திருகோணமலை சாஹிரா மாணவிகளின் பெறுபேறு விவகாரம்: சபையில் பூதாகரமானது
கடும் அதிருப்தி வெளியிட்டனர் முஸ்லிம் பாராளுமன்ற உறுப்பினர்கள்
(எம்.ஆர்.எம்.வசீம், இ.ஹஷான்)
திருகோணமலை சாஹிரா பாடசாலையில் 2023 ஆம் கல்வி ஆண்டுக்கான உயர்தர பரீட்சைக்கு தோற்றிய 70 மாணவிகளின் பெறுபேறுகள் வெளியிடப்படாமை தொடர்பான விவகாரம் நேற்றும் நேற்று முன்தினமும் பாராளுமன்றத்தில் பூதாகரமாக வெடித்தது.
பர்தா அணிந்து பரீட்சை மண்டபத்தில் இருந்தமையால் ஆள் அடையாளத்தை உறுதிப்படுத்த முடியாது என அதிகாரிகள் குற்றம் சாட்டியுள்ளமையால் குறித்த மாணவிகளின் பெறுபேற்றை வெளியிடாமை பெரும் அநீதி என்றும் சுட்டிக்காட்டப்பட்டது.
முஸ்லிம் பாராளுமன்ற உறுப்பினர்கள் பலரும் இது விடயமாக உரையாற்றியதுடன் கல்வியமைச்சர் சுசில் பிரேமஜயந்த இதற்கு பதிலளித்தார்.
பாராளுமன்றத்தில் நேற்று புதன்கிழமை இடம்பெற்ற நாட்டின் கல்வி நடவடிக்கைகள் குறித்த பிரச்சினை தொடர்பான சபை ஒத்திவைப்பு வேளை விவாதத்தின் போதும் நேற்றுமுன்தினம் இடம்பெற்ற பெண்களின் வலுவூட்டல் சட்டமூலம் மீதான விவாதத்தின் போதும் இவ்விவகாரம் பேசப்பட்டது.
ரவூப் ஹக்கீம்
நேற்றைய தினம் ஸ்ரீலங்கா முஸ்லிம் காங்கிரஸ் தலைவர் ரவூப் ஹக்கீம் உரையாற்றுகையில், தலையை மறைத்து ஹிஜாப் அணிந்து பரீட்சை எழுதிய திருகோணமலை சாஹிரா பாடசாலை மாணவிகளின் பரீட்சை பெறுபேறு இடை நிறுத்தப்பட்டிருக்கிறது. ஹிஜாப் அணிந்து பரீட்சை எழுதுவதற்கு தடை எதுவும் இல்லை. பரீட்சை மண்டபத்தில் அவர்கள் தங்களின் காதுகளை வெளிப்படுத்த வேண்டும் என கேட்டுக்கொண்டால் அந்த நேரத்தில் அதனை வெளிப்படுத்திவிட்டு பரீட்சையை எழுதலாம். மாறாக தலை மறைப்பை முழுமையாக அகற்றிவிட தேவையில்லை.
அதனால் இந்த விடயம் தொடர்பாக முறையான சுற்று நிருபம் ஒன்றை வெளியிட நடவடிக்கை எடுப்பதுடன் குறித்த மாணவிகளின் பரீட்சை பெறுபேற்றை வெளியிட நடவடிக்கை எடுக்குமாறு கேட்டுக்கொள்கிறேன் என்றார்.
இஷாக் ரகுமான்
அத்துடன் இஷாக் ரகுமான் எம்பி. உரையாற்றுகையில்,
திருகோணமலை சாஹிரா கல்லூரியின் 70 மாணவிகளின் பெறுபேறுகள் இன்னும் வெளியிடப்படவில்லை. அதனை வெளியிடுவதற்கு அதிகாரிகள் உடனடியாக நடவடிக்கை எடுக்க வேண்டும் என அநுராதபுர மாவட்ட பாராளுமன்ற உறுப்பினர் இஷாக் ரகுமான் தெரிவித்தார்.
அந்த 70 மாணவிகளும் எந்தவிதமான குற்றமும் இழைத்தவர்கள் அல்லர். அவர்கள் மத அடிப்படையில் பர்தா அணிந்து பரீட்சை மண்டபத்தில் இருந்ததே குற்றச்சாட்டாக கூறப்படுகின்றது. இது இனவாதத்தை அதிகாரிகள் முன்னெடுப்பதையே மிகத் தெளிவாக காட்டுகிறது. அதற்கு இடமளிக்க வேண்டாம். உடனடியாக இதற்கு தீர்வை முன்வைக்க வேண்டும் என்று கோரிக்கை விடுத்தார்.
இதேவேளை நேற்றுமுன்தினமும் இவ்விவகாரம் பாராளுமன்றத்தில் பேசப்பட்டது.
ரிஷாத் பதியுதீன்
பர்தா அணிந்து பரீட்சை எழுதியமைக்காக திருகோணமலை மாவட்ட ஸாஹிரா கல்லூரி மாணவிகளின் பரீட்சை பெறுபேறு நிறுத்திவைக்கப்பட்டுள்ளமை தொடர்பில் உடனடியாக நடவடிக்கை எடுத்து பெறுபேறுகளை வெளியிட நடவடிக்கை எடுக்கப்பட வேண்டும். அத்துடன் இதற்கு காரணமான அதிகாரிகள் தொடர்பாகவும் விசாரணை நடத்த வேண்டும் என அகில இலங்கை மக்கள் காங்கிரஸ் தலைவர் ரிஷாத் பதியுதீன் தெரிவித்தார்.
மேலும், குறித்த மாணவிகள் பரீட்சை எழுதும்போது, பரீட்சை மண்டபத்துக்கு பொறுப்பாக இருந்த அதிகாரி ஒருவர் அவர்களிடம் வந்து, காதுகள் தெரியும் வகையில் பர்தாவை அணிந்துகொள்ளுமாறு கேட்டுக்கொண்டுள்ளார். அதன் பிரகாரம் அந்த மாணவிகளும் அவ்வாறு செயற்பட்டுள்ளனர். ஆனால் பரீட்சை எழுதிக்கொண்டிருக்கும்போதே அந்த மண்டபத்தில் இருந்த அதிகாரிகள் சிலர், அந்த மாணவிகளுக்கு கேட்கும்வகையில், உங்கள் பரீட்சை பெறுபேறுகள் வருவதை நாங்கள் பார்த்துக்கொள்வோம் என பல தடவைகள் அங்கு வந்து தெரிவித்துள்ளார்கள் என சுட்டிக்காட்டினார்.
அதேநேரம் மாணவிகளை விசாரணை நடத்திய அதிகாரிகள் மற்றும் பரீட்சை மண்டபத்தில் இருந்தவர்களின் பெயர்களை வெளிப்படுத்த வேண்டும். இவர்கள் துவேச அடிப்படையிலேயே நடந்துகொண்டுள்ளனர். எனவே பரீட்சை ஆணையாளருடன் இதுதொடர்பாக கலந்துரையாடி உடனடியாக அந்த மாணவிகளின் பரீட்சை பெறுபேறுகளை வெளியிட நடவடிக்கை எடுக்குமாறு கல்வி அமைச்சர் சுசில் பிரேமஜயந்தவை கேட்டுக்கொள்கிறேன் என்றார்.
எஸ்.எம்.எம்.முஸர்ரப்
திருகோணமலை சாஹிரா கல்லூரியைச் சார்ந்த முஸ்லிம் மாணவிகள் பரீட்சையில் தோற்றுகின்றபோது, அவர்களுக்கு ஏற்பட்ட அசௌகரியம் அதனைத் தொடர்ந்து பரீட்சை பெறுபேறுகள் வெளிவந்தபோது ஏற்பட்ட அசௌகரியம், பெறுபேறுகள் வெளிவராத விடயமெல்லாம் சாதாரண விடயமல்ல என திகாமடுல்ல மாவட்ட பாராளுமன்ற உறுப்பினர் முஸர்ரப் தெரிவித்தார்.
பரீட்சை எழுத வந்த மாணவிகளுக்கு பர்தா அணிய முடியாது என்று ஏதாவது சுற்று நிருபம் வெளியிடப்பட்டதா? அவ்வாறு பர்தா அணிய முடியாது, மத சுதந்திரத்தை பின்பற்ற முடியாது என்று ஏதாவது சட்டம் இருந்ததா? என்றும் அவர் கேள்வி எழுப்பினார்.
ஒரு முஸ்லிம் மாணவி பர்தா அணிந்து பரீட்சை எழுத முடியாது என்று ஒரு அதிகாரி தீர்மானம் எடுத்தால், அந்த அதிகாரிக்கு நடவடிக்கை எடுப்பதற்கு மேலதிகாரிகள், மாகாண கல்வித்திணைக்களம், ஆளுநர், கல்வி அமைச்சின் அதிகாரிகள் என்ன செய்தனர் என்பதெல்லாம் கடந்து செல்லக் கூடிய ஒரு விடயமல்ல என்றார்.
எம்.எஸ்.தௌபீக்
திருகோணமலை சாஹிரா கல்லூரியில் பரீட்சைக்கு தோற்றிய 70 மாணவிகளுக்கும் இழைக்கப்பட்டது பெரும் அநீதியாகும். கடந்த இரண்டு வருடங்களாக பெரும் பொருளாதார சுமைகளுக்கு மத்தியில் பல்கலைக்கழகத்திற்கு செல்ல வேண்டும் என்ற அவாவில் கற்று பரீட்சைக்கு தோற்றினார்கள் என திருகோணமலை மாவட்ட பாராளுமன்ற உறுப்பினர் குறிப்பிட்டார்.
பர்தா அணிந்து பரீட்சைக்கு சென்றார்கள் என்ற அடிப்படையிலும் ஆள் அடையாளம் உறுதிப்படுத்தப்படவில்லை எனம் குற்றச்சாட்டிலும் பெறுபேறுகள் இடைநிறுத்தப்பட்டிருக்கிறது. இது பாரிய அநீதியாகும்.
பரீட்சை திணைக்களத்திற்கு சென்று சம்பந்தப்பட்ட அதிகாரிகளிடம் பேசியபோது இன்னும் ஓரிரு வாரங்களில் பெறுபேற்றை வெளியிட எதிர்ப்பார்ப்பதாக உறுதியளித்துள்ளார். எனவே அவசரமாக பெறுபேற்றை வெளியிடவேண்டும் என்று இந்த உயரிய சபையில் கல்வி அமைச்சுக்கும் அரசாங்கத்திற்கும் வேண்டுகோள் விடுக்கிறேன் என்றார்.- Vidivelli