(எம்.எஸ்.எம். நூர்தீன்)
பசில் ராஜபக்ச எனது விருப்பத்துக்குரியவர் அவர் மீது எனக்கு அபிமானம் இருக்கிறது என முஸ்லிம் காங்கிரஸின் தலைவர் ரவூப் ஹக்கீம் காத்தான்குடியில் இடம்பெற்ற மு.கா. பேராளர் மாநாட்டில் தெரிவித்துள்ளார்.
அத்துடன், “உங்களுக்கு நாங்கள் ஒருமுறை தேவையில்லை என்றால் எங்களுக்கு நீங்கள் 100 முறை தேவையில்லை” என்று பசில் ராஜபக்ஷ ஜனாதிபதியிடம் அடித்து கூறி இருக்கிறார். கட்சியை எவ்வாறு கையாள வேண்டும் என்பதை ஜனாதிபதி தெரிந்திருக்க வேண்டும் தலைவர்களை துச்சமாக மதித்தால் தலைவர்களும் ஜனாதிபதியை துச்சமாகவே மதிப்பார்கள் என்றும் ஹக்கீம் ஜனாதிபதியை சாடியுள்ளார். .
தலைவர்கள் சோரம் போனால் கட்சிகள் அழிந்து போகும் என தெரிவித்துள்ள, அற்ப சொற்பங்களுக்காக அடிப்படைகளை மறக்க முடியாது என்றும் அவர் மேலும் தெரிவித்துள்ளார்.
ஸ்ரீ லங்கா முஸ்லிம் காங்கிரஸ், 31 ஆவது பேராளர் மாநாடு கடந்த 22 ஆம் திகதி காத்தான்குடி ஹிஸ்புல்லாஹ் கலாசார மண்டபத்தில் நடைபெற்றபோது கட்சியின் தலைவராக மீண்டும் தெரிவுசெய்யப்பட்ட பாராளுமன்ற உறுப்பினர் ரவூப் ஹக்கீம் அங்கு ஆற்றிய உரையின்போதே இவ்வாறு தெரிவித்தார்.
அவர் அங்கு மேலும் தெரிவிக்கையில்,
நேற்றைய (21 திகதி) ஆங்கில பத்திரிகையைப் பார்த்தேன். அதில் கூறப்படுபவர் எனது விருப்பத்துக்கு உரியவர் அல்லர்.என்றாலும், சொல்லியிருக்கின்ற விடயத்தைப் பார்த்ததும் அவர் மீது எனக்கு ஓர் அபிமானம் வந்தது. “இவர் மேல் அபிமானமா?”என்று நீங்கள் கொஞ்சம் முகம் சுழிக்கலாம். அவர் வேறு யாரும் அல்லர். ஸ்ரீலங்கா பொது ஜன பெரமுன ஸ்தாபகர் பசில் ராஜபக்ஷ. அவர் ஜனாதிபதி ரணில் விக்ரமசிங்க முன்னிலையில் துணிச்சலோடு சொன்ன விடயம் தன்னுடைய கட்சிகாரர்களில் ஒரு சிலர் தாங்களாகவே ஒரு முடிவை எடுத்து அதைதான் கட்சி செய்ய வேண்டும் என்று சொன்னவர்களுக்கு அவர் சொன்ன கருத்துதான் தலைப்புச் செய்தியாக வந்திருக்கின்றது. கட்சி தலைவர்கள் சோரம் போக முடியாது. எனக்கு ஒரு சந்தர்ப்பம் கிடைத்தால் அதைதான் நானும் சொல்லுவேன். தலைவர்கள் சோரம் போனால் கட்சிகள் அழிந்து போகும். எனவே இந்த தலைமை அதிகாரத்துக்கு அடி பணிகின்ற தலைமையாக இருக்க மாட்டாது என்ற விடயத்தை மிக தெளிவாக நான் சொல்லி வைக்க விரும்புகின்றேன். அச்சுறுத்தி அடி பணிய வைக்க முடியாது, ஆர்ப்பரித்து அடி பணிய வைக்க முடியாது. ஆட்களைப் பறித்து வைத்து கொண்டு அடிபணிய வைக்க முடியாது. அது நடக்காது என்று பசில் ராஜபக்ஷ சொல்கிறார். எனவேதான் பசில் ராஜபக்ஷ மேல் எனக்கு கொஞ்சம் அபிமானம் வந்தது.
கட்சியை எவ்வாறு கையாள வேண்டும் என்று நாட்டு தலைவர்கள் தெரிந்து கொள்ள வேண்டும். நாட்டு தலைவர் கட்சி தலைவர்களை துச்சமாக மதிக்கின்ற போது, தலைவர்களும் அவர்களை துச்சமாகதான் மதிப்பார்கள். இதுதான் முக்கியமான விடயம்.
எனவே இந்த விவகாரம் சம்பந்தமாகத்தான் இன்று எங்களுக்குள் நிறைய கேள்விகளும் பிரச்சினைகளும். ஆனால் நாங்கள் இவற்றையெல்லாம் தூக்கி வைத்து விட்டோம்.
இனி நாங்கள் எதையும் பேசுவது கிடையாது. எல்லோரும் ஓர் உறுதியான சத்தியப் பிரமாணம் எடுத்திருக்கின்றோம். தலைமையோடும், கட்சியோடும் பிணக்கில்லாமல் பயணிப்பது என்கின்ற தீர்மானம், அந்த தீர்மானத்தை உறுதிமொழியாக எழுத்தில் தந்திருக்கின்றோம். பேராளர்களுக்கு முன்னால் சத்திய வாக்காக “பைஅத் “ஆக செய்திருக்கின்றோம். அதை நாங்கள் செயல் படுத்துவதன் மூலமாகத்தான் இந்த இயக்கத்தை வீரியமாக வாழ வைக்க முடியும். இது குறுகிய அரசியல் நலன்களுக்கு அப்பாற்பட்ட விடயம்.
பிரதித் தலைவர்கள் தொகையை இன்று நாங்கள் ஏழாக கூட்டி யிருக்கின்றோம். எல்லா அரசியல் அந்தஸ்தில் இருக்கின்ற முக்கிய பிரதிநிதிகளை உள்வாங்கி இந்த கட்சியை -இதற்கு எதிராக இருக்கின்ற களங்கங்களையும், விமர்சனங்களையும் புறந்தள்ளி முன்கொண்டு செல்வதற்காக எல்லோரும் தலைவர் உட்பட உறுதி பூணுகின்ற ஒரு பேராளர் மாநாடாக இந்த மாநாடு மாறுகின்றது செய்தியை மக்களுக்கு நாங்கள் சொல்லுகின்றோம்.
அந்த கட்டங்களில் இந்த மண் பட்ட அவஸ்த்தை விடவும் பாரிய அவஸ்தையை 2019ம் ஆண்டு ஏப்ரல் மாதம் 21ம் திகதி காத்தான்குடி அனுபவித்தது. யாரும் எதிர்பார்த்திராத ஒரு பழிச் சுமையை இந்த மண் மீது சுமத்தினார்கள். அந்த பழியின் பின்னணியில் மிகப் பெரிய சதி இருந்தது என்ற விடயம் இப்போது படிப்படியாக அம்பலத்துக்கு வந்திருக்கின்றது. ஒரு கூலிப்படையை வைத்து இந்த புண்ணிய பூமிக்கு களங்கம் விழைவிக்கின்ற அந்த மாபாதக செயலுக்கு யார் பின்னணியில் இருந்தார்கள் என்ற விபரம் பொதுவெளியில் கதைக்கப்படுகின்றது. முன்னாள் பொலிஸ் அதிகாரிகளுக்கும் புலனாய்வு அதிகாரிகளுக்கும், முன்னாள் போராளிகளுக்கும் விரல் நீட்டுகின்றார்கள். இன்னும் பல இடங்களுக்கு விரல் நீட்டப்படுகின்றது. உண்மை கண்டறியப்பட வேண்டும். இந்த படுபாதகச் செயலை செய்து தொடர்ந்தேர்ச்சியாக பாதிக்கப்பட்ட இந்த மண்ணுக்கு மேலும் அழியாத ஒரு களங்கத்தை ஏற்படுத்துகின்ற அந்த விவகாரத்துக்கு பின்னால் இருந்து செய்த சதி என்ன என்பது அம்பலப்படுத்தப்பட வேண்டும். குறுகிய அரசியல் இலாபங்களுக்காக அரங்கேற்றப்பட்ட நாடகமா? என்ற கேள்வி இன்று பூதாகரமாக எழுந்து நிற்கின்றது. இதற்கு விடை வேண்டும். தீர்வு வேண்டும்.
தீராமல் இருக்கின்ற ஆயிரக்கணக்கான பிரச்சினைகளுக்கு -எங்களது நிலப்பிரச்சினை, காணிப்பிரச்சினை, நிர்வாக பிரச்சினை இப்படி அடுக்கடுக்காக பிரச்சினைகளை வைத்து கொண்டு இருக்கின்ற ஒரு சமூகத்தின் விடிவுக்காகப் போராடுகின்ற இயக்கம் வெறும் அற்ப சொற்பங்களுக்காக எங்களுடைய அடிப்படைகளை மறந்து விட முடியாது.
எனவேதான் அந்த அடிப்படைகளுக்கு திரும்புகின்ற மறைந்த தலைவரின் காலத்தில் இந்த இயக்கத்தின் மீது மக்கள் காட்டிய அந்த அமோக ஆதரவை முழுமையாக மீட்டுக் கொள்கின்ற யுகத்துக்கு மீண்டு போகின்ற ஒரு யுகமாக அடுத்த யுகம் அமையட்டும் என்றார்.- Vidivelli