எம்.ஐ.அப்துல் நஸார்
தொடர் தாக்குதல்களையும் பட்டினி நிலையினையும் எதிர்கொண்டுவரும் காஸா மக்களுக்கு ஆதரவளிக்கும் வகையில் இந்து சமுத்திரத்தின் தீவுக்கூட்ட நாடான மாலைதீவு இத் தடையினை விதித்துள்ளது.
காஸாவில் நடைபெற்றுவரும் போர் முஸ்லிம் மக்கள் பெரும்பான்மையாக வாழும் மாலைதீவில் பொதுமக்கள் மத்தியில் கடுமையான கோபத்தினை ஏற்படுத்தியுள்ளதனையடுத்து, வெள்ளை மணல் கடற்கரைகள் மற்றும் சொகுசு ஓய்வு விடுதிகளுக்கு பெயர் பெற்ற இந்து சமுத்திரத்தின் தீவுக்கூட்ட நாடான மாலைதீவு இஸ்ரேலியர்கள் தனது நாட்டுக்குள் வருவதைத் தடைசெய்துள்ளது.
ஜனாதிபதி மொஹமட் முய்சு ‘இஸ்ரேலிய கடவுச்சீட்டினை கொண்டிருப்பவர்களை நாட்டுக்குள் நுழைவதைத் தடை செய்யத் தீர்மானித்துள்ளார்’ என அவரது அலுவலகத்தின் ஊடகப் பேச்சாளர் அறிக்கையொன்றில் தெரிவித்துள்ளார், எனினும் புதிய சட்டம் எப்போது அமுலுக்கு வரும் என்ற விபரங்கள் எதனையும் தெரிவிக்கவில்லை.
முய்சு, ‘பலஸ்தீனத்துக்கு ஆதரவுடன் மாலைதீவு’ என்ற தேசிய நிதி திரட்டும் பிரச்சாரத்தையும் அறிவித்துள்ளார். கடந்த வருடம் சுமார் 11,000 இஸ்ரேலியர்கள் மாலைதீவுக்கு விஜயம் செய்தனர், இது மொத்த சுற்றுலாப் பயணிகளின் வருகையில் 0.6 சதவீதமாகும்.
இந்த வருடத்தின் முதல் நான்கு மாதங்களில் மாலைதீவிற்கு வருகை தந்த இஸ்ரேலியர்களின் எண்ணிக்கை 528 ஆகக் குறைந்துள்ளது, இது கடந்த வருடம் இதே காலத்துடன் ஒப்பிடுகையில் 88 சதவீத வீழ்ச்சியாகும்.
காஸா போருக்கு எதிரான போராட்டத்தின் அடையாளமாக இஸ்ரேலியர்கள் நாட்டுக்குள் வருவதைத் தடை செய்யுமாறு மாலைதீவின் எதிர்க்கட்சிகளும் அரசாங்க கூட்டணியினரும் முய்சு மீது அழுத்தம் கொடுத்து வருகின்றனர். ஒக்டோபர் 7 ஆம் திகதி முதல் நடந்துவரும் மோதலில் குறைந்தது 36,439 பலஸ்தீனியர்கள் கொல்லப்பட்டுள்ளனர் மற்றும் 82,627 பேர் காயமடைந்துள்ளனர்.
1990 களின் முற்பகுதியில் இஸ்ரேலிய சுற்றுலாப் பயணிகளுக்கான முந்தைய தடையை மாலைதீவு நீக்கியதோடு 2010 இல் இஸ்ரேலுடனான உறவுகளை சீர்செய்யும் நகர்வுகளை மேற்கொண்டது. எனினும், பெப்ரவரி 2012 இல் ஜனாதிபதி முகமது நஷீத் பதவி கவிழ்க்கப்பட்டதைத் தொடர்ந்து உறவுகளை சீர்செய்யும் முயற்சிகள் கைவிடப்பட்டன.
இந்த நிலையில், இஸ்ரேல் வெளிநாட்டலுவல்கள் அமைச்சின் ஊடகப் பேச்சாளர், தற்போது மாலைதீவில் உள்ள இஸ்ரேலியர்களை வெளியேறுமாறு வலியுறுத்தியுள்ளார்.
‘மாலைதீவில் தங்கியிருக்கும் இஸ்ரேலிய மக்களுக்கு, வெளியேறுவது தொடர்பில் கருத்தில் கொள்ள பரிந்துரைக்கப்படுகிறது, ஏனெனில் அவர்கள் ஏதேனும் காரணத்திற்காக துன்பத்தில் சிக்கிக்கொண்டால், எங்களுக்கு உதவுவது கடினம்.’
அல்ஜீரியா, பங்களாதேஷ், புருனே, ஈரான், ஈராக், குவைத், லெபனான், லிபியா, பாகிஸ்தான், சவூதி அரேபியா, சிரியா மற்றும் யெமன் ஆகிய நாடுகளுக்குள் நுழைய இஸ்ரேலிய பாஸ்போர்ட் வைத்திருப்பவர்களுக்கும் அனுமதி மறுக்கப்பட்டுள்ளது.
இந்த நாடுகளின் நுழைவுத் தடைகள் தொடர்பில் பதிலளிக்கும் விதமாக இஸ்ரேல் அரசாங்கம் கடந்த மார்ச் மாதம் எக்ஸ் தளத்தில் இட்ட பதிவில், ‘நாங்கள் நன்றாக இருக்கிறோம்,’ இதுபோன்ற நிலைமைகள் காஸாவில் நடந்துகொண்டிருக்கும் போர் தொடங்குவதற்கு முன்பும் இருந்தது எனவும் தெரிவித்துள்ளது.
மாலைதீவு அதிபர் முகமது முய்சுவின் அலுவலகம் ஞாயிற்றுக்கிழமை வெளியிட்ட தகவலின்படி, இஸ்ரேலிய பாஸ்போர்ட் வைத்திருப்பவர்கள் நாட்டிற்குள் நுழைவதைத் தடுக்கும் வகையில் சட்டங்களை மாற்ற அமைச்சரவை முடிவு செய்துள்ளதாக தெரிவித்தது. அமைச்சரவை பரிந்துரையின் பேரில் அதிபர் முய்சு இந்த முடிவை எடுத்துள்ளார்.
இந்த செயல்முறையை மேற்பார்வையிட துணைக் குழுவொன்றை அமைக்கவும் தீர்மானித்துள்ளதாக அதிபர் அலுவலகம் தெரிவித்துள்ளது. இந்த முடிவு குறித்து அந்நாட்டு உள்துறை அமைச்சர் அலி இஹ்சானும் அறிவித்தல் ஒன்றை வெளியிட்டார்.
உள்துறை அமைச்சர் அலி இஹ்சானுடன், இஸ்லாமிய அமைச்சர், அட்டர்னி ஜெனரல், பொருளாதார அமைச்சர், சுற்றுலாத்துறை அமைச்சர் மற்றும் வெளியுறவு அமைச்சர் ஆகியோரும் இந்த துணைக்குழுவில் இடம்பெறுவார்கள் என அவர் தெரிவித்துள்ளார்.
இஸ்ரேலிய குடிமக்களுக்கு தடை விதிப்பது மட்டுமின்றி, பலஸ்தீனம் தொடர்பான முக்கிய முடிவுகளையும் மாலைதீவு எடுத்துள்ளது.
பலஸ்தீன மக்களுக்காக
எடுக்கப்பட்ட முடிவு
மாலைதீவு அதிபர் அலுவலகம் வெளியிட்ட தகவலின்படி, அதிபர் முகமது முய்சு பலஸ்தீனர்களின் தேவைகளை மதிப்பிடும் ஒரு சிறப்பு தூதுவரை நியமிப்பார், மேலும் பலஸ்தீன மக்களுக்காக நிதி திரட்டுவதற்கான பிரசாரத்தையும் தொடங்குவார்.
இந்த நிதி இடம்பெயர்ந்த பலஸ்தீனர்களுக்கு உதவும் வகையில் பயன்படுத்தப்படும். இது தவிர பலஸ்தீனர்களுக்கு எந்தெந்த பகுதிகளில் உதவிகள் தேவை, என்ன மாதிரியான உதவிகள் தேவை என்பது குறித்தும் இந்த தூதுவர் மாலைதீவு அதிபருக்கு ஆலோசனை வழங்குவார்.
‘மாலைதீவு மக்கள் பலஸ்தீனத்துக்கு ஆதரவாக நிற்கிறார்கள்’ என்று பெயரிடப்பட்ட தேசிய அணிவகுப்பை நடத்தவும் மாலைதீவு அமைச்சரவை முடிவு செய்துள்ளது. மேலும், பலஸ்தீன விவகாரம் தொடர்பாக இஸ்லாமிய நாடுகளுடன் சந்திப்பை ஏற்பாடு செய்து, முன்மொழிவை வெளியிடவும் மாலைதீவு திட்டமிட்டுள்ளது.
இஸ்ரேலிய பிரஜைகள் மாலைதீவுக்குள் நுழையத் தடை விதிக்கும் இந்த முடிவை அரசாங்கம் எடுப்பதற்கான அழுத்தத்தை எதிர்க்கட்சித் தலைவரே வழங்கியிருந்தார். பிரதான எதிர்க்கட்சியான மாலைதீவு ஜனநாயகக் கட்சியின் (எம்.டி.பி) தலைவரான மைக்கேல் அகமது நசீம், இஸ்ரேலிய பிரஜைகள் நாட்டுக்குள் நுழைவதைத் தடை செய்யும் வகையில் குடிவரவுச் சட்டத்தில் திருத்தத்தை கடந்த வாரம் அறிமுகப்படுத்தி இருந்தார். மாலைதீவில் புதிய பாராளுமன்றம் கடந்த வாரம் பொறுப்பேற்றது.
மாலைதீவில் சமீபத்தில் நடைபெற்ற தேர்தலில், பிரதான ஆளும் கட்சியான மக்கள் தேசிய காங்கிரஸ் (PNC) 93 தொகுதிகளில் 75 இடங்களில் வெற்றி பெற்று, நாடாளுமன்றத்தில் அமோக பெரும்பான்மையை பெற்றது.
இதனிடையே தலைநகர் மாலே நகரில், காஸாவில் இஸ்ரேலிய தாக்குதல்களுக்கு எதிராக பொது மக்கள் பல மாதங்களாக ஆர்ப்பாட்டத்தில் ஈடுபட்டு வருகின்றனன. மேலும் இஸ்ரேலிய பிரஜைகள் நாட்டிற்குள் நுழைவதைத் தடை செய்யும் சட்டத்தை கொண்டு வருமாறு கோரிக்கை விடுத்தும் வந்தனர்.
இஸ்ரேலின் எதிர்வினை என்ன?
இஸ்ரேலிய பாஸ்போர்ட் வைத்திருப்பவர்கள் மாலைதீவுக்குள் நுழைவதைத் தடுக்கும் மாலைதீவின் முடிவைத் தொடர்ந்து இஸ்ரேலும் முன்னெச்சரிக்கை நடவடிக்கைகளை எடுத்துள்ளது.
மாலைதீவுக்கு பயணம் செய்வதை தவிர்க்குமாறு இஸ்ரேல் மக்களுக்கு அந்நாட்டு வெளியுறவு அமைச்சகம் அறிவுறுத்தியுள்ளதாக இஸ்ரேல் வெளியுறவு அமைச்சக செய்தி தொடர்பாளர் ஓரன் மார்மோர்ஸ்டீன் தெரிவித்துள்ளார்.
இஸ்ரேலிய பாஸ்போர்ட் வைத்திருக்கும் நபர்களுக்கும் வெளியுறவு அமைச்சகம் இந்த ஆலோசனையை வழங்கியுள்ளது.
மாலைதீவுக்கு ஒவ்வொரு ஆண்டும் கிட்டத்தட்ட 1 மில்லியன் சுற்றுலாப் பயணிகள் வருகிறார்கள், அவர்களில் சுமார் 15 ஆயிரம் பேர் இஸ்ரேலைச் சேர்ந்தவர்கள். கடந்த ஆண்டு, சுமார் 11 ஆயிரம் இஸ்ரேல் பிரஜைகள் மாலைதீவுக்கு வருகை தந்துள்ளனர். இது மாலைதீவின் மொத்த சுற்றுலாப் பயணிகளின் எண்ணிக்கையில் 0.6 சதவீதம் ஆகும்.
மாலைதீவு மற்றும் இஸ்லாம் மதம்
மாலைதீவு ஒரு இஸ்லாமிய நாடு. 1965 இல் பிரிட்டனிடம் இருந்து மாலைதீவு அரசியல் ரீதியாக முற்றிலும் சுதந்திரமடைந்தது. சுதந்திரம் அடைந்த மூன்று ஆண்டுகளுக்குப் பிறகு, மாலைதீவு ஒரு இஸ்லாமிய குடியரசானது.
சுதந்திரம் பெற்றதில் இருந்து, மாலைதீவு மக்களின் அரசியலிலும், வாழ்விலும் இஸ்லாம் முக்கிய பங்காற்றியுள்ளது. 2008 இல் மாலைதீவில் அரச மதமாக `இஸ்லாம்’ மாறியது.
மாலைதீவில் நில உரிமையும் குடியுரிமையும் சுன்னி முஸ்லிம்களுக்கு மட்டுமே வழங்கப்படுகிறது. மாலைதீவின் அதிபர் மற்றும் அமைச்சர்கள் சுன்னி முஸ்லிம்களாக மட்டுமே இருக்க வேண்டும் என்பது அரசியலமைப்பில் கட்டாயமாக்கப்பட்டுள்ளது.
மாலைதீவு சட்டப்படி, இஸ்லாத்தை விமர்சிப்பது குற்றமாக கருதப்படுகிறது. மாலைதீவு உலகின் மிகச்சிறிய இஸ்லாமிய நாடு.
அதிபராக பதவியேற்ற பிறகு முகமது முய்சு முதல் வெளிநாட்டுப் பயணமாக துருக்கிக்குச் சென்றார். முன்னதாக, மாலைதீவின் புதிய அதிபரின் முதல் வெளிநாட்டு பயணம் எப்போதும் இந்தியாவாக தான் இருக்கும். ஆனால் முய்சு இந்த பாரம்பரியத்தை உடைத்துள்ளார்.
துருக்கி ஒரு முஸ்லிம் பெரும்பான்மை நாடு மற்றும் ஒட்டோமான் சுல்தானகத்தின் மரபுகளுடன் தொடர்புடையது. எனவே இந்த பாரம்பரியத்தின் அடிப்படையில், துருக்கிய அதிபர் ரெசெப் தையிப் எர்டோகன் துருக்கியை இஸ்லாமிய நாடுகளின் தலைவராக முன்வைக்கிறார்.
இஸ்ரேலுக்கு எதிரான வழக்கு
காஸாவில் நடந்த படுகொலைகள் தொடர்பாக சர்வதேச நீதிமன்றத்தில் இஸ்ரேலுக்கு எதிராக றத்தில் இஸ்ரேலுக்கு எதிராக தென்னாபிரிக்கா வழக்குத் தொடர்ந்துள்ளது.
அந்த சமயத்தில், காஸாவில் பலஸ்தீன மக்களுக்கு எதிரான வன்முறைகளை நிறுத்துமாறு நீதிமன்றம் தற்காலிக தீர்ப்பை வழங்கியது.
ஒக்டோபர் 7 அன்று, இஸ்ரேலில் ஹமாஸ் நடத்திய தாக்குதலில் ஏறக்குறைய 1,200 பேர் கொல்லப்பட்டனர். 250 க்கும் மேற்பட்ட இஸ்ரேலியர்களை ஹமாஸ் ஆயுதக்குழுவினர் பணயக் கைதிகளாக காஸாவிற்கு பிடித்துச் சென்றனர். இதற்குப் பிறகு, இஸ்ரேல் காஸாவில் தன் தாக்குதலைத் தொடங்கியது, இதில் இதுவரை 36 ஆயிரத்துக்கும் மேற்பட்ட மக்கள் இறந்துள்ளனர், அவர்களில் பெரும்பாலானோர் பொதுமக்கள்.- Vidivelli