உழ்ஹிய்யா கடமையை நிறைவேற்றும்போது பிறமதத்தவரின் உணர்வுகளை தூண்டும் விதமாக செயற்படாதீர்
சட்டங்களை மதித்து சுகாதார வழிமுறைகளையும் பேணி நடக்குமாறும் அகில இலங்கை ஜம்இய்யத்துல் உலமா வேண்டுகோள்
உழ்ஹிய்யாவை நிறைவேற்றும்போது பல்லின மக்களோடு வாழும் நாம் பிறமத சமூகத்தவர்களின் உணர்வுகள் தூண்டப்படும் வகையில் நடந்துகொள்ளக் கூடாது என அகில இலங்கை ஜம்இய்யத்துல் உலமா தெரிவித்துள்ளது.
அத்துடன், இவ்விவகாரத்தில் நம் நாட்டின் சட்டத்தை கவனத்திற் கொண்டு, மிருகத்தின் உரிமைக்கான சான்றிதழ், மாட்டின் அல்லது ஆட்டின் விபரச் சீட்டு, சுகாதார அத்தாட்சிப் பத்திரம், மிருகங்களை எடுத்துச் செல்வதற்கான அனுமதிப் பத்திரம் போன்ற ஆவணங்களை முன்கூட்டியே தயார்படுத்திக் கொள்ளல் வேண்டும் என்றும் தெரிவித்துள்ளது.
ஜம்இய்யத்துல் உலமா வெளியிட்டிருக்கும் உழ்ஹிய்யா வழிகாட்டல்கள் வெளியிட்டிருக்கும் அறிக்கையிலேயே இவ்வாறு குறிப்பிடப்பட்டுள்ளது.
அதில் மேலும் தெரிவிக்கப்பட்டுள்ளதாவது, அனுமதியின்றி உழ்ஹிய்யாவுக்கான பிராணிகளை வண்டிகளில் ஏற்றி வருவதையும், அனுமதி பெற்றதை விட கூடுதலான எண்ணிக்கையில் எடுத்து வருவதையும் முற்றிலும் தவிர்ந்துகொள்ள வேண்டும்.
குர்பானிக்கு பயன்படுத்தப்படும் இடத்தை சுத்தமாக வைத்துக் கொள்வதோடு, அறுவைப் பிராணியின் எலும்பு, இரத்தம் மற்றும் ஏனைய கழிவுப்பொருட்களை அகற்றும் போது சுகாதார விதிமுறைகளைப் பேணிக் கொள்ள வேண்டும். அறுவைக்காகப் பயன்படுத்திய இடத்தில் கிருமி நாசினிகளைத் தெளித்து சுத்தத்தை உத்தரவாதப்படுத்தல் வேண்டும் என்றும் தெரிவிக்கப்பட்டுள்ளது.
அத்துடன், உழ்ஹிய்யாவுக்காக அறுப்புப் பிராணிகளை வைத்திருக்கும் போதும் உழ்ஹிய்யாவை நிறைவேற்றும் போதும் உழ்ஹிய்யாவை நிறைவேற்றியதன் பின்னரும் புகைப்படங்கள் அல்லது வீடியோக்கள் எடுப்பதை தவிர்ந்து கொள்ள வேண்டும். குறிப்பாக, சமூக வலைத்தளங்களில் அவற்றைப் பகிர்ந்து கொள்வதை முற்றாக தவிர்த்துக் கொள்ள வேண்டும் என்றும் கோரிக்கை விடுக்கப்பட்டுள்ளது.- Vidivelli