நல்லிணக்கத்தை பாதிக்கும் வகையில் கருத்து வெளியிட்ட விவகாரம் : ஞானசார தேரருக்கு எதிரான வழக்கு விசாரணை 24 ஆம் திகதிக்கு ஒத்திவைப்பு

By A.R.A Fareel Last updated Nov 16, 2023

(ஏ.ஆர்.ஏ.பரீல்)
தேசிய நல்லிணக்கத்திற்கு குந்தகம் ஏற்படுத்தும் வகையில் கருத்து வெளியிட்ட சம்பவம் தொடர்பில் பொது பல சேனா அமைப்பின் செயலாளர் ஞானசார தேரருக்கு எதிராக கொழும்பு மேல் நீதிமன்றில் தாக்கல் செய்யப்பட்டுள்ள வழக்கு விசாரணையை நீதிவான் ஏ.படபெந்தி எதிர்வரும் 24 ஆம் திகதிக்கு ஒத்திவைத்தார்.

இவ்வழக்கு விசாரணைக்கு எடுத்துக் கொள்ளப்பட்ட போது பிரதிவாதி ஞானசார தேரர் மன்றில் ஆஜராகியிருக்கவில்லை. அவர் சுகயீனம் காரணமாக மன்றில் ஆஜராகவில்லை என அவரது சார்பில் ஆஜரான சட்டத்தரணி சஞ்சய ஆரியதாச மன்றுக்குத் தெரிவித்ததை அடுத்தே வழக்கு எதிர்வரும் 24 ஆம் திகதிக்கு ஒத்திவைக்கப்பட்டது.

இவ்வழக்கின் சாட்சியாளரான அகில இலங்கை மக்கள் காங்கிரஸின் தலைவரும் பாராளுமன்ற உறுப்பினருமான ரிசாத் பதியுதீன் மன்றில் ஆஜராகியிருந்தார். அவரையும் குறிப்பிட்ட தினத்தில் சாட்சியமளிக்க நீதிமன்றில் ஆஜராகும்படி நீதிவான் உத்தரவிட்டார்.

2016.03.30 ஆம் திகதி அல்லது அதனை அண்மித்த திகதியில் நடைபெற்ற ஊடக சந்திப்பொன்றில் கலகொடஅத்தே ஞானசார தேரர் இனங்களுக்கிடையிலான நல்லிணக்கத்துக்கு குந்தகம் ஏற்படும் வகையில் கருத்து வெளியிட்டதாக குற்றம் சுமத்தி சட்டமாஅதிபரினால் இவ்வழக்கு தாக்கல் செய்யப்பட்டது.- Vidivelli