பலஸ்தீன மக்களுடன் ஒட்டுமொத்த இலங்கையர்கள் ஒன்றுபட்டு நிற்பார்கள்
எதிர்க்கட்சித் தலைவர் சஜித் பிரேமதாச
எம்.ஆர்.எம்.வசீம், இ.ஹஷான்
கொடூரமான, கொலைகார, காட்டுமிராண்டித்தனமான தாக்குதல்களுக்கு உள்ளாகும் பாலஸ்தீன மக்களுடன் ஒட்டுமொத்த இலங்கை மக்களும் ஒன்றுபட்டு நிற்பார்கள் என்பதை இந்த உயர்ந்த சபையில் மிகத் தெளிவாக அறிவித்துக் கொள்கின்றோம். இந்தக் கொடூரமான கொலைக் கலாச்சாரத்தை நிறுத்தி, பேச்சுவார்த்தை மேசைக்கு வந்து சகோதரத்துவத்துடனும், நல்லிணக்கத்துடனும், ஒற்றுமையுடனும் இப்பிரச்சினையை தீர்க்க இஸ்ரேலை கேட்டுக்கொள்கிறோம் என எதிர்க்கட்சித் தலைவர் சஜித் பிரேமதாஸ தெரிவித்தார்.
அவர் மேலும் உரையைாற்றுகையில், பாலஸ்தீன மக்களுக்கும் இஸ்ரேல் மக்களுக்கும் சரியான முடிவுகளை சர்வதேச சமூகத்தின் தலைவர்கள் என்று அழைக்கப்படுபவர்கள் எடுக்கும் வரை நாங்கள் பார்த்துக் கொண்டிருக்கின்றோம்.
எந்த விலை கொடுத்தாவது பெற்றுக் கொள்ளும் அமைதி மற்றும் பாலஸ்தீன மக்களின் படுகொலைகள் உடனடியாக நிறுத்தப்படுவதை உறுதிசெய்து, இஸ்ரேலும் பாலஸ்தீனும் ஒன்றுக்கொன்று இணக்கமாகச் செயல்படுவதை உறுதிசெய்யும் அமைதி எமக்குத் தேவை. நாங்கள் அமைதியை விரும்புகிறோம் என்பதுடன் பாலஸ்தீனியர்களுக்கு அவர்களின் உரிமைகளை வழங்கவும் வேண்டும். அவர்களின் தேசியம், அரச நிருவாகம் அவர்களுக்கு வழங்கப்பட வேண்டும் என்றார்.- Vidivelli