முகுசீன் றயீசுத்தீன்
சிலாவத்துறை
முசலி தேசிய பாடசாலையில் கல்விகற்று வந்த ஹம்தான் (வயது 19) க.பொ.த. (உ/த) விவசாய விஞ்ஞான பாடப் பரீட்சைக்கு கடந்த முதலாம் திகதி தோற்றத் தயாராக இருந்த நிலையில் அதற்கு முதல் நாள் (ஜனவரி 31 ஆம் திகதி) மோட்டார் சைக்கிளில் சென்று கொண்டிருந்தபோது கடற்படையினரின் வாகனத்தில் மோதி விபத்துக்குள்ளானார்.
இச்சம்பவம் முசலிப் பிரதேசத்தின் கொண்டச்சி, பாசித்தென்றல் எனும் இடத்தில் இடம்பெற்றது. தாய் மற்றும் 3 சகோதரிகளுடன் மறிச்சுக்கட்டி, ஹுனைஸ் நகரில் வசித்து வந்த ஹம்தான் அங்கிருந்து சுமார் 15 கிலோமீட்டர் தொலைவிலுள்ள மன்/முசலி தேசிய பாடசாலையில் உயர்தர பொறியியல் தொழில்நுட்ப பிரிவில் கற்று வந்தார்.
2024 ஜனவரி நடைபெற்ற க.பொ.த. உயர்தர பரீட்சை எழுதி வந்த ஹம்தான் விவசாய விஞ்ஞான பாடத்திற்கு தோற்றிய போதும் அப்பாட வினாத்தாள் முற்கூட்டியே வெளியான காரணத்தினால் பெப்ரவரி முதலாம் திகதி நடைபெறவிருந்த அப்பாடத்தின் மீள் பரீட்சைக்குத் தோற்றவிருந்த நிலையிலேயே அதற்கு முதல் நாளான ஜனவரி 31 ஆம் திகதி விபத்துக்குள்ளானார்.
ஹம்தானின் அகால மரணம் அல்லாஹ்வின் ஏற்பாட்டின்படி நடைபெற்றதாயினும் மரணம் குறித்த சம்பவம், படிப்பினை பற்றி பொதுவாக சமூகம் பேசிக்கொள்வது இயல்பானதே.
சம்பவம் இடம்பெற்ற ஜனவரி 31 ஆம் திகதி புதன்கிழமை பகல் சிலாவத்துறையில் வாழும் தனது சகோதரியின் வீட்டுக்கே அவர் மோட்டார் சைக்கிளில் சென்றுள்ளார். அன்றைய தினம் சகோதரியின் கணவரான (மச்சான்) சஹ்ரியின் அழைப்பின் பேரில் அவர் வழமையான இப்பயணத்தை மேற்கொண்டதால் ஹம்தானின் மரணம் குறித்து மச்சான் சஹ்ரி நிலை குலைந்து போனார்.
விபத்து இடம்பெற்றதும் சிலாவத்துறை பிரதேச வைத்தியசாலையில் அனுமதிக்கப்பட்டு, அங்கிருந்து மன்னார் மாவட்ட பொது வைத்தியசாலைக்கும் பின்னர் யாழ். போதனா வைத்தியசாலைக்கும் அன்றைய தினமே மாற்றப்பட்டார்.
எனினும் வைத்திய சிகிச்சை பலனளிக்காத நிலையில் ஜனவரி 2 ஆம் திகதி வெள்ளிக்கிழமை மாலை 6 மணியளவில் வபாத்தானார். மறுநாள் 3 ஆம் திகதி சனிக்கிழமை பிற்பகல் 5 மணியளவில் ஜனாசா ஹுனைஸ் நருக்குக் கொண்டுவரப்பட்டு அன்று மாலை மஃரிப் தொழுகையின் பின்னர் நல்லடக்கம் செய்யப்பட்டது.
விவசாய விஞ்ஞான பாடப் பரீட்சைக்கு தோற்றத் தயாராக இருந்த நிலையில் அதற்கு முதல் நாள் மோட்டார் சைக்கிளில் சென்று கொண்டிருந்தபோது கடற்படையினரின்
வாகனத்தில் மோதி விபத்துக்குள்ளானார்.
அதிபர் மர்ஹூம் முப்தி அவர்களின் மகனே ஹம்தான். முப்தி சேர் கடந்த 3 ஆண்டுகளுக்கு முன்னர் வபாத்தானார். முப்தி சேர் கல்வி, சமூக, சமய, கலாசாரப் பணிகளில் முன்னின்று செயற்பட்டவர். நல்ல மனிதர். அனைவருடனும் அன்பாகவும் சிரித்த முகத்துடனும் பேசிப் பழகியவர்.
அவ்வாறே அவரது மகன் ஹம்தானும் மென்மையான போக்குடையவர். எவருக்கும் எந்தத் தீங்கும் செய்திராத இளம்பிள்ளை. அவ்வாறான நற்பழக்கவழக்கங்களைக் கொண்ட இளைஞனாக வாழ்ந்து வந்ததால் தான் ஹம்தானின் இழப்பால் முசலிப் பிரதேசமே சோகமயமாகியது.
தந்தை இல்லாததாலும் ஒரேயொரு ஆண் பிள்ளையாததாலும் தனது கல்வி நடவடிக்கைகளுக்கு மேலதிகமாக வீட்டின் சகல வெளி வேலைகளையும் ஹம்தான் கவனித்து வந்தார். தாய், சகோதரிகள் மற்றும் சகோதரிகளுடைய பிள்ளைகளுக்கு ஹம்தான் செய்து வந்த பணிவிடை ஒரு முதிர்ச்சியடைந்த மனிதரைப் போல் இருந்ததாக பலரும் கூறுகின்றனர்.
பாடசாலையில் மாணவர் தலைவராக இருந்த ஹம்தான் அதிபர், ஆசிரியர்கள், மாணவர்கள் மத்தியில் நற்பண்புகளுடன் தொடர்பாடல்களை மேற்கொண்டுள்ளார். பாடசாலையில் பல்வேறு நற்பணிகளிலும் சுயமாக முன்வந்து தன்னை ஈடுபடுத்திக் கொண்டுள்ளார்.
உறவினர்கள், நண்பர்கள் உட்பட ஆயிரக்கணக்கானோர் முன்னிலையில் ஹம்தானின் ஜனாசா நல்லடக்கம் இடம்பெற்றது. நிசப்த வெளியில் சொரிந்த கண்ணீர்த் துளிகளின் மத்தியில் ஹம்தானின் கடைசி நிமிடங்கள் அனைவரையும் துயரின் உச்சத்திற்கே கொண்டு சென்றது.
ஹம்தான் தனது இறுதி நாட்களில் நட்பு வட்டங்களில் பரிமாறிக் கொண்ட வார்த்தைகள், உறவுகளிடம் பேசிய பேச்சுக்கள் நெஞ்சை விட்டு நீங்காத காவியங்களாகின. கடைசிக் காரியங்கள் முடிந்த போதும் அடக்கஸ்தலத்தை விட்டு அகன்று செல்ல மறுத்த இரத்த உறவுகளதும் நண்பர்களதும் நிலை கண்டு மனம் துடியாய்த் துடித்தது.
ஹம்தானுக்கு இனியொரு போதும் மரணமில்லை. ஆனால் நாமெல்லாம் இன்னும் மரணத்தைச் சுவைக்கும் வரிசையில் காத்திருக்கிறோம். ஹம்தானை இழந்து தவிக்கும் உறவுகள் படும் வேதனைகளையும் வலிகளையும் விபரிக்க வார்த்தைகள் இல்லை. மொத்தத்தில் ஹம்தான் வபாத்தான போதும் அவர் மக்கள் மனங்களில் வாழ்கிறார். அல்லாஹ் அன்னாருக்கு ஜன்னதுல் பிர்தெளஸ் எனும் சுவனபதியை அருள்வானாக.- Vidivelli