காஸா மீதான இஸ்ரேலின் தாக்குதல்களை நிறுத்துவதற்கு நடவடிக்கை மேற்கொள்க
159 இலங்கை பாராளுமன்ற உறுப்பினர்கள் ஒப்பமிட்டு ஐ.நா. செயலாளருக்கு கடிதம்
(ஏ.ஆர்.எ.பரீல்)
காஸா மீதான இஸ்ரேலின் அராஜகமான தாக்குதல்களை உடன் நிறுத்துவதற்கு உரிய நடவடிக்கைகளை மேற்கொள்ளுமாறு கோரிக்கை விடுத்து, 159 இலங்கை பாராளுமன்ற உறுப்பினர்கள் கையொப்பமிட்ட கடிதமொன்று ஐ.நாவின் செயலாளர் நாயகம் அன்டோனியோ குட்டெரஸுக்கு அனுப்பி வைக்கப்பட்டுள்ளது. இதன் பிரதி நேற்று முன்தினம் கொழும்பிலுள்ள ஐ.நா. உயர்ஸ்தானிகராலயத்தில் அகில இலங்கை மக்கள் காங்கிரஸின் தலைவரும் பாராளுமன்ற உறுப்பினருமான ரிசாத் பதியுதீன் தலைமையிலான எம்.பி.க்கள் குழுவினரால் நேரில் கையளிக்கப்பட்டது. இக்கோரிக்கை கடிதத்தில் முன்னாள் ஜனாதிபதிகளும், பாராளுமன்ற உறுப்பினர்களுமான மைத்திரிபால சிரிசேன, மஹிந்த ராஜபக்ஷ ஆகியோரும் கையொப்பமிட்டுள்ளனர்.
ஐ.நா செயலாளர் நாயகத்துக்கு அனுப்பி வைக்கப்பட்டுள்ள கடிதத்தில் தெரிவிக்கப்பட்டுள்ளதாவது, உலக அரசியலில் முக்கிய பங்கு வகிக்கும் முக்கிய பங்குதாரர்கள் மத்திய தரைக்கடல் பகுதியின் பிரச்சினையின் மூல காரணத்தை ஆராய வேண்டும். சரியான தீர்வினை செயற்படுத்துவதன் மூலம் உடனடியாக இந்தப்பிரச்சினைக்கு தீர்வினைப் பெற்றுக் கொடுப்பதற்கான வழிவகைகளைக் கண்டறிய வேண்டும்.
கிழக்கு ஜெரூசலமை தலைநகராகக் கொண்ட 1967 ஆம் ஆண்டின் எல்லைகளுடன் கூடிய சுதந்திர பலஸ்தீனத்தை உருவாக்கி அங்கீகரிக்க வேண்டும். பிராந்தியத்தில் ஸ்திரத்தன்மை மற்றும் நியாயமான அமைதியை அடைவதற்கான ஒரே வழி இதுவாகும். இதனை இஸ்ரேல் ஏற்க வேண்டும். இதற்காக உலக நாடுகள் செயற்பட வேண்டும்.
சர்வதேச ரீதியில் ஏற்றுக்கொள்ளப்பட்ட தீர்மானங்கள் சர்வதேச சட்டங்கள் மற்றும் இது தொடர்பாக எடுக்கப்பட்ட தீர்மானங்களை நடைமுறைப்படுத்துவதற்கு உடனடியாக போரை நிறுத்தும் படியும் பேச்சுவார்த்தைக்கு வருமாறும் நாங்கள் கோருகிறோம்.
இஸ்ரேல் சர்வதேச சட்டங்கள் மற்றும் உலகளாவிய மனிதாபிமான விதிமுறைகளின் கீழ் தற்போதும் இதற்கு முன்னரும் ஒரே மாதிரியான போர்க் குற்றத்தை மேற்கொண்டமையைப் பொறுப்பேற்க வேண்டும்.
இலங்கைப் பாராளுமன்ற உறுப்பினர்கள் என்ற வகையில் ஐக்கிய நாடுகள் சபை மற்றும் அதன் அனைத்து நிறுவனங்களும் உலகில் அமைதியை விரும்புவோரும் பலஸ்தீன் மக்கள் மீதான தாக்குதல்கள், ஆக்கிரமிப்புகள் என்பவற்றை நிறுத்துவதற்கு இஸ்ரேல் மீது தேவையான நடவடிக்கைகளை விரைந்து செயற்படுத்துமாறு வேண்டிக் கொள்கிறோம்.
இஸ்ரேலை ஆதரிப்பதை நிறுத்திவிட்டு சர்வதேச சட்டத்தின்படி நயவஞ்சகத்தன்மை மற்றும் இரட்டை நிலைப்பாடு இல்லாமல் நியாயமான ரீதியில் நடந்து கொள்ளுமாறு மேற்கத்திய நாடுகளை வேண்டுகிறோம். குறிப்பாக ஐ.நா பாதுகாப்பு சபையின் மூன்று நிரந்தர உறுப்பினர்களான அமெரிக்கா, இங்கிலாந்து மற்றும் பிரான்ஸ் ஆகிய நாடுகளைக் கேட்டுக் கொள்கிறோம்.
மனித உரிமைகள், மனித விழுமியங்கள் என்பவற்றைக் கையாள்வதில் நேர்மையாகவும், உண்மையாகவும் இருக்க வேண்டிய தருணம் இதுவாகும் என்றும் அக்கடிதத்தில் தெரிவிக்கப்பட்டுள்ளது.
இது தொடர்பில் பாராளுமன்ற உறுப்பினர் ரிசாத் பதியுதீன் விடிவெள்ளிக்கு கருத்து தெரிவிக்கையில், பலஸ்தீனர்களின் பாரம்பரிய நிலத்தை கபளீகரம் செய்து சர்வதேச சட்டங்களை மீறி நிலைகொண்டுள்ள இஸ்ரேல் காஸா பொது மக்கள் மீது குண்டுகளை வீசி அழிவுகளை ஏற்படுத்தி வருகிறது. பெரும் எண்ணிக்கையிலான சிறுவர்கள், பெண்கள் என நாளாந்தம் படுகொலை செய்யப்பட்டு வருகிறார்கள்.
இஸ்ரேல் மனசாட்சியே இல்லாது தொடர்ந்தும் தாக்குதல்களை நடத்தி வருகிறது.
யுத்தம் உடனடியாக நிறுத்தப்பட வேண்டுமென ஐ.நாவில் அங்கம் வகிக்கும் 120 நாடுகளின் ஆதரவுடன் தீர்மானம் நிறைவேற்றப்பட்டும் இஸ்ரேல் தொடர்ந்தும் தாக்குதல்களை நடத்தி வருகின்றது. எம்மால் இதனை அனுமதிக்க முடியாது. அதனாலேயே பாராளுமன்ற உறுப்பினர்களாகிய நாம் ஐ.நா.வின் செயலாளர் நாயகத்திடம் யுத்தத்தை உடனடியாக நிறுத்தக் கோரி கடிதம் மூலம் கேட்டுள்ளோம் என்றார்.- Vidivelli