உயிர்த்த ஞாயிறு தின தற்கொலை தாக்குதல் விவகாரம் : உண்மைத் தன்மையை கண்டறிவதற்கான போராட்டத்தை ஒருபோதும் கைவிடாதீர்
கொழும்பு பேராயருக்கு போப்பாண்டவர் ஆலோசனை
(ஏ.ஆர்.எ.பரீல்)
உயிர்த்த ஞாயிறு தாக்குதலினால் பாதிக்கப்பட்ட மக்களுக்கு நீதியைப் பெற்றுக் கொடுப்பதற்கும் தாக்குதலின் உண்மைத்தன்மையை கண்டறிவதற்குமான போராட்டத்தை ஒரு போதும் கைவிட வேண்டாம் என போப்பாண்டவர் பிரான்ஸிஸ் ஆலோசனை வழங்கியுள்ளதாக கொழும்பு பேராயர் மெல்கம் கர்தினால் ரஞ்சித் தெரிவித்தார்.
பேராயர் மெல்கம் கர்தினால் ரஞ்சித் மற்றும் இலங்கை கத்தோலிக்க ஆயர்கள் பேரவையின் உறுப்பினர்கள் போப்பாண்டவருடன் ரோமில் மேற்கொண்ட பாரம்பரிய சந்திப்பின் போதே அவர் இவ்வாறு ஆலோசனை வழங்கியுள்ளார்.
உயிர்த்த ஞாயிறு தாக்குதலில் பாதிக்கப்பட்டவர்களுக்கான உண்மை மற்றும் நீதிக்கான போராட்டத்தைக் கைவிட வேண்டாம். இந்தப் போராட்டம் உண்மையைக் கண்டறியும் வரை நீதியைப் பெற்றுக் கொடுக்கும் வரை தொடர வேண்டும். என போப்பாண்டவர் எம்மை வேண்டிக் கொண்டார் என பொரள்ளை பேராயர் இல்லத்தில் நடைபெற்ற அவரது பிறந்த தின நிகழ்வின் போது பேராயர் மெல்கம் கர்தினால் ரஞ்சித் இவ்வாறு தெரிவித்தார்.
பேராயர் மற்றும் இலங்கை ஆயர்கள் பேரவையின் உறுப்பினர்கள் ரோமுக்கு போப்பாண்டவரை சந்திப்பதற்காக மேற்கொண்ட விஜயம் ஐந்து வருடங்களுக்கொருமுறை மேற்கொள்ளும் பாரம்பரிய விஜயம் என்பது குறிப்பிடத்தக்கதாகும். – Vidivelli