900,000 பலஸ்தீனர்கள் இஸ்ரேலிய தாக்குதலை எதிர்கொள்கின்றனர்

அகதிகளாகியுள்ள மக்களின் திகிலூட்டும் அனுபவங்கள்

By vidivelli Last updated Nov 13, 2023

எம்.ஐ.அப்துல் நஸார்

கடந்த செவ்வாய்க்கிழமையன்று வடக்கு காஸா மற்றும் காஸா நகரத்திலுள்ள 900,000 பலஸ்தீன பொதுமக்கள் இஸ்ரேலிய டாங்கிகளாலும் தாக்குதலுக்கு தயாராகி வரும் படைகளாலும் சூழப்பட்டனர்.

பலஸ்தீனப் பொதுமக்களை தெற்கு பகுதிக்குச் செலுமாறு இஸ்ரேல் வற்புறுத்தியதோடு வெளியேறுவதற்கு நான்கு மணிநேர கால அவகாசத்தையே வழங்கியது, ஆனால் தெற்கு காஸாவும் தாக்குதலுக்குள்ளானது. கான் யூனிஸ் மற்றும் ரபா நகரங்களில் இஸ்ரேல் நடத்திய வான்வழித் தாக்குதலில் குறைந்தது 23 பேர் கொல்லப்பட்டனர்.

11 பேர் கொல்லப்பட்ட கான் யூனிஸில் ஒரு வீட்டின் இடிபாடுகளில் இருந்து மீட்கப்பட்ட அகமது ஆயிஷ், ‘நாங்கள் பொதுமக்கள்’ எனக் குறிப்பிட்டார். ‘இதுதான் இஸ்ரேல் என்று அழைக்கப்படுவோரின் வீரம். -அவர்கள் பொதுமக்கள், குழந்தைகள், கர்ப்பத்திலுள்ள குழந்தைகள் மற்றும் வயதானவர்கள் மீதே தமது வலிமையையும் சக்தியையும் காட்டுகிறார்கள்.’

அவர் பேசிக்கொண்டிருக்கும் போதே, இடிபாடுகளுக்குள் இடுப்பு வரை புதைந்திருந்த சிறுமியை மீட்க வீட்டில் இருந்த மீட்புப் பணியாளர்கள் தங்கள் கைகளைப் பயன்படுத்தி முயற்சிக்கத் தொடங்கினர்.

தெற்கு நோக்கிச் சென்ற காஸா நகரவாசியான ஆதம் பயேஸ் ஜெயாரா கூறுகையில்: ‘என் வாழ்க்கையின் மிகவும் ஆபத்தான பயணம். டாங்கிகளை மிகவும் அண்மித்த நிலையில் பார்த்தோம். சிதைந்த உடல் பாகங்களைப் பார்த்தோம். நாங்கள் மரணத்தைக் கண்ணெதிரே கண்டோம்.

காஸாவின் நகர்ப்புற மையப்பகுதியை தாக்குவதற்காக டாங்கிகள் புறநகரில் நிலைநிறுத்தப்பட்டிருந்த காஸா நகருக்குள் அதன் படைகள் ஆழமாக ஊடுருவியுள்ளதாக இஸ்ரேல் தெரிவித்தது.

இரண்டாவது மாதமாக நடைபெறும் போரின் ஆரம்பத்திலும், தற்போதும் இராணுவம் பொதுமக்களை தெற்கே செல்லுமாறு வலியுறுத்தியுள்ளது. முற்றுகையிடப்பட்ட பகுதியின் மையப்பகுதியை ஊடறுத்துச் செல்லும் சலாஹ் அல்-தீன் வழியாகச் செல்லும் பாதை பாதுகாப்பானது என தெரிவித்து குறுகிய கால அவகாசத்தினை வழங்கியது.

ஆனால் பல்லாயிரக்கணக்கான பொதுமக்கள் வடக்கில் தங்கியுள்ளனர், பலர் வைத்தியசாலைகளில் அல்லது ஐ.நா. வின் பாதுகாப்பிடங்களில் தங்கியுள்ளனர்.

தெற்கில் மக்கள் நெரிசல், தண்ணீர் மற்றும் உணவுப் பொருட்கள் தட்டுப்பாடு நிலவுவதாகவும், பாதுகாப்பான இடமென கருதப்படும் பகுதிகளில் இஸ்ரேல் வான்வழித் தாக்குதல்களைத் தொடர்வதாகவும் இடம்பெயராது தங்கியிருப்பவர்கள் தெரிவிக்கின்றனர்.

திங்களன்று, காஸாவின் சுகாதார அமைச்சின் ஊடகப் பேச்சாளர் அஷ்ரப் அல்-கித்ரா, பாதுகாப்பான பாதையென இஸ்ரேலிய குறிப்பிடுவது ‘மரண படுகுழியைத் தவிர வேறெதுவுமில்லை’ என இஸ்ரேலின் வேண்டுகோளை நிராகரித்தார்.

ஜனாஸாக்கள் பல நாட்களாக வீதியில் வரிசையாக இருக்கின்றன. மேலும் ஜனாஸாக்களை மீட்க உதவுமாறு உள்ளூர் நோயாளர் காவு வண்டிகளுடன் வருமாறு சர்வதேச செஞ்சிலுவைச் சங்கத்திற்கு அழைப்பு விடுக்கப்பட்டுள்ளது.

ஒரு கட்டத்தில், பொது மக்களுக்காக தற்காலிகமாக வீதியைத் திறக்க முயன்றபோது, ஹமாஸ் துப்பாக்கிச் சூடு நடத்தியதாக இஸ்ரேல் இராணுவம் குற்றம் சாட்டியது.

இஸ்ரேலிய பிரதமர் பெஞ்சமின் நெதன்யாகு திங்கட்கிழமை பிற்பகுதியில் ஏபிசி நியூஸ் ஒளிபரப்பிற்கு அளித்த நேர்காணலில் இராணுவத்தின் கூற்றுக்களை உண்மைப்படுத்தினார்.

‘நாங்கள் குறிப்பாக மிருகத்தனமான ஒரு எதிரியுடன் போராடுகிறோம். அவர்கள் தங்கள் குடிமக்களை மனிதக் கேடயங்களாகப் பயன்படுத்துகிறார்கள், மேலும் பாலஸ்தீனிய பொதுமக்களை போர் நடைபெறும் பிரதேசத்தை விட்டு வெளியேறுமாறு நாங்கள் கேட்டுக் கொண்டிருக்கும்போது, அவர்கள் துப்பாக்கி முனையில் அவர்களைத் தடுக்கிறார்கள்,’என்று நெதன்யாகு கூறினார்.

‘பல தசாப்தங்களில் முதன்முறையாக, பயங்கரவாதத்தின் மையத்தில், காஸா நகரின் மையப்பகுதியில் இஸ்ரேல் பாதுகாப்புப் படை போராடுகிறது’ என இராணுவத்தின் தெற்கு கட்டளைத் தலைவர் மேஜர் ஜெனரல் யாரோன் பிங்கெல்மேன், தெரிவித்தார்.

‘ஒவ்வொரு நாளும் ஒவ்வொரு மணி நேரமும் படைகள் ஆயுததாரிகளைக் கொன்று, சுரங்கப்பாதைகளை கண்டறிந்து, ஆயுதங்களை அழித்து, எதிரி மையங்களை நோக்கி முன்னேறி வருகின்றனர் எனவும் தெரிவித்தார்.
முன்னேறி வரும் இஸ்ரேலியப் படைகளுக்கு பெரும் இழப்புகளையும் சேதங்களையும் போராளிகள் ஏற்படுத்துவதாக ஹமாஸின் இராணுவப் பிரிவு தெரிவிக்கின்றது.

ஒக்டோபர் 7 ஆந் திகதியன்று ஹமாஸ் போராளிகள் காஸாவைச் சுற்றி அமைக்கப்பட்டிருந்த பாதுகாப்பு வேலியைத் தாண்டிச் சென்று 1,400 இஸ்ரேலியர்களைக் கொன்று 200க்கும் மேற்பட்டவர்களைக் கடத்திச் சென்றதையடுத்து போர் தொடங்கியது. அதன் பின்னர், இஸ்ரேல் இடைவிடாமல் காஸா மீது குண்டுவீசி 10,000 க்கும் மேற்பட்ட மக்களைக் கொன்றது, அவர்களில் 40 சதவிகிதம் குழந்தைகளாவர். ‘இது ஒரு முழு மாத படுகொலைகள், இடைவிடாத துன்பங்கள், இரத்தம் சிந்துதல், அழிவு, சீற்றம் மற்றும் அவநம்பிக்கை’ என ஐநா மனித உரிமைகள் தலைவர் வோல்க்கர் டர்க் தெரிவித்தார்.

முதன்முறையாக நீண்ட கால திட்டங்கள் தொடர்பில் கலந்துரையாடிய நெதன்யாகு, ‘காலவரையின்றி காஸாவின் பாதுகாப்பிற்கான பொறுப்பை இஸ்ரேல் ஏற்கும்’ எனத் தெரிவித்திருந்தார்.

‘காஸா பகுதி ஆபத்தினை எதிர்நோக்கியுள்ள நிலையில் பாலஸ்தீன அதிகார சபைக்கு அதனைத் தாரைவார்ப்பதற்காக எமது படைகள் இரத்தம் சிந்தக்கூடாது என நெதன்யாகுவின் தீவிர வலதுசாரி தீவிரவாத கூட்டணியின் உறுப்பினரான சிம்சா ரோத்மேன் தெரிவித்ததோடு முழு இஸ்ரேலியக் கட்டுப்பாடு மற்றும் முழு இராணுவமயமாக்கல் மட்டுமே பாதுகாப்பை தரும் எனவும் தெரிவித்தார்.

ஆனால் அமெரிக்க ஜனாதிபதி ஜோ பைடன் ‘இஸ்ரேல் மீண்டும் ஆக்கிரமிப்பு மேற்கொள்வதற்கு எதிர்ப்பினை வெளிப்படுத்தியதாகவும் அவ்வாறு செய்வது இஸ்ரேலுக்கு நல்லதல்ல, இஸ்ரேலிய மக்களுக்கு நல்லதல்ல’ என அவர் தெரிவித்ததாக வெள்ளை மாளிகை பேச்சாளர் ஜோன் கிர்பி தெரிவித்தார்.- Vidivelli