சாஹிரா மாணவிகளுக்கு அநீதி இழைக்க வேண்டாம்
பெறுபேறுகளை விரைவில் வெளியிடுங்கள் என சபையில் சஜித் கோரிக்கை ஒரு சில தினங்களில் வெளியிட நடவடிக்கை என்கிறார் கல்வி அமைச்சர் சுசில்
(எம்.ஆர்.எம்.வசீம், இரா.ஹஷான்)
திருகோணமலை சாஹிரா கல்லூரி மாணவர்களின் உயர்தர பரீட்சை பெறுபேறுகள் வெளியிடுவதை மேலும் தாமதப்படுத்தி அவர்களுக்கு அநீதி இழைக்க வேண்டாம் என கோரிக்கை விடுத்த எதிர்க்கட்சித் தலைவர் சஜித் பிரேமதாஸ, பெறுபேறுகளை விரைவில் வெளியிட நடவடிக்கை எடுக்குமாறு கல்வி அமைச்சரிடம் நேற்று சபையில் கோரிக்கைவிடுத்தார்.
இதற்கு பதிலளித்த கல்வி அமைச்சர் சுசில் பிரேமஜயந்த, இன்னும் சில தினங்களில் அம்மாணவிகளின் பெறுபேறுகள் வெளியிடப்படும். அது தொடர்பான நடவடிக்கைகளை பரீட்சை ஆணையாளர் நாயகம் முன்னெடுத்து வருகிறார் என தெரிவித்தார்.
பாராளுமன்றத்தில் நேற்று எதிர்க்கட்சித் தலைவர் சஜித் பிரேமதாச எழுப்பிய இடையீட்டு கேள்விக்கு பதிலளிக்கையிலேயே இவ்வாறு தெரிவித்தார்.
எதிர்க்கட்சித் தலைவர் தனது கேள்வியின்போது, பாராளுமன்ற உறுப்பினர் இம்ரான் மகரூப் இது தொடர்பாக என்னிடம் தெரிவித்தார். திருகோணமலை சாஹிரா கல்லூரி மாணவிகள் 70 பேரின் உயர்தர பரீட்சை பெறுபேறுகள் இடை நிறுத்தப்பட்டிருக்கிறது.
பரீட்சை பெறுபேறுகள் ஒரு வாரகாலத்துக்குள் வெளியிட நடவடிக்கை எடுக்கப்படும் என இந்த சபையில் கடந்த இரண்டு வாரங்களுக்கு முன்னர் தெரிவித்திருந்தீர்கள். ஆனால் இதுவரை பெறுபேறுகள் வெளியிடப்படவில்லை. அதனால் அந்த மாணவிகளுக்கு அநீதி ஏற்படாமல் அவர்களின் பெறுபேறுகளை விரைவாக வெளியிட நடவடிக்கை எடுக்க வேண்டும் என்றார்.
இதற்கு கல்வி அமைச்சர் பதிலளிக்கையில்,
இது தொடர்பாக பாராளுமன்ற உறுப்பினர் இம்ரான் மகரூப் என்னிடமும் தொலைபேசியில் கலந்துரையாடினார். பரீட்சை மண்டபத்துக்குள் பர்தா அணிந்து வருவதாக இருந்தால், இரண்டு காதுகளும் தெரியும் வகையில் இருக்கவேண்டும். அதற்கு பல காரணங்கள் இருக்கின்றன.
அதனை இந்த இடத்தில் நான் தெரிவிக்கவில்லை. இந்த விடயங்கள் இடம்பெறுகின்ற பிரதேசங்களும் இருக்கின்றன. அது தொடர்பாகவும் தற்போது நான் ஒன்றும் தெரிவிக்கப்போவதில்லை.
இந்த விடயம் காரணமாகவே இவ்வாறு பரீட்சை பெறுபேறு இடை நிறுத்தப்பட்டிருக்கிறது. இந்த விடயத்தை அதிகாரி ஒருவர் அளவுக்கு அதிகமான வகையில் எடுத்துக்கொண்டுள்ளார் என்றாலும் மாணவர்களின் பெறுபேறுகளுக்கு எந்த பாதிப்பும் ஏற்படப்போவதில்லை.
பெறுபேறுகளை வெளியிடுவதற்கான நடவடிக்கைகளை பரீட்சைகள் திணைக்களம் நடவடிக்கை எடுத்து வருகிறது. பரீட்சைகள் ஆணையாளர் இன்னும் ஒரு சில தினங்களில் அதனை வெளியிடுவார் என்றார்.- Vidivelli