கருத்து சுதந்திரத்தின் குரல் வளையை அரசாங்கம் நெரிக்க எத்தனிக்கிறது
பாராளுமன்றத்தில் ரவூப் ஹக்கீம் காட்டம்
நிகழ்நிலை காப்பு சட்டமூலத்தின் ஊடாக ஜனநாயகத்தைச் சீர்குலைத்து கருத்து முரண்படுவோரை முடக்குவதற்கு முயற்சிக்கப்படுவதாகவும், இந்த நாட்டில் கருத்துச் சுதந்திரத்தின் குரல் வளையை அரசாங்கம் நெரிக்க எத்தனிப்பதாகவும் ஸ்ரீலங்கா முஸ்லிம் காங்கிரஸ் தலைவர், பாராளுமன்ற உறுப்பினர் ரவூப் ஹக்கீம் தெரிவித்தார்.
நேற்றுமுன்தினம் செவ்வாய்க்கிழமை அந்த சட்டமூலத்தின் மீதான முதல் நாள் விவாதத்தில் கலந்து கொண்டு உரையாற்றும்போது தெரிவித்தார்.
எதிர்க்கட்சியினரின் ஆட்சேபனைக்கு மத்தியில் கட்சித் தலைவர் கூட்டத்தில் ஆராயப்பட்டு , பிரஸ்தாப விவாதத்தை செவ்வாய்க்கிழமையும், புதன்கிழமையும் விவாதிப்பதாக தீர்மானிக்கப்பட்டதன் பின்னர் விவாதம் இடம்பெற்றது.
முஸ்லிம் காங்கிரஸ் தலைவர் ரவூப் ஹக்கீம் உரையாற்றும்போது மேலும் கூறியதாவது,
எனக்கு முன் உரையாற்றிய ராஜாங்க அமைச்சர் கனக ஹேரத் இந்த நிகழ்நிலை காப்பு சட்ட மூலம் மக்களை பாதுகாக்கும் சட்டம் என்று எடுத்துக்காட்ட முயற்சித்தார்.
ஆனால் எதிர்க்கட்சியின் கவனத்தை ஈர்த்துள்ள காரணங்களைப் பார்க்கும்போது அரசு தனது இருப்பை தக்க வைத்துக் கொள்வதற்காகத்தான் இதனை ஒரு துரும்பு சீட்டாக பாவிக்கின்றது என்பது எங்களுக்கு தெளிவாக தெரிகின்றது. அதைத்தான் இப்பொழுது விளக்க போகின்றேன் .
வித்தைக்காரன் பார்வையாளர்களுக்கு போலியான காட்சியை காட்ட எத்தனிப்பதை போன்றே அரசாங்கமும் பொதுமக்களுக்கு காட்ட எத்தனிக்கின்றது. இராஜாங்க அமைச்சர் கனக ஹேரத் உரையாற்றும்போது இளவயது பிள்ளைகள் துஷ்பிரயோகம் செய்யப்படுவது பற்றியும் பெண்களின் நிர்வாண தோற்றம் காட்சிப்படுத்தப்படும் போது அவர்கள் அவமானப்படுவது பற்றியும், அவ்வாறே பலவிதங்களிலும் பொதுமக்களை பாதுகாப்பதற்கு அவசியமான சட்டம் என்றவாறு இதை எடுத்துக்காட்ட முயற்சித்தார்.
அவருக்கு ஒன்றைச் சொல்ல வேண்டும் நீங்கள் இளவயதினரையும் பெண்களையும் பற்றி இங்கு கதைத்த போதிலும் ,உங்களுக்கு தெரியுமா இந்த சட்டமூலத்தில் அடங்கியுள்ள 57 பிரிவுகளில் இரண்டு பிரிவுகளில் மட்டும் தான் இளம் வயதினரையும் பெண்களையும் பற்றி குறிப்பிடப்படுகின்றது. ஏனைய அனைத்தும் இணையத்தளத்தை எவ்வாறு கட்டுப்பாட்டில் வைத்திருப்பது என்பதை பற்றி தான் உள்ளன. இணையத்தின் ஊடாக தகவல்களை பரிமாறும் போது அவமானத்துக்குரிய வகையில் அரசியல் ரீதியாக தங்களால் சகித்துக் கொள்ள முடியாத அளவுக்கு விமர்சனங்கள் எழும்போது அவற்றை கட்டுப்படுத்துவதற்காக தான் இந்த முயற்சி என்பது திட்டவட்டமாக தெரிகின்றது.
இது பற்றி உயர்நீதிமன்றத்தில் நீண்ட விவாதம் இடம்பெற்றது. இந்த சட்ட மூலம் அரசியலமைப்புக்கு ஏற்புடையதா என்பதை பற்றி பரிசீலனைக்கு உட்படுத்தப்பட்ட போது சட்டமா அதிபர் முரணான 31 பிரிவுகளையும் பற்றி விளக்கமளிப்பதற்கு மூன்று மணித்தியாலங்களை செலவிட்டிருக்கிறார். இந்த சட்டமூலம் அரசியலமைப்போடு இணங்கி செல்லாத நிலையில் அதனை வர்த்தமானியில் பிரசுரிப்பதற்கு சட்டமா அதிபர் எவ்வாறு அத்தாட்சி படுத்தினார் என்பது புதிராக இருக்கிறது. 57 பிரிவுகளில் 31 பிரிவுகள் அரசியலமைப்புக்கு முரணாக இருந்த போது அதனை தெரிந்து கொண்டே அவர் நீதிமன்றத்திற்கு வந்திருந்தார்.
இதை நாங்கள் மிக கவனமாக நோக்க வேண்டும். இந்த நாட்டின் கருத்து வெளிப்பாட்டு சுதந்திரத்தில் எஞ்சியுள்ள சில காப்பீடுகளையும் கூட அப்புறப்படுத்துவதற்கு இந்த சட்டத்தின் ஊடாக அரசாங்கம் எத்தனிக்கின்றது. அத்துடன் இந்த நாட்டில் ஜனநாயகத்தை அழித்து ஒழிக்கப் போகின்றது. மக்களின் விமர்சனத்திற்கு அஞ்சி அரசாங்கம் மக்களை விட்டும் விரண்டோடுகின்றது. அந்த விமர்சனங்களை கட்டுப்படுத்துவதற்காகவே இப்பொழுது இந்த சட்டமூலத்தை கொண்டு வந்துள்ளது. கடுமையான தண்டனைகள் விதிக்கப்படப் போகின்றன மக்களை நசுக்கும் சூழ்நிலை ஏற்படுத்தப்படப் போகிறது. நிறைவேற்று அதிகாரம் அதனது நிலைப்பாட்டை திட்டவட்டமாக தெளிவாக்கியுள்ளது.
காலையில் நடைபெற்ற கட்சித் தலைவர்கள் கூட்டத்தில் , இந்த வழக்கில் தோன்றிய ஜனாதிபதி சட்டத்தரணி சுமந்திரன் எம்.பி இந்த சட்டத்தின் 31 திருத்தங்கள் பற்றி விவாதிப்பதற்கு சட்டமா அதிபர் எவ்வாறு பிரயாசை பட்டார் என்பதை கூறி இருந்தார்.
தேர்தல் தொகுதி, தேர்தல் தொகுதி ஒருங்கிணைப்பு என்பனவற்றை கையாள்வதும் இதன் உள்ளார்ந்த நோக்கங்களில் ஒன்றாகும். முன்னாள் ஜனாதிபதி தனியார் நிறுவனங்களை ஊடுருவிச் செல்லும் கண்காணிப்பு முறை ஒன்றை ஏற்படுத்தி ,அவற்றில் பொருத்தப்படும் கருவிகளின் ஊடாக ஒவ்வொரு பிரஜையையும் உன்னிப்பாக கண்காணிக்கின்ற ஒரு செயல் முறையை தோற்றுவித்திருந்தார்.
இலங்கையில் குற்றச் செயல்களைப்பொறுத்தவரை ஏற்கனவே உள்ள சட்டங்களைக் கொண்டு அவற்றை கையாள முடியும். அதற்கான ஏற்பாடுகள் அந்த சட்டங்களில் அடங்கியுள்ளன. குற்றவியல் கோவையில் 291,291(A), 291(B),484,485 ஆகியவை மூலம் அவற்றை கையாள முடியும் அவ்வாறே ஐ .சி .சி .பி .ஆர். சட்டத்தில் இதற்கான ஏற்பாடுகள் உள்ளன. ஆனால் அப்பாவி மக்கள் வெளியிட்ட, அப்பாவித்தனமான சில கருத்துக்களுக்காக இந்த சட்டத்தின் ஊடாக தண்டிக்கப்பட்டி ருக்கிறார்கள். உண்மையிலேயே, வெறுப்பூட்டக்கூடிய பேச்சு பேசியவர்கள் இதனால் தண்டிக்கப்படவில்லை. அவர்களுக்கு அரசாங்கத்தின் அனுசரணை இருந்து வந்துள்ளது.
அவ்வாறே கணினி சம்பந்தமான குற்றச் செயல்களுக்கு தண்டிப்பதற்கும் அதற்குரிய சட்டம் வேறாக இருக்கிறது . சில கட்டளை சட்டங்களும் எடுத்துக்கொண்ட சில கட்டங்கள் சட்டங்களும் உள்ளன. மின்னியல் பரிமாற்ற சட்டம் போன்றவையும் உள்ளன .ஆகவே அவ்வாறிருக்கும் பொழுது ஏன் அரசாங்கம் அவசரப்பட்டு இந்த சட்டமூலத்தைகொண்டு வர வேண்டும்?.
உரிய முறையில் குற்ற செயல்களை கையாள்வதற்கான சட்ட ஏற்பாடுகள் ஏற்கனவே இருக்கத்தக்கதாக ,சட்டமும் ஒழுங்கும் பொறிமுறையும்(Law and Order Machinery) சட்டத்தை நடைமுறைப்படுத்தும் பொறிமுறையும் (Law Enforcement Machinery) ஏன் இதில் தலையிட்டு கடும் போக்கை கடைபிடிக்கின்றன?
நேற்று (கடந்த திங்களன்று) பேராசிரியர் ஜீ.எல்.பீரிஸ் மற்றும் முக்கியஸ்தர்களும் பங்கு பற்றிய ஒரு கலந்துரையாடலில் சட்டத்துறை பேராசிரியர் சாவித்திரி குணசேகர இந்த சட்டமூலம் பற்றி அதனை கண்டித்துப் பேசினார். இந்த சட்ட மூலம் கொண்டுவரப்படுவதன் நோக்கம் சந்தேகத்துக்கு இடமானது என்று அவர் காரசாரமாக விமர்சித்தார்.
அரசாங்கம் அவசரமாக இதனை நிறைவேற்றிக் கொள்ளப் போகின்றது. அதாவது இந்த சட்டத்தை அப்பாவி மக்களின் தொண்டைக்குழிகளுக்குள் திணிக்க போகின்றது. மக்களை கண்ணியப்படுத்துவதற்காகவே கொண்டு வருகிறோம், அவர்களை பாதுகாப்பதற்காகவே கொண்டு வருகிறோம் என்று கூறிக்கொண்டு அரசாங்கம் இதனைச் செய்ய துணிந்திருக்கிறது என்றார்.- Vidivelli