ஷுஹதாக்கள் தினம்; முஸ்லிம்களின் இழப்புகளின் அடையாளத்தை வெளிப்படுத்தும் நாளாக பிரகடனம்
பாதிக்கப்பட்டவர்களுக்கு அரசாங்கமும் சர்வதேசமும் தீர்வு தர வேண்டும் என காத்தான்குடி சம்மேளனம் வேண்டுகோள்
(எம்.எஸ்.எம்.நூர்தீன்)
இன்றைய தினம் அனுஷ்டிக்கப்படவுள்ள காத்தான்குடி பள்ளி வாயல் படுகொலையின் 33 ஆவது வருட ஷுஹதாக்கள் தினத்தை முஸ்லிம்களின் இழப்புக்களின் அடையாளத்தை வெளிப்படுத்தும் நாளாக காத்தான்குடி பள்ளி வாயல்கள் முஸ்லிம் நிறுவனங்களின் சம்மேளனம் பிரகடனப்படுத்தியுள்ளது.
30 வருட யுத்தத்தில் முஸ்லிம் சமூகமும் பெரிதும் பாதிக்கப்பட்டுள்ளது. இதனை சரியாக புரிந்துகொண்டு சர்வதேசமும் இலங்கை அரசாங்கமும் தீர்வை பெற்றுத் தர வேண்டும் என்றும் அவ்வமைப்பு வேண்டுகோள் விடுத்துள்ளது.
யுத்தத்தினால் பாதிக்கப்பட்ட கிழக்கு மாகாண முஸ்லிம்களின் காணிப் பிரச்சினை உட்பட முஸ்லிம்களின் பல்வேறு பிரச்சினைகளையும் அரசாங்கத்துக்கும் சர்வதேசத்துக்கும் சொல்லும் தினமாகவும் ஆகஸ்ட் 3ஆம் திகதியை பயன் படுத்துமாறும் கிழக்கு மாகாண முஸ்லிம்களை காத்தான்குடி பள்ளிவாயல்கள் முஸ்லிம் நிறுவனங்களின் சம்மேளனம் கேட்டுள்ளது.
இது தொடர்பாக காத்தான்குடி பள்ளிவாயல்கள் முஸ்லிம் நிறுவனங்களின் சம்மேளன மாநாட்டு மண்டபத்தில் கடந்த திங்கட்கிழமை இரவு இடம் பெற்ற ஊடகவியலாளர் சந்திப்பிலேயே சம்மேளனம் இந்த வேண்டுகோளை விடுத்துள்ளது.
காத்தான்குடி பள்ளிவாயல்கள் முஸ்லிம் நிறுவனங்களின் சம்மேளனத்தின் தலைவர் ரவூப் ஏ மஜீத் தலைமையில் நடைபெற்ற இந்த ஊடகவியலாளர் சந்திப்பில் சம்மேளன உறுப்பினர்கள், காத்தான்குடி வர்த்தக சங்க பிரதிநிதிகள், முச்சக்கர வண்டி சாரதிகள் சங்க பிரதிநிதிகள், ஷுஹதாக்கள் நிறுவன பிரதிநிதிகள், பள்ளிவாயல் படுகொலை இடம் பெற்ற காத்தான்குடி முதலாம் மீரா பெரிய ஜும்ஆ பள்ளிவாயல் நிருவாகிகள் என பலரும் கலந்து கொண்டனர்.
இதன்போது தொடர்ந்து கருத்து தெரிவித்த சம்மேளன செயலாளர் அஷ்ஷெய்ஹ் ஏ.எல்.எம்.சபீல் நழீமி, 1990 ஆம் ஆண்டு ஆகஸ்ட் மாதம் 3 ஆம் திகதி காத்தான்குடியின் இரண்டு பள்ளிவாயல்களில் தொழுது கொண்டிருந்த நூற்றுக்கணக்கான முஸ்லிம்கள் படுகொலை செய்யப்பட்ட தினமாகும். இந்தப் படுகொலை இடம்பெற்று 33 ஆண்டுகளாகின்றன. இது ஆகஸ்ட் 3ம் திகதியன்று நினைவு கூறப்படுகிறது.
கடந்த யுத்தத்தினால் முஸ்லிம் சமூகமும் கடுமையாக பாதிக்கப்பட்ட சமூகமாகும். அதிகமாக இழந்திருக்கின்றோம். ஆனால் முஸ்லிம் சமூகத்திற்கு எந்த ஒரு ஆக்கபூர்வமான நடவடிக்கையும் தீர்வும் முன்வைக்கப்படவில்லை. இது விடயத்தில் முஸ்லிம் சமூகம் கவலையோடு இருக்கிறது.
1990 ஆம் ஆண்டு குருக்கள் மடத்தில் வைத்து நூற்றுக்கணக்கான முஸ்லிம்கள் கடத்தப்பட்டு படுகொலை செய்யப்பட்டார்கள்.
கடத்தப்பட்டு படுகொலை செய்யப்பட்ட அந்த இடம் இது வரை தோண்டப்படாமலிருக்கின்றது. அதேபோன்று கிழக்கு மாகாண முஸ்லிம்கள் யுத்தத்தின் பின்னர் காணிப்பிரச்சினைக்கு கடுமையாக முகம் கொடுத்து வருகின்றார்கள்.
யுத்த காலத்தில் மட்டக்களப்பு மாவட்ட முஸ்லிம் சமூகம் 33 முஸ்லிம் கிராமங்களை இழந்துள்ளது. அதற்கான இழப்பீடுகள், மீள்குடியேற்ற வசதிகள் இன்னும் சரியான முறையில் கிடைக்கப் பெறவில்லை என்பது ஒரு கவலையான விடயமாகும்.
அந்த அடிப்படையில் ஆகஸ்ட் 3 ஆம் திகதி பள்ளிவாயல் படுகொலை நாளான ஷுஹதாக்கள் தினத்தன்று அரசாங்கம் உட்பட சர்வதேசத்துக்கு எமது பிரச்சினைகளை முன்வைக்கின்ற தினமாக நாங்கள் பிரகடனப்படுத்தியிருக்கின்றோம். அந்த அடிப்படையில் கிழக்கு மாகாண முஸ்லிம்கள் மட்டக்களப்பு மாவட்ட முஸ்லிம்கள் எதிர் நோக்குகின்ற அனைத்து வகையான பிரச்சினைகளையும் சர்வதேசத்துக்கு கொண்டு செல்கின்ற நாளாக இந்த ஆகஸ் 3ம் திகதியை (இன்றைய தினத்தை) பயன்படுத்திக் கொள்ள வேண்டும்.
எனவே படுகொலை செய்யப்பட்டு ஷஹீதானவர்களின் இழப்பினால் பாதிக்கப்பட்டுள்ள முஸ்லிம் சமூகம் பல்வேறு துன்பங்களையும் துயரங்களையும் அனுபவித்து வந்துள்ளது. அந்த அடிப்படையில் முஸ்லிம் சமூகத்தின் பிரச்சினைகளும் சரியாக நோக்கப்படல் வேண்டும். அரசாங்கமும் சர்வதேசமும் எமது பிரச்சினைகளையும் தீர்த்து வைக்க வேண்டும்.
அதேபோன்று ஜனாதிபதி தீர்வை வழங்குவதற்கு முயற்சிகளை மேற்கொண்டு பலதரப்பட்ட தரப்புக்களுடனும் பேச்சுவார்த்தையில் ஈடுபட்டுள்ளார். அந்த வகையில் இழப்புக்களை சந்தித்துள்ள கிழக்கு மாகாண முஸ்லிம் சிவில் சமூகத்தோடும் பேசவேண்டும். 13 வது திருத்த சட்ட மூலமாக இருந்தாலும் எந்த தீர்வாக இருந்தாலும் முஸ்லிம் சமூகத்துக்கும் ஏற்றதான தீர்வாக முன்வைக்க வேண்டும் என மேலும் தெரிவித்தார்.– Vidivelli