இலங்கையில் மிக நீண்ட காலமாக பலஸ்தீன தூதுவராக கடமையாற்றிய பின்னர், இஸ்லாமாபாத்திற்கு இராஜதந்திரியாக இடமாற்றம் பெற்றுச் செல்லும் கலாநிதி சுஹைர் எம்.எச்.செய்த், முன்னாள் ஜனாதிபதியும் ஸ்ரீலங்கா பொதுஜன பெரமுனவின் தலைவருமான மஹிந்த ராஜபக்சவை அவரது இல்லத்திலும் ஸ்ரீலங்கா முஸ்லிம் காங்கிரஸ் தலைவர் ரவூப் ஹக்கீமை கட்சியின் தலைமையகத்திலும் பிரியாவிடை நிமித்தம் சந்தித்துக் கலந்துரையாடினார்.
மஹிந்த ராஜபக்சவுடனான சந்திப்பின்போது, அவர் பலஸ்தீனத்திற்கு தொடர்ச்சியாக வழங்கி வரும் ஆதரவுக்கு நன்றிகளை தெரிவித்தார். அத்துடன், இதன்போது முன்னாள் ஜனாதிபதிக்கு நினைவுச் சின்னமொன்றையும் பலஸ்தீனத் தூதுவர் வழங்கிவைத்தார்.
இதனிடையே, பலஸ்தீனம் சுதந்திரமான இறைமையுள்ள நாடாக மிளிர்வதற்கும், அங்கு வாழும் மக்கள் இனப் படுகொலை செய்யப்படுவதைக் கண்டித்தும் மூன்று தசாப்த காலமாக இலங்கைப் பாராளுமன்றத்தில் ஓயாது குரல் எழுப்பி வருவதற்காக பலஸ்தீன மக்களின் சார்பில் நன்றிகளை அவர் முஸ்லிம் காங்கிரஸ் தலைவரிடம் தெரிவித்துக் கொண்டார்.
பலஸ்தீனம் ஒரு சுதந்திரமான இறைமையுள்ள நாடாக விளங்க வேண்டும் என்பது தமது வாழ்நாள் ஆசை என்பதாக அவரிடம் ஹக்கீம் கூறினார்.
பிராந்திய நாடுகளில் ஒன்றான பாகிஸ்தானுக்கு தூதுவராகச் செல்லும் கலாநிதி சுஹைர் எம். எச் செய்த்தை தாம் மனப்பூர்வமாக வாழ்த்துவதாகவும் முஸ்லிம் காங்கிரஸ் தலைவர் குறிப்பிட்டார்.– Vidivelli