நீதிமன்றினை அவமதித்த குற்றச்சாட்டின் கீழ் சிறைத்தண்டனை அனுபவித்து வரும் பொதுபலசேனா அமைப்பின் செயலாளர் கலகொட அத்தே ஞானசார தேரருக்கு மன்னிப்பு வழங்கி விடுதலை பெற்றுக்கொடுக்குமாறு ஜனாதிபதி மைத்திரிபால சிறிசேனவிடம் கோரிக்கையொன்றினை முன்வைக்கும்படி பொதுபலசேனா அமைப்பு உட்பட பௌத்த குருமார் அமைப்புகள் சில, அஸ்கிரிய மற்றும் மல்வத்து பீட மகாநாயக்க தேரர்களிடம் வேண்டுகோள் விடுத்துள்ளன. அஸ்கிரிய மற்றும் மல்வத்து பீடாதிபதிகளைச் சந்தித்து நேற்று முன்தினம் இக்கோரிக்கை முன்வைக்கப்பட்டது. சிங்கள ராவய அமைப்பின் பொதுச் செயலாளர் மாகல்கந்தே சுதத்த தேரர், போரே ஸ்ரீ மகா விகாரை அதிபதி கொத்மலே தம்மகித்தி தேரர் என்போர் தலைமையிலான பௌத்த குருமார் குழுவினரும் பல்கலைக்கழக பேராசிரியர்களும் இச்சந்திப்பில் கலந்து கொண்டனர்.
அஸ்கிரிய மகாநாயக்க வரகாகொட ஸ்ரீ ஞானரதன தேரர் மற்றும் மல்வத்து மகாநாயக்க திப்பட்டுவாவே ஸ்ரீ சித்தார்த்த சுமங்கல தேரர் ஆகியோரைச் சந்தித்து ஞானசார தேரருக்கு ஜனாதிபதியின் பொது மன்னிப்பு பெற்றுக்கொடுப்பதில் ஒத்துழைக்குமாறு வேண்டிக் கொண்டனர். அது தொடர்பாக மகஜர் ஒன்றினையும் கையளித்தனர்.
சந்திப்பின் போது சிங்கள ராவய அமைப்பின் பொதுச் செயலாளர் மாகல்கந்தே சுதத்த தேரர் மகாநாயக்க தேரர்களுக்கு விளக்கமளிக்கையில் அரசியல் கைதியாக சிறைத்தண்டனை அனுபவித்து வரும் ஞானசார தேரருக்கு பொது மன்னிப்பளித்து விடுதலை செய்யுமாறு ஜனாதிபதியிடம் பல தடவைகள் எழுத்து மூலமும் நேரிலும் கோரிக்கை விடுத்திருக்கிறோம். அது தொடர்பாக தங்களது ஒத்துழைப்பைக் கோரியே இங்கு வந்துள்ளோம்.
அநீதியான முறையில் எங்களது தேரர்கள் சிறைத்தண்டனை அனுபவித்து வருகிறார்கள். இவ்வாறான நிலைமைகள் பௌத்த தேரர்களுக்கு ஏற்படாவண்ணம் ஜனாதிபதி செயற்படுவார் என நம்புகிறோம். நாங்கள் ஜனாதிபதியுடனே இருக்கிறோம். அவரைத் தனிமைப்படுத்தி விடவில்லை.
பிரதீப் எக்னெலிகொட தற்போது டுபாய் நாட்டில் இருப்பதாக தெரிவிக்கப்படுகிறது. எக்னெலிகொட காணாமற் போனமை தொடர்பில் இராணுவ வீரர்கள் சிறைப்படுத்தப்பட்டார்கள். ஞானசார தேரரும் அவ்வாறே சிறை வைக்கப்பட்டுள்ளார். சர்வதேச பொலிஸாரின் உதவியுடன் உடனடியாக எக்னெலிகொட கைது செய்யப்பட்டு இலங்கைக்கு கொண்டுவரப்பட்டு அது தொடர்பான பிரச்சினைகளுக்கு தீர்வு காணுவதற்கு ஜனாதிபதி முன்வரவேண்டும் என்று தெரிவித்தார்.
-Vidivelli