(எச்.எம்.எம்.பர்ஸான்)
ஓட்டமாவடி பாலத்துக்கு அருகில் இடம்பெற்ற சுதந்திர தின நிகழ்வில் மார்க்கத்திற்கு முரணாக இடம்பெற்ற நடன நிகழ்ச்சிக்கு அகில இலங்கை ஜம்இய்யதுல் உலமா கல்குடா கிளை கடும் கண்டனத்தை வெளியிட்டுள்ளது.
பிரதேசத்திலுள்ள பல அமைப்புக்கள் ஒன்றிணைந்து ஓட்டமாவடி பாலத்துக்கு அருகில் பிரமாண்டமான சுதந்திர தின நிகழ்வு ஒன்றினை ஏற்பாடு செய்திருந்தது. அந்நிகழ்வில், இஸ்லாத்திற்கு முரணான நடன நிகழ்ச்சி இடம்பெற்றதால் அது சமூக மட்டத்தில் பெரும் சர்ச்சையையும் விமர்சனங்களை தோற்றுவித்தன.
இவ்வாறான நடன நிகழ்ச்சியை கண்டித்து அகில இலங்கை ஜம்இய்யது உலமா கல்குடா கிளை நேற்றைய தினம் கண்டன அறிக்கையொன்றை வெளியிட்டுள்ளது.
குறித்த அறிக்கையில், 76 ஆவது சுதந்திர தினத்தை முன்னிட்டு 04.02.2024 ஆம் திகதி ஓட்டமாவடி பாலத்தின் அருகில் இடம்பெற்ற சுதந்திர தின நிகழ்வினையொட்டி எமது கலாசாரத்திற்கும் பண்பாட்டிற்கும் விரோதமான சில நடன நிகழ்ச்சிகள் அரங்கேற்றப்பட்டதை கல்குடா உலமா சபை வன்மையாகக் கண்டிக்கிறது. இதுபோன்ற தருணங்களில் இன, மத நல்லிணக்கம் என்ற பெயரில் முஸ்லிம் சமூகம் கரைந்துவிடாதிருப்பதை நிகழ்ச்சி ஏற்பாட்டாளர்கள் பொறுப்புடன் உறுதிப்படுத்த வேண்டுமெனவும் உலமா சபை வலியுறுத்திக் கேட்டுக் கொள்கிறது என்று தெரிவிக்கப்பட்டுள்ளது. – Vidivelli