்களின் நம்பிக்கையைத் தன்னகத்தே ஈர்த்துள்ள, அவர்களின் விருப்பத்துக்குரிய சிலர் மாத்திரமே ஜனாதிபதித் தேர்தலில் போட்டியிட வேண்டும். அபிவிருத்தியடைந்துள்ள நாடுகளில் இந்நிலைமையினை எம்மால் நோக்கமுடிகிறது.
எது எப்படியிருப்பினும் செப்டம்பர் 21 ஆம் திகதி நடைபெறுவதாக அறிவிக்கப்பட்டுள்ள ஜனாதிபதித் தேர்தலில் போட்டியிடுவதற்காக 40 பேர் கட்டுப்பணம் செலுத்தியுள்ளனர். இவர்களில் ஒரு சிலரைத் தவிர ஏனையோர் வேட்புமனுத் தாக்கல் செய்து போட்டியிடுவர் என எதிர்பார்க்கப்படுகிறது. இது கடந்த முறை போலவே இம்முறையும் நீளமான வாக்குச் சீட்டை அச்சிட வேண்டிய நிலைக்கு தேர்தல்கள் ஆணைக்குழுவைத் தள்ளியுள்ளது.
உண்மையில் பிரதான வேட்பாளர்களுக்கு இறுதி நேரத்தில் தமது ஆதரவை வெளிப்படுத்தி வாக்காளர்களின் கவனத்தை ஈர்ப்பதற்காகவே இவ்வாறு அதிக எண்ணிக்கையானோர் தேர்தலில் போட்டியிடுகின்றனர்.
இவ்வாறான போலி வேட்பாளர்களால் தேர்தல் ஆணைக்குழுவும் வாக்காளர்களும் பாதிக்கப்பட்டுள்ளார்கள் என்றே கூறவேண்டும். இவ்வாறான வேட்பாளர்களினாலே தேர்தல் ஆணைக்குழுவின் செலவினங்கள் அதிகரித்துள்ளன. இந்த அதிகரித்த செலவுகள் தேர்தல் ஆணைக்குழுவின் அதிகாரிகளினாலோ அல்லது வேட்பாளர்களினாலோ செலவழிக்கப்படுவதில்லை. நாட்டு மக்களின் பணமே இதற்குச் செலவழிக்கப்படுகிறது. இவ்வாறான வீணான அதிகரித்த செலவுகள் காரணமாகவே எமது நாட்டின் பொருளாதாரமும் ஸ்திரமற்ற நிலைக்குள்ளாகியுள்ளது.
தேர்தலின் பின்பு இவ்வாறான வேட்பாளர்களைக் தேடிக்கண்டுபிடிக்க முடியாமற் கூட போகலாம். அவர்களினால் நாட்டுக்கு ஏற்பட்ட நஷ்டங்களை மீட்டிக்கொள்வதற்கான சட்ட ஏற்பாடுகள் கூட எமது நாட்டில் இல்லை.
ஜனநாயகம் என்பது எந்தவொரு மோசடிக்காரருக்கும் ஜனாதிபதி வேட்பாளராகும் சந்தர்ப்பம் வழங்குவதாக இருக்கக்கூடாது. இன்னொருவரின் நன்மைக்காக வேட்பாளராகக் களமிறங்குவது நாட்டு மக்களின் ஜனநாயகத்தை சவாலுக்குட்படுத்தும் முயற்சியாகும்.
இவ்வாறான போலி வேட்பாளர்களின் உள்வாங்கலைத் தவிர்ப்பதற்காக எதிர்காலத்தில் ஜனாதிபதித் தேர்தலில் போட்டியிடுவதற்குச் செலுத்தப்படும் கட்டுப்பணத் தொகையை அதிகரிக்க வேண்டும். அத்தோடு இவ்வாறான நடவடிக்கையில் இறங்கும் அரசியல் கட்சிகள் பதிவு செய்யப்படுவதும் நிராகரிக்கப்பட வேண்டும்.
ஜனாதிபதித் தேர்தலுக்கு பின்பு பொதுத்தேர்தல் நடாத்தப்படும். புதிய அரசாங்கம் பதவியில் அமரும். எனவே எதிர்கால ஜனாதிபதித் தேர்தல்களில் பிரதான அபேட்சகர்களுக்கு மாத்திரம் போட்டியிடும் வகையில் மட்டுப்படுத்தப்படுவதற்கான சட்டம் இந்தக் கால எல்லையில் இயற்றிக் கொள்ளப்பட வேண்டும்.
இந்தப் பொறுப்பினை தேர்தல் ஆணைக்குழுவின் மீது சுமத்திவிட்டு அரசாங்கமும் எதிர்க்கட்சியும் மெளனமாக இருப்பதன் மூலம் பிரச்சினைகளுக்குத் தீர்வுகாண முடியாது. இது விடயத்தில் பொது மக்களுக்கும் பொறுப்பிருக்கிறது. அதிகரிக்கும் ஜனாதிபதி வேட்பாளர்களின் எண்ணிக்கையினால் தங்களுக்கு ஏற்படும் அசௌகரியங்கள், மேலதிக செலவினங்கள், வாக்களிக்கும் போது எதிர்நோக்கும் பிரச்சினைகள் தொடர்பில் பொதுமக்கள் சட்ட ரீதியான தீர்வுகள் பெற்றுக் கொள்வதற்கு ஒன்றிணையவேண்டும்.- Vidivelli