(ஏ.ஆர்.ஏ பரீல்)
முஹம்மத் நபி (ஸல்) அவர்கள் தொடர்பிலும், இஸ்லாம் மதம் தொடர்பிலும் பொய்யான கருத்துகளைத் தெரிவித்து மிகவும் கீழ்தரமான இழிவான கருத்துகளை யூடியுப் தளத்தில் பதிவிட்டமைக்காக விளக்கமறியலில் வைக்கப்பட்டிருந்த சோதிடர் இந்திக்க தொட்டவத்தவுக்கு நீதிவான் கடுமையான நிபந்தனைகளுடன் பிணை வழங்கினார்.
இந்திக்க தொட்டவத்த இனிமேல் இவ்வாறான கீழ்த்தரமான இழிவான பேச்சுக்களை பொது வெளியில் வெளியிடக் கூடாது என்றும் எச்சந்தர்ப்பத்திலேனும் அவ்வாறு பேசினால் பிணை நிபந்தனையை மீறியதன் அடிப்படையில் மீண்டும் கைது செய்யப்படுவார் எனவும் நீதிவான் எச்சரித்தார்.
பிணையில் வைக்கப்பட்டிருந்த இந்திக்க தொட்டவத்த கடந்த வெள்ளிக்கிழமை மாளிகாகந்த நீதிவான் நீதிமன்றில் ஆஜர் செய்யப்பட்டார். அப்போதே அவருக்கு நிபந்தனைகளுடன் கூடிய பிணை வழங்கப்பட்டது.
இவர் கடந்த 6ஆம் திகதி கைது செய்யப்பட்டு நீதிமன்றில் ஆஜர்படுத்தப்பட்ட போது 14 நாட்கள் விளக்கமறியல் வைக்க நீதிவானினால் உத்தரவிடப்பட்டிருந்தது.
இந்த வழக்கு கடந்த வெள்ளிக்கிழமை மாளிகாகந்த நீதிவான் நீதிமன்றில் விசாரணைக்கு எடுத்துக் கொள்ளப்பட்டது. அப்போது சி.ஐ.டி. கணினி குற்றத் தடுப்புப் பிரிவினர் இந்தத் தவறை ICCPR சட்டத்தீன் கீழ் பதிவு செய்வதா? இல்லையா? என சட்டமாஅதிபர் திணைக்களத்திடமிருந்து இன்னும் ஆலோசனை கிடைக்கவில்லையென்றும் அதுவரையில் சந்தேக நபரை விளக்கமறியலில் வைக்குமாறும் நீதிவானை வேண்டிக் கொண்டனர்.
இந்நிலையில் இவ்வழக்கில் முஸ்லிம் சமூகத்தின் முறைப்பாட்டாளர்கள் சார்பாக ஆஜராகியிருந்த சிரேஷ்ட சட்டத்தரணி சிராஸ் நூர்தீன் மற்றும் சட்டத்தரணிகளான மாஸ் யூசுப், முஹம்மத் அன்வர், பசான் வீரசிங்க, எம்.கே.எம்.பர்ஸான் என்போர் தமது சமர்ப்பணத்தை நீதிவான் லோச்சனா வீரசிங்ஹவிடம் முன்வைத்தனர்.
இந்திக்க தொட்டவத்தவுக்கு பிணை வழங்குவதை தாம் எதிர்க்கவில்லை. ஆனால் இந்திக்க தொட்டவத்த எல்லா மதங்களையும் மிகவும் கேவலமாக இழிவுபடுத்தக் கூடியவர் என முறைப்பாட்டாளர் சார்பில் ஆஜரான சட்டத்தரணிகள் தெரிவித்தனர். அது சம்பந்தமான ஆதாரங்களையும் முன்வைத்தனர். இவருக்கு சாதாரணமாக பிணை வழங்காமல் நிபந்தனையுடன் கூடிய பிணை வழங்க வேண்டுமெனவும், இனி இவர் இது போன்று மதத்தையும், மதத் தலைவர்களையும் நிந்திக்கும் வகையில் பேசினால் பிணை ரத்துச் செய்யப்பட்டு அவர் கைது செய்யப்பட வேண்டும் எனவும் நீதிவானிடம் தெரிவித்தனர். அவர் தான் கூறிய இழிவான வார்த்தைகளுக்காக தனது வருத்தத்தை தெரிவிக்க வேண்டும் எனவும் கேட்டுக் கொண்டனர்.
அத்தோடு இஸ்லாத்தில் நபியவர்கள் எதிரிகளுடன் எவ்வாறு நடந்து கொண்டார்கள். எவ்வாறு எதிரிகளை மன்னித்தார்கள் என்பது தொடர்பில் 172 சம்பவங்களை சட்டத்தரணிகள் நீதிபதியிடம் சமர்ப்பணம் செய்தனர். மேலும் இவ்வாறான வெறுப்புப் பேச்சுகள் மூலம் மக்களின் உணர்வுகள் தூண்டப்பட்டு தவறான முடிவுகளை எடுப்பார்கள் என்றும் இது போன்ற நடவடிக்கைகளுக்கு எதிராக சட்டரீதியான நடவடிக்கை எடுக்கப்படாவிட்டால் மக்களுக்கு நாட்டில் சட்ட ஒழுங்கு மீதுள்ள நம்பிக்கை இல்லாது போய்விடுமெனவும் சுட்டிக்காட்டினர்.
இதனையடுத்து இந்திக்க தொட்டவத்த சார்பில் ஆஜரான சட்டத்தரணி உபுல் குமாரப்பெரும உட்பட 4 சட்டத்தரணிகள், முறைப்பாட்டாளர்கள் தரப்பு சட்டத்தரணிகளின் குழாம் முன்வைத்த வாதத்தை தாம் ஏற்பதாகவும் தமது சேவை நாடுனரால் ஏற்பட்ட தவறுக்காக அனைவரிடமும் தங்கள் வருத்தத்தை தெரிவித்துக் கொள்வதாகவும் குறிப்பிட்டனர். மேலும் இந்திக்க தொட்டவத்தவுக்கு ஐந்து புலன்களுமில்லை. அவர் மாற்றுத் திறனாளி. அதனால் அவரை அறியாமல் சில விடயங்களைப் பேசிவிடுவாரெனவும் நீதிமன்றில் தெரிவித்தனர்.
இரு பக்க விவாதங்களையும் செவிமடுத்த நீதிவான் லோச்சனா வீரசிங்க முஸ்லிம் சமூக முறைப்பாட்டாளர்கள் சார்பில் ஆஜரான சட்டத்தரணிகள் பாராட்டத்தக்க முறையில் நடந்து கொண்டதாக சுட்டிக்காட்டினார்.
பிரதிவாதி இந்திக்க தொட்டவத்த புலன் குறைந்தவர் என்ற விடயம் ஒருபோதும் அவருக்கு மன்னிப்பாக அமைய மாட்டாது என்றும் அவருக்கு அவ்வாறான பிரச்சினை இருந்தால் அதாவது தன்னைக் கட்டுப்படுத்தி பேச முடியாவிட்டால் இவ்வாறான மதம் சார்ந்த விடயங்களை பொது வெளியில் பேசாமல் தவிர்க்க வேண்டும். ஒரு தனிநபரின் செயற்பாட்டுக்காக முழு நாடும் பிரச்சினையை எதிர்நோக்க விட முடியாது என்றும் குறிப்பிட்டார்.
இந்திக்க தொட்டவத்த இனிமேல் இவ்வாறான கீழ்த்தரமான இழிவான பேச்சுக்களை பொது வெளியில் பேசக் கூடாது என்றும் எச்சந்தர்ப்பத்திலேனும் அவ்வாறு பேசினால் பிணை நிபந்தனை யினை மீறியதன் அடிப்படை யில் மீண்டும் கைது செய்யப்படுவாரெனவும் நீதிவான் குறிப்பிட்டார்.
வழக்கு விசாரணை 2024 ஜனவரி மாதம் 19ஆம் திகதிக்கு ஒத்தி வைக்கப் பட்டது. -Vidivelli