ஆதில் அலி சப்ரி
உலகம் மிக வேகமாக நிலைபேறான மற்றும் புதுப்பிக்கத்தக்க சக்தி மூலங்களை நோக்கி நகர்ந்து கொண்டிருக்கிறது. பருவகால மாற்றம் மற்றும் அதன் பூகோள தாக்கங்கள் உலக நாடுகளை இவ்வாறான சக்தி மூலங்களில் கவனம் செலுத்த வைத்துள்ளன. அபிவிருத்தியடைந்த நாடுகள் 2030 அல்லது 2040ஆம் ஆண்டளவில் எரிபொருள் பாவனைக்கு முற்றுப்புள்ளி வைத்துவிட்டு, முழுமையாக புதுப்பிக்கத்தக்க சக்திப் பயன்பாட்டிற்குச் செல்லும் திட்டத்துடன் பயணிக்கின்றன.
வளர்முக நாடுகள் புதுப்பிக்கத்தக்க சக்தி மாற்றத்திற்கு செல்வதில் எண்ணிலடங்கா சவால்கள் காணப்படுகின்றன. சூரிய சக்தி, காற்றாலை அல்லது கடல் அலை உட்பட பல்வேறு சக்தி மூலங்களும் இலவசமாக இருந்தாலும், அவற்றை ஒருமுகப்படுத்தி, பயன்பாட்டிற்குள் கொண்டுவரும் செயற்பாடு பெரும் பணச் செலவைக் கொண்டதாகும்.
இலங்கை ஒரு வளர்முக நாடாக இருந்தாலும் சூரிய மற்றும் காற்றாலை சக்தி மூலங்களைப் பயன்படுத்தி மின்னுற்பத்தி செய்யும் திட்டங்களில் நீண்ட காலமாகக் கை வைத்துள்ளமை பெருமைப்படக் கூடியதுதான். இருந்தாலும், பருவநிலை மாற்றம் மற்றும் அதன் தாக்கங்களில் இருந்து உலகை மீட்பதற்கான முயற்சியாகக் கூறப்படும் நிலைபேறான மற்றும் புதுப்பிக்கத்தக்க சக்தி மூலங்களை உற்பத்தி செய்யும் திட்டங்கள், நாட்டுக்கும் மக்களுக்கும் தீங்கு விளைவிப்பதாக அமைய முடியுமா?
இலங்கை மின்சார சபை மன்னார் தீவில் 30 காற்றாலைகளை நிர்மாணித்து, அதன் மூலம் பிறப்பிக்கப்படும் 103 மெகா வாட் மின்சாரம் 2020ஆம் ஆண்டு முதல் தேசிய மின்னோட்டத்திற்கு இணைக்கப்பட்டுள்ளமை எமக்குத் தெரிந்த விடயமே. இலங்கையின் முதலாவது பெரிய காற்றாலை மின்னுற்பத்தித் திட்டமான இது, மன்னார் காற்றாலை மின்சார உற்பத்தி நிலையம் அல்லது தம்பபவனி மின்சார உற்பத்தி நிலையம் எனப்படுகிறது.
இந்நிலையில், மன்னாரில் தம்பபவனி மின்சார உற்பத்தித் திட்டத்தின் இரண்டாம் கட்டத்தை ஆரம்பிக்க இலங்கை மின்சார சபை நடவடிக்கை எடுத்துள்ளது. அது 21 காற்றாலைகளை உள்ளடக்கியதாகவும் மக்கள் குடியிருப்புகளை அண்மித்ததாகவும் திட்டமிடப்பட்டுள்ளமை கவலை தருகின்றது.
அரசாங்கத்தின் அபிவிருத்தித் திட்டங்களை அல்லது குறிப்பாக புதுப்பிக்கத்தக்க மின்சார உற்பத்தித் திட்டத்தை எதிர்க்கும் மனநிலையில் மக்கள் இல்லை. என்றாலும், தமது வாழ்வாதாரத்தையும் இயல்பு வாழ்க்கையையும் கேள்விக்குறியாக்கும் இந்தத் திட்டத்தை மன்னார் தீவு மக்கள் எதிர்க்க வேண்டிய நிலைக்குத் தள்ளப்பட்டுள்ளனர்.
இலங்கை மின்சார சபையின் காற்றாலைத் திட்டத்திற்குப் போட்டியாக, இந்தியாவின் அதானி நிறுவனமும் மன்னார் தீவில் புதுப்பிக்கத்தக்க மின்சார உற்பத்தித் திட்டத்தில் இறங்கியுள்ளது. அதானி நிறுவனம் 250 மெகா வாட் மின்சாரத்தை உற்பத்தி செய்யும் முயற்சியில் 52 காற்றாலைகளைப் பொருத்த முயற்சிப்பதாகத் தெரிய வருகிறது.
“நாம் மிகப் பெரும் ஆபத்தைச் சந்தித்துள்ளமை பலருக்கும் தெரியாது. புதிதாக நிறுவப்படவுள்ள காற்றாலைகள் மக்கள் குடியிருப்புப் பகுதிகளிலேயே பொருத்தப்படவுள்ளன. மக்கள் குடியிருப்புகள் பறிபோகும் அவலம் காத்திருக்கின்றது. இந்தத் திட்டத்திற்கு எதிரான போராட்டங்கள், மக்களின் வாழ்வியலைத் தக்கவைத்துக் கொள்வதற்கான முயற்சிகளேயன்றி வேறில்லை” என்று மன்னார் பிரஜைகள் குழுவின் தலைவர் அருட்தந்தை சந்தியோகு மார்கஸ் தெரிவித்தார்.
காற்றாலைகளின் இயக்கம் பாரிய இரைச்சலை ஏற்படுத்தக் கூடியது. அவ்வாறான திட்டமொன்று மக்கள் குடியிருப்புகளுக்கு அருகாமையில் வருவது மக்களின் இயல்பு வாழ்க்கையைப் பாதிக்கும் என்பதில் ஐயமில்லை. மேலும், காற்றாலை மின் உற்பத்தித் திட்டம் மூலம் மன்னார் தீவு மக்களின் ஜீவனோபாயமும் கேள்விக்குறியாகியுள்ளது.
பனை மரங்கள் இந்த மக்களின் வாழ்வாதாரத்தில் பிரதான பங்கு வகிக்கின்றன. பனையை மையமாகக் கொண்ட உற்பத்திகள் மூலம் பெருமளவான மக்கள் வாழ்ந்து வருகின்றனர். அத்தோடு, பனை மரங்கள் மன்னார் தீவின் நிலக்கீழ் நீர் ஓட்டத்தையும் ஸ்திரப்படுத்துகிறது. இவ்வாறு இருக்கையில் இந்தத் திட்டங்களுக்காக ஆயிரக் கணக்கான பனை மரங்கள் அழிக்கப்படும் அவதானம் இருப்பதாக மக்கள் தெரிவிக்கின்றனர். “எமது வீட்டிற்கு மதில் அமைக்கவும் கூரை போடவும் பனை மரங்களை வெட்டுவது தடை செய்யப்பட்டுள்ளது. ஆனாலும், இந்தத் திட்டத்திற்காக ஆயிரக்கணக்கான பனை மரங்களை அழிக்க எத்தனிக்கின்றனர்” என ஒரு முதியவர் முணுமுணுக்கிறார்.
காற்றாலைகள் ஒவ்வொன்றையும் இணைப்பதற்காக அமைக்கப்பட்டுள்ள பாதை மூலம் மன்னார் வெள்ள அனர்த்தங்களை எதிர்கொண்டுள்ளது. குறித்த பாதை நிலத்தில் இருந்து 1 மீட்டர் அளவு உயரமாக இருப்பதால் நீர் வடிந்தோடும் அமைப்புகள் தடைப்பட்டுள்ளன. இதனால் முன்னெப்போதும் இல்லாத வெள்ள அனர்த்தம் ஏற்பட்டு, விவசாய நிலங்கள் வெள்ளத்தில் மூழ்குவதாக மக்கள் குற்றம் சாட்டுகின்றனர்.
இது தொடர்பாக மன்னார் மாவட்ட பெண்கள் ஒன்றியத்தின் தலைவி மகா லக்ஷ்மி கருத்துத் தெரிவிக்கையில், “தீவில் ஏற்கனவே பொருத்தப்பட்டுள்ள காற்றாலைகளால் நாம் பல்வேறு இன்னல்களுக்கும் முகங்கொடுத்து வருகின்றோம். வெள்ளத்தால் பெண்களின் வீட்டுத் தோட்டங்கள் நாசமடைந்து போனது. அபிவிருத்தித் திட்டங்கள் எமது சமூக, பொருளாதார, மனித உரிமைகளைப் பாதிக்கும் விதத்தில் இருக்கக் கூடாது” என்றார்.
ஐக்கிய நாடுகள் புலம்பெயர் உயிரினங்களைப் பாதுகாப்பது தொடர்பான பேரவையின் பிரதானமான நாடாக இலங்கை விளங்குகிறது. இதற்கான காரணம், ஆண்டுதோறும் 30 க்கு மேற்பட்ட நாடுகளில் இருந்து 250க்கும் அதிகமான பறவை இனங்கள் இலங்கைக்குப் புலம்பெயர்வதனாலாகும். வருடாந்தம் இலங்கைக்கு 15 இலட்சம் பறவைகள் வருவதாகக் கணிக்கப்பட்டுள்ள நிலையில், மன்னார் பிரதேசத்திற்கு மாத்திரம் 10 இலட்சம் பறவைகள் வருகை தருகின்றன.
இவ்வாறு வருகின்ற பறவைகளின் பயணப் பாதையும் இருப்பிடங்களும் பாதிப்படைவதாகவும், காற்றாலைகளின் இயக்கத்தால் பறவைகள் உயிரிழப்பதாகவும் சூழலியல் நீதிக்கான நிலையத்தின் நிறைவேற்றுப் பணிப்பாளர் ஹேமன்த விதானகே தெரிவிக்கிறார். இந்தியாவின் அதானி நிறுவனத்தின் திட்டத்தில் பறவைகளுக்கான தாழ்வாரப் பகுதிகள் ஒதுக்கப்பட்டுள்ளதாகக் கூறப்பட்டாலும் அவை, பெயரளவிலானது என்றும் அவர் விளக்குகிறார்.
மன்னார் பிரதேச மக்கள் அபிவிருத்தித் திட்டங்களை எதிர்ப்பவர்களல்லர். மாறாக, திட்டங்கள் தமது இருப்பையும் வாழ்வியலையும் பாதித்துவிடக் கூடாதென்று போராடுபவர்கள். இந்த முன்மொழிவுத் திட்டங்கள் தொடர்பாக இலங்கை நிலைபெறுதகு சக்தி அதிகாரசபை சுற்றுச்சூழல் தாக்க மதிப்பீட்டு அறிக்கை ஒன்றை வெளியிட்டுள்ளது.
எனினும், அறிக்கையில் மன்னார் வாழ் மக்களின் சமூக, பொருளாதார மற்றும் சுற்றுச் சூழல் விடயங்கள் கவனத்தில் கொள்ளப்படவில்லை என்று சிவில் அமைப்புகள் குற்றம்சாட்டுகின்றன. மக்களின் இருப்பு உட்பட பல்வேறு சூழலியல் காரணிகளையும் சவாலுக்கு உட்படுத்தும் அதானி நிறுவனத்தின் காற்றாலை மின் உற்பத்தித் திட்டம் மன்னார் தீவுக்கு வெளியே கொண்டு செல்லப்பட வேண்டும் என்பதே மக்களின் கோரிக்கையாகும். – Vidivelli