புத்தளம் மாவட்ட பாராளுமன்ற உறுப்பினர் அலி சப்ரி ரஹீம் டுபாயிலிருந்து சட்டவிரோதமான முறையில் இலங்கைக்கு பெருந் தொகை தங்கத்தைக் கொண்டு வந்த நிலையில் கைது செய்யப்பட்ட விவகாரம் சமூகத்திற்கு பெரும் தலைகுனிவை ஏற்படுத்தியிருக்கிறது.
அவருக்கு வாக்களித்து பாராளுமன்றம் அனுப்பிய புத்தளம் மாவட்ட மக்கள் மாத்திரமன்றி முழு இலங்கை முஸ்லிம்களும் இந்த சம்பவத்தினால் மிகுந்த விசனமடைந்துள்ளனர். அதுமாத்திரமன்றி பாராளுமன்றத்தின் கெளரவத்திற்கும் மதிப்பிற்கும் இழுக்கை ஏற்படுத்திய சம்பவமாகவும் இது பார்க்கப்படுகிறது.
பாராளுமன்ற உறுப்பினராக தனக்குள்ள விசேட சலுகைகளைப் பயன்படுத்தி பிரமுகர்களுக்கான விமான நிலைய சிறப்பு முனையத்தினூடாக இந்தக் கடத்தல் முன்னெடுக்கப்பட்டுள்ளது. 1978 ஆம் ஆண்டிற்குப் பின்னர் பாராளுமன்ற உறுப்பினர் ஒருவர் இவ்வாறு குறித்த வழியூடாக கடத்தலில் ஈடுபட்ட முதல் சம்பவம் இதுவாகும்.
புத்தளம் மக்கள் நீண்ட காலமாக தமக்கென குரல் கொடுக்கவும் சேவையாற்றவும் பாராளுமன்ற உறுப்பினர் ஒருவர் இல்லையே என்ற ஆதங்கத்தில் கடந்த பாராளுமன்றத் தேர்தலில் வகுக்கப்பட்ட வியூகத்தின் ஊடாக இவரை தெரிவு செய்து சபைக்கு அனுப்பினர். எனினும் பாராளுமன்றத்துக்கு அனுப்பிய மிகக் குறைந்த காலப் பகுதிக்குள்ளேயே ஏன் இவரைத் தெரிவு செய்தோம் என மக்கள் சிந்திக்கும் வகையிலேயே இவரது செயற்பாடுகள் அமைந்திருந்தன. குறிப்பாக 20 ஆம் திருத்தத்திற்கு ஆதரவாக வாக்களித்து கோத்தாபய ராஜபக்ச தலைமையிலான ஆட்சிக்கு முட்டுக் கொடுத்ததுடன் கொவிட் காலத்தில் முஸ்லிம்களின் ஜனாஸாக்கள் எரிக்கப்பட்ட போது அதனை கை கட்டி வேடிக்கை பார்த்த வரலாற்றுத் துரோகத்திற்கும் துணைபோனார். அது மாத்திரமன்றி புத்தளம் மாவட்ட மக்கள் எதிர்நோக்கும் பிரச்சினைகளுக்கு உரிய தீர்வைப் பெற்றுக் கொடுக்கக் கூடிய ஆளுமையை அவர் கொண்டிருந்ததாகத் தெரியவில்லை.
இப் பின்னணியில்தான் இப்போது அவர் இவ்வாறானதொரு சட்டவிரோத செயலில் ஈடுபட்டு கைது செய்யப்பட்ட நிலையில் 7.5 மில்லியன் ரூபா அபராதம் செலுத்தி வெளியில் வந்துள்ளார். அது மாத்திரமன்றி நேற்றைய தினம் பாராளுமன்றத்தில் இடம்பெற்ற பொதுப் பயன்பாடுகள் ஆணைக்குழுவின் தலைவருக்கு எதிரான வாக்கெடுப்பில் பங்கேற்று வாக்களித்துள்ளார். இதன்போது அரசாங்கத்துக்கு எதிராக இவர் வாக்களித்த போதிலும் தான் கைது செய்யப்பட்ட போது தன்னைக் காப்பாற்ற ஜனாதிபதியும் பிரதமரும் தலையிடவில்லை என்பதாலேயே இவ்வாறு எதிர்த்து வாக்களித்ததாக நேற்று பாராளுமன்றத்தில் வைத்து செய்தியாளர்களிடம் குறிப்பிட்டுள்ளார். ஆக தான் முன்னெடுத்த தங்கம் மற்றும் கையடக்கத் தொலைபேசி கடத்தலுக்கு ஜனாதிபதியும் பிரதமரும் ஒத்துழைப்பு வழங்கவில்லை என்பதாலேயே அரசாங்கத்திற்கு எதிராக வாக்களித்துள்ளார். கடந்த காலங்களில் மக்களின் அபிலாசைகளைப் புறந்தள்ளி முஸ்லிம் சமூகத்திற்கு எதிராக செயற்பட்ட கோத்தாபய தலைமையிலான இனவாத அரசுக்குத் துணைபோன அலி சப்ரி ரஹீம் இன்று தனக்கு உதவவில்லை என்பதற்காக அரசாங்கத்தை எதிர்க்கத் துணிந்துள்ளார். இது அவர் மக்களின் நலனுக்காகவன்றி, தனது சுயநலத்துக்காகவும் தனது வியாபார நலனுக்காகவுமே அரசியலுக்கு வந்து இந்தப் பதவியைப் பயன்படுத்துகிறார் என்பதைத் தெளிவுபடுத்துகிறது. அந்த வகையில் இவருக்கு எதிர்வரும் தேர்தல்களில் தகுந்த பாடம் கற்பிக்க வேண்டியது புத்தளம் மாவட்ட வாக்காளர்களின் கடமையாகும்.
தமக்குரிய விசேட சலுகைகளைப் பயன்படுத்தி இவ்வாறான சட்டவிரோத செயற்பாடுகளில் அரசியல்வாதிகள் ஈடுபடுவது ஒன்றும் புதிய விடயமல்ல. இவ்வாறான அதிகார துஷ்பிரயோகங்களில் மேலும் பல பாராளுமன்ற உறுப்பினர்களும் ஈடுபட்டு வருகிறார்கள் என்பதை சுங்கத் துறையினர் நன்கறிவார்கள். அந்த வகையில் இவ்வாறான கடத்தல்களுக்கு முற்றுப் புள்ளி வைக்கும் வகையில் சட்டம் இறுக்கமாக்கப்பட வேண்டும். மேலும் பாராளுமன்ற உறுப்பினர்களுக்கு வழங்கப்படும் சலுகைகள் மட்டுப்படுத்தப்பட வேண்டும். அவர்களும் சாதாரண மக்கள் போன்று சகல விதமான சோதனைகள் மற்றும் கெடுபிடிகளுக்கு உட்படுத்தப்பட வேண்டும். அரசியல்வாதிகளுக்கு இந்நாட்டில் வழங்கப்படும் கூடுதல் சலுகைகள் அனைத்தும் வாபஸ் பெறப்பட வேண்டும். இதற்கான அழுத்தங்கள் சகல தரப்பிலிருந்தும் வழங்கப்பட வேண்டும் என வலியுறுத்த விரும்புகிறோம்.- Vidivelli