“நிக்காஹ்’ பயான்களை செவிமடுக்க பெண்களும் அனுமதிக்கப்பட வேண்டும்
விவாகரத்துகளை தடுப்பது குறித்த கலந்துரையாடலில் வலியுறுத்து
(ஏ.ஆர்.ஏ.பரீல்)
நாட்டில் அண்மைக்காலமாக அதிகரித்து வரும் முஸ்லிம் விவாக விவாகரத்து உட்பட ஏனைய விவாகரத்துகள் தொடர்பில் கலந்துரையாடலொன்று கடந்த ஞாயிற்றுக்கிழமை கொழும்பில் இடம்பெற்றது.
கொழும்பு சிலிடா (SLIDA) கல்வி நிறுவனத்தில் இடம்பெற்ற குறிப்பிட்ட கலந்துரையாடலை சிலிடா கல்வி நிறுவனத்தின் கல்வி ஆலோசகர் அப்துல் ரஸாக் ஏற்பாடு செய்திருந்தார்.
கலந்துரையாடலில் நாட்டில் அதிகரித்துவரும் விவாகரத்துகளை எவ்வாறு குறைக்க முடியும் என்பது பற்றியும் திருமண பந்தத்தில் இணையவுள்ள தம்பதிகளுக்கு விவாகத்துக்கு முன்பு விவாகம் தொடர்பான விழிப்புணர்வு நிகழ்ச்சிகளை நடாத்துவது பற்றியும் கருத்துகள் பரிமாறப்பட்டன.
பாடசாலை மட்டத்திலும், பள்ளிவாசல்கள் உட்பட மத நிலையங்களிலும் இவ்வாறான விழிப்புணர்வு நிகழ்ச்சிகளை நடாத்தத் திட்டமிட்டுள்ளதாக அப்துல் ரஸாக் தெரிவித்தார்.
பள்ளிவாசல்களில் நிக்காஹ் பயான்கள் இடம்பெறும்போது அந்நிகழ்வுக்கு பெண்களும் அழைக்கப்பட வேண்டும் எனவும் ஆலோசனை முன்வைக்கப்பட்டது. ‘வொலி’யின் சம்மதமின்றி விவாகம் செய்து கொள்வதற்காக வீட்டை விட்டு வெளியேறிச் செல்லும் முஸ்லிம் பெண்கள் ‘வொலி’ அனுமதிப்பத்திரம் பெற்றுக் கொள்வதற்காக காதிநீதிமன்றங்களை நாடும்போது அவர்களுக்கும் திருமண வாழ்க்கை தொடர்பான கவுன்சலிங் வழங்கப்பட வேண்டும் என்றும் ஆலோசனை முன்வைக்கப்பட்டதாக பாணந்துறை முஸ்லிம் விவாக பதிவாளர் குவாமி பாரூக் தெரிவித்தார்.
நாட்டில் விவாகரத்துகளை கட்டுப்படுத்துவதற்கான வேலைத் திட்டமொன்றினைத் தயாரித்து அரசாங்கம் மற்றும் ஏனைய நிறுவனங்களின் அனுசரணையுடன் நடைமுறைப்படுத்தவுள்ளதாகவும் அப்துல் ரஸாக் தெரிவித்தார்.
குறிப்பிட்ட கலந்துரையாடலில் அகில இலங்கை விவாகம், பிறப்பு மற்றும் இறப்பு பதிவாளர்களின் சங்கத்தின் தலைவர் துஷ்மன்த கருணாநாயக்க உட்பட தேர்ந்தெடுக்கப்பட்ட முஸ்லிம் மற்றும் பொது விவாக பதிவாளர்கள் கலந்து கொண்டிருந்தனர். – Vidivelli