அலி சப்ரி ரஹீமுக்கு எதிராக ஏன் சட்டத்தை நிலைநாட்ட முடியாதுள்ளது
எதிர்க்கட்சித் தலைவர் சஜித் சபையில் கேள்வி
(எம்.ஆர்.எம்.வசீம், இ.ஹஷான்)
அண்மையில் விமான நிலையத்தில் சட்டவிரோதமான முறையில் தங்கம் மற்றும் பொருட்களுடன் பிடிபட்ட பாராளுமன்ற உறுப்பினர் அலி சப்ரி ரஹீமுக்கு ஏன் சட்டம் உரிய முறையில் பிரயோகிக்கப்படவில்லை என எதிர்க்கட்சித் தலைவர் சஜித் பிரேமதாச நேற்று பாராளுமன்றத்தில் கேள்வி எழுப்பினார்.
பாராளுமன்றத்தில் நேற்றுமுன்தினம் விசேட கூற்றொன்றை முன்வைத்து குறிப்பிடுகையிலேயே இவ்வாறு குறிப்பிட்டார்.
இது தொடர்பாக அவர் தொடர்ந்து தெரிவிக்கையில்,
அனைத்து பாராளுமன்ற உறுப்பினர்களும் பாராளுமன்ற உறுப்பினர்களுக்கான நடத்தை விதிகளை பின்பற்றுவதற்கு கடமைப்பட்டுள்ளனர். இது தொடர்பில் பல சரத்துக்கள் உள்ள போதிலும் அண்மையில் விமான நிலையத்தில் சட்டவிரோதமான முறையில் தங்கம் மற்றும் பொருட்களுடன் பிடிபட்ட பாராளுமன்ற உறுப்பினர் அலி சப்ரி ரஹீமுக்கு ஏன் சட்டம் உரிய முறையில் பிரயோகிக்கப்படாமல் இருக்கிறது என கேட்கிறேன்.
அத்துடன் 4.611 கிலோ தங்கத்தை (80 மில்லியன் பெறுமதி) கொண்டு வந்த நபருக்கு 70 மில்லியன் ரூபா அபராதம் விதிக்கப்பட்டிருக்கிறது, அதனை செலுத்த முடியாமல் அவர் விளக்கமறியலில் வைக்கப்பட்டிருக்கிறார். ஆனால் 7 கோடி பெறுமதியான தங்கம் மற்றும் கையடக்கத் தொலைபேசிகளைக் கொண்டு வந்த போது பிடிபட்ட இந்த பாராளுமன்ற உறுப்பினருக்கு 7.5 மில்லியன் அபராதம் விதிக்கப்பட்டிருக்கிறது. இது எந்தளவு நியாயம் என கேட்கிறேன்.
பாராளுமன்ற உறுப்பினர்கள் அனைவரையும் அவமானப்படுத்தும் வகையில் மேற்கொள்ளப்பட்ட இந்த செயலை வன்மையாகக் கண்டிக்கிறோம். அவர் பாராளுமன்ற உறுப்பினர் பதவியை இராஜினாமா செய்ய வேண்டும் என கேட்டுக்கொள்கிறோம்.
நாட்டின் குடிமகனுக்கு ஒரு கவனிப்பும், பாராளுமன்ற உறுப்பினருக்கு மற்றொரு கவனிப்பும் நடைமுறைப்படுத்துவதா முறை மாற்றம் என கேட்கிறேன். அதனால் இதற்குப் பின்னால் இருக்கும் மறைமுக சக்தி யாது? என கேட்கிறோம்., இது தொடர்பில் கடும் நடவடிக்கை எடுக்குமாறு கேட்டுக்கொள்கிறோம் என்றார்.-Vidivelli