எப்.அய்னா
இஸ்லாமியர்கள் ஏக இறைவனாக வழிபடும் அல்லாஹ்வையும் இஸ்லாத்தையும் அவமதித்து கருத்து வெளியிட்டதன் ஊடாக இனங்களுக்கு இடையே, நல்லிணக்கத்தை பாதிக்கும் விதமாக நடந்துகொண்டமை தொடர்பில் குற்றவாளியாக காணப்பட்டுள்ள, ஒரே நாடு ஒரே சட்டம் ஜனாதிபதி செயலணி தலைவரும், பொது பல சேனா அமைப்பின் பொதுச் செயலருமான கலகொட அத்தே ஞானசார தேரருக்கு எதிராக தண்டனை அளிக்கப்பட்டுள்ளது. கடந்த மார்ச் 28 ஆம் திகதி இந்த தண்டனை தீர்ப்பு கொழும்பு மேல் நீதிமன்ற நீதிபதி ஆதித்ய பட்டபெந்திகேயினால் வழங்கப்பட்டது.
இஸ்லாமியர்கள் ஏக இறைவனாக வழிபடும் அல்லாஹ்வை தூற்றும் விதமாக கருத்து வெளியிட்டு, மத உணர்வுகளை தூண்டியதாக கொழும்பு மேல் நீதிமன்றில் சட்ட மா அதிபர் தொடர்ந்த எச்.சி.1948/20 எனும் வழக்கின் விசாரணைகள் நிறைவடைந்த நிலையில், இந்த தீர்ப்பளிக்கப்பட்டது.
மேல் நீதிமன்ற வழக்கு :
இனங்களுக்கு இடையே, நல்லிணக்கத்தை பாதிக்கும் விதமாக கருத்து வெளியிட்டமை தொடர்பில் குற்றம் சாட்டப்பட்டுள்ள, ஒரே நாடு ஒரே சட்டம் ஜனாதிபதி செயலணி தலைவரும், பொது பல சேனா அமைப்பின் பொதுச் செயலருமான கலகொட அத்தே ஞானசார தேரருக்கு எதிராக இந்த வழக்கில் சாட்சி விசாரணைகள் 2022 செப்டம்பர் 20 ஆம் திகதி ஆரம்பிக்கப்பட்டது. கொழும்பு மேல் நீதிமன்ற நீதிபதி ஆதித்ய பட்டபெந்திகே முன்னிலையில் இவ்வழக்கு விசாரணை செய்யப்பட்டது.
குற்றச்சாட்டுக்கள்:
1. கடந்த 2016 நவம்பர் மாதம் முதலாம் திகதிக்கும் 2016 டிசம்பர் மாதம் 16 ஆம் திகதிக்கும் இடைப்பட்ட காலப்பகுதியில் கிருளப்பனையில் வைத்து, ஒரு சாராரின் மத உணர்வுகளை அவமதிக்கும், தூண்டும் விதமாக துஷ்ட எண்ணத்துடன் அதாவது, இஸ்லாமியர்களின் ஏற்பு மற்றும் நம்பிக்கைகளுக்கு நிந்தனை செய்யும் நோக்குடன்,’ கூரகல என்பது 12 ஆயிரம் பிக்குகள் சங்கமித்த ஒரு வரலாற்று இடம்.இப்போது இந்த இடத்தை ஆக்கிரமித்துள்ளனர். அதனை ஆக்கிரமித்தவர்கள் சைலானி முஸ்லிம்கள். இப்போது இங்கு மிக்க பிரச்சினை கடவுள் ஒன்று இல்லவும் இல்லை அந்த கடவுளுக்கு முகமும் இல்லை இனி நாம் கேட்கிறோம் என்ன ல…… காட்டுகின்றீர்கள் என்று?’ என கூறியதன் ஊடாக முஸ்லிம்களின் மத நம்பிக்கையை நிந்தனை செய்து இலங்கை தண்டனை சட்டக் கோவையின் 291 ஆ பிரிவின் கீழ் தண்டனைக்குரிய குற்றம் ஒன்றினை புரிந்தமை.
2. இதே காலப்பகுதியில், அதே இடத்தில் ஒரு சாராரின் மத உணர்வுகளை அவமதிக்கும், தூண்டும் விதமாக துஷ்ட எண்ணத்துடன் அதாவது, இஸ்லாமியர்களின் ஏற்பு மற்றும் நம்பிக்கைகளுக்கு நிந்தனை செய்யும் நோக்குடன் ‘ இந்த அல்லாஹ் பிடித்துக்கொண்டிருந்த இடமே இது. இங்கு தான் சிறுநீர் கழித்தார். அதன் பின்னர் அடுத்த இடத்தில் காலை வைத்தார். அப்படி சொல்லுமளவுக்கு பெரிய ‘ பூ வல்லா'( ஒரு வகை படரும் ஆக்டோபஸ்) தான் அல்லாஹ். அல்லாஹ் என்பது பாரிய ‘ பூ வல்லா'( ஒரு வகை படரும் ஆக்டோபஸ்). ஒரு இடத்தில் சிறு நீர் கழிக்கிக்கின்றார். இன்னொரு இடத்தில் மலம் கழிக்கின்றார். முழு உலகும் அல்லாஹ்வினுடையது என்றே சொல்லி இருக்கின்றார்கள். எனவே இந்த மூட நம்பிக்கைக்கு இடமளிக்க முடியாது.’ என கூறியதன் ஊடாக முஸ்லிம்களின் மத நம்பிக்கையை நிந்தனை செய்து இலங்கை தண்டனை சட்டக் கோவையின் 291 ஆ பிரிவின் கீழ் தண்டனைக்குரிய குற்றம் ஒன்றினை புரிந்தமை.
இந்த இரு குற்றச்சாட்டுக்களே குற்றப் பத்திரிகையில் ஞானசார தேரருக்கு எதிராக சுமத்தப்பட்டிருந்த நிலையில், அவை வாசித்துக்காட்டப்பட்ட போது, அக்குற்றச்சாட்டுக்கள் தொடர்பில் தான் நிரபராதி என ஞானசார தேரர் குறிப்பிட்டிருந்தார். எனினும் வழக்குத் தொடுநர் சட்ட மா அதிபர் நியாயமான சந்த்தேகத்துக்கு அப்பால் அக்குற்றங்களை ஞானசார தேரர் புரிந்தார் என்பதை சாட்சியங்கள் ஊடாக நிரூபித்ததை அடுத்து அவரை குற்றவாளியாக நீதிமன்றம் அறிவித்தது.
மதகுருமாருக்கு சமூகத்தில் அமைதியை நிலைநாட்டும் பொறுப்பு உள்ள நிலையில் அதனை குற்றவாளி மீறியுள்ளதாக சுட்டிக்காட்டிய நீதிபதி ஆதித்ய பட்டபெந்திகே, குற்றவாளியான ஞானசார தேரருக்கு இரு குற்றச்சாட்டுக்களுக்கும் தலா 2 வருடம் வீதம் 4 வருட கடூழிய சிறைத் தண்டனையை விதித்து தீர்ப்பளித்தார்.
முறைப்பாடு:
முன்னாள் மேல் மாகாண ஆளுநர் அசாத் சாலி, முன்னாள் பாராளுமன்ற உறுப்பினர் முஜிபுர் ரஹ்மான் மற்றும் பாராளுமன்ற உறுப்பினர் ரிஷாத் பதியுதீன் ஆகியோர் பொலிஸில் செய்த முறைப்பாட்டுக்கு அமைய இடம்பெற்ற விசாரணைகளை மையப்படுத்தி, மேல் நீதிமன்றில் ஞானசார தேரருக்கு எதிராக சட்ட மா அதிபரால் இந்த குற்றப் பத்திரிகை தாக்கல் செய்யப்பட்டது.
சாட்சிகள்:
இவ்வழக்கை பொறுத்தவரை முதல் சாட்சியாளரான அசாத் சாலியின் சாட்சியம் பதிவு செய்யப்பட்ட நிலையில் 2 ஆவது சாட்சியாளரான முஜிபுர் ரஹ்மானின் சாட்சியமும் நீதிமன்றில் பெறப்பட்டது. 3 ஆம் சாட்சியாளரான பாராளுமன்ற உறுப்பினர் ரிஷாத் பதியுதீனின் சாட்சியத்தை பெற அறிவித்தல் விடுத்த போதும் பின்னர் அதற்கான அவசியம் இல்லை என அவரது சாட்சியம் பெறப்படவில்லை. இந்த சாட்சியாளர்கள் மன்றில் சாட்சியம் அளித்த போது அவர்களின் நலனுக்காக சட்டத்தரணி வஸீமுல் அக்ரமுடன் சிரேஷ்ட சட்டத்தரணி ருஷ்தி ஹபீப் மன்றில் ஆஜராகியிருந்த்தார்.
இதனைவிட 4 ஆவது சாட்சியாளராக பெயரிடப்பட்டிருந்த சுவர்னவாஹினி பிரதான நிறைவேற்று அதிகாரியாக இருந்து ஊடகத் துறையிலிருந்து ஒதுங்கிய வர்த்தகர் சுதேவ ஹெட்டி ஆரச்சி,5 ஆவது சாட்சியாளர் குறித்த செய்தியாளர் சந்திப்பை ஒளிப்பதிவு செய்த ஒளிப்பதிவு ஊடகவியலாளர் ஜனக விஜேவர்தன ஆகியோரின் சாட்சியங்களும் மன்றில் நெறிப்படுத்தப்பட்டது.
சட்ட மா அதிபர் சார்பில் அரசின் சிரேஷ்ட சட்டவாதி லக்மாலி திஸாநாயக்க மன்றில் ஆஜரானதுடன், ஞானசார தேரருக்காக சட்டத்தரணி ஆரியதாஸ குரே உள்ளிட்ட குழுவினர் மன்றில் ஆஜராகியிருந்தனர்.
குற்றப் பத்திரிகையில் குறிப்பிடப்பட்டிருந்த 4 விடயங்களை ஞானசார தேரர் தரப்பு சவாலுக்கு உட்படுத்தாது வழக்கு விசாரணைக்கு முன்னரான ஒன்று கூடலின் போது ஏற்புக்களாக ஏற்றுக்கொண்டது.
அதில் இஸ்லாத்தில் சிலை வணக்கம் இல்லை என்பதும் சிலை வணக்கம் இஸ்லாமிய நம்பிக்கைக்கு எதிரானது என்பதும் ஒரு ஏற்பாகும்.
வழக்குத் தொடுநர் சட்ட மா அதிபர் தன் பக்க சாட்சியங்களை நெறிப்படுத்திய பின்னர், ஞானசார தேரருக்கு அவர் தரப்பு நியாயங்களை முன் வைக்க அனுமதிக்கப்பட்டது. இதன்போதே அவர் பிரதி வாதிக் கூண்டில் இருந்தவாறு அறிவிப்பொன்றினை செய்தார்.
அதன் பின்னர் ஞானசார தேரரின் சட்டத்தரணியால் எழுத்து மூல சமர்ப்பணம் ஒன்றும் மன்றுக்கு முன் வைக்கப்பட்டது.
சாட்சி பகுப்பாய்வு :
நீதிமன்றை பொறுத்தவரை சட்ட மா அதிபர் கொண்டு வந்த சாட்சியங்கள் கவனமாக பகுப்பாய்வு செய்யப்பட்டுள்ளன. குறிப்பாக அந்த பகுப்பாய்வுகளின் போது சாட்சியாளர்களின் நம்பகத் தன்மை, சாட்சியளிக்கும் பாணி, தாமதமின்மை, ஒத்த தன்மைகள், நடப்பதற்கான வாய்ப்புக்கள் என பல நிர்ணயங்களை மையப்படுத்தி இந்த பகுப்பாய்வு முன்னெடுக்கப்பட்டுள்ளது.
சாட்சியாளர்கள் :
முதல் இரு சாட்சியாளர்களான அசாத் சாலி, முஜிபுர் ரஹ்மான் ஆகியோர் சாட்சியமளிக்கும் போது தாங்கள் யூ ரியூப் தளத்தில் ஞானசார தேரரின், முஸ்லிம்களை புண்படுத்தும் செய்தியாளர் சந்திப்பை முழுமையாக பார்த்ததாக கூறி முறையிட்டதாக தெரிவித்ததுடன், குற்றச்சாட்டில் குறிப்பிடப்பட்டுள்ள வசனங்களைக் கொண்டு அந்த நிந்தனையை ஞானசார தேரர் செய்ததாகவும் குறிப்பிட்டனர். அது தொடர்பில் அச்செய்தியாளர் சந்திப்பின் இறுவெட்டு சி.ஐ.டி.க்கு கையளிக்கப்பட்டிருந்த நிலையில், அந்த இறுவெட்டு தொடர்பில் சாட்சியங்கள் தொடர்பிலான விஷேட விதிவிதானங்கள் தொடர்பிலான சட்டத்தின் 7 ஆம் அத்தியாயம் பிரகாரம் போதுமான நடவடிக்கைகள் எடுக்கப்பட்டிருந்தன.
4 ஆவது சாட்சியாளரான சுதேவ ஹெட்டி ஆரச்சி சாட்சியம் அளித்து, குறித்த ஒளிப்பதிவு ஹிரு தொலைக்காட்சி ஊடாக பதிவு செய்யப்பட்டது எனவும், அப்போது தான் அத்தொலைக்காட்சியின் செய்திப் பிரிவுக்கு பொறுப்பாக இருந்ததாகவும் சாட்சியமளித்தார்.
5 ஆவது சாட்சியாளரான கடந்த 12 வருடங்களாக ஹிரு தொலைக்காட்சியில் ஒளிப்பதிவாளராக பணி புரியும் சத்துரங்க விஜேவர்தன, முழு செய்தியாளர் சந்திப்பின் காணொளியையும் திறந்த மன்றில் கேட்டுவிட்டு, அது தன்னால் பதிவு செய்யப்பட்டதே என்பதை சாட்சியமாக வழங்கினார்.
ஞானசார தேரரின் நிலைப்பாடு:
இவை தொடர்பில் பிரதிவாதி கூண்டிலிருந்தவாறு ஞானசார தேரர் அளித்த அறிவிப்பில், குறித்த ஊடகவியலாளர் சந்திப்பு மற்றும் அதன் உள்ளடக்கம் ஆகியவற்றை ஏற்றுக் கொண்டதுடன் அது எவரையும் புண்படுத்தும் நோக்குடன் பேசப்படவில்லை எனவும், இஸ்லாமியர்களின் மனம் புண்பட்டிருந்தால் தான் கவலை தெரிவிப்பதாகவும் குறிப்பிட்டிருந்தார்.
எழுத்து மூல சமர்ப்பணம் :
ஞானசார தேரர் சார்பில் முன் வைக்கப்பட்ட எழுத்து மூல சமர்ப்பணத்திலும் அவர் புண்படுத்தும் நோக்குடன் அந்த கருத்துக்களை முன் வைக்கவில்லை என்பதே பிரதான விடயமாக அமைந்திருந்தது.
நீதிபதி ஆதித்ய பட்டபெந்திகேயின் தீர்ப்பு :
முறைப்பாட்டாளர் தரப்பு மற்றும் பிரதிவாதியின் பிரதிவாதிக் கூண்டு அறிவிப்பு அவர் சார்பிலான எழுத்து மூல சமர்ப்பணம் உள்ளிட்டவை நீதிபதியினால் கவனமாக ஆராயப்பட்டுள்ளது. முறைப்பாட்டாளர் தரப்பு சாட்சியாளர்களிடம் ஞானசார தேரர் தரப்பினால் தொடுக்கப்பட்ட குறுக்கு கேள்விகள் அவை தொடுக்கப்பட்ட விதம், அதற்கு அளிக்கப்பட்ட பதில்கள் என அனைத்தும் நீதிபதி ஆதித்ய பட்டபெந்திகேயினால் கவனமாக ஆராயப்பட்டுள்ளது.
இதில் 5 ஆவது சாட்சியாளரின் சாட்சியம் எந்த சவாலுக்கும் உட்படுத்தப்படவில்லை. அதே போன்று முதல் இரு சாட்சியாளர்களான அசாத் சாலி, முஜிபுர் ரஹ்மான் ஆகியோர் இணையத்தில் இருந்து பிரதி செய்து சி.ஐ.டி.க்கு வழங்கிய இறுவெட்டுக்களில் அடங்கியுள்ள விடயங்கள் எந்தவகையிலும் ஞானசார தேரர் தரப்பினரால் சவாலுக்கு உட்படுத்தப்பட்டிருக்கவில்லை என்பது நீதிபதி ஆதித்ய பட்டபெந்திகேயின் அவதானிப்பாகும்.
அதன்படியே, ஞானசார தேரருக்கு எதிராக முன் வைக்கப்பட்ட குற்றப் பத்திரிகையில் குறிப்பிடப்பட்டுள்ள கேவலமான வசனங்களை உள்ளடக்கிய விடயங்களை ஞானசார தேரர் தெரிவித்தமை, அதனூடாக முஸ்லிம்களின் நம்பிக்கையை நிந்தனை செய்தமை தொடர்பில் முன் வைக்கப்பட்டுள்ள இரு குற்றச்சாட்டுக்களும் சந்த்தேகத்துக்கு இடமின்றி நிரூபிக்கப்பட்டுள்ளதாக நீதிபதி அறிவித்து ஞானசார தேரரை குற்றவாளியாக அறிவித்துள்ளார்.
இஸ்லாமியர்களின் நம்பிக்கையை நிந்தனை செய்தமை ஊடாக இலங்கை தண்டனைச் சட்டக் கோவையின் 291 ஆ பிரிவின் கீழ் தண்டனைக்குரிய குற்றம் ஒன்றினை ஞானசார தேரர் புரிந்துள்ளார் என்பதை விளக்க நீதிபதி தனது தீர்ப்பில், தண்டனை சட்டக் கோவையின் 291 ஆவது அத்தியாயம் தொடர்பில் நீண்ட விளக்கங்களை கொடுத்துள்ளார்.
1883 ஆம் ஆண்டு அறிமுகம் செய்யப்பட்ட எமது தண்டனைச் சட்டக் கோவையின் மூலம் ஆங்கில மொழியில் இருப்பதை சுட்டிக்காட்டி அதனை விளக்கியுள்ள நீதிபதி, எமது தண்டனை சட்டக் கோவையின் 291 ஆ பிரிவு, இந்திய தண்டனை சட்டக் கோவையின் 295 ஆவது அத்தியாயத்துக்கு சமமானது என்பதை விளக்கியுள்ளார்.
இந்திய தண்டனைச் சட்டக் கோவை 1860 களில் ஆங்கிலேயரால் அறிமுகம் செய்யப்பட்ட போதும், 1927 ஆம் ஆண்டே 295 ஆவது அத்தியாயம் உள்ளீர்க்கப்பட்டுள்ளது. அதே போல இலங்கையின் தண்டனை சட்டக் கோவையின் 291 ஆ அத்தியாயமானது 1945 ஆம் ஆண்டின் 40 ஆம் இலக்க திருத்தம் ஊடாகவே உள்ளீர்க்கப்பட்டுள்ளது.
இந்திய தண்டனை சட்டக் கோவையின் 295 ஆவது அத்தியாயம் உள்ளீர்க்கப்பட காரணமாக அமைந்த முஹம்மத் நபியவர்களை நிந்தனை செய்யும் கையேடு ஒன்றினை மையப்படுத்திய விடயத்தை இந்திய தண்டனை சட்டக் கோவை விளக்க புத்தகம் ஒன்றினை மையப்படுத்தி விரிவாக ஆராய்ந்துள்ள நீதிபதி ஆதித்ய பட்டபெந்த்திகே, இவ்வகையான குற்றச்சாட்டுக்களின் பயன்படுத்திய வசனங்கள் மற்றும் அவ்வசனங்களை பயன்படுத்துவதின் உள்ளார்ந்த்த நோக்கம் தொடர்பில் வழக்குத் தொடுநர் நிரூபிக்க வேண்டும் என்பது புலனாவதாக குறிப்பிட்டுள்ளார்.
அதன்படியே இந்த வழக்கில் ஞானசார தேரர் பயன்படுத்திய வசனங்கள் தனியாக ஆராயப்படாது, முழு செய்தியாளர் சந்திப்பின் உள்ளடக்கத்துடனும் சேர்த்து ஆராயப்பட்டுள்ளது.
நீதிபதியின் தீர்ப்பின் படி, இந்த செய்தியாளர் சந்திப்பு முழுவதும் ஞானசார தேரரின் இலக்கு முஸ்லிம்களாக இருந்துள்ளது. இந்த ஊடகவியலாளர் சந்த்திப்பில் முழு முஸ்லிம்கள் மற்றும் அவர்கள் ஏக இறைவனாக, அவர்களது பாதுகாவலனாக நம்பிக்கை கொண்டுள்ள அல்லாஹ்வை குறி வைத்தே அனைத்து விடயங்களும் பேசப்பட்டுள்ளன.
ஒரு பெளத்த துறவியாக இருந்து கொண்டு ஞானசார தேரர் மிக ஆக்ரோஷமாக அவரது வசனங்களை வெளிப்படுத்தியுள்ளமை தெட்டத் தெளிவாக அவதானிக்கப்பட்டுள்ள நிலையில், அவர் வேண்டும் என்றே, நிந்தனை செய்யும் எண்ணத்துடன் அந்த வசனங்களை வெளிப்படுத்தியுள்ளமை சாட்சியங்கள் ஊடாக உறுதி செய்யப்பட்டுள்ளது. இதனூடாக முழு உலகிலும் வாழும் முஸ்லிம்களின் நம்பிக்கை நிந்தனை செய்யப்பட்டுள்ளது.
‘முழு உலகிலும் உள்ள இஸ்லாமியர்கள் அல்லாஹ்வை கடவுளாக வழிபடுகின்றனர். அவர்கள் அல்லாஹ்வுக்கு உருவம் கற்பிப்பதில்லை. அது அவர்களின் நம்பிக்கை. இந்த நிலையில் இவ்வழக்கில் முன் வைக்கப்பட்டுள்ள சாட்சியங்களை ஆராயும் போது, ஞானசார தேரர் பிரதிவாதிக் கூண்டில் இருந்தவாறு கூறிய விடயம் அவர் சார்பிலான எழுத்து மூல சமர்ப்பணத்தில் குறிப்பிடப்பட்டுள்ள விடயத்துக்கு அமைய நிந்தனை செய்யும் எண்ணத்தில் கூறவில்லை என்பதை ஏற்றுக்கொள்ள முடியாது.
ஞானசார தேரரின் கருத்துக்கள் திடீரென, தெரியாமல், கவனயீனமான போக்கினால் வெளிப்படவில்லை. அது இஸ்லாத்தை பின்பற்றும் அனைவரதும் உணர்வுகள், எண்ணங்களை வேண்டுமென்றே புண்படுத்தும் நோக்குடன் நிந்தனை செய்யும் எண்ணத்துடன் வெளிப்படுத்தப்பட்டுள்ளமை துல்லியமாக நிரூபிக்கப்பட்டுள்ளது. அதனால் ஞானசார தேரரை குறித்த இரு குற்றச்சாட்டுக்கள் தொடர்பிலும் குற்றவாளியாக இந்த நீதிமன்றம் அறிவிக்கின்றது.’ என நீதிபதி ஆதித்ய பட்டபெந்திகே தனது 24 பக்க தீர்ப்பில் தெளிவாக குறிப்பிட்டுள்ளார்.
தண்டனை தீர்ப்பு:
குற்றவாளியாக காணப்பட்ட ஞானசார தேரருக்கு தண்டனை அளிக்க முன்னர் தண்டனை தொடர்பில் மன்றில் விடயங்கள் முன் வைக்கப்பட்டன. சட்ட மா அதிபர் சார்பில் ஆஜரான சிரேஷ்ட அரச சட்டவாதி லக்மாலி திஸாநாயக்க, இலங்கை பல இனக் கலவரங்களை கண்டுள்ள நிலையில், இவ்வாறான கருத்துக்கள் மிக ஆபத்தானது எனவும் அவை இன முரண்பாடுகளை தோற்றுவிக்கும் எனவும் சுட்டிக்காட்டினார். எனவே குற்றவாளியான தேரருக்கு ஒத்தி வைக்கப்பட்ட தண்டனை வழங்காது, அவர் உணரும் வண்ணமான நடைமுறை தண்டனை ஒன்று அவசியம் என அவர் கோரினார்.
ஞானசார தேரர் சார்பிலான சட்டத்தரணி, நீதிமன்ற அவமதிப்பு தொடர்பில் ஞானசார தேரருக்கு ஜனாதிபதி மன்னிப்பு அளிக்கப்பட்ட பின்னர் அவர் எந்த குற்றங்களோடும் தொடர்புபடவில்லை என்பதை கருத்தில் கொண்டு இலகு தண்டனை ஒன்றினை எதிர்ப்பார்ப்பதாக குறிப்பிட்டார்.
இந் நிலையில் மதகுருமாருக்கு சமூகத்தில் அமைதியை நிலைநாட்டும் பொறுப்பு உள்ள நிலையில் அதனை குற்றவாளி மீறியுள்ளதாக சுட்டிக்காட்டிய நீதிபதி ஆதித்ய பட்டபெந்திகே, குற்றவாளியான ஞானசார தேரருக்கு இரு குற்றச்சாட்டுக்களுக்கும் தலா 2 வருடம் வீதம் 4 வருட கடூழிய சிறைத் தண்டனையை விதித்து தீர்ப்பளித்தார். அத்தண்டனையானது தனித் தனியாக அனுபவிக்கப்படல் வேண்டும் என உத்தரவிட்ட நீதிபதி, இரு குற்றச்சாட்டுக்கள் தொடர்பிலும் தலா 50 ஆயிரம் ரூபா வீதம் ஒரு இலட்சம் ரூபா அபராதமும் விதித்தார். அதனை செலுத்த தவறினால் மேலும் இரு வருடங்கள் கடூழிய சிறைத் தண்டனையை அனுபவிக்க வேண்டி வரும் என நீதிபதி எச்சரித்தார்.
வெலிக்கடை சிறைக்கு :
இதனையடுத்து ஞானசார தேரர் தண்டனை கைதியாக வெலிக்கடை சிறைச்சாலைக்கு அழைத்துச் செல்லப்பட்டார். தற்போது அவர் அங்கு சிறைச்சாலை வைத்தியசாலையில் நோய் நிலைமை ஒன்றுக்காக சிகிச்சை பெறுவதாக அறியமுடிகின்றது.
இதனிடையே நான்கு வருட சிறைத்தண்டனை விதிக்கப்பட்டுள்ள கலகொட அத்தே ஞானசார தேரரர் தன்னை பிணையில் விடுவிக்குமாறு அவரது சட்டத்தரணிகள் விடுத்த கோரிக்கையை கொழும்பு மேல் நீதிமன்றம் நிராகரித்துள்ளது.
ஞானசார தேரருக்கு சிறைத்தண்டனை விதித்த கொழும்பு மேல் நீதிமன்ற நீதிபதி ஆதித்ய பட்டபெந்த்திகே இதனை நிராகரித்துள்ளார்.
தீர்ப்பை அறிவித்த நீதிபதி, ஞானசார தேரருக்கு பிணை கோருவதற்கு முன் வைக்கப்பட்ட விடயங்களில் விஷேட காரணிகள் எதுவும் இல்லாத காரணத்தினால் அவரது பிணை கோரிக்கையை நிராகரிப்பதாக அறிவித்துள்ளார்.
இந் நிலையில் மேன் முறையீட்டு நீதிமன்றில் பிணை கோர ஞானசார தரப்பு தீர்மானித்துள்ளது. – Vidivelli