(ஏ.ஆர்.ஏ.பரீல்)
இவ்வருட ஹஜ் யாத்திரைக்கு பதிவு செய்துள்ளோர், தாம் மீள பெற்றுக் கொள்ளக்கூடிய பதிவுக் கட்டணமான 25 ஆயிரம் ரூபாவை எதிர்வரும் 31 ஆம் திகதிக்கு முன்பு முஸ்லிம் சமய பண்பாட்டலுவல்கள் திணைக்களத்தில் செலுத்தி தங்கள் யாத்திரையை உறுதி செய்து கொள்ளுமாறு வேண்டப்பட்டுள்ளனர்.
இவ்வருட ஹஜ் யாத்திரைக்கு இதுவரை 3400 பேர் பதிவு செய்து கொண்டுள்ள போதும் 400 பேரே 25ஆயிரம் ரூபா பதிவுக் கட்டணத்தைச் செலுத்தியுள்ளதாகவும் 3000 பேர் இதுவரை பதிவுக் கட்டணம் செலுத்தவில்லை எனவும் முஸ்லிம் சமய பண்பாட்டலுவல்கள் திணைக்களப் பணிப்பாளர் இஸட். ஏ.எம்.பைசல் விடிவெள்ளிக்குத் தெரிவித்தார்.
கடந்த வருடங்களில் ஹஜ் யாத்திரைக்கு 25 ஆயிரம் ரூபா செலுத்தி பதிவு செய்து கொண்டுள்ள விண்ணப்பதாரிகள் அப்பதிவினை இரத்துச் செய்து 25 ஆயிரம் ரூபா பதிவுக் கட்டணத்தை மீளப்பெற்று புதிதாக பதிவு செய்து கொண்டிருந்தால் அதற்கு அந்தத் தொகையைச் செலுத்த முடியும் எனவும் அவர் கூறினார்.
பதிவுக் கட்டணம் செலுத்தியுள்ள விண்ணப்பதாரிகளுக்கு மாத்திரமே பதிவின் அடிப்படையில் யாத்திரைக்கான ஏற்பாடுகள் மேற்கொள்ளப்படுமெனவும் தெரிவித்தார். – Vidivelli