(ஏ.ஆர்.ஏ.பரீல், எம்.எப்.அய்னா)
பயங்கரவாதத் தடுப்பு சட்டத்தின் கீழ் தடை செய்யப்பட்டுள்ள முஸ்லிம் அமைப்புக்களில், 5 அமைப்புக்களின் தடையை முற்றாக நீக்க அரசாங்கம் தீர்மானித்துள்ளது.
ஐந்து நிபந்தனைகளை மையப்படுத்தி இந்த தடையினை நீக்க அரசாங்கம் தீர்மானித்துள்ள நிலையில், அது குறித்த வர்த்தமானி அறிவித்தல் நாளை வெள்ளிக் கிழமை வெளியிடப்படவுள்ளதாக அறிய முடிகின்றது. இதற்கான ஏற்பாடுகளை பாதுகாப்பு அமைச்சு முன்னெடுத்துள்ளது.
அதன்படி, தெளஹீத் அமைப்புக்களாக அறியப்படும், ஐக்கிய தௌஹீத் ஜமாஅத் (யூ.டி.ஜே.), சிலோன் தௌஹீத் ஜமாஅத் (சி.டி.ஜே.), ஸ்ரீலங்கா தௌஹீத் ஜமாஅத் (எஸ்.எல்.டி.ஜே.), அகில இலங்கை தௌஹீத் ஜமாஅத் (ஏ.சி.டி.ஜே.), ஜம்மியதுல் அன்ஸாரி சுன்னதுல் மொஹமதியா (ஜே.ஏ.எஸ்.எம்.) ஆகியவற்றின் மீதான தடைகளை தளர்த்தவே தீர்மானிக்கப்பட்டுள்ளதாக அறிய முடிகின்றது.
தடைகளை நீக்க முடிவெடுக்க முன்னர், இதுவரை உயிர்த்த ஞாயிறு தாக்குதல் விவகாரத்தில் முன்னெடுக்கப்பட்ட விசாரணைகளின் சாராம்சம், சட்ட மா அதிபரின் ஆலோசனை உள்ளிட்டவற்றை பாதுகாப்பு அமைச்சு பெற்றுக்கொன்டுள்ளது. அத்துடன் ஜனாதிபதி ரணில் விக்ரமசிங்கவை சந்தித்த முஸ்லிம் சமூக பிரதிநிதிகளின் கோரிக்கையும் தடை நீக்கத்தில் தாக்கம் செலுத்தியுள்ளதாக அறிய முடிகின்றது. எவ்வாறாயினும் விடிவெள்ளிக்கு கிடைத்த தகவல்கள் பிரகாரம், தடையினை தளர்த்த பாதுகாப்பு அமைச்சு முன் வைத்துள்ள 5 நிபந்தனைகளும் வருமாறு :
1. அமைப்புக்கு நிதி திரட்டல், செலவு செய்தல் தொடர்பில் வெளிப்படைத் தன்மை பேணப்படுகின்றது என்பதை உறுதி செய்ய வருடாந்தம், பாதுகாப்பு அமைச்சுக்கு அறிக்கை சமர்ப்பித்தல். பாதுகாப்பு அமைச்சு அது தொடர்பில் ஏதும் ஆலோசனைகள் வழங்கினால் அதனை பின்பற்றுதல்
2. அமைப்புக்கள் முன்னெடுத்து செல்லும் கல்வி நிலையங்கள் தொடர்பில் முஸ்லிம் சமய கலாசார திணைக்களத்துக்கு அறிவித்தல். கல்வி அமைச்சு அவ்வப்போது பிறப்பிக்கும் உத்தரவுகளுக்கு அமைய அவற்றை முன்னெடுத்து செல்லல்
3. வெளிநாட்டிலிருந்து நிதியினை பெற்றுக்கொள்ளும் போது, மத்திய வங்கி அங்கீகரித்துள்ள முறைமைகளின் கீழ் பெற்றுக்கொள்ளல்
4. அமைப்பின் உறுப்பினர்கள் தேசிய பாதுகாப்புக்கு அல்லது பொது அமைதிக்கு பங்கம் விளைவிக்கும் நடவடிக்கைகளில் ஈடுபடுவதை தவிர்க்க தேவையான நடவடிக்கைகளை எடுத்தல். உறுப்பினர்களின் நடவடிக்கைகள் தொடர்பில் பொறுப்புடன் நடந்துகொள்ளல்
5. உயிர்த்த ஞாயிறு தின தாக்குதல்கள் தொடர்பில் கைது செய்யப்பட்டு விளக்கமறியலில் வைக்கப்பட்டுள்ள நபர்களுக்கு புனர்வாழ்வளிக்கவும், இஸ்லாமிய தேசம் தொடர்பில் சமூக வலைத் தளங்களில் முன்னெடுக்கப்படும் பிரச்சாரங்களை முறியடிக்க எதிர் பிரச்சாரங்களை முன்கொண்டு செல்லவும் அரசாங்கத்துக்கு ஒத்துழைப்பு வழங்குதல்
குறித்த நிபந்தனைகளுக்கு மேலதிகமாக, குறித்த முஸ்லிம் அமைப்புக்கள் தடைகளை எதிர்த்து உயர் நீதிமன்றில் தாக்கல் செய்துள்ள அடிப்படை உரிமை மீறல் மனுக்களை, தடை நீக்க வர்த்தமானி அறிவித்தல் வெளியிடப்பட்ட பின்னர் வாபஸ் பெற வேண்டும் என்பதும் முஸ்லிம் அமைப்புக்களுடன் பாதுகாப்பு அமைச்சின் அதிகாரிகள் (உளவுத் துறை அதிகாரிகள்) முன்னெடுத்த கலந்துரையாடல்களின் போது நிபந்தனையாக முன் வைக்கப்பட்டதாக அறிய முடிகின்றது.
இவ்வாறான நிலையில், நிபந்தனைகளுக்கு, தடையை நீக்கக் கோரிய 5 முஸ்லிம் அமைப்புக்கள் இணக்கம் தெரிவித்துள்ள நிலையில், நாளை வெள்ளியன்று வர்த்தமானி வெளியிடப்பட்டு தடை நீக்கம் அறிவிக்கப்படவுள்ளதாக தெரிகிறது. இது தொடர்பில் குறித்த அமைப்புக்களுக்கு அறிவிக்கப்பட்டுள்ளதாகவும் வெள்ளியன்று வர்த்தமானி அறிவித்தல் வெளிவராவிட்டால் திங்கட் கிழமை அது வெளியிடப்படும் என பாதுகாப்பு அமைச்சின் அதிகாரிகள் தெளஹீத் ஜமாஅத் அமைப்புக்களின் பிரதிநிதிகளுக்கு அறிவித்துள்ளனர்.- Vidivelli