எம்.வை.எம்.சியாம்
“மன்னம்பிட்டி கொட்டலிய பாலத்தை அண்மிக்கும்போது இரவு 7.45 மணியிருக்கும். பஸ் மிக வேகமாக சென்று கொண்டிருந்தது. பாலத்துக்கு அருகே வேகக் கட்டுப்பாட்டு தடங்களில் டயர்கள் பட்டதுமே பஸ் கட்டுப்பாட்டை இழந்து பாலத்தையும் உடைத்துக்கொண்டு ஆற்றுக்குள் விழுந்தது. அதுதான் எமது வாழ்க்கையின் கடைசி நிமிடங்கள் என நினைத்தேன்” என மன்னம்பிட்டியில் 11 உயிர்களைப் பலியெடுத்த பஸ் விபத்தில் உயிர்தப்பிய முர்ஷித் அஹமட் தெரிவித்தார்.
கதுருவெலவிலிருந்து ஒலுவில் நோக்கிச் சென்ற தென்கிழக்கு பல்கலைக்கழக இஸ்லாமிய கற்கைகள் மற்றும் அரபு மொழி பீட மாணவனான முர்ஷித் அஹமட் தனது அந்த ‘திக் திக்’ அனுபவங்களை விடிவெள்ளியுடன் பகிர்ந்துகொண்டார்.
அன்று இரவு என்ன நடந்தது?
“நான் கண்டியிலிருந்து கதுருவெலவிற்கு வந்து, குறித்த பஸ்ஸில் ஏறினேன். என்னுடன் கண்டியிலிருந்து வந்தவர்களும், கொழும்பிலிருந்து வந்த மற்றுமொரு பஸ்ஸில் வந்தவர்களுமே குறித்த பஸ்ஸில் ஏறினார்கள். 7.20 மணி அளவில் பஸ் தரிப்பிடத்தில் இருந்து பயணத்தை ஆரம்பித்து பின் பஸ் இடைநடுவே 10 நிமிடங்கள் கதுருவெல தனியார் பஸ் தரப்பிடமொன்றில் நிறுத்தப்பட்டு 7.30க்கு கல்முனை நோக்கி பயணத்தை ஆரம்பித்தது.
பயணத்தை ஆரம்பித்தது முதல் வேகமாக சென்ற பஸ் சுமார் 7.45 மணியளவில் மன்னம்பிட்டி கொட்டலிய பாலத்தை அண்மித்த சந்தர்ப்பத்தில் வேகத்தை குறைக்காமல் அதே வேகத்திலேயே பாலத்தினுள் நுழைந்தது. முன்னால் இருந்த ஸ்பீட் ப்ரேக்கரை கவனிக்காமல் அதில் வேகமாக பஸ்ஸை செலுத்தியமையால் தீடீர் என தூக்கப்பட்ட பஸ் டயர்கள் இழுத்துச் செல்லப்பட்டு சாரதியினால் பஸ்ஸை கட்டுப்படுத்த முடியாமல் பாலத்தின் கம்பிகளை உடைத்து கொண்டு கீழே வீழந்தது.
மலையொன்றின் மேலிருந்து கீழே வீழ்வது போன்றுதான் இருந்தது. பஸ்ஸினுள் இருந்த அனைவரும் கூக்குரலிட்டனர். வீழ்ந்த உடனே பஸ்ஸுக்குள் நீர் உட்புகுவதை அவதானித்த பின்னரே நாங்கள் ஆற்றுக்குள் வீழ்ந்துள்ளோம் என்று விளங்கியது. அதுதான் வாழ்க்கையின் கடைசி நிமிடங்கள் என எண்ணிக் கொண்டோம். அதிகளவிலான நீரையும் குடித்துவிட்டேன். பின்னர்தான் ஒருவாறு சுதாகரித்துக் கொண்டு திறந்திருந்த ஜன்னல் வழியாக நான் மேலே வந்தேன். அந்த சந்தர்ப்பத்தில் இருட்டாக இருந்தது.
காலில் இருந்த ஒரு பாதணியுடனேயே ஆற்றைவிட்டும் வெளியேறி வீதிக்கு ஏறி வந்து எம்மை காப்பாற்றுமாறு உதவி கோரினேன்” என தான் உயிர் தப்பிய கணங்களை முர்ஷித் அஹமட் எம் கண்முன்னே கொண்டு வந்தார்.
விபத்து நடந்த மறுகணமே அவ்வழியால் பயணித்த பொது மக்களும் அருகில் இருந்த பிரதேசவாசிகளும் தம் உயிரையும் துச்சம் என மதித்து ஆற்றுக்குள் குதித்து உயிருக்கு போராடிக் கொண்டிருந்தவர்களை மீட்கும் பணியில் ஈடுபட்டனர். பொலிஸ் மற்றும் இராணுவத்தினரும் சம்பவ இடத்துக்கு விரைந்து உயிர்களை காப்பாற்றும் போராட்டத்தில் ஈடுபட்டனர். இவ்வாறு உடனடியாக பொது மக்களும் படையினரும் மீட்புப் பணியில் ஈடுபட்டிராவிடின் பலியானவர்களின் எண்ணிக்கை மேலும் உயர்ந்திருக்கும் என சம்பவத்தை நேரில் கண்டவர்கள் தெரிவிக்கின்றனர்.
சுமார் 3 மணித்தியாலங்களுக்கும் அதிகமாக மேற்கொள்ளப்பட்ட மீட்பு பணிகளுக்கு பின்னர் 10 பேர் உயிரிழந்த நிலையில் சடலங்களாக மீட்கப்பட்டனர். 42 பேர் காயங்களுடன் பொலன்னறுவை மற்றும் மன்னம்பிட்டிய வைத்தியசாலைகளில் அனுமதிக்கப்பட்டனர். மறுநாள் சிகிச்சை பலனின்றி ஒருவர் உயிரிழந்தார்.
11 பேர் உயிரிழப்பு
இச் சம்பவத்தில் மொத்தமாக 11 பேர் உயிரிழந்துள்ளதாக வைத்தியசாலை தகவல்கள் உறுதிப்படுத்தின. ஆரம்பத்தில் 12 பேர் உயிரிழந்ததாக தகவல்கள் வெளிவந்த போதிலும் இறுதியான கணக்கெடுப்புகளின்படி 11 பேரே மரணித்துள்ளதாக பொலன்னறுவை வைத்தியசாலை நிர்வாகம் உறுதிப்படுத்தியுள்ளது.
இதில் சிங்கள சமூகத்தைச் சேர்ந்த 4 பேரும் முஸ்லிம் சமூகத்தைச் சேர்ந்த 7 பேருமாக 11 பேர் உயிரிழந்துள்ளனர்.
ஏறாவூரைச் சேர்ந்த ஒரு பெண் உட்பட மூன்று பேரும், ஓட்டமாவடியைச் சேர்ந்த ஒரு பெண் உட்பட மூன்று பேரும் ஒலுவில் பிரதேசத்தைச் சேர்ந்த ஒரு ஆணும், பொலனறுவையைச் சேர்ந்த ஒரு ஆணும், அலவ்வ, ஆனமடுவ, மற்றும் ஹலாவத்த ஆகிய பிரதேசங்களைச் சேர்ந்த தலா ஒருவருமாக 11 பேர் இதில் இதுவரை உயிரிழந்துள்ளனர்.
இந்த கோரவிபத்தில் கிழக்கு பல்கலைக்கழக்கத்தின் தொழிநுட்ப பீடத்தின் 3 ஆம் ஆண்டு மாணவர்களான புத்தளம், ஆனமடுவ பிரதேசத்தைச் சேர்ந்த 23 வயதுடைய தமித் சாகர மற்றும் தும்மலசூரிய பிரதேசத்தைச் சேர்ந்த 23 வயதுடைய சாமித தில்ஷான் எனும் மாணவர்கள் உயிரிழந்துள்ளதுடன், 18 வயதுடைய செவனப்பிட்டிய பிரதேசத்தைச் சேர்ந்த டில்சான் சஞ்சீவ எனும் இளைஞரும் உயிரிழந்திருந்தார்.
மேலும் கொழும்பிலிருந்து ஒலுவில் நோக்கி பயணித்த 29 வயதுடைய ரபியுத்தின் முஹம்மதும் சம்பவத்தின் போது உயிரிழந்துள்ளார். இவர் மூன்றரை மாத குழந்தையின் தந்தையாவார்.
அதேபோன்று ஏறாவூரைச் சேர்ந்த மூன்று பேரும் இச் சம்பவத்தில் உயிரிழந்தனர். இவர்களது ஜனாஸாக்கள் கடந்த திங்கட்கிழமை நள்ளிரவு ஏறாவூர் நூறுஸ்ஸலாம் பள்ளிவாயல் மையவாடியில் நல்லடக்கம் செய்யப்பட்டன. ஏறாவூர் அரபா வித்தியாலயத்துக்கு அருகில் வசித்து வந்த மஃரூப் என்பவரும், ஏறாவூர் ஆலையடி வீதியில் வசித்த வந்த முனாஸ் என்பவரும், 3 பிள்ளைகளின் தாயான கபீலா வீவி என்பவருமே இவ் விபத்தில் உயிரிழந்த ஏறாவூரைச் சேர்ந்தவர்களாவர்.
அதேபோன்று ஓட்டமாவடி பிரதேசத்தைச் சேர்ந்த மூவரும் இவ்விபத்தில் உயிரிழந்தனர். இவர்களது ஜனாஸாக்கள் பொது அமைப்புகளின் ஏற்பாட்டில் ஓட்டாமவடி நாவலடி கேணி நகர் அக்பர் ஜும்ஆ மையவாடியில் நேற்றுமுன்தினம் நல்லடக்கம் செய்யப்பட்டன. இவர்கள் ஓட்டமாவடி, கதுருவெல போன்ற பகுதிகளில் யாசகத்தில் ஈடுபட்டு வருபவர்கள் எனத் தெரிய வருகிறது.
விபத்தின் போது அலவ்வ, சிலாபம், பொலன்னறுவை பிரதேசங்களைச் சேர்ந்தவர்களும் உயிரிழந்துள்ளனர். காயமடைந்தவர்களில் இதுவரையில் 25 பேர் வைத்தியசாலையை விட்டு வெளியேறியுள்ளனர். ஜனாஸாக்களை விரைவாக விடுவிக்கும் பணியில் முன்னாள் பாராளுமன்ற உறுப்பினர் அலி சாஹிர் மெளலானா உள்ளிட்ட குழுவினர் ஈடுபட்டனர்.
விபத்தை ஏற்படுத்திய பஸ்
தொடர்பான குற்றச்சாட்டுக்கள்
சச்சின் எனும் பெயரைக்கொண்ட குறித்த தனியார் பஸ் பல வருடங்களாக போக்குவரத்து சேவையில் ஈடுபட்டு வருகிறது. இந்த பஸ் அதிக வேகம், எதிர்த்திசையில் வரும் வாகனங்களுக்கு அச்சுறுத்தல் விடுக்கும் வகையில் பயணித்தல், முன்னால் செல்லும் வாகனங்களை பொருட்படுத்தாமல் முந்திச்செல்வது என ஒழுங்குவிதிகளை மீறியே தினமும் பயணத்தை மேற்கொள்வதாக பயணிகள் குற்றம்சாட்டுகின்றனர்.
விபத்துக்குள்ளான இதே தனியார் பஸ் வண்டியின் முறைகேடுகள் குறித்து கடந்த 2020 மார்ச் 6 ஆம் திகதி பயணி ஒருவர் அதிருப்தி தெரிவித்து தனது பேஸ்புக் பக்கத்தில் வெளியிட்ட பதிவானது தற்போது இணையத்தில் அதிகம் பேசுபொருளாகியுள்ளது.
அப்பதிவில் “ இந்த பஸ் விரைவில் மக்களின் உயிரைப் பறிக்கப் போகிறது. பல தடவைகள் பார்த்துவிட்டேன். அதிக வேகம். எதிர் திசையில் வாகனம் வந்தாலும் இடம் கொடுக்காமல் முந்திச் செல்ல முற்படுகிறது. பஸ் உரிமையாளரே, உங்கள் சாரதியையும் நடத்துனரையும் மக்களுக்கு ஆபத்து வராதபடி நடந்து கொள்ளச் சொல்லுங்கள்’’ என அப்பதிவில் குறிப்பிட்டிருந்தார். அவர் எதிர்வுகூறியபடியே அனைத்தும் நடந்து முடிந்துள்ளது.
சாரதிக்கு விளக்கமறியல்
விபத்துக்குக் காரணமான பஸ்ஸின் சாரதி உயிர்தப்பியுள்ள நிலையில் அவர் கைது செய்யப்பட்டு நீதிமன்றில் ஆஜர்படுத்தப்பட்டு எதிர்வரும் 24 ஆம் திகதி வரையில் விளக்கமறியலில் வைக்கப்பட்டுள்ளார். சந்தேக நபர் மட்டக்களப்பு, சந்திவெளி பிரதேசத்தைச் சேர்ந்த நடராஜா விமல்ராஜ் என்பவராவார்.
இதே சாரதி ஏற்கனவே ஆபத்தான முறையில் வாகனத்தைச் செலுத்திய குற்றச்சாட்டில் அபராதம் விதிக்கப்பட்டவர் என பொலிசார் தெரிவிக்கின்றனர். எவ்வாறாயினும், விபத்து இடம்பெற்ற போது சாரதி மதுபோதையில் இருக்கவில்லை எனவும் அவர் வேறு ஏதேனும் போதைப்பொருளை பயன்படுத்தியுள்ளாரா என்பது குறித்து விசாரணைகள் இடம்பெற்று வருவதாகவும் பொலிஸ் ஊடகப் பேச்சாளர் தெரிவித்தார்.
அமைச்சர், ஆளுநர் கூறுவது என்ன?
குறித்த தனியார் பஸ் நிறுவனத்துக்கு தேசிய போக்குவரத்து ஆணைக்குழுவின் அனுமதிப்பத்திரம் வழங்கப்படவில்லை எனவும் மாகாண அதிகார சபையினால் ஏதேனும் அனுமதிப்பத்திரம் வழங்கப்பட்டுள்ளதா என்பது தொடர்பில் ஆராயப்பட்டு வருவதாக ஆணைக்குழுவின் தலைவர் சஷி வெல்கம தெரிவித்தார்.
இதேவேளை, விபத்து தொடர்பில் அறிக்கை சமர்ப்பிக்குமாறு போக்குவரத்து துறையினருக்கு கிழக்கு மாகாண ஆளுநர் செந்தில் தொண்டமான் பணிப்புரை விடுத்துள்ளார். அத்துடன் காயமடைந்த தரப்பினருக்கு போதிய மருத்துவ வசதிகளை பெற்றுக்கொடுக்குமாறும் ஆலோசனை வழங்கியுள்ளார்.
இதேவேளை நாட்டின் கடன் மறுசீரமைப்பு இடம்பெறும் வரை பாலங்களை மீள புனரமைக்க முடியாது என போக்குவரத்து பெருந்தெருக்கள் அமைச்சர் பந்துல குணவர்தன தெரிவித்துள்ளார். “பாரிய வீதிகள் அமைக்கப்பட்டுள்ள போதிலும் வீதிகளுக்கு பொருந்தாத பாலங்கள் அமைக்கப்பட்டுள்ளன. பாலத்தில் பிரச்சினையில்லை. பஸ் சாரதியே விபத்துக் காரணம். எனினும் பாலத்தை விஸ்தரிப்பதற்கான செயற்பாடுகள் முன்னெடுக்கப்படவுள்ளன. பாலத்தை புனரமைக்க 300 மில்லியன் தேவைப்படுவதாக மதிப்பிடப்பட்டுள்ளது. இருப்பினும் கடன் மறுசீரமைப்பு இடம்பெறும் வரை இவ்வாறான விபத்துகள் இடம்பெற்றாலும் பாலங்களை புனரமைக்க முடியாது” என்றும் அமைச்சர் குறிப்பிட்டுள்ளார்.
அவலத்திற்கு முற்றுப்புள்ளி
வைக்கப்படுமா?
நாட்டில் விபத்துச் சம்பவங்கள் தொடர்ந்த வண்ணமேயுள்ளன. மன்னம்பிட்டியில் குறித்த விபத்து நடந்த அதே தினம் நாட்டில் மொத்தமாக 18 பேர் விபத்துக்களில் மரணித்துள்ளனர். அன்றைய தினம் அம்பன்பொல மற்றும் புசல்லாவ ஆகிய பகுதிகளில் இடம்பெற்ற விபத்துகளில் இருவர் மரணித்துள்ளனர். மட்டக்களப்பு, தன்னாமுனை பிரதேசத்தில் இடம்பெற்ற விபத்தில் ஒன்றரை வயது சிறுமி ஒருவர் மரணித்துள்ளார்.
அதேபோன்று மன்னம்பிட்டி, கொட்டலிய பாலத்தில் இடம்பெற்ற விபத்து இதுவே முதல் தடவையுமல்ல. இதே இடத்தில் கடந்த 2011 ஆம் ஆண்டு வேன் ஒன்று விபத்துக்குள்ளாகி ஆற்றில் வீழ்ந்ததில் மருதமுனை பிரதேசத்தைச் சேர்ந்த ஒரே குடும்பத்தைச் சேர்ந்த ஆறு பேர் உயிரிழந்தமை குறிப்பிடத்தக்கது.
இவ்வாறான விபத்துக்களுக்கு காரணமாகும் சாரதிகளுக்கு எதிராக கடுமையான சட்டங்களை நடைமுறைப்படுத்துவதுடன் பாதுகாப்பற்ற வீதிகள் மற்றும் பாலங்களை புனரமைக்க அரசாங்கம் நடவடிக்கை எடுக்க வேண்டும். இன்றேல் இவ்வாறு தினம் தினம் அப்பாவி உயிர்கள் அநியாயமாக பறிக்கப்படுவதை தடுக்க முடியாது போய்விடும்.– Vidivelli