அமெரிக்க – மெக்ஸிக்கோ எல்லையின் பாதுகாப்பு கருதி சுவர் எழுப்ப வேண்டும் எனவும், அதற்காக 500 கோடி டொலர் நிதி ஒதுக்க வேண்டுமெனவும் ஜனாதிபதி ட்ரம்ப் கோரிக்கை வைத்தார்.
ஆனால் இந்தக் கோரிக்கைக்கு அமெரிக்க எதிர்க்கட்சியான ஜனநாயகக் கட்சி தொடர்ந்தும் மறுத்துவருகிறது. மேலும் அமெரிக்க அரசின் செலவின நிதி மசோதாவை செனட்டில் நிறைவேற்ற எதிர்க்கட்சி முன்வரவில்லை.
இதனால் தொடர்ந்து 3 ஆவது நாளாக அமெரிக்க அரசு நிர்வாகம் முடங்கியுள்ளது. அத்தோடு அரசாங்க ஊழியர்கள் ஊதியமின்றிப் பணியாற்ற வேண்டிய நிலை ஏற்பட்டுள்ளது.
கிறிஸ்மஸ் பண்டிகையை கொண்டாட செல்லாமல், ஜனாதிபதி டொனால்ட் ட்ரம்ப் வெள்ளை மாளிகையில் தங்கியுள்ளார்.
இதுகுறித்து அவர் தனது டுவிட்டர் பக்கத்தில், “வெள்ளை மாளிகையில் நான் தனியாக இருக்கிறேன். அவசரமாக தேவைப்படும் எல்லை பாதுகாப்புக்கு ஒரு ஒப்பந்தம் செய்ய உழைத்துக் கொண்டிருக்கிறேன்.
ஜனநாயக கட்சி எம்.பி.க்கள் திரும்பி வந்து அமெரிக்க – மெக்ஸிக்கோ எல்லையின் பாதுகாப்பு ஒப்பந்தத்துக்கு அனுமதி அளிக்க வேண்டும் அதற்காக காத்திருக்கிறேன்.
ஆனால், ஜனநாயகக் கட்சி எம்.பி.க்கள் நாட்டைப்பற்றி கவலைப்படாமல் கிறிஸ்மஸ் கொண்டாடி வருகின்றனர். அவர்கள் நாட்டைப்பற்றி பேசுகிறார்கள். வேடிக்கையாக இருக்கிறது. ஆனால், நான் வெள்ளை மாளிகையில் ஒரு ஏழை போன்ற உணர்வுடன் தனியாக இருக்கிறேன்.” என தெரிவித்துள்ளார்.
-Vidivelli