இலங்கையில் பயங்கரவாத தாக்குதல்கள் நடக்கும் என ‘திக்குவெல்லை ஷெய்க்’ கூறினார்
பிணையில் விடுதலையான பின் ஞானசார தேரர்
2014 ஜூன் 24ஆம் திகதி திக்வெல்ல பகுதியில் ஷேக் ஒருவரை சந்தித்த போது இந்த நாட்டுக்கு ஆபத்தான விடயமொன்று இருப்பதாக கூறி, உலகளாவிய பயங்கரவாத குழுவொன்று இந்த நாட்டில் பரிசோதனை நடவடிக்கையாக தாக்குதலொன்றை நடத்தவுள்ளதாக தகவல்கள் கிடைத்துள்ளதாக கூறினார். அதன்படி அதனை பாதுகாப்பு தரப்பினருக்கு நாங்கள் கூறினோம். நாட்டில் பிரதான இடங்களை இலக்கு வைத்து தாக்குதல்களை நடத்தவுள்ளதாகவும் ஆயிரக் கணக்கானோரை கொல்வதற்கு திட்டமிடுவதாகவும் அவரால் கூறப்பட்டிருந்தது. அன்று ராஜபக்ஷ ஆட்சியின் போது அது தொடர்பில் பாதுகாப்பு தரப்பினரால் நடவடிக்கை எடுக்கப்பட்டது என பொதுபல சேனா அமைப்பின் பொதுச் செயலாளர் கலகொட அத்தே ஞானசார தேரர் தெரிவித்தார்.
நான்கு வருட கடூழிய சிறைத்தண்டனை விதிக்கப்பட்டிருந்த பொதுபல சேனா அமைப்பின் பொதுச் செயலாளர் கலகொடஅத்தே ஞானசார தேரர், மேன்முறையீட்டு நீதிமன்றத்தால் பிணையில் விடுவிக்கப்பட்ட பின்னர், கடந்த திங்கட்கிழமை சிறையில் இருந்து வெளியே வந்த பின்னர் ஊடகங்களை சந்தித்த போதே இவ்வாறு கூறினார். அதன்போது அவர் மேலும் கூறுகையில்,
எங்களால் அடையாளம் காட்டப்பட்ட அடிப்படைவாத குழுக்கள் நல்லாட்சி அரசாங்கத்திற்காக செயற்பட்ட ஜே.வி.பி.யினரிடம் சென்றே மறைந்துகொண்டனர். அத்துடன் இந்த நாட்டில் அந்த அடிப்படைவாதிகள் தாக்குதல் குழுக்கள் அரசியல் தலைவர்களின் பின்னாலேயே ஒளிந்துகொண்டனர். இப்போது அடிமுடி தேடுவதாக அனுரகுமார ஜப்பானில் இருந்துகொண்டு கூறுகின்றார். ஆனால் அவருக்குதான் அனைத்தும் தெரியும். தாக்குதல் குழுக்கள் அவரின் பின்னாலேயே மறைந்துகொண்டிருந்தன. அன்று நாங்கள் கூறியதை எவரும் கேட்கவில்லை. இது தொடர்பில் அரசியல் கட்சிகள் எதுவும் கதைக்கவில்லை. மக்களுக்காக பேசிய எங்களை சிறையில் தள்ளினர்.
பல தடவைகள் நான் சிறையில் இருக்க வேண்டியேற்பட்டது. என்ன காரணத்திற்காக நான் சிறையில் இருக்கின்றேன் என்று மக்களிடையே பல்வேறு கருத்துக்கள் உள்ளன. இந்த நாட்டில் ஆட்சி செய்யும் மற்றும் அதிகாரத்தை கோரும் அனைத்து அரசியல்வாதிகளும் உண்மைகளை கொன்றுள்ளனர்.
நான் சிறையில் இருக்கும் போது அரசியல் மேடைகளில் உயிர்த்த ஞாயிறு தாக்குதல் தொடர்பில் பேசப்படும் விடயங்கள் தொடர்பில் செய்திகளில் பார்ப்பேன். உண்மையில் அரசியல் கட்சிகளின் தலைவர்கள் அனைவரும் வெளியில் இருக்கக் கூடாது. சிறைகளுக்குள்ளேயே இருக்க வேண்டும்.
அவர்களுக்கு உயிர்த்த ஞாயிறு தாக்குதல் தொடர்பில் பேச உரிமையில்லை. எல்லாவற்றுக்கும் முன்னர் இங்கு அனர்த்தமொன்று ஏற்படும் என்பதனை நாங்கள் பௌத்த பிக்குகளாக அன்றி பொதுவான மனிதர்களாக பல்வேறு தகவல்களை வெளிப்படுத்தினோம்.
பேராயர் போன்றோர் நீதி கேட்கின்றனர். பௌத்தர்கள் செய்த தவறைப் போன்று மற்றையவர்கள் கைகளை துடைத்துக்கொள்ள முயற்சிக்கின்றனர். இந்த கதைகளை கூறும் போது இனவாதம் என்றெல்லாம் கூறலாம். எங்களுக்கு பிரச்சினை உள்ளது. அமைதியான முறையில், நிராயுதபாணியாக இந்த நாட்டில் மத நடவடிக்கைகளை முன்னெடுத்துச் செல்லக்கூடிய சூழலில் நாங்கள் வாழ்கின்றோம். ஆனால் வேறு யாராவது மதத்தின் பெயரில் ஆயுதத்துடன் வந்து மக்களை கொல்வதற்கு இடமளிக்க முடியுமா? இதுபற்றி கதைப்பது இனவாதமா? அல்லது வேறு பிரச்சினையா? இது தொடர்பில் கலந்துரையாட வேண்டும்.
நிச்சயமாக இந்த பிரச்சினைகள் மூடி மறைக்கப்பட இடமளிக்கக்கூடாது. ஆனால் உண்மையான பிரச்சினைகளுக்கு மத்தியில் உருவாகும் குழுக்கள் தொடர்பில் எவரும் கதைப்பதில்லை. வாக்குகளுக்காக இவ்வாறு பேசாது இருக்கின்றனர். இப்போது சில அரசியல் சக்திகளானது பௌத்த தேரர்களை இலக்கு வைத்து நடவடிக்கைகளை முன்னெடுத்து வருகின்றன. அதற்கு எதிராக நாங்கள் அமைதியாக இருக்கப் போவதில்லை. மீண்டும் மீண்டும் சிறையில் போட்டாலும் பேசாமல் அமைதியாக இருக்க மாட்டோம் என்பதனை பொறுப்புடன் கூறுகின்றேன். நாங்கள் இறக்கும் மனிதர்களே. உண்மைக்காக முன்னின்று இறந்து போக வேண்டும் என்றார்.– Vidivelli