ஏ.ஆர்.ஏ.பரீல்
கடந்த சில மாதங்களாக உள்ளூராட்சி மன்றத்தேர்தலை நடாத்தும்படி பாராளுமன்றத்திலும், மக்கள் மத்தியிலும் கோஷங்கள் எழுப்பப்பட்டு வந்தன. நாடு தழுவிய ரீதியில், உள்ளூராட்சி மன்றத் தேர்தலை நடத்தாமல் அரசாங்கம் மெளனமாக இருந்த வேளையில் ஆர்ப்பாட்டங்கள் முன்னெடுக்கப்பட்டு வந்தன. தேர்தல்கள் ஆணைக்குழுவின் அப்போதைய தலைவர் தேர்தல் உரிய காலத்தில் நடத்தப்படவேண்டும் என்ற நிலைப்பாட்டில் உறுதியாக இருந்தார். ஆனால் அனைத்தும் கானல் நீராகிப்போயின.
பிற்போடப்பட்டுள்ள உள்ளூராட்சி மன்றத்தேர்தலை உடனடியாக நடாத்த வேண்டும் என்று எதிர்க்கட்சியினர் போர்க்கொடி ஏந்தினாலும் இந்தக் கோஷங்களை முறியடித்து தேர்தலை நடத்தாமல் இருப்பதற்கு அரசாங்கம் காய்நகர்த்தி வருகிறது. அத்தோடு ஜனாதிபதி ரணில் விக்கிரமசிங்க தனக்குள்ள நிறைவேற்று அதிகாரத்தையும் பாராளுமன்றில் உள்ள பெரும்பான்மையையும் பயன்படுத்தி அரசுக்கெதிரான ஆர்ப்பாட்டங்களையும், எதிர்ப்புகளையும் முறியடிப்பதில் ஈடுபட்டுள்ளார். அவர் மேற்கொண்டுவரும் நடவடிக்கைகள் இதனை உறுதி செய்கின்றன. உள்ளூராட்சி மன்றத்தேர்தலை நடத்தும் விடயத்தில் அரசாங்கம் ஜனநாயக நடைமுறைகளைப் பின்தள்ளியுள்ளது. மக்களின் ஜனநாயக உரிமையைப் பறித்தெடுத்துள்ளது.
இந்நிலையில் உள்ளூராட்சி மன்றத் தேர்தலை நடத்தாமலே இருப்பதற்கு அரசாங்கம் காய்நகர்த்தி வருகிறது. உள்ளூராட்சி மன்றத் தேர்தலை இன்றைய சூழ்நிலையில் நடாத்தினால் அரசாங்கம் படுதோல்வியைக் கவ்விக் கொள்ளும் என்பதை ஜனாதிபதி புரிந்து வைத்துள்ளார் என்பது வெளிப்படையாகத் தெரிகிறது.
உள்ளூராட்சி மன்றங்களின் பதவிக்காலம் நிறைவுக்கு வந்ததனையடுத்து அவை கலைக்கப்பட்டன. இவ்வாறான சூழ்நிலையில் கலைக்கப்பட்டுள்ள உள்ளூராட்சி சபைகளுக்கு மீண்டும் உயிர்கொடுத்து அதற்குப் பொறுப்பான அமைச்சர் விரும்பும் கால எல்லைவரை அதிகாரத்தை வழங்குவதே அரசாங்கத்தின் சூட்சுமமான முயற்சியாகும். பதவி காலாவதியாகியுள்ள உள்ளூராட்சி மன்ற உறுப்பினர்களை மீண்டும் பதவியில் அமர்த்துவதே திட்டமாகும்.
பிரேரணையை பாராளுமன்றத்தில் பொதுஜன பெரமுன பாராளுமன்ற உறுப்பினர் ஜயந்த கெட்டகொடவே முன்வைத்துள்ளார். என்றாலும் இத்திட்டம் பொதுஜன பெரமுனவினதும் ஜனாதிபதியினதும் தேவை கருதியதாகும்.
தற்போதைய சூழ்நிலையில் பிற்போடப்பட்டுள்ள உள்ளூராட்சி மன்றத்தேர்தல் அண்மையில் ஒரு தினத்தில் நடத்தப்பட்டால் ஜனாதிபதி தலைமை தாங்கும் ஐக்கிய தேசியக்கட்சி மற்றும் பொதுஜன பெரமுன என்பன தோல்வியைத் தழுவும் என இவ்வருட ஆரம்பத்தில் நடாத்தப்பட்ட மக்களின் கருத்துக்கணிப்பின்படி தெளிவாகியுள்ளது.
கடந்த வருடம் அக்டோபர் மாதம் அரசாங்கம், உள்ளூராட்சி மன்றங்களின் உறுப்பினர்களின் எண்ணிக்கையை அரைவாசியாகக் குறைக்கப் போவதாக அறிவிப்புச் செய்து அதற்கான நடவடிக்கைகளை முன்னெடுத்தது. அச்சந்தர்ப்பத்தில் அரசாங்கம் தேர்தலை பிற்போடுவதற்கான சூழ்ச்சியே இது என எதிர்க்கட்சிகள் குற்றம் சுமத்தின. இதனையடுத்து தேர்தல் சட்டத்தில் திருத்தங்களைச் செய்வதற்கென நியமிக்கப்பட்டிருந்த பாராளுமன்ற தெரிவுக்குழு தனது அறிக்கையை ஐந்து மாதங்களுக்கு முன்பு சமர்ப்பித்திருந்த நிலையிலும் அரசாங்கம் இது தொடர்பில் மீண்டும் பாராளுமன்ற தெரிவுக்குழுவொன்றினை நியமிக்க முயற்சித்தது.
இதேவேளை ஓய்வுநிலை இராணுவ அதிகாரியொருவர் உள்ளூராட்சி மன்ற தேர்தலை நடத்த வேண்டாமென உத்தரவொன்றினைப் பிறப்பிக்கும்படி கோரி உயர்நீதிமன்றில் ரிட்மனுவொன்றினைத் தாக்கல் செய்தார்.
உள்ளூராட்சி மன்ற தேர்தல் அறிவிப்புச் செய்யப்பட்டிருந்த நிலையில் அதனை சவாலுக்குட்படுத்தும் விதத்திலான இரண்டு சட்ட மூலங்கள் பாராளுமன்றத்தில் முன்வைக்கப்பட்டன. இறுதியில் தேர்தலுக்காக ஒதுக்கப்பட்ட நிதியை தடுத்துவைத்திருக்க முடியாதென உயர்நீதிமன்றம் உத்தரவொன்றினைப் பிறப்பித்தது. நீதிமன்றின் உத்தரவு வழங்கப்பட்டிருந்த நிலையிலும் அந்நிதி விடுவிக்கப்படாததால் தேர்தல் காலவரையறையின்றி பின்தள்ளப்பட்டுள்ளது.
தனிநபர் பிரேரணைக்கு எதிராக
உயர் நீதிமன்றில் மனு தாக்கல்
கலைக்கப்பட்ட உள்ளூராட்சி மன்றங்களை மீண்டும் செயற்படுத்துவதற்கான அதிகாரத்தைப் பெற்றுக்கொள்வதற்கு பொதுஜன பெரமுனவின் பாராளுமன்ற உறுப்பினர் ஜயந்த கெட்டகொடவால் பாரா-ளுமன்றத்தில் சமர்ப்பிக்கப்பட்ட தனி நபர் பிரேரணைக்கு எதிராக உயர்நீதிமன்றத்தில் மனுதாக்கல் செய்யப்பட்டுள்ளது.
பெப்ரல் அமைப்பின் நிறைவேற்றுப் பணிப்பாளர் ரோஹன ஹெட்டியாராச்சி குறித்த மனுவை சமர்ப்பித்துள்ளதுடன் சட்டமா அதிபர் மனுவில் பிரதிவாதியாகக் குறிப்பிடப்பட்டுள்ளார்.
உள்ளூராட்சி சபை கட்டளைச் சட்டத்தில் திருத்தமொன்றினைச் சேர்க்கும் வகையில் பாராளுமன்ற உறுப்பினர் ஜயந்த கெட்டகொடவால் புதிய வரைபு ஜூலை மாதம் 5ஆம் திகதி பாராளுமன்றத்தில் சமர்ப்பிக்கப்பட்டுள்ளதாக மனுதாரர் குறிப்பிட்டுள்ளார்.
குறித்த சட்ட மூலத்தின் மூலம் கலைக்கப்பட்ட உள்ளூராட்சி மன்றங்களை மீள அழைக்கும் அதிகாரம் மற்றும் மீள அழைக்கப்பட்ட உள்ளூராட்சி மன்றங்களின் பதவிக்காலத்தை தீர்மானிக்கும் அதிகாரம் என்பன அமைச்சருக்கு வழங்கப்பட்டுள்ளது. உள்ளூராட்சி மன்றங்களுக்கு நான்கு வருடங்களுக்கு ஒருமுறை தேர்தல் இடம்பெறும் நிலையில் கலைக்கப்பட்ட உள்ளுராட்சி மன்றங்களை மீள அழைக்கும் அதிகாரத்தை அமைச்சருக்கு வழங்குவதானது மக்களின் வாக்குரிமையை மீறும் செயலெனவும் சுட்டிக்காட்டப்பட்டுள்ளது.
2-/3 பெரும்பான்மையுடன் சர்வஜன
வாக்கெடுப்பும் தேவை
கலைக்கப்பட்டுள்ள உள்ளூராட்சி சபைகளை மீண்டும் செயற்படுத்துவதற்கான அரசாங்க தரப்பில் கொண்டு வரப்படும் தனிநபர் பிரேரணை பாராளுமன்றத்தில் மூன்றில் இரண்டு பெரும்பான்மையுடன் நிறைவேற்ற வேண்டும் என்பதுடன் அதற்கான சர்வஜன வாக்கெடுப்பின் ஊடாக மக்களின் அனுமதியையும் பெற்றுக்கொள்ள வேண்டும் என்று சட்டமா அதிபரினால் அறிவிக்கப்பட்டுள்ளதாக எதிர்க்கட்சி பிரதம கொரடாவான பாராளுன்ற உறுப்பினர் லக்ஷ்மன் கிரியெல்ல தெரிவித்துள்ளார்.
அவர் மேலும் தெரிவித்துள்ளதாவது; உள்ளூராட்சி சபைகள் சட்டத்தில் திருத்தம் மேற்கொள்வதற்காக தனிநபர் பிரேரணையொன்று முன்வைக்கப்பட்டுள்ளது. இதனூடாக கலைக்கப்பட்டுள்ள உள்ளூராட்சி சபைகளை மீள செயற்படச் செய்யவே அரசாங்கம் முயற்சிக்கின்றது. ஆனால் அரசாங்கம் எதிர்பார்க்காத வகையில் இது சிக்கலுக்குள்ளாகியுள்ளது. அதாவது இதனை செயற்படுத்த பாராளுமன்றத்தில் மூன்றில் இரண்டு பெரும்பான்மையுடன் சர்வஜன வாக்கெடுப்பு அவசியமாகும் என்று சட்டமா அதிபரினால் கூறப்பட்டுள்ளது.
அரச தரப்பில் பெருமளவான உள்ளூராட்சி உறுப்பினர்களும் நிறுவனங்களும் உள்ளன. இதனாலேயே தந்திரமாக அரசாங்கம் இந்தச் சட்டத்தைத் திருத்துவதற்கு முயற்சிக்கிறது. எதிர்வரும் தேர்தலுக்கு இவர்கள் அவசியமானவர்களாவர். இதனாலேயே இவ்வாறான முயற்சி மேற்கொள்ளப்படுகிறது. இந்தச் சட்டத்தை செயற்படுத்தும்போது எதிர்க்கட்சி உறுப்பினர்களின்றி ஆளும் தரப்பினர் மாத்திரமே நியமிக்கப்பட போகின்றனர் என்ற தகவல்களும் பரவுகின்றன.
இந்நிலையில் சட்டமாஅதிபர் பாராளுமன்ற செயலாளருக்கு கடிதம் ஒன்றினை அனுப்பி இது தொடர்பில் மூன்றில் இரண்டு பெரும்பான்மையுடன் சர்வஜன வாக்கெடுப்பு நடத்தப்பட வேண்டும் என்று அறிவித்துள்ளார்.
தேர்தலை நடத்துவதற்குப் பணம் இல்லை என்று கூறிக்கொண்டு சர்வஜன வாக்கெடுப்பை நடத்தப்போகிறார்களா? இது தொடர்பில் அரசாங்கம் மக்களுக்கு தெளிவுபடுத்த வேண்டும் என்றார்.
ஜனாதிபதி மெளனம்
உள்ளூராட்சி மன்றத்தேர்தலை நடத்துவதற்கு எதிரான அரசாங்கத்தின் காய் நகர்த்தல்களுக்கு ஜனாதிபதி ரணில் விக்கிரமசிங்க இதுவரை காலம் வழிகாட்டியாக இருந்தார். மெளனம் காத்தார். இந்நிலையில் தற்போது சர்ச்சையினை உருவாக்கியிருக்கும் தனிநபர் பிரேரணை குறித்து ஜனாதிபதி இதுவரை எவ்வித பிரதிபலிப்பையும் வெளியிடவில்லை.
உள்ளூராட்சி மன்றத் தேர்தலை தற்போதைக்கு நடத்துவதற்-கு ஒத்துழைக்கக்கூடாது என்பதில் உறுதியான நிலைப்பாட்டினை ஜனாதிபதி கொண்டிருக்கிறார். இந்நிலையில் கலைக்கப்பட்டுள்ள உள்ளூராட்சி மன்றங்களுக்கு மீண்டும் உயிர்கொடுக்க முன்னெடுத்துள்ள முயற்சிகளுக்கு அவர் ஆதரவு வழங்குவாரா? என்பது சந்தேகமே. ஏனென்றால் 340 உள்ளூராட்சி சபைகளில் 330 சபைகள் பொதுஜன பெரமுனவின் கட்டுப்பாட்டிலே இருந்தன. மீண்டும் சபைகளை உயிர்ப்பித்தால் அது பொதுஜன பெரமுனவுக்கே சாதகமாக அமையும்.
பொதுஜன பெரமுனவின் நலன்கருதியே தனிநபர் பிரேரணை முன்வைக்கப்பட்டுள்ளது. தேர்தலுக்கு முகங்கொடுக்காது பீதியில் இருக்கும் அரசு மீண்டும் பதவியைக் கைப்பற்றிக்கொள்வதற்கு இவ்வாறான யூகங்களைக் கையாளுகிறது.- Vidivelli