அயோத்தியில் புதிய பள்ளிவாசல் நிர்மாணிக்கப்படுமா?
எம்.ஐ.அப்துல் நஸார்
அயோத்தியில் கட்டப்படவுள்ளதாக முன்மொழியப்பட்ட முகமது பின் அப்துல்லா பள்ளிவாசல் நிருவாக கட்டுப்பாடுகள் காரணமாக இதுவரை ஏட்டளவிலேயே காணப்படுகின்றது.
அயோத்தியில் வாழும் முஸ்லிம்கள் தமது கருத்துக்களை பின்வருமாறு வெளிப்படுத்துகின்றனர்.
பஞ்சித்தோலா மஹல்லாவிற்கு அருகில் வசிக்கும் 55 வயதான சகீர் அஹமட் :
‘கோயில் தொடர்பாக எமக்கு மாற்றுக் கருத்துக்கள் எதுவும் இல்லை, அதேவேளை உத்தேசிக்கப்பட்ட பள்ளிவாசல் வேலைகள் இதுவரை முறையாக ஆரம்பிக்கப்படவில்லை என்பது எமக்கு கவலை தருகின்றது. கோயில் திறக்கப்படும் இந்த நாளை அவர்கள் கொண்டாடுகின்றனர், நாம் வீடுகளுக்குள்ளேயே இருக்க முடிவு செய்துள்ளோம்.
மற்றொரு நபர் தனது மஹல்லாவை ‘இந்து- முஸ்லிம் ஒற்றுமையின் சின்னம் என பெருமையாகக் கூறியதோடு, ‘நாங்கள் உள்ளூர் இந்துக்களைக் கண்டு பயப்படுவதில்லை. அவர்கள் எங்களுடன் அமைதியாகவும் நல்லிணக்கத்துடனும் வாழ்கிறார்கள், ஆனால் வெளியாட்கள் சிக்கலை ஏற்படுத்தலாம்.’ என்கிறார்.
அயோத்தியில் உள்ள பல முஸ்லிம்களைப் போலவே, அவரும் ஜனவரி 22 அன்று வீட்டிற்குள்ளேயே இருக்க திட்டமிட்டிருந்தார்.
அயோத்தியின் ஹஸ்ரத் ஷீஷ் தர்காவின் பராமரிப்பாளரான முகம்மது ஸாகிர்
‘பாதுகாப்பு அதிகாரிகள் உஷார் நிலையில் வைக்கப்பட்டுள்ளனர். இராமர் கோயில் திறப்புவிழா நிகழ்வு நடைபெறும் காலத்திலேயே எமது வருடாந்த உர்ஸ் (கொண்டாட்டம்) நிகழ்வும் வருகின்றது, எனினும் பதட்ட நிலை தோன்றும் என்ற காரணத்தினால் சுமார் ஒரு மாதத்திற்கும் அதிகமான காலம் அக் கொண்டாட்ட நிகழ்வு பிற்போடப்பட்டுள்ளது.’
ஏட்டளவிலேயே காணப்படும் பள்ளிவாசல்
2019 ஆம் ஆண்டு உச்ச நீதிமன்ற தீர்ப்பு, இடிக்கப்பட்ட பாபரி மஸ்ஜித் அமைந்திருந்த இடத்தில் கோவில் கட்ட வழி வகுத்தது, ஆனால் நீதிமன்றம் தனது உத்தரவின் பள்ளிவாசல் கட்டுவதற்காக சுன்னி வக்ப் சபைக்கு ‘முக்கிய இடத்தில்’ ‘பொருத்தமான’ ஐந்து ஏக்கர் காணியினை வழங்க வேண்டும் என்று உத்தரவிட்டது.
அதே உத்தரவில், கோவிலுடன் சம காலத்தில் பள்ளிவாசல் கட்டுவதற்கு நடவடிக்கை எடுக்குமாறு மத்திய மற்றும் மாநில அரசாங்கங்களை உச்ச நீதிமன்றம் குறிப்பாகக் கேட்டுக் கொண்டது. ஆனாலும், அயோத்தியில் இந்துக் கோவில் நிர்மாணிக்கப்பட்டு திறக்கப்பட்டுள்ள நிலையில், அயோத்தியில் முன்மொழியப்பட்ட முகமது பின் அப்துல்லா மஸ்ஜித் இது வரை வெறுமனே வரைபடமாக மாத்திரமே காணப்படுகின்றது.
பள்ளிவாசல் அமைப்பதற்காக வழங்கப்பட்டுள்ள காணி அயோத்தியின் மையப்பகுதியில் இருந்து சுமார் 25 கிலோமீட்டர் தொலைவில் தன்னிபூரின் தூசி நிறைந்த சமவெளியில் உள்ளது. இங்கே, ஒரு மயான அமைதி காணப்படுகின்றது. வாக்குறுதியளிக்கப்பட்ட பள்ளிவாசல் நிர்மாணத்திற்காக அந்த காணி காத்திருக்கிறது. அதைச் சுற்றி ஆரவாரம் இல்லை. அதைச் சுற்றி பெரிய திட்டங்கள் எதுவும் அறிவிக்கப்படவில்லை. அதற்கான பணியும் ஆரம்பிக்கப்படவில்லை. இதற்கான நிதியை முழுமையாக திரட்ட வேண்டியுள்ளது.
60 வயதான அப்துல் மஜீத், அந்த இடத்திற்கு அருகில் ஒரு சிறிய இனிப்புக் கடையை நடத்தி வருகிறார். மேலும் இங்கு ஒரு பள்ளிவாசல் கட்டப்பட்டால், அதனைத் தொடர்ந்து கிராம மக்களுக்கு மேம்பாடு மற்றும் சிறந்த வேலை வாய்ப்புகள் கிடைக்கும் என அவர் நம்புகிறார்.
தன்னிப்பூரில் வசிக்கும் 22 வயதான ராஜா தான் ‘வேலையின்றி இருக்கும் நாட்கள்’ முடிவுக்கு வரலாம் என்கிறார். அவரும் பக்கத்து கிராமங்களான தன்னிபூர் மற்றும் ரவுனாஹியில் உள்ள மற்றவர்களைப் போலவே, பெரும்பாலும் தினசரி கூலி வேலை செய்து வாழ்ந்து வருகின்றார். பள்ளிவாசல் அமைக்கப் படுமானால் தனது வாழ்க்கையும் மாற்றமடையும் என அவர் நம்புகின்றார். ‘அனைவருடைய வளர்ச்சியையும் பற்றிப் பேசுகிறார்கள். அயோத்தியில் வளர்ச்சி ஆறு ஓடிக்கொண்டிருக்கும்போது, தன்னிப்பூரில் மாத்திரம் இல்லாமல் போய்விடுமா?’ என ராஜா கேள்வி எழுப்புகின்றார்.
‘பள்ளிவாசலுக்கான நிலம் இங்கு ஒதுக்கப்பட்டதை அறிந்ததும் எங்கள் கிராமத்தில் உள்ள அனைவரும் மகிழ்ச்சியடைந்தனர். ஆனால், இதுவரை எங்களுக்கு எதுவித பலனும் ஏற்படவில்லை,’ என மற்றொரு உள்ளூர்வாசி தெரிவித்தார். அவர்களில் பெரும்பாலோர் கூலிகளாக வேலை செய்வதாகவும், வேலை தேடி புலம்பெயர்ந்து வருவதாகவும் மற்றொரு உள்ளூர்வாசியான சோராப் சுட்டிக்காட்டினார்.
தன்னிபூர் மற்றும் அதனை அண்டிய பகுதிகளில் சொத்துக்களின் விலைகள் உயரும் என எதிர்பார்க்கப்படுகிறது. தன்னிபூரைச் சேர்ந்த சொஹ்ராப் கான், இப்பகுதியில் சொத்துக்களின் விலைகள் ஏற்கனவே பத்து மடங்கு உயர்ந்துள்ளதாக தெரிவித்தார்.
ஒதுக்கப்பட்ட காணியில் வைத்தியசாலை அமைக்கப்படவுள்ளதாக இங்குள்ள மக்கள் நம்பிக்கையுடன் இருக்கின்றனர். அருகிலுள்ள வைத்தியசாலை பைசாபாத்தில் உள்ளது, சுமார் 30- நிமிடங்கள் தொலைவில் உள்ளது. தன்னிபூரின் மக்கள் தொகை 2,500 மற்றும் ரௌனாஹியின் மக்கள் தொகை 12,000. இரண்டு கிராமங்களிலும் முஸ்லிம்கள் பெரும்பான்மையாக வாழ்கின்றனர். அரசாங்க பாடசாலைகள் இல்லை, சிறிய மதரசாக்கள் மற்றும் தனியார் பாடசாலைகள் மாத்திரமே உள்ளன. பெருந்தெருவினால் பிரிக்கப்பட்ட இரு கிராமங்களிலும் ஆரம்ப சுகாதார நிலையமும் இல்லை.
பள்ளிவாசல் கட்டுவதற்காக தற்போது ஒதுக்கப்பட்டுள்ள காணி முன்பு விவசாயம் மற்றும் சர்தா பாபா என்று அழைக்கப்படும் ஹஸ்ரத் கடா ஷாவின் வருடாந்த கந்தூரி அல்லது உர்ஸ் ஆகியவற்றிற்காக பயன்படுத்தப்பட்டது. இந்த தர்கா நூற்றுக்கணக்கான ஆண்டுகள் பழமையானது என்று கூறப்படுகிறது, மேலும் உள்ளூரில் கடை வைத்து நடத்துபவர்கள் மற்றும் வியாபாரிகள் இந்த தர்காவுக்கு நிதியுதவி செய்து வருகின்றனர். சில ஆண்டுகளுக்கு முன்னர், கிராம மக்கள் ஒன்று கூடி இதனைப் புனரமைத்தனர்.
தற்போது, இந்த காணி சிறுவர்களின் விளையாட்டு மைதானமாகவும், ஆண்டுதோறும் நடைபெறும் உர்ஸ் கந்தூரி மற்றும் ஏனைய சிறிய நிகழ்வுகளுக்காகவும் பயன்படுத்தப்படுகிறது. மஸார் பகுதியின் நுழைவாயிலில் பள்ளிவாசலின் அழகிய வரைபடம் காட்சிப்படுத்தப்பட்டுள்ளது, ஆனால் பெளதீகரீதியாக பள்ளிவாசல் அக் காணியில் இல்லை.
தன்னிபூர் கிராமத்தில் மேற்படி காணியில் பள்ளிவாசலை நிர்மாணிக்கும் பணியில் ஈடுபட்டுள்ள இந்தோ இஸ்லாமிக் கலாச்சார நிலையம் (IICF), அண்மையில் தனது நடைமுறையினை மாற்றியது. புதிய பள்ளிவாசலுக்கு 50 லட்சம் ரூபாயைக் கூட சேகரிக்க முடியாமல் இந்நிலையம் போராடுகிறது. மட்டுப்படுத்தப்பட்ட அளவிலான நன்கொடைகளுக்கான காரணங்கள் எவை என நோக்கினால், முஸ்லிம்களின் பொருளாதார நிலைமைகள் மற்றும் திட்டத்தின் எதிர்காலம் பற்றிய கவலைகள் என்பனவற்றைக் குறிப்பிடலாம். நிருவாக ரீதியான தாமதங்கள், இடையூறுகள் மற்றும் நெருக்குதல்களை சீர் செய்வதற்கு போதிய அரசியல் தலையீடுகள் இல்லாதிருப்பதும் ஒரு குறைபாடாகக் காணப்படுகின்றது.
நிருவாக ரீதியான தடைகளும் இதில் காணப்படுகின்றன. ‘நீதிமன்றத்தினால் உத்தரவு பிறப்பிக்கப்பட்டு நான்கு ஆண்டுகளுக்கும் மேலாகிவிட்டது, நிருவாக தாமதங்களால் முயற்சிகள் தொடர்ந்து தடைப்பட்டுள்ளன. ராமர் கோயில் கட்டுவதில் எங்களால் போட்டியிட முடியாது என்பதை நாங்கள் ஒப்புக்கொண்டாலும், இப்போது நாம் எதிர்கொள்ளும் சவால்கள் நாம் எதிர்பார்க்கப்படாதவையாகும்’ என சுன்னி வக்ப் சபையின் சிரேஷ்ட உறுப்பினர் ஒருவர் தெரிவித்தார். ‘இதில் எந்த முன்னேற்றமும் ஏற்படாவிட்டால், முஸ்லிம் சமூகம் மன உறுதியை இழந்து, தாம் ஒதுக்கப்பட்டதாக உணரும். நிதி சேகரிப்பு நிறுத்தப்பட்டுள்ளது, அதற்குக் காரணம் நிர்மாணப்பணிகளை முன்னெடுப்பதில் ஏற்படுத்தப்பட்டுள்ள தடைகள் ஆகும்’ எனவும் அவர் தெரிவித்தார்.
2023 ஆம் ஆண்டு மே மாதத்தில் இந்தோ- இஸ்லாமிக் கலாச்சார நிலையம் திட்ட அனுமதியைப் பெறுவதற்கு அயோத்தி அபிவிருத்தி அதிகாரசபையிடமிருந்து, தொழிலாளர் செஸ் மற்றும் அபிவிருத்தி வரியில் 10 கோடி ரூபாவிற்கு முழுமையாக வரிவிலக்களிக்குமாறு உத்தரப் பிரதேச அரசாங்கத்திடம் கோர திட்டமிட்டிருந்தது.
2023 ஆம் ஆண்டு நவம்பர் இல் நியமிக்கப்பட்ட பள்ளிவாசல் அபிவிருத்திக் குழுவின் புதிய தலைவரான ஹாஜி அரபாத் ஷேக், மகாராஷ்டிராவைச் சேர்ந்த பாரதீய ஜனதா கட்சியின் பிரதேச தலைவராவார். பள்ளிவாசலுக்கான நிதியை சேகரிக்க புதிய திட்டத்தை கொண்டு வந்தார். மார்ச் மாதத்திற்குள் ஆரம்பித்து இந்தோ-இஸ்லாமிக் கலாச்சார நிலையத்தின் இணையதளத்தின் மூலம் கியூஆர் (QR) குறியீட்டினைப் பயன்படுத்தி நன்கொடைகளைப் பெறுவதே அத் திட்டமாகும்
புதிய நிதி திரட்டும் பிரச்சாரம் பள்ளிவாசல் நிர்மாணப் பணிகளை துரிதமாக செயற்படுத்த உதவும் என எதிர்பார்க்கப்படுகிறது. ராமர் கோவிலை பார்க்க வரும் அனைவரும் பள்ளிவாசலையும் பார்வையிட வரும் வகையில் பள்ளிவாசல் நிர்மாணத்தை விளம்பரப்படுத்த திட்டமிடப்பட்டுள்ளது. இப்போது புதிய தலைவர் பாஜகவுடன் இணைந்திருப்பதால், இப் பணியில் முன்னேற்றம் ஏற்படும் என உள்ளூர்வாசிகள் எதிர்பார்க்கின்றனர்.
பள்ளிவாசலின் முந்தைய ‘நவீன’ பாணியிலான வடிவமைப்புப் பற்றி சமூகத்தின் ஆட்சேபனைகளைத் தொடர்ந்து பள்ளிவாசலின் புதிய வடிவமைப்பு மேற்கொள்ளப்பட்டது. சுன்னி வக்ப் சபையின் உத்தரப் பிரதேசத் தலைவர் ஸூபர் அகமட் பாருகி, கடந்த வருடம் மும்பையில் புதிய வடிவமைப்பை வெளியிட்டபோது, ‘சமூகம் முந்தைய வடிவமைப்பில் அதிருப்தியடைந்திருந்தது. எமது பள்ளிவாசலின் வடிவம், பள்ளிவாசலுக்கு உரியது போல் காணப்படவில்லை என மக்கள் எங்களிடம் தெரிவித்தனர். அப்போதுதான் வடிவமைப்பை மாற்ற முடிவு செய்தோம்’ எனத் தெரிவித்தார்.
ஆரம்பத்தில், டில்லியின் ஜாமியா மில்லியா இஸ்லாமிய பல்கலைக்கழகத்தின் கட்டிடக்கலை பீடத்தின் தாபகப் பீடாதிபதி பேராசிரியர் எஸ்.எம்.அக்தர் அவர்கள் தனது திட்ட வடிவமைப்பில் 1857 சுதந்திரப் போராட்டத்தில் பங்கேற்ற மௌலவி அஹமதுல்லா ஷா அவர்களின் பெயரில் ஒரு வைத்தியசாலை, ஒரு சமூக சமையலறை, ஒரு நூலகம் மற்றும் ஒரு ஆராய்ச்சி மத்திய நிலையம் ஆகியவற்றை உள்ளடக்கியிருந்தார். இவை அனைத்தும் 4,500 சதுர மீட்டர் பரப்பளவில் அமையவிருந்தது.
தற்போது, புனேவைச் சேர்ந்த கட்டிடக் கலைஞரான இம்ரான் ஷேக் தயாரித்த புதிய திட்ட வடிவமைப்பின் நோக்கம், இந்தியாவின் மிகப்பெரிய பள்ளிவாசல்களுள் ஒன்றாக அமைவதும், ‘தாஜ்மஹாலை விடச் சிறந்தது’ ஆக இருப்பதுமாகும். இந்தியாவில் ஐந்து மினார்களைக் கொண்ட முதல் பள்ளிவாசல் இதுவாகும். முந்தைய வடிவமைப்பிற்கு தனது அதிருப்தியை வெளிப்படுத்திய ஹாஜி அராபத் ஷேக், இது ஒரு பள்ளிவாசல் போல் இல்லை என தெரிவித்திருந்தார். புதிய, வடிவமைப்பு வேலைகள் தற்போது நடைபெற்று வருகின்றன. எதிர்வரும் பெப்ரவரி மாதமளவில் அது பூர்த்தியடைந்ததும், 2024 ஆம் ஆண்டு ரமழானின் பின்னர் கட்டட நிர்மாண வேலைகள் ஆரம்பமாகும்.
வைத்தியசாலை மற்றும் சமூக சமையலறை அதில் மாற்றமின்றி இருக்கும் அதேவேளையில், பள்ளிவாசலுக்குள் அதான் ஒலிக்கும் போது ஒரு பெரிய மீன் தொட்டியில் ஒத்திசைவான நீர் மற்றும் ஒளி காட்சி உட்பட ஏனைய அம்சங்ளும் அறிமுகப்படுத்தப்பட்டுள்ளன. மகாராஷ்டிர மாநில சிறுபான்மையினர் ஆணைக்குழுவின் முன்னாள் தலைவரான ஷேக், பள்ளிவாசலின் ஆரம்பப் பெயரான மஸ்ஜித்- அயோத்தி என்பதற்கு எதிர்ப்புத் தெரிவித்ததையடுத்து நபியின் பெயரால் முகம்மது பின் அப்துல்லா மஸ்ஜித் என்று மாற்றப்பட்டது.
நிர்மாணிக்கப்படாத பள்ளிவாசல் கட்டமைப்பு, அதிகாரத்தில் இருப்பவர்களின் அக்கறையின்மை, நிதிசார் சவால்கள், நீடித்த சில கவலைகள் மற்றும் அயோத்தியின் பரபரப்பான சூழலில் அமைதி மற்றும் நல்லிணக்கத்திற்கான பாரிய தேடல் ஆகியவற்றிற்குள் சிக்கியுள்ளது. பள்ளிவாசல் கட்டட நிர்மாணத்தின் முன்னேற்றத்தைத் தடுக்கும் பல நிதிசார் தடைகள் மற்றும் அரசியல் செயற்பாடுகள் தொடர்ந்தும் காணப்படுகின்றன.
‘இந்த வரைபடம் அயோத்தி அபிவிருத்தி ஆணைக்குழுவின் இணையப் பக்கத்தில் பதிவேற்றம் செய்யப்பட்டுள்ளது. தீயணைப்பு சேவைகள் துறை உள்ளிட்ட சில துறைகளிலிருந்து ஆட்சேபனையில்லை என்ற சான்றிதழை பெற்று சமர்ப்பிக்குமாறு சுன்னி வக்ப் சபையிடம் கேட்கப்பட்டுள்ளது, காணி பயன்பாட்டு மாற்றக் கட்டணம் மற்றும் வரைபட அங்கீகாரக் கட்டணத்தை வைப்புச் செய்யுமாறும் வக்ப் சபை கேட்டுக்கொள்ளப்பட்டுள்ளது. இவை கடந்த ஆறு மாதங்களாக சுன்னி வக்ப் சபையில் பதிலுக்கு காத்திருக்கின்றன,’ என அயோத்தி அபிவிருத்தி ஆணைக்குழுவின் உப தலைவரும், அயோத்தி மாநகர ஆணையருமான விஷால் சிங் தெரிவித்தார்.
பிரார்த்தனை மற்றும் பராமரிப்பு மத்திய நிலையம்
‘புதிய பள்ளிவாசல் மருத்துவமனை மற்றும் தொழுகை நடத்தும் நிலையமாக செயற்பட வேண்டும் என உத்தேசிக்கப்பட்டுள்ளது’ என இந்தோ- இஸ்லாமிக் கலாச்சார நிலையத்தின் செயலாளர் லக்னோவைச் சேர்ந்த அதர் ஹுசைன் சித்திக் தெரிவித்தார். ‘இந்தப் பள்ளிவாசல் அனைவரது கவனத்தையும் ஈர்தத்துள்ளது என்பதோடு நாடு முழுவதும் உள்ள முஸ்லிம்கள் அதற்காக நிதி திரட்டும் அளவுக்கு பெருந்தன்மையுடன் இருக்க வேண்டும். நாம் எதை அடைய விரும்புகிறோம் என்பதற்கான திட்டத்தை உருவாக்குவதற்கு கூட பெருமளவில் நிதி அவசியம். வடிவமைப்புகள் மீளவடிவமைக்கப்பட்டுள்ளன. தற்போது அது இந்திய பாரம்பரிய வடிவமைப்பில் காணப்படுகின்றது. அபிவிருத்திக் கட்டணங்களாக சில கோடிகள் செலுத்திய பின்னரே வரைபடம் அனுமதிக்கப்படும்.’ எனவும் சித்தீக் தெரிவித்தார்.
‘சுன்னி வக்ப் சபைக்கு பாபரி மஸ்ஜிதுக்கு பதிலாக வேறு பள்ளிவாசலை அமைப்பதற்கு மாற்றுக் காணி ஐந்து ஏக்கர் கிடைத்தது என்பது எதிர்பாராதது. முஸ்லிம் சமூகம் அதை பயன்படுத்த மனதளவில் தயாராக இல்லை’ என இந்தோ- இஸ்லாமிக் கலாச்சார நிலையத்தின் பெயர் குறிப்பிட விரும்பாத சிரேஷ்ட உறுப்பினர் ஒருவர் தெரிவித்தார். – Vidivelli