(அஷ்ரப் ஏ சமத்)
காஸாவில் வசித்து வந்த இரண்டு குடும்பங்கள் இலங்கையை வந்தடைந்துள்ளன. இந்த இரு குடும்பங்களினதும் தாய்மார் இலங்கையைப் பூர்வீகமாகக் கொண்டவர்களாவர். கடந்த ஆண்டு ஒக்டோபர் மாதம் 7ஆம் திகதி தொடக்கம் இஸ்ரேல் நடாத்தி வரும் தாக்குதல்களினால் காஸாவில் தங்களுக்குச் சொந்தமான அனைத்தையும் இழந்து நிராதரவாகிவிட்டதாக இவர்கள் தெரிவித்தனர்.
நேற்று முன்தினம் கொழும்பிலுள்ள பலஸ்தீன தூதரகத்தில் இலங்கைக்கான பலஸ்தீன தூதுவர் கலாநிதி சுஹைர் தார் ஸைட் தலைமையில் நடைபெற்ற இந்த செய்தியாளர் மாநாட்டில் இக் குடும்பங்கள் கலந்து கொண்டு தமது அனுபவங்களை வெளிப்படுத்தினர்.
இவர்களில் ஒரு தாய்க்கு 4 பிள்ளைகளும் மற்றொரு தாய்க்கு 5 பிள்ளைகளும் உள்ளனர். தனது கணவரின் உறவினர்கள் சுமார் 50 பேர் இஸ்ரேலின் தாக்குதல்களில் கொல்லப்பட்டுள்ளதாக இங்கு கருத்து வெளியிட்ட பெண் ஒருவர் கூறினார்.
“எங்களிடம் கடவுச்சீட்டுகள் இல்லை, இலங்கைத் தூதரகம் தான் கடவுச்சீட்டுகளைப் பெற எங்களுக்கு உதவியது” என இலங்கையை வந்தடைந்த 16 வயதான சயீத் அல்-ஹபாஷ் ஊடகங்களுக்குத் தெரிவித்தார்.
“நாங்கள் எங்கள் வீட்டை விட்டு வெளியேறி ஓர் இரவு பள்ளிவாசலில் கழித்தோம். பிறகு இலங்கை வரும் வரை பாடசாலைகளில் தஞ்சம் அடைய வேண்டியதாயிற்று. எனக்கு வாழ வருமானம் இல்லாததால் ஆதரவற்ற நிலையில் இருக்கிறேன். என் குழந்தைகள் மோதலால் அதிகம் பாதிக்கப்பட்டுள்ளனர். அவர்களின் கல்வி தடைப்பட்டுள்ளது. மொழிப் பிரச்சினையால் கல்வியைத் தொடங்குவது அவர்களுக்கு கடினமாக உள்ளது. எனது கணவரையும் இலங்கைக்கு வரச் செய்வதே எனது எண்ணம். நாங்கள் தற்போது கேகாலையில் வசித்து வருகிறோம். எனினும் எனது பிள்ளைகள் கொழும்பிலேயே இருக்க விரும்புகிறார்கள்” என சயீத்தின் தாய் சித்தி சுஹைனா தெரிவித்தார்.
மற்றொரு குடும்பத் தலைவி பாத்திமா ரிகாசா கூறுகையில், ‘‘இந்த மோதலால் நாம் கடுமையாகப் பாதிக்கப்பட்டுள்ளோம். நாங்களும் பாதுகாப்புக்காக ஓரிடத்திலிருந்து இன்னுமோர் இடத்திற்குச் செல்ல வேண்டியிருந்தது. குழந்தைகளை வீட்டை விட்டு வெளியே அனுப்ப வேண்டாம் என்று கேட்டுக் கொள்ளப்பட்டோம், பின்னர் வெளியேறுமாறு அறிவுறுத்தினர். நாங்கள் ஒரு பாடசாலையில் தங்க வேண்டியிருந்தது. அந்த பாடசாலை மீதும் குண்டுத் தாக்குதல் நடத்தப்பட்டதால் அங்கிருந்தும் வெளியேற வேண்டியிருந்தது. எனது கணவரின் தாய் சுகவீனமுற்றுள்ளதால் அவரை அங்குவிட்டுவிட்டே இலங்கைக்கு வந்துள்ளோம். நாங்கள் ஆரம்பத்தில் இலங்கையிலேயே வசித்து வந்தோம், ஆனால் எனது கணவரின் தாய் நோய்வாய்ப்பட்டதால் நான் பலஸ்தீனத்திற்கு செல்ல வேண்டியிருந்தது ”என்று அவர் தனது கஷ்டங்களை விபரித்தார்.
இரண்டு குடும்பங்களும் காஸா பகுதியில் இருந்து வெளியேற உதவிய இலங்கை அரசாங்கத்திற்கும் இலங்கைக்கான பலஸ்தீன தூதுவருக்கும் நன்றி தெரிவித்தனர். “காஸாவில் அமைதியை நிலைநாட்டுமாறு சர்வதேச சமூகத்திடம் வேண்டுகோள் விடுக்கிறோம். பலஸ்தீன மக்களை அவர்களின் தாயகத்திலிருந்து வெளியேற்ற இஸ்ரேல் விரும்புகிறது. காஸாவில் இனப்படுகொலை நடந்து கொண்டிருக்கிறது, அதை நிறுத்த வேண்டும். அங்குள்ள மக்கள் கடுமையான சிரமத்திற்கு ஆளாகியுள்ளனர்” என்றும் அவர் குறிப்பிட்டார். – Vidivelli