பெறுபேறு இடைநிறுத்தத்திற்கு ஹிஜாப் அணிந்திருந்ததை காரணம் காட்டியமையானது மத சுதந்திரத்தை மீறுகிறது
அதிருப்தி வெளியிட்டது மனித உரிமைகள் கண்காணிப்பகம்
(நா.தனுஜா)
திருகோணமலை மாவட்டத்தில் க.பொ.த உயர்தரப்பரீட்சைக்குத் தோற்றிய 70 முஸ்லிம் மாணவிகளின் பெறுபேறுகள், அவர்கள் தலையை மறைக்கும் விதமாக ஹிஜாப் அணிந்து வந்ததாகக் குறிப்பிட்டு இடைநிறுத்தி வைக்கப்பட்டிருப்பதாகவும், இது அம்மாணவிகளின் மத சுதந்திரத்தை மீறும் வகையில் அமைந்திருப்பதாகவும் மனித உரிமைகள் கண்காணிப்பகம் அதிருப்தி வெளியிட்டுள்ளது.
இச்சம்பவம் தொடர்பில் அவதானம் பாய்ச்சும் வகையிலும், அம்மாணவிகளின் கல்விக்கான உரிமையை உறுதிப்படுத்துவதற்கு நடவடிக்கை எடுக்குமாறு வலியுறுத்தியும் மனித உரிமைகள் கண்காணிப்பகத்தினால் வெளியிடப்பட்டுள்ள அறிக்கையில் மேலும் கூறப்பட்டிருப்பதாவது,
கிழக்கு மாகாணத்தின் திருகோணமலை நகரை அண்மித்து வாழும், பெரும்பாலும் குறைந்த வருமானம் பெறும் குடும்பங்களைச் சேர்ந்த மாணவர்கள் பலர் கடந்த ஜனவரி மாதம் நடைபெற்ற க.பொ.த உயர்தரப்பரீட்சைக்குத் தோற்றியிருந்தனர். அதன்போது பரீட்சை முறைகேடுகளைத் தடுக்கும் நோக்கில் மாணவர்களின் காதுகள் வெளித்தெரியவேண்டும் என விதிக்கப்பட்டிருந்த வரையறைக்கு அமைவாக அவர்கள் இறுக்கமாக அணியும் ஹிஜாப்பை (இஸ்லாமிய மதக்கோட்பாடுகளுக்கு அமைய தலையை மறைக்கும் வகையிலான ஆடை) தவிர்த்து, தளர்வான – வெளித்தெரியக்கூடியவாறான வெண்ணிற துணிகளையே அணிந்திருந்தனர். அதேபோன்று அன்றைய தினம் உரிய பரீட்சை நிலையங்களில் மேற்பார்வையில் ஈடுபட்டவர்கள் அம்மாணவர்களைப் பரீட்சை எழுதுவதற்கு அனுமதித்திருந்தனர்.
இருப்பினும் கடந்த மேமாதம் 31 ஆம் திகதி உயர்தரப்பரீட்சைப் பெறுபேறுகள் வெளியான நிலையில், பரீட்சைகள் திணைக்களமானது மேற்குறிப்பிட்டவாறு ஹிஜாப் அணிந்திருந்த மாணவர்கள் ‘புளுடுத் கேட்பான்களை’ பயன்படுத்தியிருக்கக்கூடிய வாய்ப்பு இருப்பதாகக் குறிப்பிட்டு, அம்மாணவர்களின் பெறுபேறுகளை வெளியிடாது இடைநிறுத்தியுள்ளது. இதன்விளைவாக அம்மாணவர்கள் பல்கலைக்கழக உயர்கல்வியைத் தொடர்வதற்கான வாய்ப்பு மறுக்கப்படக்கூடிய அச்சுறுத்தலுக்கு முகங்கொடுத்துள்ளனர்.
பொதுவில் முஸ்லிம் பெண்கள் கல்வியைத் தொடர்வதற்கு அவர்களது சமூகங்களுக்கு உள்ளேயே பல்வேறு தடைகளுக்கு முகங்கொடுப்பதாகவும், அத்தடைகளைக் கடந்து வந்த இம்மாணவர்கள் தற்போது ‘முஸ்லிம்களுக்கு எதிரான போக்கினால்’ பாதிப்படைந்திருப்பதாகவும் ஆசிரியர்கள் மற்றும் சமூக செயற்பாட்டாளர்கள் சுட்டிக்காட்டியுள்ளனர். இதற்கு முன்னரும் திருகோணமலையில் கல்வித்துறை சார்ந்து முஸ்லிம் பெண்களின் ஆடை குறித்து சர்ச்சைகளும், முரண்பாடுகளும் நிலவின. நாட்டின் ஏனைய பாகங்களில் உயர்தரப்பரீட்சைக்குத் தோற்றிய முஸ்லிம்கள் இத்தகைய ஒடுக்குமுறைக்கு முகங்கொடுத்ததாகப் பதிவாகாத போதிலும், கடந்த ஆண்டு தலைநகர் கொழும்பில் ஆசிரியர் பரீட்சைக்குத் தோற்றிய 13 பெண்கள் இதனையொத்த சவாலை எதிர்கொண்டுள்ளனர்.
இலங்கையைப் பொறுத்தமட்டில் அண்மைய வருடங்களில் சிறுபான்மையின முஸ்லிம்களை ஒடுக்கும் வகையிலான வழிகாட்டல்கள் தொடர்ந்து நடைமுறைப்படுத்தப்பட்டு வந்திருக்கின்றன. கொவிட் – 19 பெருந்தொற்றுக் காலப்பகுதியில் தொற்றினால் உயிரிழந்தோரின் சடலங்களைப் புதைப்பதற்கு அரசாங்கம் தடைவிதித்ததுடன், இது முஸ்லிம்களின் மத்தியில் வலுவான காயத்தைத் தோற்றுவித்தது. அதேபோன்று தவறான பரப்புரைகளை அடிப்படையாகக்கொண்டு முஸ்லிம்களுக்கு எதிராகத் தூண்டப்பட்ட வன்முறைச் சம்பவங்களும் கடந்த காலங்களில் பதிவாகியிருந்தன.
இவ்வாறானதொரு பின்னணியில் பரீட்சைகளின் நேர்மைத்தன்மையை உறுதிப்படுத்துவது உரிய அதிகாரிகளின் பொறுப்பாகும். இதன்போது பின்பற்றப்படும் நடைமுறைகள் மத அல்லது பாலின அடிப்படையில் எந்தவொரு மாணவரையும் புறந்தள்ளும் விதமாக அமையக்கூடாது. அவ்வாறிருக்கையில் மேற்குறிப்பிட்ட மாணவர்களின் உயர்தரப்பரீட்சைப் பெறுபேறுகளை இடைநிறுத்திவைப்பது அவர்களுக்குப் பெரும் பாதிப்பை ஏற்படுத்தும் என்பதுடன் சமூகங்களுக்கு இடையில் அமைதியையும், நல்லிணக்கத்தையும் கட்டியெழுப்ப முனைவதாகக் கூறும் அரசாங்கத்தின் எதிர்பார்ப்புக்கும் முரணாகவே பார்ப்புக்கும் முரணாகவே அமையும் என மனித உரிமைகள் கண்காணிப்பகம் சுட்டிக்காட்டியுள்ளது.- Vidivelli